Read Ninia Yali 1 RAJA-RAJA 11 Bible Online

1 RAJA-RAJA 11 - Ninia Yali bible

1 RAJA-RAJA 11

¹ At Raja Salomo en de homi bohon humdoho enda nebagdeg, hun raja Mesir on ahaloho hwelebag on anyo oho liren de, Salomo en de homi enobam Het on mel, Moab on, Amon on, Edom on, Sidon on mel og-enepfag.

² TUHAN en it ap homi Israel on fam melale feseruk kwit, “Hiren homi enunggul unuk ai amu on mel og-og am fug, it ai fene en hit Israel on kembu ilah amu on apne wauk kamag ulug henebuhup anggere,” ulug hweag-esebag. Famen Salomo en de homi dagma on etma og-enepfag ai.

³Ap kaindeg enahwelani etma Salomo en ohwesiapdoho og-enepfag on de homi enebe 700 en, ne it homi eta enamingming angge on fam en aren og-enepfag on de 300 en welatfag. Ai fam at ohwesi etman dil ale famen de Salomo anyo Allah embesebag,

⁴ai fam de at ebe mun sobal atfag li em de iren at enda onggonlug de kembu ilah omano apne wag lebag. Salomo akni Daud de akni TUHAN Allah fam dipdeg latfag famen de Salomo re akni hagdoho deg latfag fug.

⁵At Salomo en de kembu Asytoret mel, it enunggul unuk Sidon on en kembu hwe on dewi mel, ai en Dewa Molokh me nape on it ap homi enunggul unuk Amon enap en apne wauk katfag on mel, etma fam apne wauk katfag.

⁶Airoho duruk kwit, Salomo en TUHAN fam siag duruk katfag. Salomo akni Daud aire enda biren-baren uk fug angge TUHAN mutlug lauk katfag famen de Salomo re ai hagdoho duruk katfag fug.

⁷O Yerusalem en foma mo lahaik waharuk fil dom fam etma re at Salomo en de kembu ap homi Moab on en Dewa Kamos anyo mel, kembu ap homi Amon enap en Dewa Molokh anyo mel mot-durukmu witfag. Kembu dewa biren etare mun me napereg on welatfag.

⁸At Salomo en de it ohwesi bohon omano en amben angge dupa yaleheg, ne enenggembu dewa iren on fahet di angge su angge og-ereheg, durukmu fahet obale wit-enepfag.

⁹Airoho debag ma re enggik birenam TUHAN Allah ebe Salomo akit enam atfagdeg, kembu ilah amu on etma fam apne wauk kam fug ulug enggare febag, famen de at Salomo en de TUHAN ele holoho debag fug. Ite aren TUHAN embeselug duruk katfama re TUHAN olok at fam febag.

¹⁰

¹¹Olok febagdeg de TUHAN en uruk kwit, “Hat de hendaman wenggele folug wene sali An nim hat nim wareg lahe on anyo dahandoho duruk kwit, An den wene melaleg hweag-hitihik on anyo nele holoho duk fug angge duruk kahenma re, hat hebe raja wereg lit melal-enepuk kahen on ai An den henggikmu en lisoho re ap misig hat haut pegawai eke fam og-uruhuk.

¹²Airoho duhuk famen de, hat hakni Daud anyo fahet eberoho re, An den ai duhuk on aire hat hebe holuk wereg li em de duhuk fug. We hat hamloho en melal-enepuk wereg li em neg de An den airoho duhuk.

¹³Famen de raja wereg lit melal-enepuk karuhu on aire abirangge at fam en lisoho wahuk fug. An namingming angge Daud anyo mel, ne o Yerusalem An nobam kota deberihik mu anyo mel fahet ebereg lit de, An den de unggul unuk misig neg de hat hamloho fahet fohuk,” ulug hweag-etfag.

¹⁴Ai fam TUHAN en hun Hadad raja Edom on ambiangma on anyo en de Salomo nim aselei on debebag.

¹⁵Ai owan atuk eleg kweleg atam etma re, at Raja Daud en de o Edom apma sebeloho febag ma re hun Yoab, Raja Daud autsi sehen foroho on fahet enowe panglima welatfag on anyo re o Edom lebagdeg at ori enebe wareg omano sal-enebik lebag. Lebagdeg de etma bigalem folfalik en hoporoho at ebe nim at autsi nim de o Edom etma welatfag. Airoho eta li em wereg lit de iren ap on neg o etma wereg on mundoho enowatfag.

¹⁶

¹⁷Famen, at Hadad ebe eta li em de ket sauwereg li re, ap Edom on fomane at akni eyabuk obahet duruk katfag on omano nim de o Mesir heiye lebag.

¹⁸Lebagdeg it enebe o Midian en lebagdeg de o Paran lebag. Etman de ap fomane inim sebe ebagdeg it anyo seberoho re raja Mesir on akit kwik lebag. Kwik lebag ma re at raja Mesir on ai en Hadad fam o inim kwenang at wereg ma inim, at ebe oluk wereg ale fahet inim og-etfag.

¹⁹Ai fam Hadad anyo re at raja are fano on atfag ma, at raja en at ombarik, ohwe Tahpenes aut anyo re at Hadad ohwe amag ulug og-etfag.

²⁰Ai en Hadad ohwe anyo en omaliki ap angge eke endetfag ma re unuk Genubat soalfag. Omalik anyo re hwe raja ohwe anyo en kuldukmu re at raja obam olma at omaliki omano mel welatfag.

²¹Airoho wereg ma re Hadad en esanggo holduk men de Raja Daud anyo mundoho waratsi, ne Yoab it sehen seneg enap fahet enowe panglima anyo ohore waratsi, urukmu esanggo holfagdeg, Hadad en raja Mesir on fam uruk kwit, “An nobam indipmu lamin en de fano lowag bein,” ulug hweag-etfag.

²²Hweag-etfag ma re at raja en hein og-hauk kwit, “Nunggwelug? Hat de suma di angge su angge elegma anggoloroho wereg lit hobam indipmu lamihin en a?” ulug hweag-etfag ma, at Hadad en onggo uruk kwit, “An nangge eke elegdoho wereg lit de fug, famen de we an lamin en de lowag bein,” ulug hweag-etfag. Ai ebagdeg de at anyo sombandoho re anggwenang[13] indipmu omano watfag.

²³At Allah en hun Rezon, Elyada amloho anyo en oho inim aselei on amag ulug debebag. Rezon aire hun Raja Hadadezer o Zoba ahun anyo amingming angge welatfag famen aren heiye wiliplug lebag ahun.

²⁴Raja Daud en de Hadadezer aire along elehapdoho febagdeg de Hadadezer ori etma o Siria en enowatfag. Airoho duruk salim aire Rezon de Hadadezer fam en heiye lebagdeg aren ap kabog-enepfagdeg de dag kwe noruk kwit ap enowarukoho dil noruk on fahet enowe kepala inatfag. Airoho debagdeg at nim autsi nim de o Damsyik lebagdeg o kota ai fam etma welatfag. Etma wereg lit at autsi en de at ebe ap homi Siria on fahet raja welamag ulug unduhuk febag.

²⁵Airoho wereg lit at Hadad en duruk katfag hagdoho re Raja Rezon ai en ohore at Salomo oluk wereg li em etma re ap homi Israel on nim a weim deg lit o kwenang etma fam lal-fal enepuk katfag.

²⁶At Salomo raja welatmisi fug, an welatmin ulug, ap eke at autsi pegawai on en uruk katfag on aire unuk Yerobeam ai. At ebere hun Nebat o Zereda Efraim fam ai ahun amloho. Isinga re hwe Zerua ebe sohwe febag ma welatfag on.

²⁷Wene apma fil sure at Yerobeam en debag ale fahet de diroho: O TUHAN Obam wirigmu en apma fil etma kwenang helahe dahan deheg, enen weheg, o kota fak lehet oho latfag on wauk li em,

²⁸de at Yerobeam ohore inim etma yabuk duruk katfag. Yabuk duruk mu re at Salomo en il kumu hauk men de at Yerobeam de yabuk enggik buhundeg lit, asukun fanoroho durukmu hebag. Airoho durukmu hebagdeg de ap homi enunggul unuk Manasye on mel Efraim on mel en wilayah etma fam yabuk enele omamne fam hweag-esauk kweleg duruk on omano kahaleg welamag ulug kepala febag.

²⁹Airoho unduhuk febag ma re nukoho eke salim de at Yerobeam o Yerusalem en wilipfagdeg o leimu ap homi elegma etma lauk men de, hun Nabi Ahia o Silo ahun asum jubah dagma on anyo keron wandoho waharukmu inim ambi atfag.

³⁰Ambi atfagdeg Ahia en de asum jubah wandeg latfag on anyo nonggoloho re dilip-dalap debebagdeg de nesanggo en angge denele febag.

³¹Airoho denele febagdeg Yerobeam numen og-utlug at hweag-utuk kwit, “Nit ap homi Israel on nenakni TUHAN Allah en de hat hobam diroho eheik, An den Salomo raja wereg lit melal-enepuk on au oko re enunggul unuk num en etare hat og-huruhuk.

³²Ne, unggul unuk misig ai neg de An den ap homi Israel on wereg kwe en de An nobam kota welamag ulug de o Yerusalem ferihik mu re, An namingming angge Daud mel, o Yerusalem ai mel enalahasik dohore Salomo en melal-enepuk wereg hag melal-enepuk karuhu.

³³An den airoho duhuk ale aire, An den Salomo akni Daud fam uruk kwit, diroho suroho duruk kamuk ulug hweag-itihik on nele holoho duruk katsi hagdoho at Salomo en airoho duruk katsi fug. Aren de An nobahalug kembu dewi ap homi enunggul unuk Sidon enap en Asytoret anyo mel, ap homi Moab on enanggembu Kamos anyo mel, ap homi Amon on enanggembu Milkom anyo mel, apne wauk ai.

³⁴Aren airoho duruk kweleg de An namingming angge Daud ebe An den momaldihikdeg diroho diyug airoho diyug ulug hweag-itihik on aren nele holoho neg duruk katsi on ai fahet alahasik de, at Salomo en melal-enepuk kwit wereg on ai enggikmu en dalukdoho wa fug angge at ebe oluk wereg lit eta melal-enepuk kamag ulug embesehukmu melal-enepuk karuhu.

³⁵At Salomo en melal-enepuk kwit wereg on ai at omaliki enenggikmu en oko walug, ap homi enunggul unuk num en de hat henggikmu fohuk.

³⁶Famen de ap homi enunggul unuk misig neg de o kota Yerusalem it nomaliki en An nobahet duruk kamuhupmu ulug momaloho ferihik mu suma, An namingming angge Daud en ondohoma on misig on eke en An nobahet melal-enepuk kamag ulug embesehuk.

³⁷Airoho embeselug, hat Yerobeam en ap homi Israel on fahet raja atlug, o di kwe su kwe etma melal-enepuk kale behen on etma melal-enepuk karuhun en de unduhuk hobahakuk.

³⁸Ne, An namingming angge Daud en de An den diroho diyug suroho diyug ulug hweag-utuk katihik on nele holoho neg duruk katsi eta hag, An den hat hweag-huruhuk on aire haren nele holoho An nendama nahayeg boruk kahi ale etma An nil hanim higitdoho neg duruk karuhun halug, An den hat hinim mundoho welaruhuk. Airoho hinim wereg lit ap homi Israel on enobahet raja welaruhun en unduhuk hobahakuk. At Daud ambiangman ondoho on unduhuk feseruk karuhuk ai hag, haren ondoho on hambiangman ap homi Israel on enobahet raja welamag ulug unduhuk feseruk karuhuk neg.

³⁹Salomo en siag disi ai fam Daud en ondoho on ambiangma on etma unggum enobam fesehuk famen de, unggum etma enobam mundoho-mundoho fahet fesehuk fug, ulug eheik,” ulug hweag-etfag.

⁴⁰Airoho hweag-etfag ma re wene hweag-etfag on ai, it ap homi eke en de Salomo akit hweag-irik lebag ma re Yerobeam waruhuk ulug weim endama wereg ale at Yerobeam oluk atfagdeg, Yerobeam ebe heiye re raja Mesir on hun Sisak akit lebagdeg etma welatfagdeg en de Salomo ebe waratfag ma neg de watfag.

⁴¹Salomo en duruk katfag ale mel, at enda mundoho wenggeleg on fam duruk katfag ale mel, de “Buku unuk Salomo en duruk katfag wene” ulug baleg on ai fam baloho febag ma wereg.

⁴²Salomo ebe o Yerusalem wereg lit etma tahun 40 en ap homi Israel on melal-enepuk kwit welatfag.

⁴³Airoho melal-enepuk katfagdeg fobik en ebe waratfag ma re o kota Daud en on fam etma salfag. Airoho salfag ma re at amloho Rehabeam obalma raja inatfag.