Read Ninia Yali 1 RAJA-RAJA 12 Bible Online

1 RAJA-RAJA 12 - Ninia Yali bible

1 RAJA-RAJA 12

¹Ap Israel enap enobam utara fil welatfag on omano abirangge en de Rehabeam raja welaruhu en unduhuk foul ulug de o Sikhem etma kabog-dik watfagdeg wereg ma at Rehabeam enekit lebag.

²Eta li em hun Nebat amloho Yerobeam anyo re Raja Salomo akol en de heiye o Mesir lebagdeg wereg kweleg debag. At Yerobeam etma wereg ma ap homi en de, Rehabeam anyo raja welamag ulug unduhuk foukoho duruk, ulug ebag ma esanggo holfagdeg sombandoho ap homi Israel on enobam omano watfag.

³Watfag ma ap homi enobam utara fil welatfag on en de Yerobeam ayonggo febagdeg inim seberoho re Rehabeam akit lebagdeg enele uruk kwit,

⁴“Nenowe hakni hun Salomo en de obabut hapereg lit nit yabuk anggin on nenobam forukmu duruk katuhuk. Mu re haren anggin on ai dot seap debelug, di anggin su anggin hauk katuhuk on etma dorap debehun halug de nit hat hamingming angge welamuhuk,” ulug hweag-etfag.

⁵Airoho hweag-etfag ma Rehabeam en, “An nenda wenggelmin deg onggo hweag-hesahuk anggere nukoho henahan welatlug manu,” ulug hweag-esebag ma it ap omano sombandoho lebag.

⁶Lebag ma Rehabeam en akni Salomo ori wene diroho suroho dimihin ulug komo-duruk katfag on omano enekit lebagdeg it enobam uruk kwit, “An den ap etma enobam wene keroho hweag-esahuk boruk kahep? An den wene onggo hweag-esahuk on fahet de, hiren wene diroho iyug ulug hweag-nemek,” ulug hein og-enepfag.

⁷Airoho hein og-esebag ma iren de, “Haren it ap homi enobahet duruk karuhuk boruk kwit halug de, iren heng ehesa ale ai enele hole feiyug. Airoho duhun halug iren hat hamingming angge mundoho-mundoho welamuhup,” ulug hweag-etfag.

⁸Famen de Rehabeam en de it ap lohon en komo-debag on omano re seram hag bolug ap sauwe on it at nim ambine on omano enekit lebag.

⁹Lebagdeg it enobam uruk kwit, “Ap homi en yabuk enobam anggin on dorangge seap deboukwag ulug hweag-nutswa on ai fahet de an den wene keroho hweag-esahuk boruk kahep, hiren hweag-nemek,” ulug hweag-esebag.

¹⁰Airoho ebag ma iren onggo hweag-utuk kwit de, “Haren de diroho hweag-esakiyug, An nakni omamne dotdeg[14] fug mun hum deg latsi famen an nomamne neg de mun along deg lahi.

¹¹An nakni en yabuk anggin on henobam foruk katsi on aire we dot se hag famen de an den anggin humon henobam foruk karuhuk. Aren de yeik we on fam lalfisog henowatuk katsi, famen an den yeik bosiemanggen alog ding-doung uruk on fam henowatuk karuhuk,” ulug hweag-esakiyug ulug hweag-etfag.

¹²Airoho hweag-etfag ma weregman it ap omano Rehabeam en de nukoho henahan welatlug manu ebag aleroho re, iren Yerobeam inim Raja Rehabeam akit watfag.

¹³Watfag ma re Rehabeam en wene komo it ap lohon en hweag-etfag on omano re embeselug it ap sauwe on en hweag-etfag on omano neg ele hape fam hweag-esebag.

¹⁴Wene it ap sauwe on en hweag-etfag ale higitdoho hweag-esauk kwit, “An nakni en yabuk anggin on henobam foruk katsi on aire dot se hag famen de, an den neg anggin mun humon henobam foruk karuhuk. Ne, aren de yeik we on fam lalfisog henowatuk katsi famen, an den de bosiemanggen alog ding-doung uruk on fam fetnangge henowatuk karuhuk,” ulug hweag-esebag.

¹⁵Wene ai fahet TUHAN enda bebag fam de Aren ap Nabi Ahia obam Silo on anyo fene en Yerobeam hweag-etfag ale anyo eneg amag ulug Rehabeam en it ap etman heng debag on omano enele holuk fug angge embesebag.

¹⁶ At raja en it enele holuk fug angge embesebag ai fam iren enele hum-ngairuruk kwit, “Daud ebe nim ne aren ondohoma on nim en nit nenobahet raja wereg alere mun nenerim. Iren nit nenobahet di ale su ale nenepuk katswa no a? Mun eleg. Ma re ap Israel henap suma, at Rehabeam onggwareg fahet duruk kamagdoho re, nenobam lakohon manik,” ulug ebagdeg de sombandoho enobam lebag.

¹⁷Airoho lebag ma re Rehabeam anyo re ap homi Yehuda on enobahet neg raja inatfag.

¹⁸Famen Rehabeam en de hun Adoniram ap homi yabuk enele omamne fam durukmu kahal-enusug welatfag on anyo ayonggo febagdeg ap homi omano enendama fano amag ulug enekit monde febag. Monde febag famen iren helep fam ebe binggi watfag. Watfag ma re Rehabeam en il hebagdeg akol en de no kereta fam de folo-folo lebagdeg heiye o Yerusalem watfag.

¹⁹Ai debag huli anyo en de it ap homi utara fil wereg on omano en de, ap Raja Daud en ondoho on ambiangma en nit fahet raja welamuhup fug, ulug ning-nang hauk katfag.

²⁰Airoho debagdeg wereg lit hol-hauk men de, Yerobeam anyo o Mesir en sombandoho wahasi, urukmu holfagdeg, enebe o ekema kabog-dul ulug Yerobeam ayonggo febagdeg at ebe it Israel enobam raja welamag ulug unduhuk febag. Unduhuk febag ma re it ap homi enunggul unuk Yehuda on neg de at Raja Daud en ondoho on en melal-enepuk on fam holeg welatfag.

²¹Raja Rehabeam o Yerusalem watfagdeg autsi tentara enunggul unuk Yehuda on mel Benyamin on mel en weim yapuk ale enoluk on en de it enunggul unuk Israel on utara fil wereg on etma nim weim yaplug de Raja Daud en ondoho on en melal-enepukmu welamagdoho fesehuk ulug de ap tentara enebe 180.000 en esan foloho monde-fesebag.

²²Famen Allah en nabi unuk Semaya anyo ayonggo folug monde feik watfag ma

²³Rehabeam mel, ap homi Yehuda on mel, Benyamin on mel abirangge fam wene diroho hweag-esebag,

²⁴“Wene atsi on aire An nenda berihik fam atsi mu re hit henori Israel on ai enowarik la fug angge re henobam nikangge somban diek, eheik,” ulug hweag-esebag ma re it enebe abirangge re TUHAN en airoho duk fug ulug hweag-esebag ale anyo enesanggo holfagdeg sombandoho enobam domog buhulfag.

²⁵Hun Yerobeam ap homi Israel on enobahet raja mundoho inatfagdeg, o kota Sikhem dom Efraim on fam etma mun omamneroho witfagdeg de ebe we elamna fahet etma lebagdeg welatfag. Welatfagdeg fobik en o kota Pnuel omamneroho wirik lebag.

²⁶Airoho witfagdeg endaman boruk kwit, “It ap homi etman o Yerusalem TUHAN Obahet dulen ulug lauk ai hag, airoho neg lauk kamuhup halug de fobik en Rehabeam it Yehuda on enowe raja anyo omaliki atlug an nebe nowaruhup ane,” ulug ai bebag.

²⁸ Airoho bebagdeg de kembu sapi emas on fam ahut ilitdoho biren angge witfagdeg ap homi omano fam uruk kwit, “Yaho hit ap homi henunggul unuk Israel on suma, hiren Allah obahet dul en ulug de o endam et angge o Yerusalem neg lauk kahepma re, hiren henakni o Mesir en og-heneplug wilibik wahasi on anyo re su,” ulug hweag-esebag.

²⁹Airoho hweag-esebagdeg kembu sapi emas on ahut hilinggig etano re eke o Betel febag, ne eke o Dan febag.

³⁰Airoho febag ma re it ap homi en kembu etano obahet dukoho re iren o Betel nim Dan inim lauk kwit de iren siag debag ai.

³¹Ne, at Yerobeam en kembu ai obahet durukmu ulug di kwe su kwe duk-duk etma wiroho feil lebagdeg, aren ap kembu etma hwalduk on fahet enunggul unuk Lewi on fugmen de ap hesangge on unduhuk fesebag.

³² Airoho unduhuk fesebag ma it ap kembu hwalduk katfag enap omano kembu obahet duruk kamag ulug o Betel fesebagdeg Yerobeam en de kembu sapi emas on ahut ilitdeg witfag on etmano fahet wam di angge su angge fesebag. Airoho debelug it ap homi Yehuda on en TUHAN Obahet duruk katfag hag, aren soni kembu obahet on bigalem iren wenaharuk katfag aleroho re ligin on fam tanggal 15 fam duruk kamuhuk ulug eneko febag. Airoho eneko folug eta li em Yerobeam en kembu obahet wam di angge su angge og-itmin ulug o Betel lebag.