Read Ninia Yali 1 RAJA-RAJA 2 Bible Online

1 RAJA-RAJA 2 - Ninia Yali bible

1 RAJA-RAJA 2

¹Daud ebe waratuk ale mun horogdoho atuk mu wereg lit de amloho Salomo wol-debag ma watfag ma, aren fobik duruk karuhu ale ulug komoroho hweag-utuk kwit de diroho ebag:

²“An de ketiare mundoho wilibik lauk ale atuk kahi eiya. Anggere henda hambukdoho wereg lit hambong seroho neg welamuk.

³Hakni TUHAN en hweag-nesasi ale ai on neg higitdoho duruk kamuk. Haren o ekema lalug di ale su ale durukmu higitdoho neg atuk kamag ulug de wene Allah en diroho diyug airoho diyug ulug wene melaleg hweag-nesasi wene Musa en buku fam baloho fesi wene anyo higitdoho neg duruk kamuk.

⁴Allah en an hweag-nutuk kwit, haren ondohoma on en enobabut mel enenda mel misig debelug, An den diroho diyug airoho diyug ulug irihik on ai nele holoho neg duruk kamuhup halug de, ap homi Israel on enowesi raja ap amu on eke am fug angge, it neg wereg lit melal-enepuk kamuhup, ulug An den wene abug wat-hutuk kahi on ai ebe dipdoho neg duhuk ulug wene hweag-nitsi on ai demdoho aruhu.

⁵ Ne, wene eke su hweag-hirik. At Yoab en an nunuk siahapdoho ap tentara Israel on enowesi perwira enebe biren on, hun Ner amloho Abner anyo ha, hun Yeter amloho Amasa anyo ha enebe fobik deg atam deg enowatsi. It biren etan weim yapuk kwit de, ap enowatswa on fahet enunggulmu re weim yabuk fug angge lioleg weregman enowatsi ai. It etan de wene siag ale eke duswa fugmen enowatsi mu re, aren enowatsi ai fam mebonggo an nobam fesimu an nobam anggindoho[2] welahi ale ai hendama mun ebereg wereg lamuk.

⁶Anggere, namloho at Yoab ai ebe mun sobal atlug ap homi waratuk aleroho wararuhu hayog de, haren henda bemihin ale airoho neg diyug.

⁷ Famen de hun Barzilai o Gilead on ai omaliki nim neg de mun henda enusug lamuk. An nebe hat howe Absalom en nowatmin ulug duruk men heiye lauihik mu it ai en enenda nealug og-napswa anggere, henasiburu nauk kwit halug ohore enerohole kwe duruk kam fug.

⁸ Ne, at Gera obam de ap Benyamin on wereg ma kota Bahurim on anyo amloho Simei ai fahet de wene eke hweag-hirik. An o Mahanaim lauk li em de at Simei ai en ele hururung napsi. Famen de an waharukmu Ik Yordan ikma nolohotma lasimu an den hweag-utuk kwit de, An den howatmin fug, ulug nakni TUHAN unuk hombuk baloho hweag-itihik.

⁹Famen de at aire aren siag disi fug on ulug unggum obam fouk fug angge embesouk fug. Hat henda mundoho kahalegma duruk kahen ale aire an mundoho noluk deg. Ma re, at ebe sobal on dehen ulug embesouk fug angge wariyug,” ulug hweag-etfag.

¹⁰Airoho hweag-etfagdeg Daud ebe waratfag ma, ebe wareg de at onggwareg obam kota etma salfag.

¹¹ Aren de ap homi Israel on 40 tahun huli wereg lit melal-enepuk katfag. O Hebron wereg lit de tahun sabiren welatfag, ne o Yerusalem wereg lit de 33 tahun en welatfag.

¹² Airoho waratfag ma re Salomo re akni Daud obalma raja inatfagdeg wereg lit mun ningdoho neg duruk kwit fanoroho melal-enepuk katfag.

¹³Nukoho eke salim de at Adonia anyo hwe Batsyeba akit lebag ma at Batsyeba en Adonia fam hein og-hauk kwit de, “Hat de an nea wahen on aure hendama mun fanoroho wahen a?” ulug ebag ma, At Adonia en de, “Yuo” ebag.

¹⁴Ai en eke nim ele lisoho uruk kwit de, “An den namu ale eke nisinga hat fam heng hapuk kahi,” ebag. Ai ebag ma hwe Batsyeba en hein og-hauk kwit de, “Nunggwangge?” ebag ma,

¹⁵Adonia en onggo uruk kwit de, “An nebe raja inamag ulug aire nisinga hat oho holuk deg, ne ai fahet de it ap homi Israel on en oho airoho alep ulug boruk. Famen de ketia aha on aire ahamdoho aha. TUHAN enda boruk kwit airoho amag borukmu atlug de an naut on anyo raja inaha.

¹⁶Ma re ketia an den wene misig eke heng hapuk kahi anggere nisinga haren herim en embesouk fug,” ulug hweag-etfag.

¹⁷ Ai ebag ma at Batsyeba en de, “Nunggwangge heng napuk kahen?” ebag ma, Adonia en de, “Nisinga an hwele Abisag duhum on obam Sunem on ai an nohweapdoho hwelamin en de Raja Salomo en fano ukwag ulug haren heng imihin en heng hapuk kahi. An den boruk kwit de nisinga haren ai imihin on ai Salomo en embesemisi fug boruk kahi,” ulug hweag-etfag.

¹⁸Ai ebag ma at Batsyeba en uruk kwit de, “Fano, wene ai an den hat hobahet at raja fam nele imin,” ulug hweag-etfag.

¹⁹Ai ebagdeg at Batsyeba anyo re wene Adonia fahet on anyo imin en ulug lebag. Lebag ma re at raja anyo isinga dangdoho ulug inatfagdeg de elenggen dimirebelug dang-debagdeg nikangge at takhta anyo fam huratfag. Ai en ap en isinga huratuk mu fahet at ebe weregman enggik bekit fil etano huramag ulug obale fouk dukwag ulug hweag-esebag.

²⁰Ai debebag ma at ebe huratfagdeg at Batsyeba en uruk kwit de, “Nimi, an hisinga en de wene dorale fahet eke heng hapmin anggere, embesemihin hayog,” ulug hweag-etfag. Ai ebag ma at Salomo en hein og-hauk kwit de, “Aire nunggwe ale? an den de embesemin fug anggere” ulug ebag.

²¹Ai ebag ma Batsyeba en onggo uruk kwit de, “Hat howe Adonia anyo en hwele Abisag ai hwelowagdoho fano in,” ulug hweag-etfag.

²²Ai ebag ma at Salomo en uruk kwit de, “Wene ai fahet de nunggwelug ninga haren an nobam uruk kahen? Aire an den raja wereg lit hwerieg welahimu su at obam og-omag ulug hagdoho uruk kahen. Ne, at aire an nowe no abi. Ne, eke at Imam Abyatar mel Yoab mel ohore at ibil deg omano re!” ulug ebag.

²³Airoho ebagdeg at Salomo en TUHAN unuk fam hombuk baloho uruk kwit de, “At Adonia en heng nabeheik on ai fam an den unggum obam folug binggi waruk eleg angge dimin halug de, TUHAN en ele hururung anyo an nobam welamag!

²⁴TUHAN en de an nakni Daud hwerieg welatsi mu anyo an hwerieg welamag ulug omamneap nobahasi. TUHAN en de wene sali isi on anyo dipdoho re kerajaan su an nobam nim an den ondoho on fam inim og-nesasi. Mu re dik-demdoho TUHAN mun oluk wereg on anyo unuk fam anggere Adonia re yoho su salim at waratmisi,” ulug hombuk balfag.

²⁵Ai ebagdeg de at Raja Salomo en de Benaya fam miming-debag ma re, at Benaya ebe lebagdeg de Adonia anyo warik lebag.

²⁶ Ai en Raja Salomo en Imam Abyatar fam uruk kwit de, “Hat de an nakni nim wereg lit etano an nakni en anggin-fanggin hauk ale anyo haren oho hauk katihin. Ne, haren at Peti TUHAN en Wene Sali wareg on yohwareg angge anyo hwalduk katihin. Famen de ketia hobam o Anatot lakin. Hat de hebe yoho su salim binggi howaruk on famen de yoho re howatmin fug,” ulug hweag-etfag.

²⁷ Airoho ebagdeg at Salomo en hun Abyatar imam welatfag on anyo belabe febag. At Salomo en airoho debag on ai fam de at Imam Eli anyo ambiangma on fahet TUHAN en o Silo en ebag ale anyo eneg atfag.

²⁸Airoho atfag ale etmano fahet Yoab en esanggo holfagdeg de at ebe Adonia ibil on deg latfag ma re akol neg atfag. Famen de atam aren Absalom ibil on deg latfag fug mu re, aren buroho TUHAN Obam Sabo salegma etmano lebagdeg de mezbah ambiang[3] seneg lit welatfag.

²⁹Airoho deg ma re at wereg ale anyo Raja Salomo oluge febag ma re at raja en de Yoab warukwag ulug Benaya miming-debag.

³⁰Miming debag ma re Benaya o TUHAN Obam Sabo salegma etmano lebagdeg Yoab fam uruk kwit de, “Hun raja en de hat welahenma eiya en wilip amag ulug eheik,” ebagman de Yoab en onggo uruk kwit de, “Eleg, an de dian waratmin fano,” ebag. Ai ebag ma re Benaya anyo nikangge watfagdeg airoho ebag ale anyo raja hweag-irik watfag.

³¹Airoho uruk ale anyo raja esanggo holfagdeg, aren uruk kwit de, “An nim an nakni ahain elekwe on abirangge nim de ap siag duswa fug on famen aren enowatsi on etma fahet niren akni atlug eke duhuk fug anggere, lamihin deg de aren eheik ale etaroho diyug. Binggi ware folug de sale feiyug.

³²Hun Abner aire it Israel on en tentara omano enowe ne Amasa re it Yehuda on tentara enowe, ne it enebe biren et de siag eke duswa fug. At Yoab aire siag ahun famen de it etare mun fano enap famen de it enowatsi. Mu re an nakni apeleg kweleg aren ap watsi on ai fahet TUHAN en at oho unggum obam foukwag.

³³Ap sehen foroho on enowesi biren waratswa on ai fahet ambiangma re at Yoab onggwareg nim ne aren ondohoma on en nim ambiangma hauk kwit neg mundoho-mundoho welamuhup. Famen de an nakni raja welatsi on anyo en ondohoma on abirangge re TUHAN en fanoap debeseruk kwit neg welaruhu. Ne, it de ambiangma fano ale neg hauk kamuhup,” ebag.

³⁴Ai ebag ma re at Benaya anyo o TUHAN Obam Sabo salegma etmano lebagdeg de Yoab anyo etano en warik lebag. Ware febagdeg de at Yoab ebe onggwareg obam o kota en dag fil etmano salfag.

³⁵Ai en de raja en de at Benaya anyo re Yoab obalma it sehen seneg enap enakni panglima unduhuk febag, ne Zadok de hun Abyatar obalma imam unduhuk febag.

³⁶Anyo airoho debagdeg de at raja en Simei wol debagdeg hweag-utuk kwit de, “O Hat honggwareg hobam o Yerusalem oma wirin. Wiri folug de etma neg wereg lamuk, ne o kota en wilibik la fug.

³⁷Ne, haren hambong se angge wilibik lahun deg Ik Kidron ahi on ai baloho lahun men de hat hebe howaruhup; ne airoho duhup on aire hat honggwareg en neg ambiangma hwelahun,” ulug hweag-etfag.

³⁸Ai ebag ma at Simei en de, “Nakni kain on, fano neg, an de nakni haren ehen ale airoho neg dimin,” ulug ebag. Ai ebagdeg de at Simei anyo o Yerusalem etma il anunuroho hag welatfag.

³⁹Tahun henahan debelug de wene diroho su atfag: At Simei amingming angge biren anggere heiye o Gat lebagdeg de Raja Akhis hun Maakha amloho anyo akit lebag. Airoho lebag ma it lebag ale anyo fahet at Simei hweag-etfag ma re,

⁴⁰aren owam keledai fam doaloho hweri-atuk angge bug debelug de at amingming angge etano hera enepil de o Gat hun Raja Akhis anyo akit lebag. Lebagdeg de etma wereg ma hweag-enepfagdeg og-eneplug sombandoho watfag.

⁴¹Airoho debag ma, at Simei en debag ale anyo Salomo esanggo holfagdeg,

⁴²ap en at wol-dik lowag ulug miming enepuk kwit wene diroho imihin ebag, “An den de hat hebe o Yerusalem suman wilibik lahun fug ulug TUHAN unuk fam hombuk balin ulug irihik. Ne, an den uruk kwit hat o Yerusalem suman wilibik lahun halug de hebe wararuhun ulug irihik. Ne, airoho irihik mu haren nele holoho duruk karuhuk ulug yuo irihin anyo i.

⁴³Famen de ketia nunggwelug haren hele sali anyo dahan debeheg, ne an nele anyo sahaloho deheg, dehen?

⁴⁴Haren habut siag en an nakni fam deberuk katihin ale aire hat mun demdoho holuk deg lahen. Ai fam de TUHAN en neg hat unggum og-hitmisi,

⁴⁵famen de an neg de fanoap nobaharuk karuhu, ne an nakni fam raja welamag ulug indip disi on aure Aren omamne deberukmu mundoho-mundoho welaruhu,” ulug hweag-etfag.

⁴⁶Airoho hweag-etfagdeg de at raja en Benaya miming-debag ma Benaya lebagdeg Simei binggi warik lebag. Airoho ware febag ma re eta li em at Salomo amu neg aren melal-enepuk katfag ma etma along wereg on welatfag.