Read Ninia Yali 1 RAJA-RAJA 16 Bible Online

1 RAJA-RAJA 16 - Ninia Yali bible

1 RAJA-RAJA 16

¹Ai fam de TUHAN en Nabi Yehu hun Hanani amloho anyo fam hweag-utuk kwit de, “An den wene imin on su Baesa fam hweag-umuk.

²Endam hat de diroho suroho eke dirihin deg en fug famen de, An den hat hebe it nomaliki Israel on enobahet unduhuk hobaharihik. Ne, ketiare Yerobeam en duruk katsi hagdoho haren siag duruk kahen ai fam it nomaliki Israel on oho siag durukmu, ai fam An nolokap kwelap-napuk.

³Ai fam An den at Yerobeam ahain elekwe on nim elehap debeserihik hag, hat oho An den hahain elekwe on nim mun elehap henobahakuk.

⁴Hat homaliki on en enebe o kota ilonggoma en waramuhup on de mene en nahup, ne enebe dagman waramuhup on de suwe en nahup, eheik ulug hweag-umuk,” ulug hweag-etfag.

⁵At Baesa en de Yerobeam ahain elekwe on abirangge enowatfag ai fam neg de fug, ite at Baesa en kwasikdoho neg duruk katfag fam TUHAN olokap kwelapuk katfag, ai fam de TUHAN en wene Baesa fahet on aire Nabi Yehu hweag-omag ulug hweag-etfag. Baesa en duruk katfag ale fomane mel, ne aren weim yapuk kwit along atfag ale mel, buku it raja Israel en duruk katfag ale baloho febag on anyo fam bale febag ma wereg. At Baesa ebe re waratfag ma re o Tirza sale febag ma, at obalmangge re at amloho Ela anyo raja inatfag.

⁸Raja Asa ap homi Yehuda on enobahet inatfagdeg melal-enepuk men neg de tahun 26 fam deg li re at Ela hun Baesa amloho anyo ap homi Israel on enobahet raja inatfag. At airoho inatfagdeg de o Tirza etma wereg lit tahun biren fam melal-enepuk katfag.

⁹Nukoho misig salim de o Tirza etman at Ela anyo ik ahalue siomo enepuk on o hun Arza, at raja ahain elekwe hwal-enepuk on fahet kepala welatfag ahun anyo obam en nebagdeg de welatfag. Airoho wereg kweleg de, at Zimri aire it ap sehen foroho enap kereta lahalug lauk kwit dog yapuk katfag on omano fahet enowe perwira welatfag on en de Ela watmin ulug weim abug ebag.

¹⁰Airoho ebagdeg at Zimri anyo olma kwik lebagdeg at Ela anyo ware febagdeg at ebe raja inatfag. Aire at Raja Asa ap homi Yehuda on melal-enepuk katfag on anyo re tahun 27 on wereg kweleg airoho atfag.

¹¹Airoho at Zimri anyo raja atfagdeg etano neg de Baesa ahain elekwe on mundoho binggi enowatfag. Ai en Baesa ori-erekwi mel, ai en at Baesa indip kwe on ap on mel eke lil atfag fug mundoho neg enowatfag.

¹²TUHAN en Nabi Yehu fene en airoho ulug hweag-etfag ale anyo higitdoho re Baesa ahain elekwe on de mundoho neg enowatfag.

¹³At Baesa ebe mel ne at amloho Ela mel en de kembu dewa omano mot-duruk katfag ai fam de ap homi Israel on oho siag debag. Ai fam it ap homi Israel on en de TUHAN Allah neg apne wauk kam on de siag debag fam TUHAN olokap kwelapfag.

¹⁴At Ela en duruk katfag ale fomane re buku it ap raja Israel on en duruk katfag ale baleg on anyo fam mundoho bale febag.

¹⁵At Asa ap homi Yehuda on enobahet raja inatfagdeg melal-enepuk weregman neg de tahun 27 huli wereg kweleg de, at Zimri ap homi Israel on fahet raja inatfagdeg de nukoho sabiren neg o Tirza etma melal-enepuk katfag. Eta li em de it Israel enap de o ap homi Filistin on enobam kota Gibeton ai huk dik lebagman debag.

¹⁶It anyo enesanggo holduk men de at Zimri en de raja waruhuk ulug abug eheikdeg de ebe binggi wareheik, ulug urukmu holfagdeg de, nukoho anyo salim neg iren enobam sabo salegma omano en de it enebe seberoho re ap sehen seneg latfag on enowe panglima hun Omri anyo ap homi Israel on fahet raja undutfag.

¹⁷Ai en de at Omri mel ne it ap esan lohwaleg anyo mel de o Gibeton embeselug lebagdeg o Tirza walinggik lebag.

¹⁸Airoho debag ma re at Zimri en hauk men de kota anyo iren mundoho sebelfag ma hebagdeg de, at ebe obam wereg ma omano kwik lebagdeg, at ebe nim o at ebe wereg ma omano nim seberoho harep fisako debag ma at ebe waratfag.

¹⁹Airoho debag aire Zimri en TUHAN fam siag debag fam ap homi Israel on oho siag debag ai fam debag. Aren de Raja Yerobeam en TUHAN il hanim siag ale neg duruk katfag hagdoho aren oho airoho neg duruk katfag.

²⁰At Zimri en duruk katfag ale fomane mel, ne aren laloho duhuk ale ulug wene melalfag on mel, etma re buku ap raja Israel on en duruk katfag ale baleg on anyo fam mundoho baleg wereg.

²¹It enunggul unuk Israel on enesahalimu omano en de it fomane en de Tibni hun Ginat amloho anyo raja amag boruk katfag, ne it fomane en de Omri raja amag boruk kwit de, minggit-minggit atfag.

²²Airoho debagdeg ambiangma en de it Omri fil atfag on anyo enalong atfag. Ne, at Tibni re waratfag ma re Omri raja atfag.

²³Aire at hun Raja Asa re ap homi Yehuda on melal-enepuk kwit weregman neg de tahun 31 on wereg kweleg atfag. At Omri re ap homi Israel on enobahet raja wereg lit melal-enepuk men neg de tahun nesanggo en debag. Ne, tahun folfalik en keram on eta fam de at ebe o Tirza etman melal-enepuk katfag.

²⁴Famen de fobik en aren de hun eke unuk de Semet ai en on andom eke onggo uang perak on 6.000 en fam onggo balfagdeg de, aren de o kota misig eke dom ai fam witfagdeg de aren o ai unuk de Samaria, hun andom ai onggwareg ahun unuk Semet ulug soaleg latfag aleroho soalfag.

²⁵At Omri re it ap raja atam melal-enepuk katfag on etman siag duruk katfag on de maben hag famen de aren neg de, siag humon neg duruk katfag.

²⁶At Yerobeam en duruk katfag higitdoho re at Omri en oho siag duruk katfag ai fam de ap homi Israel on inim siag debagdeg kembu dewa apne webag. Airoho debag ai fam de it ap homi Israel on en de TUHAN Allah neg apne wauk kam on de airoho debag fam TUHAN olokap kwelapfag.

²⁷At Raja Omri en duruk katfag ale amu on mel, ne aren di on su on debag ale mel de, buku ap raja Israel on en duruk katfag ale fahet baleg on anyo fam mundoho baloho febag.

²⁸At Omri ebe waratfag ma re o Samaria sale folug de, at amloho Ahab anyo at obalmangge raja inatfag.

²⁹At Raja Asa anyo ap homi Yehuda on melal-enepuk men neg de tahun 38 fam deg kweleg de, hun Ahab, Omri amloho anyo ap homi Israel on enobahet raja inatfagdeg de o Samaria fam etma 22 tahun wereg lit melal-enepuk katfag.

³⁰Aren de it ap raja atam welatfag on en siag duruk katfag on de maben hag famen de aren neg de TUHAN il hanim siag hum aleroho neg duruk katfag.

³¹At Raja Yerobeam en siag duruk kwit welatfag ale eta higitdoho duruk wereg ale fahet we hareg hag bebagdeg de, ohwe re Raja Etbaal obam Sidon on ahaloho Izebel anyo hwelebagdeg de aren de kembu Baal fam apne wauk katfag.

³²Airoho duruk kwit de, aren de o Samaria etma kembu Baal obahet durukmu ulug dewa ai fahet waroho yal-utuk mu mezbah witfag.

³³Airoho witfagdeg de aren Dewi Asyera anyo ahut ilitdeg inim witfag. Airoho duruk kwit de at ebe raja am fug kweleg it atam Israel on enobahet raja welatfag on etman siag duruk katfag on de maben hag deg latfag famen de at Ahab en neg de siag hum aleroho neg duruk katfag. Airoho duruk katfag ai fam de ap homi Israel on en de enakni TUHAN Allah apne wauk kam on de airoho duruk fam TUHAN olokap kwelapuk katfag.

³⁴ At Raja Ahab wereg lit melal-enepuk katfag li em eta re, hun Hiel o Betel on ai en de o kota Yerikho leko wirik lebag. Wirik lebag famen de aren owan wiruk fug kweleg etma atam TUHAN en Yosua hun Nun amloho anyo fene ebag ale higitdoho re, Hiel omaliki biren angge nal atfag. Etare re omalik wandeba on de unuk Abiram aire at Hiel o kota anyo oboule foruk salim waratfag, ne amloho eke elabo on ai unuk de Segub at Hiel en de o kota anyo sokole kwik laukmu fahet sok hilingguruk kweleg waratfag.