Read Ninia Yali 1 RAJA-RAJA 13 Bible Online

1 RAJA-RAJA 13 - Ninia Yali bible

1 RAJA-RAJA 13

¹Airoho debag ma re eta li em de ap nabi eke it Yehuda on fam etma welatfag. Wereg ma re TUHAN en o Betel lowag ulug mingming debag ma lauk men Yerobeam anyo re waroho yalduk angge mezbah anyo di angge su angge waroho yalmin ulug olohotma unduhuk latfag.

² Unduhukmu re TUHAN ele melaleg fam nabi anyo en mezbah anyo fam uruk kwit, “Hat mezbah su, hat mezbah su! TUHAN en diroho eheik, At Daud ahain elekwe on enesahalimu en omalik eke unuk Yosia ai endag-aruhu. Hat mezbah au hemberimmu re aren it kembu dewa enobahet duruk on mel ne iren wam di angge su angge hat hemberim fam yale fousa on mel etma warenebuhu. Ne, aren hat hemberim mu eiya at ap homi enowag yal-enebuhu, eheik,” ulug hweag-esebag.

³Airoho ebagdeg nabi anyo en ele eke nim uruk kwit, “Mezbah au re daloruhu ne ul emberimmu wereg on de hililuhu ai fam de an nebe TUHAN en mon-nabik waha ale anyo eneg aruhu,” ulug hweag-etfag.

⁴Airoho uruk li em etano re at Yerobeam en esanggo holfagdeg de, aren nabi anyo fam enggik dum biloho re, “Ap ai seneriek!” Ebag famen de at Yerobeam enggik anyo bekit bil atfag ma re enggik siroho wa ale nong-hong ebag.

⁵Airoho atfag ma duruk men de mezbah anyo re at nabi anyo en TUHAN ele melaleg fam ebag ale higitdoho re, fetagdoho etano molulukdoho yingguruk kwit ul emberimmu wereg on omano kwenangma hililfag.

⁶Airoho debag ma re at Raja Yerobeam en nabi anyo fam uruk kwit de, “Hat hakni TUHAN Allah ai en an enda nealug nenggik au hiling nabukwagdoho re nobahet At fam somban in!” ulug hweag-etfag. Airoho ebag ma re at nabi anyo en TUHAN fam somban ebag ma re raja enggik anyo fano atfag.

⁷Airoho debagdeg at raja en nabi anyo fam de, “An nobam siburu nakohon ma. An den hat hobahet onggo og-hitmin,” ulug hweag-etfag.

⁸Airoho ebag famen de at nabi anyo en onggo uruk kwit de, “Nakni kain haren hangge di angge su angge henggik wereg welahen etma minggiroho foma an og-nitmihin famen ohore, an den kain hebe nim ik neggeg, siburu nenggeg, dimin fug.

⁹An de TUHAN en wene melaleg hweag-nutuk kwit de, ik nenggeg, siburu nenggeg duk fug ulug melale nobahasi, ne kobokwe ohore waharukmu waharihin kwe ai en nikangge wam fug, ulug hweag-nitsi” ulug hweag-etfag.

¹⁰Airoho ebagdeg de at nabi anyo kobokwe amu kwe en lebag.

¹¹Eta li em de ap nabi sobal on eke o Betel etma welatfag. Airoho wereg ma re at omaliki en de nabi Yehuda on wereg ale anyo fahet mel, ne nukoho anyo salim o Betel en debag ale anyo mel, at Raja Yerobeam fam hweag-etfag ale mel, omano hweag-etfag.

¹²Airoho ebag ma re nabi sobal on anyo hein og-enepuk kwit de, “Nabi Yehuda on aire obam laroho lauk kwit de kobokwe re kwe ke en laha?” ulug hein og-enepfag ma iren de kwe su lasi ulug kobokwe uluhun hweag-etfag.

¹³Airoho ebagdeg de aren de omaliki fam de owam keledai doaloho huratuk angge doale foukwag ulug hweag-esebag ma, iren doale febag ma re at ebe emberimmu huratfagdeg de

¹⁴nabi Yehuda on anyo mutlug watfag. Mutlug waharuk men de nabi anyo re e humon wilibig on indipmu hweriegma watfagdeg de, nabi sobal on anyo en hein og-hauk kwit de, “Hat de nabi o Yehuda on a?” ulug hein webag ma re, ap anyo en de, “Demdoho,” ebag.

¹⁵Airoho ebag ma nabi sobal on anyo en de, “An nobam siburu naul en ma,” ebag.

¹⁶Famen de nabi Yehuda on anyo en onggo uruk kwit de, “Nakni an de nakni haren ninim an nobam lakohon ehen ale aire ninim laul fug, ne an de nakni hat hinim siburu nenggeg ik nenggeg oho dul fug neg, nakni.

¹⁷An de TUHAN en wene melaloho hweag-nutuk kwit siburu nenggeg, ik nenggeg, duk fug ulug inim ne kobokwe amu kwe en olma manu, ulug inim hweag-nitsi neg,” ulug hweag-etfag.

¹⁸Airoho ebag ma nabi o Betel on anyo en ele seiale uruk kwit de, “An ohore hat deg lahen hag nebe nabi welahi. Ne, TUHAN ele mingming fam de malaikat misig eke an nakit mondorik waharuk kwit, an den hat hondog habik watlug an nobam en bobag habukwag, ulug hweag-nereheik,” ulug hweag-etfag.

¹⁹Ai ebag ma re nabi Yehuda on anyo hun nabi sobal on anyo nim lebagdeg inim seberoho siburu nebag.

²⁰Airoho lebagdeg de it seberoho hwerieg lit siburu nauk men de, TUHAN en nabi sobal anyo fam ele ebag ma,

²¹aren nabi Yehuda on anyo enggali watuk kwit de diroho ebag, “TUHAN en de haren At ele holoho dehen fug eheik. Ne hat de Aren diyug ulug mingming-habeheik ale higitdoho dehen fug.

²²Hat de siburu nenggeg ik nenggeg duk fug ulug hweag-hitsi famen de hat hebe sombandoho suma wahendeg siburu ik nenggeg duruk kahen. Ai fam de hat hebe binggi howatlusama hebe wareg de hat hahain elekwe on salegma etma sal-haplusa fug,” ulug hweag-etfag.

²³Airoho ebag ma it anyo ik mel siburu mel mundoho nebagdeg de, nabi sobal anyo en de nabi Yehuda on anyo angge keledai anyo fam doaloho hweriatuk angge doale febag ma re

²⁴nabi anyo obam lamin ulug watfag. Waharuk men de kwe bulmu etmano en at ebe singa wilipuk kwit senggelfag ma waratfag. Waratfagdeg de at ebe wareg anyo re kobokwema etano yinggigmu re keledai anyo ohore etano unduhuk latfag. Ne, singa anyo oho etano unduhuk latfag neg.

²⁵Ap homi kwe ai fene lauk men de singa anyo mel ap wareg anyo mel airoho wereg ma hebagdeg de, iren o Betel watfagdeg de inil hebag ale anyo hweag-esa watfag.

²⁶Airoho deg uruk on anyo at nabi sobal on anyo esanggo holfagdeg, aren uruk kwit de, “Ap aire nabi TUHAN ele melaleg holoho disi fug on anyo lit deg! Aren airoho disi ai fam de TUHAN en singa ai en senggelukwag ulug mondorik wahasimu re, TUHAN en ai am fug kweleg isi hag senggeloho watsi ai,” ebag.

²⁷Airoho ebagdeg at nabi sobal anyo en omaliki fam hweag-esauk kwit de, “Keledai an den on fam doaloho hweria atuk kahi angge ai hilinggi feiyek,” ebag ma, hilinggi febag ma re at ebe hweria aik lahalug lebag.

²⁸At ebe lauk men de nabi Yehuda on wareg anyo re kobokwema etano wareg wereg ma keledai mel singa mel oho aluluk etano welatfag. Singa ai en de keledai anyo oho ne ap wareg anyo oho senggelfagdeg nebag fug.

²⁹Airoho deg ma hebagdeg aren ap wareg anyo hamboko re keledai aren anyo emberimmu lahabe folug oba yako salmin ulug sombandoho walug o Betel lebag.

³⁰Lebagdeg nabi sobal anyo en ap wareg anyo at ahain elekwe waratuk on sal-enepukmu etmano sale febagdeg, at nim omaliki nim en ap waratfag on anyo fahet fong waroho welatfag. Airoho wereg lit iren uruk kwit, “Nenare helaheg e, hat helaheg o!” ulug uruk katfag.

³¹Airoho debagdeg nabi sobal on anyo en omaliki fam uruk kwit, “An nebe wararuhuk halug ohore an nebere nabi au wareg saleg on aluluk eiya sale-nobahaiyug.

³²Ne, TUHAN awene melaleg fam ap ai en mezbah o Betel wereg on fahet isi ale mel ne kembu fahet duruk kwe o Samaria kota kwe wereg on etma fahet isi ale etma mel de demdoho aruhu,” ulug hweag-esebag.

³³Raja Yerobeam de aren obabut kwasik ale duruk katfag on omano embesouk fug angge neg duruk katfag. Ai fam de aren kembu obahet duruk kwe witfag on etmano hwalduk kamag ulug aren imam kembu fahet on de ap homi hesangge on enahain elekwe omano en, ap imam wereg ale enendan in-nenebukwag boruk on omano aren momal-eneplug in-enepuk katfag.

³⁴At obabut mun siag on deg lit airoho duruk katfag ai fam de at ambiangman ondoho on en de mun alemat atuk kwit nong-hong atil lebag.