Read Ninia Yali 1 RAJA-RAJA 8 Bible Online

1 RAJA-RAJA 8 - Ninia Yali bible

1 RAJA-RAJA 8

¹ Airoho debelug de Raja Salomo en de it Israel on enowesi mel it melal-enepuk on mel mundoho at akit o Yerusalem kabog-dik watlug Peti TUHAN en Sali Wene wareg anyo Daud obam kota Sion en walug de TUHAN Obam wirigmu o Yerusalem walug feik wamag ulug mingming-enepfag.

² Airoho mingming enepfag ma re it anyo bigalem iren wenaharuk katfag aleroho re bigalem Etanim ai fam, ap homi mundoho en atam it Israel on enebe O Sabo sal heheg welatfag ale fahet ebetuk salim kabog-dik watfag.

³It Israel on melal-enepuk on etmano enebe abirangge kabog-dik watfagdeg it imam on en de Peti Sali anyo bearebag.

⁴Bearulug de TUHAN Obam wirigmu anyo feik watfag. Ai feik waharuk kwit de TUHAN Obam Sabo anyo mel di angge su angge etma welatfag angge mel, it imam on mel Lewi enap mel en de TUHAN Obam wirigmu feik watfag neg.

⁵Feik watfag ma re Raja Salomo mel ap homi Israel on abirangge mel de Peti Sali anyo olohotma kabog-debagdeg de domba mel sapi mel mun wenahauk fug aleroho TUHAN obahet waroho og-etfag.

⁶Airoho debelug de it imam en de Peti Sali anyo o TUHAN Obam wirigmu walug kwebagdeg de Ambe Mun Along Enegma en kerub on ahut ilitdeg wereg ma etano febag.

⁷Airoho febag ma re kerub ahut ilitdeg etano enahwerabul en de peti anyo mel e beahan mel sebeleg welatfag.

⁸E beahan etare yarangge deg ma re, ambiang de Ambe Mun Along Enegma ai olohotma etan de enamegma hauk katfag. (Ketia huli en de e etare eta wereg.)

⁹ Peti Sali ai ilonggoma re amu angge eke kwelabeg wereg fug mu re, we helep biren angge ap homi enunggul unuk Israel on o Mesir en Kanaan wamul ulug waharukmu TUHAN Wene sali wat-esebag ma Dom Sinai fam en at Musa en yohwaroho kwelabe febag on etano neg welatfag.

¹⁰ It imam omano en peti anyo folug wilibik waharuk men de fetagdoho etano o hena TUHAN Obam anyo salik watfag.

¹¹Salik watfag ma re TUHAN ebe wereg ulug anggilukdoho re o hena anyo helag-felag angge debag ma re ap imam omano yabuk dukoho nikangge kuk ale nong-hong ebag ma bok atfag.

¹² Airoho debag ma at Salomo en somban uruk kwit de diroho ebag, “TUHAN nenakni mo bohol fam ferihin on. Famen de Hat hebe hena heik deg on fam wereg ale fahet hendareg lahen.

¹³Famen de ketia Hat hebe o su fam mundoho-mundoho wereg laruhun en ulug ketia an den Hobam mun ebe on wiri hobahaki ai, nakni,” ulug somban ebag.

¹⁴Raja Salomo en somban airoho ulug alukwe hebeloho ap homi mundoho etma unduhuk wereg on inibil aik watfagdeg Allah en it enobam fanoap debesoukwag ulug heng debag.

¹⁵ Heng uruk kwit de, “Nakni Haren atam an nakni Daud fam sali hweag-utuk kwit de diroho irihin, An den nomaliki Israel on o Mesir en og-eneplug wilibik waharihik huli en, it Israel on enobam kwenang fam etma An nobahet duruk kamuhupmu en ulug obale momaloho ferihik fug famen de, hat Daud en An nomaliki melal-enepuk karuhun en ulug momaloho hobahaki! ulug wene sali hweag-itihin on anyo ebe dipdoho dirihin ai en de, ap homi Israel on nenakni TUHAN Allah ai motdeg neg welaruhun!” ulug ebag.

¹⁶

¹⁷ Airoho ebagdeg it ap homi omano enobam uruk kwit de, “An nakni Daud en de nit ap homi Israel nenakni TUHAN Allah obahet duruk kamuhupmu ulug obam witmin ulug disi.

¹⁸Famen de TUHAN en at fam uruk kwit de, Hat hendama behen ale aire mun fano famen de,

¹⁹ haren wiruhun fug. Hat hamloho enderuhun on ai en An nobam wiruhu, ulug sali hweag-itsi.

²⁰Mu re airoho hwag-itsi on aire ketia ebe dipdoho dirihik ai. Ketia re an nebe nakni obalmangge raja inatihikdeg, nit Israel on nenakni TUHAN obahet duruk kamuhupmu fahet obam mundoho witihik ai.

²¹Airoho witihikdeg de Allah en it nenombasi o Mesir en og-eneplug wilibik waharuk kwit wene sali it inim TUHAN inim wat-wat atswa on Peti fam yohwareg on anyo foruk obam fahet o witihik ai,” ulug hweag-esebag.

²²At Salomo en wene airoho hweag-esebagdeg ap homi kabogdeg on etmano enolohotman de Salomo ebe mezbah wirig fil alukwereg lit enggik birenet lahaboho re,

²³somban diroho ebag, “Nit ap homi Israel on nenakni TUHAN Allah, bohol fam inim kwenang fam inim Hat hag on eke wereg fug! Haren diroho suroho henepuk karuhuk ulug wene hweag-nesauihin on ai, homaliki nenenda misig debelug hobam dipdoho wereg lit hele holoho neg durukmu, ebe dipdoho neg duruk kwit henda hundig nenepuk kahen ai, nenakni.

²⁴Haren an nakni Daud fam wene sali waritihin on ai ketia ebe dipdoho neg yoho dehen ai, nakni.

²⁵ Haren an nakni Daud fam sali hweag-utuk kwit de, Ap homi haren ondohoma on en, haren duruk kahen eta hag, dipdoho neg duruk kamuhup halug de hat hambiangman ondoho on etman de ap homi Israel on fahet raja inatil neg lauk kamuhup, ulug sali waritihin on ai mundoho dipdoho neg diyug, nakni.

²⁶

²⁷ Famen de nakni Allah, o Hat hobahet duruk kamuhupmu aure mun dotdeg ma re, Hat hebere o boholma ulug fam en ohore welahen ha ale fahet ilitdeg fug mu re, kwenangma suma Hat higitdoho welahen ha alereg a?

²⁸Nakni TUHAN Allah an nebe sure Hat hamingming angge, famen de an den somban hobam uruk kahi on su hesanggo holug de, ketia heng-hapuk kahi on ai ele holoho diyug.

²⁹ Nakni, hat hobahet duruk kamuhupmu hobam wirukwag ulug obale momaloho fahat dauihin mu, wiroho hobahaki on sure hebe nukoho nim hup anggo nim o au along baloho foroho nu. Hat hebe bohol fam welahenma etma wereg lit, an nim it homaliki abirangge su nim en siag dulug Hat hobam wirigmu su holohotma kabog-dik watlug, Hat hobam somban urukmu nenele hesanggo holug de siag duhuk on etma elehapdoho nenobaharuk kamuk.

³⁰

³¹At eke en it eke on siaho fesemin ulug wene obam dopno halug, ebe hondoholug Haren on mezbah o Hat hobahet durukmu wirig on au fam watlug at ai en de, an den siag dihi fug ulug Hat hunuk hombuk baloho ulug waharukmu re,

³²nit hamingming angge en unggum ai bilinggurukmu hebe boholma wereg lit nenele hesanggo holug de unggum ai kong-duruk kamuk. Airoho kong-duruk kwit de it eke en siag duruk aleroho unggum enobam foruk kwit de, it eke siag duhup fug on halug de loloho feseruk kamuk, nakni.

³³Homaliki Israel on en siag duhup ai fam it enaselei on enalong elehap debeselug enowatuk em somban hakit watlug, nenakni TUHAN halong bolug leho hobahakeg, ne Hat hobam wirigmu suma watlug nit siag duruhuk on etma hapelehapdoho nenobahain ulug heng-hapuk halug,

³⁴Hat hebe bohol fam etma wereg lit enele hesanggo holduk kamuk, nakni. Haren de it homaliki en siag duhup on etma hapelehapdoho embeselug de enobam it enombasi on fam enanggwenang og-esauihin mu suma sombandoho og-eneplug waharuk kamuk.

³⁵Ne, Hat homaliki en hele sahale folug durukmu, Haren unggum enobam folug osit belabik wam fug angge embserukmu, nit siag duruhuk ulug enobabut aham dulug, nenakni TUHAN Hat neg ulug halong bolug o Hat hobahet duruk kamuhupmu su fam watlug somban yiko heng-hapuk halug de,

³⁶Hebe bohol fam wereg lit enele hesanggo holduk kamuk, nakni. Hole folug de it ap homi Israel on mel, nit enowesi raja mel Hat hele sahale folug siag duhuk on ai elehapdoho nenobaharuk karuhun. Airoho nenobahalug de niren demdoho on neg duruk kamag ulug mamuli-nenobaharuk kamuk. Nenakni TUHAN, Haren airoho debeseruk halug de o kwenang Haren it homaliki on indip on atlug mundoho-mundoho welamag ulug og-nesauihin mu oma fam osit belabik waharuk kamuk.

³⁷O suma lahe siburu obok ane, ouk indip siag on ane enam aheg, hol sielu ahanhan on furik waharuk kwit di angge su angge yaho on unggul wareheg, oluk-oluk angge en ane, bulue en ane siaho feheg, it homaliki enebe ap enaselei on en enowareheg, duruk halug de,

³⁸enele hweag-hutuk on ai hensanggo holduk kamuk nakni. Homaliki Israel on enesahalimu en enenda hesilduk kwit enenggik o Hat hobahet duruk kamuhup obam su fil bilig lit Hat hobam somban urukmu,

³⁹Hat hebe bohol fam wereg lahenma etman enele hesanggo holug de siag duhup on etma elehapdoho embeselug di on su on let-enepuk kamuk. Nakni Hat hamu neg de ap homi enendama boruk ale etma holuk deg lahenma re, Hat homaliki o nit nenombasi og-esauihin mu suma fam wereg lit, Hat hebe fam halong bolug hele holoho neg duruk kamag ulug de, it enebe domog en siag deheg, fano deheg duruk kamuhup ale etma higitdoho unggum enobam feheg, enereheg, duruk kamuk.

⁴⁰

⁴¹Haren homaliki enobam duk fug alereg on duruk katihin ale etma fahet habug fano eheg, mot-habeheg, durukmu ap homi bohon enobam yatma on en enesanggo holug, o Hat hobahet duruk kamuhup obam au fam watlug, mot-habeheg, heng-habeheg, durukmu,

⁴²

⁴³Hat hebe bohol fam welahenma etman enele hesanggo holug heng habuhup angge etma og-esauk kamuk, nakni. Airoho debeseruk karuhun halug ap homi enunggul unuk domog o di o su o wereg on en de, nit homaliki Israel on en hebe nenoluk deg lit hele nenesanggo holoho duruk kahe hagdoho duruk kamuhup. Airoho duruk kwit de an den o Hat hobahet wiri-hobaharihik on su fahet de, iren de Allah obahet duruk kamuhupmu ulug fureberuk kamuhup.

⁴⁴It homaliki en it enaselei on enowarik lowag ulug hweag-esahunmu weim yabik lalug enebe o amumu wereg lit, o kota momaloho ferihin mu, hobam an den wiroho hobaharihik on su fam enalukwe hwaleg lit somban uruk halug,

⁴⁵Hat hebe bohol fam wereg lit enalong amag ulug, enalongap debeseruk kamuk, nakni.

⁴⁶Ap homi abirangge re siag duruk on neg wereg ai en de, it homaliki en Hat hele sahaloho durukmu, Hat holok en it enaselei on en enalong elehap debeselug enowarukwag ulug enebe fotog-esaukmu, sabu het-eneplug o yatma oho, horogma oho laukmu,

⁴⁷iren Hat hweag-hutuk halug de enele hesanggo holduk kamuk, nakni. TUHAN nenakni, o it sabu het-eneplug feseik lahupmu etma wereg lit siag duhup on fahet enendaman dik-demdoho embeselug enenda ahamdoho o nit nenombasi og-esauihin mu kota Haren momaloho ferihin mu, o an den Hat hobahet duruk kamuhupmu wiri-hobaharihik mu au fil enalukwe hwaleg lit enele hweag-hutuk halug de,

⁴⁸O kwenang ai fam en iren enenda demdoho fam enesiag embeselug, o kwenang Haren nit nenombasi og-esauihin mu o kota mun Haren momaloho ferihin mu etma mel, ne o an den Hat hobahet durukmu wit-hapihik mu au mel fil enalukwe yihig lit somban uruk halug,

⁴⁹Hat hebe boholma welahenma etman, hweag-humuhup on etma hesanggo holug de henda hundig-enepuk kamuk.

⁵⁰Hat homaliki hobam dipdoho welam fug angge hele sahaloho duhup on etma mundoho hapelehapdoho feselug, it enaselei on en enenda fano en debeseruk kamag ulug debeseiyug.

⁵¹It aire Hat honggwareg homaliki o Mesir en di ouk su ouk hauk kwit weregman og-eneplug wilibik waharihin on.

⁵²Nenakni TUHAN Allah homaliki Israel on nim it enowesi raja nim hil fubi-nenobaharuk kamuk. Ne, nit letnenebin ulug hundig-hundig heng-hapuk halug de enele hesanggo holduk kamuk.

⁵³Nenakni TUHAN Allah, Haren nit nenombasi o Mesir en og-eneplug waharuk kwit hamingming angge Musa hweag-itihin hag, nit nenebe Hat honggwareg homaliki on welamag ulug ap homi di enunggul unuk su enunggul unuk enesahalimu en momal-nenepihin ai, nenakni,” ulug somban ebag.

⁵⁴At Salomo en somban airoho ebagdeg, fobik mezbah witfag on anyo olohotma elenggen dimirebelug de enggik boholma lahabeg lit somban ebagdeg, fobik en ebe inatlug de,

⁵⁵ap homi etmano kabogdeg on mundoho fam de Allah en fanoap debeseruk kamag ulug ele diroho ebag,

⁵⁶ “Nenakni TUHAN en nomaliki fanoap debeseruk karuhuk ulug wene sali wat-esauihin on hamingming angge Musa en hweag-nesasi hag ebe dipdoho homaliki enobam fanoroho welamag ulug nenobaharihin mu welahe ai en de nenakni mot-hapuk kahe. Wene sali Haren wat-nesauihin on de eke suhwi am fug angge mundoho dipdoho neg nenobaharuk kahen.

⁵⁷Nenakni TUHAN Allah Haren endam nit nenombasi fotog-esa fug angge sen-enusug lit neg welatihin ai hag, ketia oho nit airoho sen-nenusug lit neg welamuk, nenakni. Haren nit fotog nesa fug, nenakni.

⁵⁸Nit Haren diroho duruk kamuk ulug hawene melaloho nenombasi fam hweag-esauihin on ai hele holoho neg wereg lit Hat hendama hahayeg boruk ale neg duruk kamag ulug, nenobabut Hat hobam dipdoho neg wereg lit duruk kamuhuk on nenobahain.

⁵⁹Haren de, nit diroho nenepuk kamuk ulug heng-habihi on ai nukoho mel hup anggo mel hendama ebereg welamuk. Hat hobabut fano en ap homi Israel on mel enowesi raja mel di angge su angge mundoho hundig-handig hwelauk kamuhup angge og-esauk kamuk.

⁶⁰Airoho duruk karuhun ai fam ap homi enunggul unuk domog di obam su obam wereg on en de, Allah amu on de eke wereg fug, we TUHAN amu neg Allah wereg ulug enoluk amuhup,” ulug ebag.

⁶¹Ne, it ap homi kabogdeg welatfag on anyo fam de, “Hit At omaliki on de nenakni TUHAN Allah ele holoho ketia dehep ai hagdoho hundig-hundig At obam dipdeg wereg lit, Aren diroho diyug airoho diyug ulug wene melaloho hweag-nesasi on anyo holoho neg duruk kamuk,” ulug komo enepfag.

⁶²At Raja Salomo en somban airoho ebagdeg at nim ap homi mundoho etma kabogdeg wereg on omano nim en de wam TUHAN obahet waroho og-etfag.

⁶³Airoho waroho og-utuk kwit de, at Salomo en wam fanoap nenebukwag ulug heng duruk kwit ulug wam sapi re 22.000 en nim domba 120.000 en nim watfag. Raja Salomo nim it ap homi Israel on nim en de o TUHAN Obam witfag on anyo fahet wam airoho waroho sok husebag.

⁶⁴Airoho duruk kwit de nukoho ai salim neg at Salomo en de o TUHAN Obam anyo olohotma ambe anggen oho anyo huliroho Allah obahet febag. Airoho duruk kwit de ambe anyo fam en de wam Allah enda ahayeg howag ulug mel, gandum anggen on mel, wam amug Allah en fanoap nenebukwag ulug heng duruk on fahet mel yalfag. Ne, mezbah perunggu on fam witfag on anyo re obale onggok deg en de ambe dag fil on fam yalfag ai.

⁶⁵Airoho duruk kwit at Salomo nim it ap homi Israel on mundoho nim en atam iren enobam O Sabo salheg welatfag on anyo fahet enenda ebetuk kwit, soni TUHAN Obam wirigmu etmano nukoho sabiren fam esetfag. Airoho duruk kwit de ap homi enebe mun humdoho il emberim utara fil de o Hamat laukmu etman de dil-dil de o Mesir huli fil en selatan fam etman watfagdeg kabog-debag.

⁶⁶Airoho nukoho sabiren fam duruk katfagdeg, nukoho ligin on fam de at Salomo en ap homi omano enobam domog lowag ulug hweag-esebag ma mundoho buhulduk kwit At TUHAN en amingming angge Daud inim omaliki enunggul unuk Israel on nim di angge su angge og-esauk katfag ale ai en de, iren at Salomo mot-debagdeg, enendaman enahayeg beil enobam lebag.