Read Ninia Yali 1 RAJA-RAJA 15 Bible Online

1 RAJA-RAJA 15 - Ninia Yali bible

1 RAJA-RAJA 15

¹At Yerobeam anyo raja it Israel on enobahet in atfagdeg hwal-enepuk katfag lien de 17 tahun debagdeg de, tahun 18 on deg li at Abiam it ap homi Yehuda on enobahet raja inatfagdeg de,

²o Yerusalem fam etma tahun henahan fam melal-enepuk katfag. At isinga unuk de hwe Maakha hun Abisalom ahaloho anyo.

³At Abiam en it akni en siag duruk katfag hag de aren oho siag neg duruk katfag. At ambu hun Raja Daud aire amuroho duruk katfag famen at de akni TUHAN Allah anyo fam dipdoho duk eleg angge neg duruk katfag.

⁴ Famen de, Raja Daud alahasik de, TUHAN Allah at Daud en apne wauk katfag on anyo en de at Abiam fam omalik misig eke at obalma raja wereg lit o Yerusalem fam etma melal-enebeheg, ne o kota ai sebeloho foroho welaheg, duruk kamag ulug og-etfag.

⁵ TUHAN en airoho debag ale aire Daud en TUHAN endama ahayeg howag ulug deberuk katfag ai fam. At Daud de TUHAN en wene melaloho diroho diyug suroho diyug ulug hweag-etfag on omano eke embesouk fug angge duruk katfag, famen we hun Uria obam Het ahun ai nim wene debag on ai neg de wene melaleg sahaloho debag.

⁶ Weim hun Rehabeam mel Yerobeam mel at Rehabeam wereg lit indip debag on anyo re at Abiam raja wereg lit melal-enepuk li em oho yapuk kwit neg welatfag.

⁷At Abiam duruk katfag ale fomane re buku it ap raja Yehuda fam welatfag on en duruk katfag ale baleg on ai fam bale febag.

⁸At Abiam ebe waratfag ma re o kota Daud obam omano salfag ma, at obalmanggere at amloho Asa anyo raja inatfag.

⁹Raja Yerobeam de ap homi Israel on melal-enepuk kwit weregman neg de tahun 20 on fam wereg kweleg at Asa ap homi Yehuda on enobahet raja inatfag.

¹⁰Aren de o Yerusalem fam etma 41 tahun en melal-enepuk katfag. At ombalo re hwe Maakha hun Abisalom ahaloho anyo.

¹¹Hun Daud at omba it aknisi enakni anyo en duruk katfag hag de aren oho TUHAN endama ahayeg boukwag ulug neg duruk katfag.

¹² It ap homi uang hwelakoho hambena duruk on kembu dewa wereg kwe welatfag on omano en aren muko wilibi feseheg, ne it raja-raja atam melal-enepuk katfag on en kembu witfag on omano o kwenang etma fam abirangge en elehapdoho feheg, debag.

¹³Aren de ombalo hwe Maakha anyo en kembu hwe on Dewi Asyera di angge su angge hesilduk on ulug mun ilmu siag on witfag on anyo fam de, hwe ai hun raja ohwe anyo isinga ulug welatfag on anyo fam en sebeloho belabe febag. At Asa en de kembu wirig anyo moluluk esebagdeg de o Kidron Donggoma etman han yalfag.

¹⁴Ne, aren di kwe su kwe etman kembu wirig on etmano mundoho moluluk debag fug famen de, at ebe oluk welatfag li em de aren TUHAN obam dipdoho neg duruk katfag.

¹⁵At akni en emas mel perak mel TUHAN obahet ulug og-etfag on omano abirangge re o TUHAN Obam wirigmu omano feik lebag, ne airoho re at onggwareg en emas, perak mel TUHAN obahet og-etfag on oho feik kwebag.

¹⁶At Raja Asa it Yehuda fam etma melal-enepuk kweleg de at Raja Baesa it Israel on fam melal-enepuk wereg kweleg etma re it raja biren etare weim neg yapuk katfag.

¹⁷At Baesa en de it Yehuda on wilibik waharuk mu kwe anyo balmin ulug de it Yehuda fam weim sinalik lebagdeg de o kota Rama anyo omamne debebag.

¹⁸Ai fam de Raja Asa en emas mel perak mel o TUHAN Obam ilonggoma wereg on omano abirangge mel ne raja obam olma wereg on omano mel webagdeg de o Damsyik hun Benhadad raja Siria on, hun Tabrimon amloho, hun Hezion omba anyo fam mondorik lebag. Di angge su angge etare ap at obam yabuk duruk on fene mondotuk kwit wene diroho nim waroho monde febag,

¹⁹“Nit nenaknisi en enebe hundig latswa hagdoho re nit oho airoho hundig lamuhuk en de, nakni haren hun Baesa raja Israel on ai nim hundig lahep on ai bale fein. Airoho bale fohun fam de at autsi sehen seneg enap wilayah an den on wereg on ai lisoho wahu. Ai fahet de wene su nim de an den nakni hat hobahet hahayegdoho ulug emas, perak mel mondorik wahi,” ulug monde febag.

²⁰Airoho monde febag ma re at Benhadad en Raja Asa en heng ebag on ai fahet fano bebagdeg de, aren de ap autsi sehen seneg enap mel enowesi melal-enepuk on perwira mel de it ap homi Israel on enobam kota omano dog sinalik lowag ulug miming-enepfag. Airoho miming-enepfag ma iren de, o Iyon mel, Dan mel, Abel-Bet-Maakha mel, o Kinerot ik Galilea yenggeleg on aluluk anyo mel, it ap Naftali enap en enobam wilayah abirangge mel sebeloho febag.

²¹Airoho debag ma at Baesa en holfagdeg de aren o Rama omamne debebagdeg welatfag ale anyo embeselug de, o Tirza lebagdeg we elamna fahet weim yabuk eleg angge welatfag.

²²Anyo airoho dulug de at Raja Asa en de o Rama anyo omamneap debeikoho re ap homi Yehuda on abirangge eke embesouk fug angge e mel, helep mel walug lowag ulug wene melalfag. Airoho debag ma re iren walug lebag angge etma re o it ap Benyamin on enobam wilayah en kota eke o Seba ai mel, Mizpa mel omamneap debeikoho miming-enepfag.

²³At Raja Asa ebe fahet nim, aren weim yapuk katfag ale mel, kota omamneroho witfag ale fahet mel, de buku it ap raja Yehuda fam melal-enepuk katfag on en duruk katfag ale baleg wereg on anyo fam mundoho bale febag. Ne, at Asa ebe sobal deg li em de at eyog biren et ouk debag ma ouk wauk katfag.

²⁴Airoho wauk katfagdeg at ebe waratfag ma o kota Daud obam raja sal-enepuk katfag ma etma salfag. Salfag ma re at amloho Yosafat anyo at obalma raja inatfag.

²⁵At Raja Asa anyo ap homi Yehuda on fahet wereg lit melal-enepuk kweleg tahun bireneg on wereg li em de, at Nadab Yerobeam amloho en de it ap homi Israel on enobahet raja inatfagdeg de tahun biren melal-enepuk katfag.

²⁶At akni at ebe raja am fug kweleg melal-enepuk wereg lit duruk katfag higitdoho re aren TUHAN il hanim siag duruk katfag. Airoho duruk katfag ai fam de ap homi Israel on en de TUHAN apne wauk kam on de iren inim siag duruk katfag.

²⁷Airoho durukmu re, at Baesa hun Ahia amloho unggul unuk Isakhar on anyo en de Nadab waruhuk ulug abug balfagdeg de at ebe watfag. Eta li em de at Nadab ebe autsi sehen foroho on nim de o kota Gibeton ap homi Filistin enap en wilayah fam omano huk debagdeg duruk kweleg watfag.

²⁸Aire at Asa ap homi Yehuda enap fahet raja inatfagdeg melal-enepuk katfag on anyo re tahun henahaneg on deg kweleg atfag. Airoho debagdeg de at Baesa anyo ap homi Israel on enobahet raja inatfag.

²⁹ At Baesa ebe raja inatfagdeg etano re aren de TUHAN en amingming angge Nabi Ahia o Silo on anyo fene wene ebag ale higitdoho re at Yerobeam ahain elekwe on mundoho enowatfag. Ma re at Yerobeam ahain elekwe on de abirangge enowatfag misig oho eke lil atfag fug.

³⁰At Yerobeam en de siag duruk katfag ai fam de ap homi Israel on oho siag neg duruk katfag. Airoho duruk katfag ai fam de at Yerobeam en de ap homi Israel on enakni TUHAN Allah apne wauk on anyo olokap kwelapuk katfag.

³¹At Nadab en duruk katfag ale fomane re buku ap raja Israel on enobahet wereg lit duruk katfag on anyo fam mundoho baleg wereg.

³²Raja Baesa o Israel on fam welatfag on ai en melal-enepuk wereg li em de, weim hundig-handig at Baesa nim ne Raja Asa it Yehuda on enobahet welatfag on anyo nim yapuk kwit neg welatfag.

³³Hun Asa ap homi Yehuda on enobahet raja inatfagdeg wereg lit melal-enepuk men neg de tahun henahaneg on wereg kweleg, Baesa hun Ahia amloho anyo ap homi Israel on enobahet raja inatfag. Airoho inatfagdeg de aren o Tirza fam etma wereg lit 24 tahun en melal-enepuk katfag.

³⁴Airoho melal-enepuk wereg lit de at Yerobeam, Baesa ebe raja inam fug li unduhuk wereg lit siag neg duruk katfag hag de, at Raja Baesa en oho TUHAN fam siag airoho neg duruk katfag fam ap homi Israel on oho siag duruk katfag.