Read Ninia Yali 1 RAJA-RAJA 10 Bible Online

1 RAJA-RAJA 10 - Ninia Yali bible

1 RAJA-RAJA 10

¹ Ap homi en de at Salomo ebe unuk bogdeg ale fahet di obam su obam mundoho holduk ulug ebag ma re hwe enesinga ratu obam Syeba on ai en esanggo holfagdeg de wene onggo uk fug alereg on etmano Salomo abut baloho hein wamin ulug o Yerusalem watfag.

²At ebe airoho waharuk kwit de ap homi enebe esan humdoho inim unta ambolowag fam de di angge su angge amben angge mel, helep permata mel, emas humdoho mel, lahaplug walug watfag. Airoho walug Salomo akit watfagdeg de wene at obam hein wamin ulug watfag on etmano mundoho hein webag.

³Hein webag famen de wene at Salomo fam hein webag on etma aren eke enda nong-hong ebag fug, we abirangge onggo higitdoho neg hweag-etfag.

⁴Airoho hweag-etfag ma re hwe enesinga ratu anyo en de Salomo enda mundoho wenggeleg neg deg ale anyo il hebagdeg de at Salomo obam ebe wereg ma fanoroho witfag on mel,

⁵at obam etma autsi pegawai en yabuk duruk katfag ale mel, enesum wandeg on orohole misig ale on neg wandeg ale mel, it enobam wirig ale mel, ik siburu nowag ulug fouk deberuk ale mel, soni esetuk kwit it yabuk duruk on omano en yohwan enepuk ale mel, at Salomo en wam di angge su angge TUHAN Obam wirigmu anyo og-utuk katfag ale mel, il hebag. Hebagdeg de obam fog ebag ma re yande fouk debag.

⁶Airoho debagdeg Raja Salomo fam uruk kwit de, “An nebe nobam etma wereg ma re ap homi en de Salomo ebe re direg, enda mun wenggeleg neg deg ahun, ulug urukmu habug holduk kahi alere demdoho neg!

⁷An den endam habug airoho holduk kwit de, demdoho uruk fug ulug boruk katihik famen de, an nebe wahireg nil en fik-furoho hihireg de demdoho ulug furebehi. Ne, ai an den habug holduk katihik on etma re we fomane neg famen de nin alongdoho nim hihi. Hat nakni henda wenggeleg neg deg lahen ale mel, hangge di angge su angge humdoho wereg ale fahet mel de amureg famen de an den habug holduk katihik on etma re we dorangge neg holduk katihik.

⁸Hat hohwesi en enendaman de eiyale boruk kamag. Ne, hautsi pegawai hundig-hundig yabuk duruk kwit nakni haren henda wenggeleg neg fam hele hweag-esauk kahen on enesanggo holduk ale etma fahet enendaman enawonog hauk kamag.

⁹Hat hakni TUHAN en it ap homi Israel on enobahet raja welamag ulug unduhuk hobahasi on ai en de it enunggul unuk Israel on enda hundig enusug wereg lit, hat nakni hobam oho enda ahayeg borukmu re hat hebe it Israel on enobahet raja wereg lit unggum higitdoho enobam feheg, katukdoho kong deheg, duruk kamag ulug unduhuk hobahasi on TUHAN Allah ai neg motdeg motdeg welamag” ulug hweag-etfag.

¹⁰At hwe ratu obam Syeba on anyo en de airoho ebagdeg de di angge su angge emas de 4.000 kilogram en mel, helep permata on humdoho mel, di angge su angge amben angge mel, og-etfag. Di angge su angge hwe ratu obam Syeba on en mun hum-hamdoho Salomo og-irik watfag on etma hag de fobik it eke on en airoho og-irik waharuk katfag fug. (

¹¹Ne, Raja Hiram en de kapal aren on fam de emas o Ofir en walug waharuk kwit de, permata humdoho mel, e fano on unuk cendana mel, oho Salomo og-irik watfag neg.

¹²Airoho og-irik watfag ma re at Salomo en de e anyo on fam de TUHAN Obam anyo mel, onggwareg obam mel, enggik sene foruk angge fahet mel hilinggeheg, ap homi binggong duruk ale enoluk on fahet binggong unuk kecapi hilinggeheg, ne suni uruk on fahet de gambus mel buhun deheg, debag. E ai on de ap homi Israel on wereg ma etma walug waharuk katfag famen de e etma nim higitdeg latfag fug. Ne, e fano on etma nim higit on oho eke fobik inil hebag fug.)

¹³Di angge su angge at Salomo en onggo enahayegdoho ulug og-esauk katfag hag de, at hwe ratu o Syeba on anyo ohore, aren diroho og-nitmihin ulug heng ebag aleroho og-etfag. Og-etfag ma re at hwe ratu anyo mel, ap homi inim watfag on omano mel, enambol somban enobam lebag.

¹⁴Raja Salomo re tahun hundig-hundig fam ap homi en emas 23.000 kilogram am aleroho deg kweleg og-irik waharukmu hwelauk katfag.

¹⁵Ne, eta wauk katfag on de it onggo wauk enap en mel, di angge su angge onggo baldul ulug walug lauk kwit onggo folug lauk katfag on mel, Arab raja en foruk on mel, ne it Israel on fam gubernur wereg on en foruk on mel et wenako re fug.

¹⁶Salomo en dog mapnu angge re ebe humon de 200 en angge emas sahaloho wireheg, ne ebe domog perisai [11] misig fahet de emas 7 kilogram en fam buhun-debag.

¹⁷Ne, dog mapnu doron de 300 en angge ebe domog fahet de emas 2 kilogram en fam hagdoho buhun-debag. Airoho hilinggebagdeg de dog mapnu etma re abirangge o wirig on unuk de: “Ambe Libanon Ohwei”[12] ulug unuk soalfag ma etma febag.

¹⁸Airoho debelug aren at ebe raja wereg lit hwerieg wereg ma fahet de wam humon unuk gajah ai aeg fam labuli febagdeg de emas ebe on fam de sapliroho wiri febag.

¹⁹Huratuk angge aire enggik hilinggi febagdeg de foma-foma re singa ahut hilinggoho febag. Huratuk angge ai ambol fil de sapi unggul ilit debebag. Huratuk angge ai fam laharukmu yal bela re folfalik en debebag.

²⁰Yal eta ambiang foma-foma re singa ahut ilit debebag ma re abirangge re nesanggo en welatfag. O di o su o raja wereg lit melal-enepuk katfag kwe etman de airoho eke witfag fug famen we at Salomo en neg witfag ai.

²¹Ap homi at Salomo welatfag li em etare perak fahet de onggo maben hag boruk katfag ma re, ikwag at Salomo ahaik nauk katfag on mundoho mel, o wirig unuk de “Ambe Libanon Ohwei” ulug soalfag ma wirig on ilonggo elekwe etma duruk katfag angge mel de emas ebe on fam neg hilinggebag.

²²Salomo en on kapal humon de hun Raja Hiram en on mel seberoho walug lauk katfag on de humdoho welatfag. Kapal etma re tahun henahan debelug misiham neg de emas mel perak mel, gajah aeg mel, bak hag kera mel, suwe unuk merak mel, walug olma waharuk katfag.

²³Raja Salomo re angge di on su on mun humdoho wereg ma enda mel mun wenggeleg neg deg ahun welatfag ai hag, o kwenangma ap raja at nim higit on eke inim higitdeg fug.

²⁴Ap homi kwenangma di obam su obam welatfag on mundoho re Salomo akni Allah en enda wenggeleg neg deg on debebag ma, di ale su ale fahet de wenggeloho neg hweag-esaukmu enesanggo holukoho waharuk katfag.

²⁵It airoho waharuk kwit enebe domog en de di angge su angge perak mel emas mel sum wan-duruk on mel, sehen mel, di on su on amben angge mel, kuda mel, keledai hwe on mel, we Salomo og-irik waharuk katfag. Tahun eke fam, eke fam airoho neg og-irik waharuk katfag.

²⁶ At Salomo en de kereta weim yapuk on de 1.400 en kabog-debeheg, ne ap kuda fam lauk kwit weim yapuk on de ap enebe 12.000 en og-enebeheg, debag. Airoho debagdeg it fomane re o Yerusalem welamag ulug feseheg, it foma enebe alongdoho re o kota dag-dag etma welamag ulug feseil laheg, debag.

²⁷ At Salomo en ap homi Israel on melal-enepuk wereg li em de di on su on de amu angge hag deberuk katfag ai fam de, o Yerusalem etman no perak de we helep anggen hag debeheg, ne e lak aire e hesangge on dom kwe wilibig on hag debeheg, debag ma mun nik aleroho welatfag.

²⁸ Raja obahet di ale su ale duruk on omano fene en de kuda re o Mesir en mel, o Kilikia en mel, walug waharuk katfag.

²⁹Ne, kereta weim yapuk on aire o Mesir en og-irik waharuk katfag. Kuda misig fahet onggo re uang perak on 150 en foruk katfag, ne kereta weim yapuk on misig onggo re uang perak on 600 en foruk katfag. Onggo airoho fam hundutuk kwit kuda mel kereta mel weim yapuk on etma raja Het enap mel Siria enap mel fam onggo balduk katfag.