Read Ninia Yali 1 RAJA-RAJA 1 Bible Online

1 RAJA-RAJA 1 - Ninia Yali bible

1 RAJA-RAJA 1

¹At Raja Daud ebe mundoho sobal atfag ma selimut il ambum on fam saloho foruk katfag famen de, ebe mun holdoho neg welatfag.

²Ai fam de at autsi pegawai omano en hweag-utuk kwit de, “Nenowe, niren hwele duhum eke nenowe hat hinim wereg lit hwal hapuk on fahet eke herarul. At airoho wereg lit de hat hebe ahanhanapdoho re-haluluk kwe nohoruk karuhu,” ulug ebag.

³Ai ebagdeg hwele duhum ebe on ap homi it Israel on wereg kwe enesahali kwe etmano heraril lebag. Heraril lebagman de hwele duhum o Sunem on ebe il aluli mun buhun on unuk de Abisag ai hweahabagdeg walug watfag. Walug watfagdeg raja akit walug watfag ma, Daud ebe foroho wereg lit hwalduk katfag. Famen de at Daud en hwele ai inim seberebag fug.

⁴

⁵ Daud amloho Absalom anyo mundoho waratfag ma re aut on Adonia anyo ap owe on atfag. At isinga re unuk Hagit ai. Ne, Adonia ebere mun buhun omalik welatfag. Aren siag duruk kweleg ohore akni en bet-duruk katfag fug. Mu re at Adonia en onggwareg fahet raja welatmin bebagdeg, kereta weim yapuk on humdoho kabog dobahat deheg, autsi wam kuda fam lahalug dog yapuk kamuhup on ulug lohwaloho feseheg, at onggwareg hopdoho wereg lit il baloho lauk kamuhup on ulug ap enebe 50 en fouk debeseheg, debag.

⁶

⁷Airoho debebagdeg de aren hun Yoab, isinga re hwe unuk Zeruya anyo mel Imam Abyatar mel inim wene balik lebag. Balik lebag ma re at Yoab mel Imam Abyatar mel en de wene aire higit anggere niren let-heahuk ulug ebag.

⁸Famen de Imam Zadok mel, Benaya hun Yoyada amloho anyo mel, Nabi Natan mel, Simei mel, Rei mel, ne at Raja Daud autsi alulukmu on mel de at Adonia ibil atfag fug.

⁹Nukoho misig salim de at Adonia en de owam domba mel sapi yohombuk on mel, omalik sei on mel Allah obahet waroho re helep unuk Kisu Helep fam, ik En-Rogel eleruk horogma etma waroho yal-itmin ulug de, Raja Daud omaliki fomane mel, Daud autsi pegawai Daud obam olma welatfag on it enunggul unuk Yehuda on omano mel enayonggo fesebag ma lebag.

¹⁰Famen de at Adonia aut Salomo mel, Nabi Natan mel, Penaya mel, Raja Daud autsi at ebe along baloho foroho latfag on mel neg de enayonggo fesebag fug.

¹¹ Airoho debag ma Nabi Natan anyo hwe Batsyeba Salomo isinga anyo akit watfagdeg hweag-utuk kwit de: “Nisinga. Hwe Hagit amloho Adonia anyo en de Raja Daud apelegdoho wereg kweleg de, onggwareg en an raja welatmin uruk ulug ehesa etma re hat de hesanggo holehendeg welahen a?

¹²Hat hebe mel hamloho Salomo mel fanoroho welamuhup en de hun Raja Daud hweag-itmihin en hweag-hirik. Haren diroho hweag-umuk: Haren de an nobalmangge hat hamloho Salomo raja welamag ulug unduhuk fohuk ulug hombuk baloho wene hweag-nitihin anyo famen de ketia at Adonia anyo raja inaha etma re nunggwelug no? ulug hweag-umuk,” ulug hweag-etfag.

¹³

¹⁴Airoho hweag-etfagdeg eke nim uruk kwit de, “Hat de ketia Raja Daud akit kulug wene matuk kweleg eta an fobik henekit kwik watlug wene haren imihin on etma demdoho eheik boukwag ulug de an den oho hweag-itmin neg,” ulug hweag-etfag.

¹⁵Ai ebag ma at Batsyeba anyo Raja Daud de o ambe baleg eke at ebe nohoruk katfag ma etmano wereg ma kwebag. Eta li em de Daud ebe mundoho yoman atfag ma re hwele duhum on Abisag obam Sunem on anyo hwalduk kwit wereg ma kwebag.

¹⁶Airoho kwebagdeg hwe Batsyeba en de Daud alukwema elenggen dimirebelug dang-debag ma, Daud en uruk kwit de, “Hat de nunggwangge hendan hweag-nerehen?” ulug hein og-hebag.

¹⁷Hein og-hebag ma at Batsyeba en onggo hweag-utuk kwit de, “Nowe, haren de an hweag-nutuk kwit de, Hamloho Salomo re an nobalma raja welaruhu en unduhuk fohuk ulug, hakni TUHAN Allah unuk hombuk baloho hweag-nitihin boruk kahi.

¹⁸Famen de hat hapelegdoho wereg kweleg de Adonia anyo raja mundoho inaha etma re nunggwelug no.

¹⁹Airoho ahareg de wam domba mel sapi yohombuk on mel sapi omalik sei on mel humdoho weheikdeg Allah obahet feheikdeg de pesta esetmin ulug de ap hat homaliki mel, hun Imam Abyatar mel, hat hautsi tentara enowe Panglima Yoab anyo mel, de enayonggo feseheik famen de hamloho Salomo re ayonggo feheik fug.

²⁰Nowe, ap homi Israel on mundoho en de, nenowe raja en at obalmangge ap sa hag on raja welaruhu ulug hweag-uruhu ulug, haren nunggwe imisi ulug hele holoho wereg.

²¹Famen de, haren ap ai hag on neg de raja welam alereg ulug folo-folo uk fugmen hebe warahen ha man de, an mel hamloho Salomo mel ap siag duruk on fam debeseruk hagdoho nenobahakup,” ulug hweag-etfag.

²²At Batsyeba en Daud fam airoho hweag-utuk mu re, Nabi Natan anyo Daud ebe wereg ma etma aik lebag.

²³Aik lebag ma re, ap homi en de, Natan wahareg wereg ulug Daud hweag-etfag ma, at Batsyeba wilibik watfag ma, Natan kwik lebagdeg de, raja alukwema elenggen dimirebelug dang-debag.

²⁴Airoho dang-debelug wene hweag-utuk kwit de, “Nowe hebe kain on. Haren de Adonia an nobalma raja unduhuk fohukmu ap homi hwal-enepuk karuhu ulug wene unduhuk ferihin no a?

²⁵O ketia eiya fam de at owam domba mel sapi yohombuk on mel, sapi sei on mel, Allah obahet feheik deg soni dimin ulug ap hat homaliki mundoho mel, hautsi tentara enowesi og-eneplug noruk on mel, hun Imam Abyatar mel, enayonggo feseheik deg soni esetuk kwit de: Nenowe Raja Adonia welamag ulug enele amitmit humdoho sup uruk etma.

²⁶Famen de an nim Imam Zadok nim, Benaya nim, hamloho Salomo nim neg de neneyonggo fehesa fug.

²⁷Haren de, an nobalmangge raja amag ulug nit hautsi hweag-nesa fug angge airoho dukwag ulug hweag-erehenma duruk a?” ulug hweag-etfag.

²⁸Ai ebag ma Daud en uruk kwit de, “Batsyeba wol-din,” ulug ai ebag ma, Natan ebe wilibik waharuk kweleg de Batsyeba raja wereg ma kwebag.

²⁹Ma re at raja en uruk kwit de, “An den nit ap homi Israel on nenakni TUHAN Allah anyo unuk hombuk baloho wene wat-hutuk kwit de, hamloho Salomo raja unduhuk fohukmu ap homi melal-enepuk karuhu ulug aire demdoho hweag-hitihik. Anggere ketia eiyan nakni TUHAN oluk mundoho wereg on en an siagdoho wereg ma del napuk on anyo unuk hombuk baloho wene wathitmin on aire dik-demdoho dipdoho neg duhu,” ulug hweag-etfag.

³⁰

³¹Ai ebag ma at hwe Batsyeba anyo elenggen dimirebelug dang duruk kwit de, mel ebag: “Nowe Daud raja mundoho welaruhun,” ulug ebag.

³²Ai ebag ma Daud en de, “Imam Zadok mel Nabi Natan mel Benaya mel, wol-esakin,” ulug hweag-etfag ma re wol-enepfag ma watfag.

³³Watfag ma re it fam uruk kwit de, “An nautsi yain-kain mundoho wol-esalug de it inim seberoho namloho Salomo akit lakiek. Lalug de at ebe an nangge keledai ambol owag fam lahalug lauk kahi on anyo fam lahabe folug de, ik Gihon elerukmu etma walug lakiyug.

³⁴Lalug de Imam Zadok nim Nabi Natan nim en de unggulmu ahalue hilili folug de ap homi Israel on enobahet raja unduhuk foukwag. Airoho debelug mundoho inatuk halug de, hiren bohweap trompet ele fururuk kwit de henele amit-mit sup uruk kwit de, diroho iyug: Nenakni Raja Salomo neg welamag ulug iyug.

³⁵Ai ulug de at ebe an nobalma ap homi Israel on mel, Yehuda on mel enobahet raja welamag ulug an nebe en eneko fehi ai anggere an den takhta hwerieg welahimu etano welamag ulug de at ebe atam waharuk kweleg de hit ombolim manu,” ulug hweag-esebag.

³⁶Airoho hweag-esebag ma re at Benaya en de, “Nakni, Mun fano. Wene haren ehen on aire hakni TUHAN Allah en ohore demdoho amag ukwag.

³⁷Nenakni TUHAN en hat hinim welatsi hag at Salomo fam oho airoho hwalduk kamag. Ne, hat raja wereg lit melal-enepukmu re habog dorangge hag lauk famen de at neg de unduhuk fohunmu melal-enepuk kwit wereg ma re abog humdoho saha uruk kamag,” ulug ebag.

³⁸Ai ebagdeg ap Imam Zadok mel, Nabi Natan mel, Benaya mel, ne Daud ebe onggwareg fahet hwalduk katfag on mel en de Salomo ebe wam keledai Daud en on anyo fam lahabe folug de, at ebe atam lauk kweleg de it ombolim lebagdeg ik Gihon elerukmu etma lebag.

³⁹Lebagdeg de at Zadok en de e zaitun ahalue o TUHAN Obam Saboman walug lebag angge anyo webagdeg Salomo unggulmu hililoho raja welamag ulug unduhuk febag. Airoho unduhuk foruk kwit de, bohweap ele fu hebag ma re ap etma kabog-debag on etmano enebe abirangge en de enele amit-mit supdoho re, enele uruk kwit de, “Nenakni raja re Salomo neg welamag,” ulug ebag.

⁴⁰Ai ebagdeg at Salomo ebe atam waharuk kweleg de it enebe mundoho at ombolim fobik waharuk kwit de enele amit-mit sup uruk kwit de binggong nunuk seruling ai fu-ril waharuk kwit suni fam yungguldil watfag. Airoho anggiluk siagdoho dil waharukmu re kwenang aplohok uruk kwit de halet la ale atfag.

⁴¹Airoho waharukmu at Adonia mel, ap enayonggo fesebag on etmano mundoho mel de pesta mundoho nebagdeg duruk men de enele anggilukdoho dil waharuk ale enesanggo holfag. At Yoab en de bohweap trompet ele urukmu esanggo holfagdeg ele uruk kwit de, “O kota ma etma re nangginoho aha ma enele anggilukdoho uruk no,” ulug ka baleg ale ebag.

⁴²Airoho uruk kwit owan ka bal ale uruk men de etano li em neg Imam Abyatar amloho Yonatan anyo lebag ma at Adonia en de “Kwik ma, hat hebe fano ai hag de wene walug wahen on ai ohorefano wene walug wahen lamag,” ulug hweag-etfag.

⁴³Airoho hweag-etfag ma aren uruk kwit de, “Nowe e, wene re siag on walug wahi. Raja Daud en de Salomo anyo raja welamag ulug unduhuk feheikma wahi.

⁴⁴Ap Imam Zadok mel Nabi Natan mel Benaya mel hun raja ebe hwalduk on mel en de Salomo keledai Daud en on anyo ambolowag fam lahabe fehesareg de at dam lauk kweleg de it ombolim lowag ulug hweag-esasimu lausa.

⁴⁵Lausareg de it Zadok nim Natan nim en de ik Gihon elerukmu etman de Salomo raja unduhuk welamag ulug unggulmu ahalue hililoho unduhuk fousa. Unduhuk fousama re yoho enambol sombandoho o kota waharuk kwit enele amit-mit supdoho mun anggilukdoho waharukmu, o kota ma di kwe su kwe mundoho enele amit-mitdoho waharuk ale re henesanggo holehep ai, Nowe.

⁴⁶Aireg ma re Salomo re ketia mundoho raja inaha.

⁴⁷Ne, it ap Daud autsi perwira omano en ohore Daud akit mundoho lahesareg dang dehesareg de iren uruk kwit de: Hat raja unduhuk wereg lit melal-enepukmu re habug dorangge neg lauk katsi famen de hakni Allah en Salomo unduhuk feheik on ai raja wereg lit melal-enepukmu re abug humdoho holduk kamag ulug hweag-erehesama re Daud ebe re at nohorukmu etmano en elenggen dimirebelug Allah mot-deheik.

⁴⁸Aren airoho mot-duruk kwit de somban diroho eheik, “Nakni TUHAN Allah nit ap homi Israel on en mot-hapuk kahe on nakni. Ketia an namloho eke an nobalmangge raja welamag ulug unduhuk fehen ai nakni. Unduhuk fehenma re an nebe nil oluk wereg lit hihi ai en de mot-hapuk kahi, nakni,” ulug ebag.”

⁴⁹Ai ebag ma re at Adonia en ap enayonggo fesebag on etmano mundoho en enesanggo holfagdeg de enakol humon atlug enebe inatlug enobam domog buhulfag.

⁵⁰Airoho debag ma at Adonia en de Salomo fahet akol atfagdeg de buroho re o TUHAN Obam Sabo salegma etmano aik lebagdeg de aren de mezbah [1] ambiang kwe etmano seneg lit welatfag.

⁵¹Airoho wereg ma ap homi en inil hebagdeg de at Raja Salomo hweag-irik lebag. At hweag-utuk kwit de, “Adonia re hat hebe fahet mundoho akol hum aha ma re mezbah wirigmu etmano lahareg ambiang nganog deg on etmano eke seneg lit de mel uruk: At Salomo en lahe an hweag-nutuk kwit, an den hat howatmin fug ulug Allah unuk hombuk baloho hweag-nutuk eleg halug de an la fug angge suma welatmin uruk,” ulug hweag-etfag.

⁵²Ai ebag ma at Salomo en de, “Aren fano ale disi halug de an den unggum dorangge ulug oho eke obam fohuk fug. Famen de aren siag disi halug neg de ebe waruk alereg,” ulug hweag-esebag.

⁵³Ai ebagdeg ap eke miming enepuk kwit de Adonia ebe mezbah wereg ma etmano en wag lowag ulug hweag-esebag ma, lebagdeg walug watfag ma, Raja Salomo wereg ma watfagdeg olohotma elenggen dimirebelug dang-debag ma, at Salomo en de, “Hat hobam lakin,” ulug hweag-etfag.