Read Ninia Yali 1 RAJA-RAJA 22 Bible Online

1 RAJA-RAJA 22 - Ninia Yali bible

1 RAJA-RAJA 22

¹Tahun biren eta fam de ap homi Israel on nim Siria on nim de weim abug eleg angge liolegma welatfag.

²Famen de tahun henahaneg on ai fam de, at Yosafat raja ap homi Yehuda on enobahet welatfag on anyo re hun Ahab raja Israel on enobahet welatfag on anyo ha lebag.

³At airoho owan la fug kweleg Ahab en autsi sehen seneg on omano fam de, “Hit de henoluk deg ai, o kota Ramot-Gilead aire niren on! Famen de niren nunggwelug raja Siria on enggikmu en del-dauk kahe fug?” ulug hweag-esebagdeg welatfag.

⁴Ai fam Yosafat watfag ma anyo re, Ahab en hein og-hauk kwit de, “Hat de an ninim seberoho o Ramot weim yabik laul henda a?” ulug hein og-hebag ma, Yosafat en onggo uruk kwit, “Fano, an nautsi tentara re hat hautsi tentara kuda emberim fam lauk on etma nim seberulusama nit nenebe ambine dog yabik kul.

⁵Famen de niren TUHAN fam atag hein og-hauldeg,” ulug hweag-etfag.

⁶Airoho hweag-etfag ma re at Ahab en it ap nabi anyo enebe 400 en kabog-debesebagdeg hein og-esauk kwit de, “An o Ramot ai enowarik lamin fano a, eleg a?” ulug hein og-esebag. Airoho ebag ma re iren uruk kwit de, “O kota aire Allah en hat henggikmu og-hirikohoreg angge re, lamihin fano!” ulug hweag-etfag.

⁷Airoho ebag famen de at Yosafat en hein og-hauk kwit de, “O suma re ap nabi eke en nit fahet TUHAN fam hein og-howag ulug de wereg fug a?” ulug ebag.

⁸Ai ebag ma Ahab en onggo uruk kwit de, “Hun Yimla amloho Mikha ai neg misig eke wereg. Famen de aren de an nobahet fano ale eke diroho aruhun ulug hweag-nom fug angge siag ale neg uruk en de, at fahet de an nerim deg lahi,” ulug ebag. Ai ebag ma re Yosafat en uruk kwit de, “Ahwi, airoho uruk eleg!” ulug hweag-etfag ma,

⁹Ahab en de ap pegawai misig eke wol-debagdeg mingming duruk kwit de, “Folo-folo hun Mikha anyo olohotma hondohweik lakin,” ulug hweag-etfag.

¹⁰Airoho mingming debag ma lauk kweleg de, eta li em de at Ahab nim Yosafat nim etanore o Samaria sokole humon kwik laukmu olohotma gandum anggen loldukmu etano enasum it ap raja en wan-duruk katfag on wan-debebagdeg hweriatuk angge kursi ap raja hwerieg on fam hwerieg latfag. It airoho hwerieg wereg ma it nabi omano en diroho aruhu suroho aruhu ulug wene hweag-esauk katfag.

¹¹It nabi omano enesahalimu en ap misig eke unuk Zedekia hun Kenaana amloho anyo en de, bosie on fam andimuk hag angge hilinggebagdeg de, aren Ahab hweag-utuk kwit de, “TUHAN en eheik on de su, Hun log haren de andimuk su hag angge fam it Siria on ai erap enebik kuhun,” ulug hweag-etfag.

¹²Airoho hweag-etfag ma re it nabi foma mundoho anyo en enele seberoho ebagdeg de, iren uruk kwit, “TUHAN en de hun log hat hibil halongap hobahamisimu dimihin on ai ambiangma mundoho aikohoreg angge re, Ramot ai, housalik kwin,” ulug hweag-etfag.

¹³It airoho uruk kweleg anyo re at Mikha hondohweik lowag ulug mondotfag on anyo en Mikha fam uruk kwit de, “It nabi fomane mundoho ai en de at raja along aruhu ale fahet uruk anggere, iren uruk hag nakni haren oho at raja fam aruhu ale etma fano ale neg in,” ulug hweag-etfag.

¹⁴Famen de at Mikha en uruk kwit de, “Nakni TUHAN oluk wereg on owag, anggere an den At Allah en imisi on neg imin!” ulug ebag.

¹⁵Airoho ebagdeg de at Mikha anyo Raja Ahab wereg ma olohotma etano inaik wahatfag ma, at raja en hein og-hauk kwit de, “An ninim Raja Yosafat inim, de o Ramot ai enowarik laul a, eleg a?” ulug hweag-etfag. Ai ebag ma at Mikha en de, “TUHAN en hun log hebe halongap hobahamisimu re hat fam ambiangma fano neg aikohoreg, anggere enowarik kwin,” ulug hweag-etfag.

¹⁶Airoho ebag ma re at Ahab en onggo uruk kwit de, “Wene ai fahet diroho iyug ulug de nunggwenam holuge hobahakuk? Haren TUHAN unuk fam an hweag-nutuk kahen halug de hele demdoho neg iyug,” ulug hweag-etfag.

¹⁷ Ai ebag ma re at Mikha en onggo lahogdoho uruk kwit de, “It ap homi Israel on anyo re domba gembala hwalduk on elegma duruk hagdoho dom kwe etmano linggik-longgo deg ma isihi. Ne, TUHAN en it fahet uruk kwit de, It ap homi sure enowesi melal-enepuk on eleg anggere, we enobam koloroho lowag,” uruk kaha,” ulug hweag-etfag.

¹⁸Ai ebag ma re at Ahab en Yosafat fam uruk kwit de, “At aire an nobahet aruhu ale ulug uruk kwit fano ale eke uk eleg angge mun siag ale neg uruk! ulug ihi anyo demdoho angge furin?” ebag.

¹⁹ At Mikha en eke nim uruk kwit de, “At TUHAN anyo re At ebe hwerieg wereg ma takhta fam boholma etmano hwerieg wereg ma, it ayonggo mon-enepuk on malaikat omano alulukmu unduhukmu isihi. Ne, ketiare At TUHAN en eheik on su henesanggo holiek!

²⁰At TUHAN en hein og-esauk kwit de, At hun Ahab ai o Gilead fam en Ramot etma weim yabik lamisimu waramagdoho, an lamin nenda boukwag ulug de hat san endama kwelabik lamihin? ulug hein og-esauk men de, it malaikat omano en onggo aham-fahamdoho uruk kahesa.

²¹Airoho ehesa-ehesa re ambiangma en de mungguat heime misig eke enam aik wahareg, aren TUHAN aluluk horogdoho etano inaik lalug ele uruk kwit de, At endama an den neg kwelabik lamin, ulug uruk kaha. Airoho urukmu re At TUHAN en hein og-hauk kwit de, Haren de keroho dehen halereg? ulug hein og-heheikma re,

²²Mungguat heime anyo en onggo uruk kwit de, “An lamin deg de at Ahab en de nabi etman mundoho enele seiale ukwag ulug enebik lamin, ulug uruk kaha. Airoho urukmu re At TUHAN en de, Haren endama kwelapmihin mu ambiangma fano aikohoreg anggere, ai fano, airoho dik lakiyug, ulug hweag-utuk kaha ma hihi,” ulug hweag-esebag.

²³Airoho hweag-esebagdeg en de nikangge at Mikha en uruk kwit de, “TUHAN en de hun log hat hobam anggin fanggin hobahakuk ulug mun wepdebesimu re, haren hautsi nabi oman seiale ukwag ulug TUHAN en debeseheik, alere airoho aha ai!” ulug hweag-etfag.

²⁴Airoho ebag ma re at Nabi Zedekia anyo inatlug hun Mikha aluluk lebagdeg ele uruk kwit de, “TUHAN Aheime en an nobahalug hat hobam neg ele hweag-hom alereg a?” ulug de Mikha orohole fam enggik en dagdoho watfag.

²⁵Airoho watfag ma at Mikha en uruk kwit de, “Hat o ambe eke fam herag atmin ulug kwik lamihindeg duruk men etma, ambiangma atmisi ale ai haroho hamihin neg!” ulug hweag-etfag.

²⁶Airoho ebag ma at Raja Ahab en miming enepuk kwit de, “Ap ai seneriek! Senetlug de o kota hwalduk ahun hun Amon anyo mel, hun raja amloho Yoas anyo mel, enekit og-esa lakiek.

²⁷Og-esa lalug de iren ap sabu hetdoho kwelap-enepukmu etmano kwelabe folug de, an weim abik laminmu etman nebe koloroho owan waharuk eleg kweleg etare siburu mel ik mel de we dorangge neg og-utuk kamuk, ulug hweag-esakiyug,” ulug hweag-esebag.

²⁸Airoho hweag-esebag ma re at Mikha anyo en uruk kwit de, “It ap homi mundoho dia wereg on aure inil wereg kweleg uruk kahi ai, hun log hat hebe lahe nikangge koloroho watmihin halug aire, TUHAN en an fene wene eheik fug ai boulusa,” ulug ebag.

²⁹Airoho debagdeg de raja Israel on Ahab anyo mel, raja Yehuda on Yosafat anyo mel, de o Gilead en kota Ramot anyo enowarik laul ulug lebag.

³⁰Lebagdeg Ahab en Yosafat fam uruk kwit, “Hat de sum hebe raja wereg lit wandeg lahen on anyo wandoho welamuk, ne an de ap we on hag atlug herag-herag it au ininim weim abik kwimin anggere,” ulug hweag-etfagdeg raja Israel on anyo weim yapuk kwit de, herag-herag inim yabik kwebag.

³¹Eta li em de it Siria enap sehen foroho on no kereta fam kulug dog yabik lauk enap enowesi panglima enebe 32 en omano re at raja en de it ap Israel on enowe raja ai neg hinim abiyug ulug hweag-esebag.

³²Airoho hweag-esebag ma re it anyo en Raja Yosafat inil hebagdeg de aure raja Israel on ulug de at watul ulug lebag. Famen Yosafat anyo ele ngaril lauk en de TUHAN Allah en de it anyo enorohole amu fil hwaloho monde-feseruk kwit de, at Yosafat anyo let debag.

³³Ne, it Siria enap tentara etmano en de aire raja Israel on fug beil lauk kwit de iren hun Yosafat watul ulug debag ale anyo hambuk hebag.

³⁴Airoho duruk kwit de, it tentara Siria on misig eke en de dog dima leheik lamin ulug mel hwaleg eleg angge andog misig eke hesangge leg hebag. Man de dog anyo hun Ahab asum sing wandeg latfag on anyo ayuhuk selebendeg kwe fologdoho re ebe warik lebag. At anyo airoho watil laukem Ahab en amingming angge kereta walug lauk kwit hwalduk katfag on anyo fam de, “An dog wareg lahi! Anggere, dog apukmu oman an og-naplug wilibik lakin!” ulug hweag-etfag.

³⁵Famen de dog yapuk katfag on anyo bale fouk fug ale mun dog ambiang neg wut watuk mu re, Raja Ahab anyo angge kereta anyo fam ologdoho lahabeg lit alukwe it tentara Siria on fil deg lit unduhuk welatfag. Airoho welatfagdeg de o mo obuk uruk li neg de at anyo waratfag.

³⁶Waratfag ma re at raja waratfag ai en de o mo obuk ikoho duruk kweleg etano re it Israel enap tentara omano re enobam kota

³⁷mel di kwe su kwe omano lowag ulug hweag-esebag. Ai ebag ma re enobam olma lebagdeg de at Ahab wareg anyo o Samaria salik lebag.

³⁸TUHAN en ebag ale etano higitdoho re it ap omano en hun Ahab angge kereta anyo fene mep omano ik Samaria sene fam horuruk men de hwelani hesangge neg hambena duruk on omano re etma kume watuk mu re mene en de kereta anyo fene mep omano meldang duruk katfag.

³⁹At Raja Ahab en duruk katfag ale mel, at obam andimuk on fam witfag on anyo mel, aren o kota witfag on fahet mel, de buku it ap raja Israel on en duruk katfag ale fahet baleg on anyo fam mundoho baleg wereg.

⁴⁰At Ahab ebe mundoho waratfag ma at obalmangge re Ahazia raja inatfag.

⁴¹Ahab ap homi Israel on fahet raja inatfagdeg melal-enepuk men neg tahun ohwaneg on deg li em, Yosafat hun Asa amloho anyo ap homi Yehuda on enobahet raja inatfag.

⁴²Eta li em de at ebe umur 35 tahun deg li inatfagdeg de o Yerusalem fam etma 25 tahun en melal-enepuk katfag. At isinga re hwe Azuba hun Silhi ahaloho anyo.

⁴³At akni Asa en duruk katfag hagdoho re at Yosafat en oho TUHAN il hanim mun bekit deg ale neg duruk katfag. Aren o kwenang aren melal-enepuk kwe omano en de kembu mot-duruk kwe ap mel homi mel enebe hesangge nenebukwag ulug hambena duruk katfag on hun Asa melal-enepuk katfag lien angge ando welatfag on omano mun enowatfag. Famen de aren obale kembu wirig kwe omano welelenggen debebag fug mu re ap homi en de di angge su angge waroho mel ne amben fano angge kemenyan mel de etman yalik lauk kwit neg welatfag. At Yosafat en de emas o Ofir en wag lauk on ulug de kapal Tarsis on witfag, famen de kapal omano o Ezion-Geber en siag atfag ma re o etma la fug ale atfag. Hun raja Israel on Ahazia en de at autsi kapal fam lahalug lauk enap de kapal etma fam at Yosafat autsi mel la ale fano, a ulug ebag famen de, at Yosafat ebe hun Ahazia inim de bali eberoho deg liren de nerim ulug embesebag. Ai en fobik en at Yosafat ebe waratfag ma re o kota Daud obam ap (...)

⁴⁴

⁴⁵

⁴⁶

⁴⁷

⁴⁸

⁴⁹

⁵⁰

⁵¹

⁵²At Yosafat ap homi Yehuda on fahet raja inatfagdeg melal-enepuk men neg de tahun 17 on deg li em de at Ahazia ap homi Israel on enobam fahet raja inatfagdeg o Samaria fam etma tahun biren melal-enepuk katfag.

⁵³Aren de it akni mel isinga mel Raja Yerobeam mel en duruk katfag aleroho enobabut wal-heheg duruk kwit de TUHAN il hanim siag duruk katfag ma, aren duruk ale muko re it ap homi Israel on oho siag neg duruk katfag.

⁵⁴Aren de Baal apne wauk kwit de obahet duruk katfag. Ne, at akni ebe raja atam wereg lit melal-enepuk katfag on en duruk katfag hagdoho re, aren oho TUHAN Allah ap homi Israel on en apne wauk on anyo olokap kwelapuk katfag.