Read Ninia Yali 1 RAJA-RAJA 3 Bible Online

1 RAJA-RAJA 3 - Ninia Yali bible

1 RAJA-RAJA 3

¹At Raja Salomo anyo raja Mesir on nim seberebagdeg de hun ahaloho duhum anyo hwelebag. Hwele anyo re Salomo en hwelebagdeg de walug o kota Yerusalem akni Daud obam anyo welamag ulug walug watfagdeg weregman neg de o sili at raja ebe wereg ma anyo nim TUHAN Obam anyo nim elehet o Yerusalem maseroho anyo nim mundoho witfag.

²Eta li em de TUHAN Obam owan wirig eleg ai en de ap homi wam mel di angge su angge mel TUHAN obahet on de di kwe su kwe en yal-utuk katfag.

³Ne, at Salomo en de TUHAN fam enda hundig deg lit akni en diroho duruk kamuk ulug melaloho hweag-etfag ale omano higitdoho duruk katfag famen de wam di angge su angge TUHAN fahet yal-utuk on aren hesa kwe etman yal-utuk katfag.

⁴Allah obahet duruk kwit indip alongdoho wam di angge su angge yalduk katfag ma re o Gibeon etma welatfag ma re at Salomo en di angge su angge Allah obahet etma yal-irik lebagdeg de nukoho eke salim di wam su wam ebe 1.000 en yal-etfag.

⁵Airoho yalfagdeg o hup anggo norohoruk men de TUHAN en olohotma inaik watfagdeg a fam hweag-utuk kwit de, “Salomo, haren henda angge An den og-huruhuk en de hweag-numuk,” ulug hweag-etfag.

⁶Ai ebag ma Salomo en onggo uruk kwit de, “TUHAN nakni, Hat hamingming angge an nakni Daud anyo hat hobam mun dipdoho neg wereg lit fanoroho neg duruk katsi ai en Hat henda hundig deg lit let-hauk katihin. Fobik at henda hundig deg lit neg welaruhun on ai eneg amag ulug amloho an nebe au og-itihin mu, ketia an at obalma raja inatihikdeg ap homi melal-enepuk kwit welahi.

⁷TUHAN Allah hunuk bogdeg nakni, an nebere mun doron deg lahimu re ap homi melal-enepuk ale fahet nape nong-hong deg lahi famen de Haren an nakni obalmangge unduhuk nobaharihin ai, nakni.

⁸An de Hat homaliki enunggul unuk Haren momal-enepihin on enesahalimu welahi. Ne, ap homi oma enebere enunggul unuk hum enap deg ma wenahauk fug aleroho deg.

⁹Nakni, ai fahet de an den homaliki au melal-enepuk wereg lit, mundoho nenda mun wenggeleg fam wene katukdoho baleheg, fano on mel siag on mel, enereheg, duruk karuhuk en de nenda ai on og-netlen ulug hweag-hirihi. Famen de haren airoho og-nutuk eleg halug ap homi Hat homaliki enebe hum-ham ale on au keroho melal-enepuk karuhuk behen?” ulug hweag-etfag.

¹⁰Airoho ebag ma, TUHAN en de, “Salomo en heng nabeheik on aire fano,” ulug ai bebag.

¹¹Ai bebagdeg Salomo fam uruk kwit de, “Haren de hebe umur yatdoho welaruhuk en ulug oho, ne henggik wereg on welaruhuk en ulug oho, ite hat haselei on enowatuk karuhuk ale fahet ulug oho heng nabehen fug, famen de ap homi fanoroho melal-enepuk karuhuk en ulug henda enggatdoho duruk ale fahet hweag-nerehen ai en de,

¹²haren heng nabehen angge aire An den mundoho og-huruhuk. Hat hendama mun enggatdeg lit di wene su wene enegdoho kumu hauk karuhun en hobahakuk on ai hag on de ap homi hat hebe owan endag-am fug mu enenda ai hag on eke og-esauihik fug. Ne, fobik hat hebe eleg aruhunmen oho eke og-esahuk fug neg. We hat og-huruhuk ai neg.

¹³Ne, haren amu angge eke heng nabehen fug on famen ohore og-huruhuk neg. Aire hat hebe holuk welaruhun huli etma it ap raja amu on de we horog sebeleg hag deg kweleg, hat neg de hangge di angge su angge hilmu wereg neg deg ma ap en oho alongdoho halong bolug leho hobaharuk kamuhup.

¹⁴Ne, haren de at hakni Daud en duruk katsi hag, An den nele melaleg diroho diyug suroho diyug ulug hweag-hesauihik on anyo duruk karuhun halug hebe holuk umur yatdoho welaruhun en hobahakuk,” ulug hweag-etfag.

¹⁵Airoho hweag-utuk mu a hebagdeg, oluk atfagdeg, Allah en na fam hweag-nutuk mu hihi ulug furebebag. Airoho furebebagdeg ambol somban de o Yerusalem watfagdeg TUHAN Wene Sali wareg yohwareg angge Peti anyo olohotma unduhuk lit, wam di angge su angge Allah obahet waroho yal-ereheg, ne wam TUHAN en fanoap nenebukwag ulug heng duruk kwit on et waroho yal-ereheg debag. Airoho debagdeg de autsi pegawai abirangge fahet soni esetfag.

¹⁶Salomo en airoho debagdeg wereg ma, nukoho eke salim de homi enebe biren hambena dil noruk katfag on at Raja Salomo wereg ma kwik watfag.

¹⁷Kwik watfagdeg it homi etano eke en diroho ebag, “Nenakni, homi eke amu on nim deg fug we hwe su nim o misigmu welahe. Wereg lit de an den nomalik ap angge endag dauihik. An endag dauihik mu en nenenggik biren angge welatlug de at su oho omalik ap angge endag dasi neg.

¹⁹Airoho endag dauhuk deg nohoruk kwit de, at hwe su omalik nohorukmu isinga enden damin ulug duruk men de omalik anyo ebe en bereloho waratsi.

²⁰Waratsi mu re o hup andundu an nohoruk kweleg hwe au inatsireg de an nomalik nalukwema yinggimu wag wahasireg de an nomalik de at nohorukmu etano feik lalug, at omalik waratsi on anyo oko an namigmu nohoruk katihik mu etano feik wahasi.

²¹Mu re o sekan disimu an noluk atihikdeg nomalik ag og-itmin ulug duruk men de nomalik anyo waratsi angge deg ma hauihik. Aireg ma hauihikdeg nil furoho kumu hauk men de an nomalik an den endetihik on anyo hag deg fug mu hauihik,” ulug hweag-etfag.

²²Airoho hweag-utuk mu re at hwe eke anyo en de, “Hele seiale uruk kahen. An nomalik de oluk wereg su, ne hat homalik de waratsi ai,” ulug hweag-etfag. Airoho ebagman de at hwe atam ebag on anyo en de, “Eleg. Waratsi on aure hat homalik oluk wereg on aire an nomalik,” ulug ebag. Airoho uruk kwit de iren hun raja olohotman suahal ebag.

²³Airoho ebag ma at Raja Salomo en uruk kwit de, “Hat eke su en de, an nomalik de oluk wereg on su ne hat homalik de wareg on ai eheg, ne hat eke en de eleg, hat homalik de wareg on su, oluk on aire an nomalik eheg, duruk kahep,” ulug hweag-esebag.

²⁴Airoho ebagdeg ap eke en karog ap enowatuk on wowag ulug hweag-etfag ma webag ma,

²⁵at raja en uruk kwit de, “Omalik oluk wereg on ai bul houwisoho re homi eiya eke foma eke foma og-esakiek,” ulug hweag-esebag.

²⁶Wene airoho urukmu enesanggo holfagdeg at hwe omalik demdoho oluk wereg latfag on anyo en de, “Nowe omalik ai waruk fug. Oluk embeselug de at hwe au og-imin,” ulug hweag-etfag. At hwe aire omalik fahet mundoho endarebagdeg de airoho hweag-etfag ai. Airoho ebag famen de at hwe eke anyo en uruk kwit, “Omalik au niren at eke fam neg og-utuk men de siag, anggere, houwisiek,” ulug ebag.

²⁷Airoho ebag ma at Salomo en autsi fam de, “Omalik ai isinga re ele atam waruk fug we oluk embeselug de hwe ele atam eheik on ai anggere og-emek, omalik ai isinga re ai anggere,” ulug hweag-esebag.

²⁸At Salomo en unggum ai higitdoho bilonggoho kong-debag ai en de it ap homi Israel on en enesanggo holfagdeg de, “At Allah en de Salomo en di unggum su unggum higitdoho kong-duruk kamag ulug endama mun wenggeleg on og-itsi mu wereg angge anyo i,” ulug yande debagdeg enele anggilukdoho Salomo along bolug leho febag.