Read Ninia Yali 2 RAJA-RAJA 1 Bible Online

2 RAJA-RAJA 1 - Ninia Yali bible

2 RAJA-RAJA 1

¹Hun Ahab ap homi Israel on enobahet raja unduhuk latfag on anyo waratfag ma re it Moab enap en de Israel enap nim weim lahapfag.

²Nukoho misig salim de raja Israel on Ahazia anyo obam Samaria ebe wereg ma lilimol ambolma on fam en e ahoreg on dahandoho bule wamburuk kwit at ebe anggindoho watfag. Ma re at ebe fano atmin a eleg a, ulug de it ap homi Filistin on enanggembu Dewa Baal-Zebub o kota Ekron etmano wereg ma hein wag lowag ulug ap mon-enepfag.

³Famen malaikat TUHAN en de Nabi Elia obam Tisbe on ai it ap Raja Ahazia en mon-enepfag on etmano fam enekit lalug de wene diroho hweag-esakiyug ebag, “Ap homi Israel on wereg ma etma re Allah wereg fug en hiren ap homi o kota Ekron enap enanggembu Dewa Baal-Zebub ai hein wag lauk kahep a?

⁴Henowe raja ai fam de TUHAN en diroho eheik ulug hweag-umuk, Hat de hebe fano aruhun fug, hebe wararuhun! eheik, ulug hweag-umuk ulug hweag-esa lakin,” ulug mingming debag. Airoho mingming debag ma re at Elia en de TUHAN en wene mingming debag ale anyo higitdoho debag.

⁵Airoho debag ma it ap raja en mon-enepfag on etano sombandoho watfag ma, at raja en it hein og-esauk kwit de, “Hit de nunggwelug sombandoho wahep?” ulug hweag-esebag.

⁶Airoho ebag ma iren onggo uruk kwit de, “Ap misig eke nit nenakit wahareg de, nit nenebe sombandoho watlug nenowe hat hobahet TUHAN diroho eheik angge hweag-irik lakiek ulug hweag-neseheik: Ap homi Israel on wereg ma etma re Allah eleg en de haren ap homi kota Ekron on enanggembu Dewa Baal-Zebub anyo hein wag lakiek ulug mon-enebehen a? Hat de hebe fano aruhun fug, hebe wararuhun! eheik iyug ulug hweag-umuk ulug hweag-neseheikma wahe,” ulug hweag-etfag.

⁷Airoho hweag-etfag ma at raja en hein og-esauk kwit, “Ap aire obabut de keroho deg laha?” ulug hein-og-esebag.

⁸ Hein og-esebag ma iren onggo uruk kwit de, “Asum jubah mel ombahaluk mel de wam ahap on bug deg laha,” ulug hweag-etfag. Ai ebag ma at raja en de, “A, aire hun Elia,” ulug ebag.

⁹Airoho ebagdeg de at raja en de ap sehen seneg on enowe perwira misig eke nim autsi enebe 50 en nim en de at Elia senerik lakiek ulug mingming enepfag. Mingming-enepfag ma re at sehen foroho on enowe anyo lauk men de at Elia ebe duk eke fam hwerieg wereg ma lebag. Lebagdeg de at perwira anyo en de, “Hat Allah amingming angge ao, nenowe raja en de hat hebe wambik wamag eheik,” ulug hweag-etfag.

¹⁰ Ai ebag ma at Elia en uruk kwit de, “An nebe Allah amingming angge halug de, indok boholman wambik waharuk kwit hat hebe nin it hautsi etma nim henebe mundoho han yal-henepmisi!” ulug hweag-esebag. Ai ebag ma re etano li em neg indok wambik waharuk kwit de at perwira anyo mel autsi 50 en etano mel han werag enepfag.

¹¹Airoho debag ma re raja en de ap perwira eke nim autsi enebe 50 en eke nim mon-enepfag neg. Mon-enepfag ma lebagdeg iren Elia fam uruk kwit de, “Hat Allah amingming angge ao, nenowe raja en de hat hebe ketia eiya wambik wamag eheik!” ulug hweag-etfag.

¹²Ai ebag ma at Elia en de, “An nebe demdoho Allah amingming angge halug de, indok bohol fam en wambik watlug hat hebe nim it hautsi enebe mundoho nim han werag henebukwag!” ulug hweag-esebag. Ai ebag ma etano li em neg indok Allah weregman wambik waharuk kwit at perwira anyo mel it autsi enebe 50 en etano mel mundoho han werag enepfag.

¹³Airoho debag ma re at raja en de eke nim ap perwira misig eke nim de it autsi enebe 50 en nim monde fesebag. Monde fesebag ma lebagdeg de at perwira anyo dukmu lebagdeg at Elia ebe wereg ma etano aik lebagdeg hweag-utuk kwit de, “Allah amingming angge nenowe, haren nit nenesiag hapelehapdoho nenobahain! Nit an nim it nautsi nim eiya nenowaruk fug o, we nenelaheg bein!

¹⁴It ap perwira biren etano nim enautsi nim de indok bohol fam en wambik waharuk kwit han werag enepsimu waratswa, famen an neg de henda nabin ulug, heng-hapuk kahi, nowe!” ulug hweag-etfag.

¹⁵Ai ebag ma etano li em neg malaikat TUHAN en Elia fam uruk kwit de, “Hakol bouk fug! At ombolim duk au fam en wambik lakin,” ulug hweag-etfag. Ai ebag ai fam de at Elia anyo at perwira anyo nim seberoho raja wereg ma lebag.

¹⁶Lebagdeg de Elia en raja fam uruk kwit de, “TUHAN en uruk kwit, Ap homi Israel on wereg ma oma Allah obam hein wa on eke wereg fug en hagdoho, haren ap o kota Ekron enap en on enanggembu Dewa Baal-Zebub anyo fam hein wag lowag ulug mon-enepihin. Ai fam de hat hebere fano aruhun fug, hebe wararuhun isi,” ulug hweag-etfag.

¹⁷Ai ebag ma re TUHAN en at Elia fene en ebag ale anyo higitdoho re at Ahazia anyo waratfag. Ma re at Ahazia ebe omalik ap angge eke welatfag fug mu re at aut[1] Yoram anyo at obalmangge raja inatfag. Aire hun Yehoram, Yosafat amloho anyo ap homi Yehuda on enobahet raja inatfagdeg melal-enepuk men neg de tahun bireneg on wereg kweleg airoho debag.

¹⁸Hun Raja Ahazia en debag ale fomane re buku ap raja Israel on en duruk katfag ale fahet baleg on anyo fam baleg wereg.