Read Ninia Yali 1 RAJA-RAJA 6 Bible Online

1 RAJA-RAJA 6 - Ninia Yali bible

1 RAJA-RAJA 6

¹Airoho melale fesebagdeg ap homi Israel on o Mesir en wilibik watfag huli en de 480 tahun welatfagdeg en, at Salomo ebe raja inatfagdeg de 4 tahun welatfagdeg, bigalem iren wenaharuk katfag aleroho on de bigalem bireneg on aire unuk Ziw wereg kweleg o TUHAN Obam anyo wituk ale fahet indip debag.

²O TUHAN Obam ai wirikoho ilit angge ilonggo elekwe ilit debag on de su: Yatdoho re 27 meter en, nunggulig de 9 meter en, ne lahabegdoho re 13,5 meter en.

³O TUHAN Obam ai olohotma re o ambe humon aire yatdoho re 4,5 meter en, ne nunggulig de 9 meter en o ebe ai deg ale anyo hagdoho.

⁴O ai obahat ai fam en de seleg fahet da fo ya fo yendeko dag fil ilonggoma anggweroho kwelabeg latfag.

⁵O ai ambol fil etma maseroho owag dag fil de ambe huli heg witfag. Huli-huli eta re henahan wirigmu re amu domog de 2,2 meter en witfag.

⁶Huli keram on fam de ambe etma domog en healoho witfag ale re 2,2 meter en, ne huli bireneg on fam de 2,7 meter en, ne huli henahaneg on fam de 3,1 meter en. Obahat apma on aire huli emberim on fam etmano re dotdeg kweleg de ai neg de wilim deg latfag. Ma re e oangge ambe obam dopnoroho ulug witfag on aire o TUHAN Obam anyo obahat owag anyo fam dilong fololuk eleg angge hundi febag.

⁷E o angge etma re e lak o Libanon en omano fam witfag. O ambe dopnoroho wirig on etma fam lauk on fahet sokole re il apma selatan fil etma welatfag, ne ambe huli bireneg on mel henahaneg on mel fam etma lauk on fahet de yal bombaloho witfag. Ai en at Salomo en de o anyo ambolma wituk kwit de salikano mel e kahaleg on mel de e lak o Libanon fam on etmano fam witfag. O TUHAN Obam ai wituk leim de helep o fahet wituk on ulug de indipmu feleroho kabog-durukmu etmano en mundoho fik-fouk debag ma atlug de o wituk li em de bosiemanggen delduk angge aplohok oho, yaha aplohok oho, ne bosie on aplohok ulug oho eke uruk katfag fug. Airoho neg wituk men de at Salomo en TUHAN Obam anyo mundoho witfag.

¹¹Airoho witfag ma TUHAN en Salomo fam uruk kwit de,

¹²“An den nawene melaleg diroho diyug airoho diyug ulug hweag-hesauihik on ai, haren mundoho holoho neg duruk karuhun halug de, An den hakni Daud hweag-utuk kwit, An den diroho hapuk karuhuk ulug wene sali hweag-itihik on ai ebere hat hobam hobahakuk. Haren An nobam ap homi Israel on enesahalimu wirehen on ai, An nebe ilonggoma wereg lit it embeselug lahuk fug,” ulug hweag-etfag.

¹⁴At Salomo en TUHAN Obam anyo mundoho witfag alere diroho:

¹⁵Obahat ilonggo fil on abirangge re e lak Libanon on fam sapliroho hwenieman de ambolma huli witfag. Hwenie re e lak hesangge on fam witfag.

¹⁶ O ai ilonggoman o ebe ambol fil etma re ambe eke e lak hesangge on fam huliroho hwenieman de ambolma huli witfag. Ambe aire unuk Ambe Mun Amu enegma; ebere ilonggo deg latfag alere 9 meter en fam witfag.

¹⁷Ambe eke Ambe Mun Along Enegma anyo olohotma aire unuk Ambe Humon uruk katfag, ne ilonggo elere 18 meter en debebag.

¹⁸O ai obahat ilonggoma hulireg on etma re e lak o Libanon on etmano fam sapliroho witfag ma re helep obahat huliroho witfag on etmano re enameg latfag fug. E sapliroho wirig on etma fenere alili angge hobut mel owil-owil angge keron mel hwesesengge oko witfag.

¹⁹O TUHAN Obam ilonggoman Ambe Mun Along Enegma witfag on aire TUHAN en Peti Sali Wene wareg anyo fahet fouk debebag.

²⁰ Ambe ai unggut nunggulig on mel ilihig on mel lahabeg on mel de higit deg latfag, ai ebere 9 meter en deg latfag. Mezbah Ambe Mun Along Enegma ai alukwema aire e Libanon en omano fam witfag. Ambe ai fam kwik laukmu sokolma etma re bosiemanggen emas on elang deg angge boreg latfag. O TUHAN Obam ai ilonggo elekwe abirangge mel, Ambe Mun Along Enegma ai mel mezbah mel etma re emas fam neg sapliroho witfag.

²³ Ambe Mun Along Enegma aire kerub [6] ahut ilit deg biren angge e zaitun on fam wirig angge etano febag. Ahut ilitdeg biren angge eta ebe domog lahabeg yatdoho re 4,4 meter en;

²⁴unggut-unggut mel, ebe obabut mel de birenet misig aleroho deg ma amu-amu re enahwerabul biren wereg ma ahwerabul misig aire yatdoho re 2,2 meter en deg latfag. Ahut ilit deg biren angge eta eke fam en eke fam il yatdeg latfag alere 4,4 meter en.

²⁷Ahut ilitdeg biren angge etano re o Ambe Mun Along Enegma anyo eraroho foma-foma febag ma re enahwerabul eke en de o obahat bal hauk katfag, enahwerabul fomane en de o ambe anyo bulmu etma bal-bal atuk katfag.

²⁸Kerub biren angge ahut ilitdeg etare no emas fam sapliroho witfag.

²⁹O TUHAN Obam ai ilonggo elekwe etma abirangge re alili angge kerub on mel, e lua hag on palem mel, owil angge keron mel hwesesengge oko ilit deg latfag.

³⁰O TUHAN Obam ai ilonggoma hwenie etma re emas on fam sapliroho witfag.

³¹O Ambe Mun Along Enegma ai kwik laukmu sokolma etma re sok biren angge e zaitun on fam wiri febag. Sok ai ambiang emberim fil de bulmu simbukdoho hagdoho nganog debebag.

³²Sok biren angge eta fam de alili angge kerub on ilitdeg mel, e lua hag on palem mel, owil angge keron mel, hwesesengge oko ilit debebag. Ne, ilit debebag angge eta abirangge re emas on sapliroho neg hilinggi febag.

³³O ambe olohotma on ambe humon anyo fam kwik laukmu sokolma etma re, sok ambiang sebeloho ulug de e zaitun on fam unggut ohwan deg angge ilit debebag.

³⁴Ai en sok eke biren angge e lak hesangge on fam wiri febag ma enamegma hauk katfag.

³⁵Sok eta fene re ilit angge kerub on mel, e lua hag on palem mel owil angge keron mel hwesesengge oko ilit debebag ma, ilit angge eta abirangge re emas on fam sapliroho ilit debebag.

³⁶Airoho debebagdeg o TUHAN Obam ai olohotma re ambe lilimol ilonggo fil witfag. Anggen obahat aire obahat aldap-aldap angge maseroho witfag: Ne, helep wirig on aldap henahan wirigmu re e lak o Libanon aldap eke wirig latfag.

³⁷At Salomo en de TUHAN Obam aire oboule re at raja inatfagdeg melal-enepuk katfag on de tahun ohwaneg on wereg kweleg, bigalem iren wenaharuk katfag on de Ziw, bigalem bireneg on ai wereg kweleg indip debag.

³⁸Airoho indip debagdeg aren ap homi Israel on melal-enepuk ale anyo re tahun nanggolop on fam aik lebag ma bigalem iren on de bigalem Bul aire bigalem bireneg on wereg kweleg, wiruhuk ale ulug wene melalfag ale higitdoho mundoho witfag. O ai wituk men neg de tahun sabiren debag.