Read Ninia Yali 1 RAJA-RAJA 21 Bible Online

1 RAJA-RAJA 21 - Ninia Yali bible

1 RAJA-RAJA 21

¹Raja Ahab obam o Yizreel on anyo obam lulukmu etma re yabuk anggur yabuk hun unuk Nabot ai eyabuk huli eke welatfag.

²Airoho wereg ma re nukoho eke salim Ahab en de Nabot fam uruk kwit de, “Hat heyabuk anggur yabuk aire an nobam olulukmu deg anggere, an den di angge su angge a yaruhuk en de, an og nimin. Haren airoho og-nuruhun halug de ai obalma re an den yabuk anggur yabuk mun fanoma eke og-huruhuk. Ne, haren lahe yabuk de nerim uang nenda behen halug de onggo fouk aleroho og-huruhuk,” ulug hweag-etfag.

³Airoho ebag ma at Nabot en de, “An neyabuk anggur yabuk aire an nomba-nambusi en enenggik ando deg ma re, nakni Allah owag anggere an den nakni hat de og-hitmin fug,” ulug hweag-etfag.

⁴Ai ebag ma at Ahab en hun Nabot en wene ebag ale anyo esanggo holfagdeg de enda mun si ebagdeg, ahummu het beil sombandoho obam lebagdeg de siburu na fug angge nohorukmu yinggig lit de orohole lahog-bahogdoho debebagdeg welatfag.

⁵Airoho wereg ma re at ohwe Izebel anyo kwebagdeg hein og-hauk kwit de, “Hat de henda mun sebe ehendeg siburu na fug angge welahen oma re nunggwelug?” ulug hein og-hebag.

⁶Hein webag ma Ahab en onggo uruk kwit de, “Hun Nabot aire an mun nerim. Aren anggur yabuk anyo an og nuruhunmu re an den onggo uang og-huruhuk ulug heng dihimen de, aren nerim eheikma re an nenda mun sebe eheikma welahi,” ulug hweag-etfag.

⁷Ai ebag ma at Izebel en de, “Hat de hebe raja ap homi Israel on enobahet welahen famen de airoho hweag-hereheik aire nakol. Ketia re hebe inatlug siburu nakin. An den Nabot en anggur yabuk ai hat og-huruhuk anggere henda seroho welamin,” ulug hweag-etfag.

⁸Airoho ebagdeg de lisu at Ahab unuk fam bale febagdeg de ebe fam cap Raja Ahab en on dag debelug de ap homi o Yizreel on melal-enepuk on mel, it enowesi ap log-lohon mel, fam monde febag.

⁹Monde febag ma re lisu aren monde febag on aire ebe diroho baleg latfag: “Ap homi enebe abirangge siburu na fug angge wereg lit o misigmu kabog-dul en de hweag-isil lakiyug. Airoho andog dulug de at Nabot anyo raja en huratuk angge fam etano hweria amag ulug hweag-umuhuk.

¹⁰Airoho hweag-utlug de ap biren on enobabut mun siag on de at Nabot olohotma huratlug de enggali waroho unggum obam foruk kwit de, diroho hweag-omag, Haren de Allah nim Raja Ahab nim ininuk sebele fehen aire mun kwasikdoho dehen, ulug de o kota elehet fak oho on en dag fil walug wilibik lalug de ebe helep fam mun obagdoho warukwag ulug hweag-sakiyug,” ulug baloho febag.

¹¹Airoho monde febag ma ap homi o Yizreel on melal-enepuk on omano mel ne it ap log-lohon mel en de hwe Izebel en lisu baloho og-esebag hagdoho debag.

¹²Airoho duruk kwit de ap homi mundoho en siburu na fug angge welamag ulug hweag-esebag ma re siburu na fug angge welatfag. Airoho wereg ma re enebe mundoho misigmu andog-dik wamag ulug hweag-esebagdeg andog-dik watfag ma re at Nabot anyo it enolohotma raja huratuk mu etano huramag ulug hweag-etfag.

¹³Airoho hweag-etfagdeg de ap enebe biren on enobabut mun siag on etano at Nabot olohotma huratfagdeg de enggali waroho unggum obam foruk kwit de, diroho ebag, “Haren Allah nim Raja Ahab inim inunuk sebeloho ferihin aire mun siagdoho dirihin,” ulug hweag-etfagdeg o kota elehet fak oho on en dag fil walug wilibik watfagdeg de helep fam obagdoho ebe binggi watfag.

¹⁴Airoho debagdeg de ap eke en de, “Nabot anyo helep en mun obagdoho warehe,” ulug hwe Izebel hweag-irik lebag.

¹⁵Airoho hweag-etfag ma re esanggo holfagdeg de hun Ahab fam uruk kwit de, “Nabot anggwenang hat hobam onggo balduk ale erim on anyo re ebe mundoho warehesa. Anggere at eyabuk anyo re haren honggwareg fahet akniapdoho sebelik lag,” ulug hweag-etfag.

¹⁶Ai ebag ma re Ahab ebe folo-folo lebadgeg de yabuk anyo at onggwareg fahet akniapdoho sebelik lebag.

¹⁷Airoho debag ma TUHAN en Elia obam Tisbe on anyo fam uruk kwit de,

¹⁸“Hun Ahab raja o Samaria on enobahet wereg on anyo en de hun Nabot en anggur yabuk anyo at indip on atmin ulug de sebelikoho lahareg wereg, anggere hat hebe at akit lakin.

¹⁹Lalug de TUHAN en de wene diroho eheik ulug hweag-umuk, Ebe mundoho warehendeg eyabuk de haren sebeleg latmin ulug ai a? Airoho dehen ai en de at Nabot amep mene en meldangdoho nasimu etan de hat oho hamep meladangdoho nahu, eheik,” ulug hweag-umuk ebag.

²⁰Ai ebag ma Elia ebe Ahab akit laukmu at Ahab en il hebagdeg hweag-utuk kwit, “Hat de an nim siagdoho welahe anyo famen de ketia an nakit waharuk kahen au a?” ulug ebag. Ai ebag ma at Elia en, “Demdoho. Haren de hebe Allah il hanim alemare fahat damin, ulug momal dehendeg duruk kahen oma re!

²¹Airoho duruk kahen ai en TUHAN en diroho eheik, An den unggum mun siag on hobam mondorik waruhuk. Airoho mondorik watlug hat hebe elehap hobahakeg, hat homaliki ap lohon mel doron mel mundoho enebe elehap debeseheg duhuk.

²²Haren de ap homi Israel on en siag dukwag ulug mamul-enepuk katihin ai fam de An nolokap kwelabe foruk katihin mu re, An den de Raja Nebat amloho Yerobeam omaliki nim, Raja Baesa hun Ahia omaliki nim debeserihik eta hagdoho hat homaliki nim oho airoho henobahakuk ulug hweag-hereheik.

²³ Ne, hohwe Izebel fahet, TUHAN en diroho eheik, At Izebel ebe wareg de o kota Yizreel ilonggoma etman mene en nahu.

²⁴Ne, ap homi hat homaliki on de o kota ilonggoma en waramuhup on etma re mene en nahup. Ne, o kota dag fil en waramuhup on etma re suwe en nahup, ulug eheik,” ulug hweag-etfag.

²⁵At Ahab en de Allah il hanim ebe alemaroho fahat-dauk katmin ulug ebe momaloho fahat debebagdeg duruk katfag ai hag de ap homi eke en airoho duruk katfag fug. At Ahab en siag duruk katfag on etma mundoho aire ohwe Izebel en endama kahaldukmu duruk katfag.

²⁶Ahab de duhwi kembu ap homi Amori on en apne waukmu, TUHAN en ap homi Israel on o Kanaan og-eneplug kwik lauk kwit muko wilibi fesebag on omano en duruk katfag hag duruk kwit de, aren de siag mun aben mel duk fug alereg on duruk katfag.

²⁷Elia en wene mundoho airoho hweag-etfag ma re Ahab esanggo holfagdeg, “An siag dihi,” ulug de asum wandeg latfag on anyo miyogdoho hwik-esebagdeg de sum karung on wandoho re siburu na fug angge wereg lit de, nohokeg, kwe laheg, duruk kwit de obam ape songdoho neg duruk katfag.

²⁸Airoho duruk katfag ma TUHAN en Elia fam uruk kwit de,

²⁹“Haren de Ahab ai An nil hanim enda sebele fahat deheikdeg duruk ale aire hauk kahen a? Aren airoho deheik ale ai fam de, An den at ebe oluk wereg li em de unggum etma obam fohuk fug. We at omaliki welamuhup li eta neg at omaliki enobam foruk karuhuk,” ulug hweag-etfag.