Read Ninia Yali 2 SAMUEL 9 Bible Online

2 SAMUEL 9 - Ninia Yali bible

2 SAMUEL 9

¹ Nukoho misig salim de at Daud en hein-og-esauk kwit de, “At hun Saul ambiangma on etmano en enoluk wereg on misig de eke wereg a? Ne, wereg halug de at Yonatan fahet unuk waroho an den ap ai fam fano on debemin anggere,” ulug hein-og-esebag.

²Airoho ebag ma re at Saul eyog indip kwe etmano en de enamingming angge misig unuk de Ziba ai welatfag. At ai welatfag ma at hweag-utuk kwit de, “Hat de hun Raja Daud anyo akit olohotma inaik lakin,” ulug hweag-etfag ma at anyo lebag duruk men de at raja anyo en hein-og-hauk kwit de, “Hat de Ziba anyo a?” ulug ebag ma, aren uruk kwit de, “Yuo, nakni hun log,” ulug ebag.

³ Airoho ebagdeg ai en at raja anyo en hein-og-hauk kwit de, “At Saul anyo ahain elekwe on de misig eke enoluk wereg a, eleg a? An den Allah fam, Airoho duhuk, ulug abug hweag-itihik hagdoho an den ap ai fam fano ale debehuk nenda anggere,” ulug hweag-etfag. Airoho hweag-etfag ma at Ziba en uruk kwit de, “Hun Yonatan anyo amloho neg eke misig wereg, ne ebere eyog holureg,” ulug hweag-etfag.

⁴Airoho hweag-etfag ma at raja en uruk kwit de, “At ebe kema wereg?” ulug ebag ma, at Ziba anyo en uruk kwit de, “O Lodebar hun Amiel amloho Makhir anyo obam wereg,” ulug hweag-etfag.

⁵Airoho ebag ma re at raja en de at Yonatan amloho ai wol-dik lakiek ulug ap mon-enepfag.

⁶Hun Yonatan amloho ai unuk de Mefiboset, ne at wol-dik lebag ma watfagdeg de aren Daud alukwema elenggen dimi-debelug dang-debag. Ne, at Daud en dangdoho wauk kwit de, “Mefiboset,” ebag ma aren uruk kwit de, “Wui nakni hun log,” ulug ebag.

⁷Airoho ebag ma at Daud en uruk kwit de, “An den de hat hakni Yonatan unukdoho re hat hobam nenda sako ale dimin anggere hakol duk fug. Kwenang hat homba Saul en on omano re hat fam nikangge og-huruhuk,” ulug hweag-etfag.

⁸Airoho hweag-etfag ma re at Mefiboset anyo en elenggen dimi-debelug ele uruk kwit de, “An hamingming angge sure nangginig on deg lahimu! Nunggwelug nakni hun log haren an nobam henda sako fam duruk kahen?” ulug ebag.

⁹Airoho ebag ma ai en at raja en hun Saul amingming angge Ziba anyo wol debagdeg hweag-utuk kwit de, “At Saul en di angge su angge folug waratsi angge mel, ne at ahain elekwe en folug waratswa angge mel de, hat howe omba su og-itmin.

¹⁰Hat mel, hat homaliki mel, hat let-hapuk on mel, en de kwenang ai yabuk at henowe Saul ahain elekwe on fahet wutuk kamuhup. Ne, wiri folug de anggen yihig de it anggolo angge fahet duruk kamagdoho re it og-esauk kamuk. Famen de at Mefiboset neg de yoho hului en mundoho-mundoho aire an nebe welahimu olma etmano nauk karuhu,” ulug hweag-etfag. (Ziba aire omaliki ap on enebe 15 en ne amingming angge enebe 20 en deg latfag.)

¹¹Airoho ebag ma at Ziba en raja [23] fam uruk kwit de, “Di ale su ale nakni hun log haren diyug ulug wene melaloho hweag-nerehen on aire an hamingming angge en duruk karuhuk,” ulug hweag-etfag. Aireg ma at Mefiboset de at Daud onggwareg omaliki on hag deg lit de siburu e at raja inim misig doaleg on fam nauk katfag.

¹²Mefiboset amloho ap on unuk de Mikha welatfag. Ne, at Ziba anyo ahain elekwe on mundoho re at Mefiboset amingming angge atfag.

¹³At Mefiboset eyog birenet holu deg latfag on anyo re o Yerusalem wereg lit at raja obam olma siburu nauk katfag.