Read Ninia Yali 1 RAJA-RAJA 5 Bible Online

1 RAJA-RAJA 5 - Ninia Yali bible

1 RAJA-RAJA 5

¹It ap homi Tirus on enowe Raja Hiram aire at Raja Daud nim hundig latfag. Ma re fobik en Daud obalma re Salomo raja unduhuk fousa ma wereg ebag ma aren autsi at Salomo akit mon-enebik watfag.

²Mon-enebik watfag ma Salomo en ohore Raja Hiram ai en let-neowag ulug wene mondotuk kwit,

³“Hiram nowe. Ap homi enunggul unuk nit horog kwe wereg on oman an nakni Daud nim weim yapul ulug neg dik waharuk en weim yapuk katsi ale anyo re hat holuk deg. Ne, TUHAN en oho Daud aselei on fam en alongap debesouk fug mu re aren akni TUHAN Allah Obam At obahet durukmu anyo wuruk fug angge welatsi.

⁴Famen nakni TUHAN Allah en ap homi an den melal-enepuk kahi on enobam lombukdoho welamag ulug nenobahasimu, ap homi naselei on mel eleg angge ne unggum siag on nenobam am fug angge welahe.

⁵ TUHAN en an nakni Daud fam hweag-utuk kwit de, An den hat hobalmangge hamloho raja welamag ulug unduhuk fohukmu aren An nobahet ale duruk kamuhupmu Nobam eke wuruhu ulug wene sali hweag-itsi ai en de, nowe an Salomo en o wuruhuk en ulug duruk kahi.

⁶Famen de nowe, ap hat homaliki etman e mutuk ale enoluk deg hag de an nomaliki suma re mun enapeleg ale aire nowe hat holuk deg. Ai en de nowe hat homaliki etma on en e lak o Libanon on eke an nobahet murukwagdoho hweag-esahun en hweag-hutuk kahi. Airoho mutuk mu re an nomalik en it let-esowag ulug enayonggo fesehuk. Ne, haren ap e muruhup on etma onggo huli deta fam og-esakiyug ulug uhun halug de, an den og-esahuk,” ulug wene mondotfag ma hweag-irik lebag.

⁷Airoho hweag-irik lebag ma re Hiram esanggo holfagdeg de endama ahayeg hebagdeg uruk kwit de, “Yoho su salim TUHAN mot-dul. At Daud en amloho enda mun wenggeleg neg deg on ai ap homi enebe humdoho etma melal-enepuk kamag ulug og-etfag ai en de Allah mot-dul,” ulug ebag.

⁸Airoho ebagdeg wene at Salomo en ebag ale anyo fahet at Hiram en onggo diroho ulug mondorik lebag, “Haren wene an nobam monde feik waharuk kwit heng napihin angge aire an mundoho nil hauihikdeg de etma mundoho let heahuk en ulug deberihik. Airoho berihik deg de an den e lak o Libanon on mel ne e lak amu on mel memeroho folug de haren heng napihin on ai fahet fohuk.

⁹Ai mundoho fouk deberuk halug de an nomaliki en e ebe walug o Libanon en de ik laut yenggelegma etma wambik wamuhup. Wambik watlug etman de e ebe sabu fam eraroho het-debelug de ik esanggo kwe en de haren o deta walug manu uhunmu etma walug wamuhup. Ne, etman de sabu fiselaroho re hat homaliki on en walug lowag ulug enenggikmuap debehuk. Walug waharuk halug de haren de ap homi an nobam silimu suma wereg on enasiburu nauk kamuhup on fahet fouk debehun en heng habihi,” ulug ebag ma hweag-irik lebag.

¹⁰Airoho hweag-irik lebag ma re at Hiram en de e lak o Libanon mel, e lak amu on mel ne e at Salomo en nenda ulug ebag on etmano mel mon-enebik watfag.

¹¹Mon-enebik watfag ma Salomo en de ap homi at Hiram obam olma welatfag on etmano enesiburu nauk on fahet de tahun hundig-hundig fam de gandum de 322.500 kilo en nim ne zaitun ahalue re 4.400 liter [5] en heg Raja Hiram obahet feselug monde feseik lauk katfag.

¹²TUHAN en Salomo fam sali hweag-utuk kwit de, “Henda wenggeleg laruhun on og-hiruhuk,” ulug abug hweag-etfag on anyo dipdoho og-etfag. Og-etfag ma re Salomo en de Raja Hiram nim hundig wereg lit de, Ninim fano airoho hundig welamuhuk, ulug wene sali wat-wat atfag.

¹³Airoho ebagdeg at Raja Salomo en ap enenggik onggo eleg angge yabuk dukwag ulug enebe re 30.000 en angge ap homi Israel on wereg kwe di kwe su kwe etmano en mundoho enayonggo febag.

¹⁴ Enayonggo febagdeg hun Adoniram en melal-enepuk kamag ulug unduhuk febag. Unduhuk febagdeg de enebe kabog henahan en lohwale fesebagdeg kabog etano domog-domog de ap enebe 10.000 en heg fesebag. Airoho fesebag ma re it anyo re bigalem eke fam de o Libanon welaheg, ne bigalem biren fam de enobam welaheg duruk katfag.

¹⁵Airoho debesebagdeg At Salomo en de it eke domma lahalug helep humon fam fele heheg ayuhuk hwal heheg foukwag ulug ap enebe 70.000 en yonggo fesebag.

¹⁶Salomo en de airoho yonggo fesebagdeg it yabuk durukmu melal-enepuk kamag ulug de ap foma enebe 3.300 en momaloho unduhuk fesebag.

¹⁷At Salomo en airoho momal-enepfagdeg unduhuk fesebag ma re TUHAN Obam wituk kwit oboule foruk on fahet ulug de helep humon mun fano on felerebag.

¹⁸Airoho at Salomo omaliki mel Hiram omaliki mel, ap homi o kota Kebal on mel, en de TUHAN Obam wiruhuk en ulug helep mel, e mel, airoho fouk debag.