Read Ninia Yali 2 RAJA-RAJA 10 Bible Online

2 RAJA-RAJA 10 - Ninia Yali bible

2 RAJA-RAJA 10

¹Raja Ahab de omaliki nim ombasi nim de enebe 70 en o kota Samaria fam etma welatfag. Ai fam de at Yehu en de lisu baloho it ap hun Ahab omaliki nim ombasi nim hwal-enepuk kwit welatfag on etmano mel, o etma enunuk bogdeg wereg enap mel, o kota ai fam ap kaindeg mel enekit mondotuk kwit de diroho balfag,

²“Hun Ahab omaliki, ombasi mel de hit henalong fam wereg, ne hit de henangge kereta weim yapuk on mel, kuda mel, sehen mel, o kota elehet omamneroho oho on mel wereg. Ai fam de hiren lisu baleg su folo-folo henenggikmu aik waharuk halug etare,

³hiren at Ahab omaliki, ombasi enesahalimu etman de ap ebe on eke momaluhupdeg ebe raja unduhuk folug de, at obahet along baloho duruk kamuk,” ulug lisu baloho monde febag.

⁴Airoho ebag ma re it ap o Samaria fam enalong welatfag enap omano mundoho enakol neg atfagdeg, iren uruk kwit de, “Hun Raja Yoram mel, Raja Ahazia mel famen ohore at Yehu inim wal-wal am fug alereg latswa, ne nit de mundoho nong-hong deg lahe,” ulug ebag.

⁵Ai fam de it ap raja ebe wereg ma fahet kepala welatfag on mel, o kota ai fam leho welatfag ahun mel, it holduk on fahet welatfag on mel, ne it hun Ahab omaliki, ombasi mel fahet hwal-enepuk on welatfag on etmano mel en de wene diroho hun Yehu fam mondotfag, “Nit de ap sa ulug oho raja undurehe ha fug alereg. Nit de nenowe hat hapma sebe ulug haren diroho diek ulug mingming nenepuk ale ai neg duruk kamul. Anggere nenowe haren hendan bolug su fano boruk ale ai neg diyug,” ulug ebag.

⁶Ai ulug mondotfag ma at Yehu en it enobam nikangge lisu baloho mondorik lauk kwit de ele diroho baleg latfag. “Hit lahe an nibil welahep halug ne an den diroho diek ulug melal-henepuk ale duruk henenda halug de, hiren hun Ahab omaliki, ombasi etma binggi enowariyug. Ne, enowatlug de sono o mo eiya hag deg kweleg de it enunggul owag kong baleg etma an nakit o Yizreel walug manu,” ulug balfag. Ne, hun Ahab omaliki mel ombasi mel enebe 70 en etare o kota Samaria fam etma it ap homi enowesi on nim wereg ma hwal-enepuk katfag.

⁷Ne, iren at Yehu en lisu baleg anyo webagdeg de iren hun Ahab omaliki, ombasi enebe 70 en etano enowatfagdeg it enunggul baleg etmano re si yihig elma kwelaboho re hun Yehu akit o Yizreel wereg ma mondotfag.

⁸Airoho debag ale anyo at Yehu hweag-etfag ma re, aren de it ap enunggul baleg etmano o kota sokole kwik laukmu etma asiog biren eraroho foukwag ulug hweag-esebag ma, airoho febag ma weregman neg de hubet sekan debag.

⁹Ne, likia hubet-habet de at Yehu o sokole humon hilinggigmu etmano wilibik lebagdeg ap homi etma kabogdeg welatfag on etmano fam hweag-esauk kwit de, “At Raja Yoram waruhuk ulug aire an den neg weim abug irihikdeg watihik; ne wene ai fahet de hiren eke siag duruhup fug. Famen de ap homi abirangge oma an den neg enowatihik fug.

¹⁰Ne, aure TUHAN en At amingming angge Elia fene en ebag ale anyo higitdoho aha au. Ne, airoho aha au fam de TUHAN en at Ahab omaliki mel ombasi mel fahet isi ale anyo demdoho aha ulug eneg deg ma hauk kahe,” ulug ebag.

¹¹ Ai ebagdeg de at Yehu at Ahab ori erekwi fomane o Yizreel wereg on mel ne at autsi pegawai mel, at ori inim hundig on mel, at obahet hwal-enap welatfag on mel, mundoho enowatfag, ne misig ulug oho eke lili febag fug.

¹²Airoho debagdeg at Yehu ebe o Yizreel embeselug de o Samaria lebagdeg, kobokwema o unuk de, “Gembala Enobam Sili,” urukmu etma lebagdeg,

¹³aren hun Ahazia ap homi Yehuda on enowe raja anyo ori fomane nim ambi atfag. Ambi atfagdeg aren it hein og-esauk kwit de, “Hit oma henebe sa mel?” ulug ebag. Ebag ma, iren onggo uruk kwit de, “Nit de at Ahazia owe-aut. Ne, nit de o Yizreel etma at hwe ratu Izebel omaliki ombasi mel ne at raja ahain elekwe on abirangge mel wereg ma enesa laul ulug lauk kahe,” ulug hweag-etfag.

¹⁴Airoho ebag ma at Yehu en autsi fam hweag-esauk kwit de, “It au enebe enoluk kengge sen enebiek!” ulug hweag-esebag. Ai ebag ma it ap etmano sen-enepfagdeg walug ik habulig on obale neg deg ma etman enebe abirangge re 42 en angge binggi enowatfag. Ap misig ulug oho eke enoluk embesebag fug.

¹⁵Airoho dulug de at Yehu anyo kwe lamin ulug lauk men de, kwe bulmu etmano Yonadab hun Rekhab amloho anyo en olohotma watfag. Watfag ma Yehu en dang-debagdeg ele obam uruk kwit de, “Nit de nenenda misig deg lahe fug no a, haren an let-neehen halere nanggig?” ulug hweag-etfag. Ai ebag ma Yonadab en onggo uruk kwit de, “Yu,” ulug ebag ma Yehu en de, “Aireg halug de henggik og-nimin, nit dang-dang amukohon,” ulug hweag-etfag ma it enenggik dang-dang atfagdeg Yehu en de Yonadab letdoho angge kereta fam lahabe foruk kwit de,

¹⁶ele diroho hweag-etfag, “An den TUHAN obahet duruk kwit namurururoho dil lauk kahi ale hamihin angge an ninim lakohon ma,” ulug hweag-etfag. Airoho ebagdeg de it etano enebe seberoho enangge kereta fam lahabagdeg o Samaria lebag.

¹⁷Etma aik lebagdeg Yehu en de Ahab autsi owesi enoluk wereg on etmano abirangge enowatfag, ne misig ulug oho eke embesebag fug. Ne, aire TUHAN en Elia fam hweag-etfag ale anyo higitdoho neg atfag.

¹⁸At Yehu en de ap homi Samaria on mundoho kabog-dukwag ulug hweag-esebag ma, kabog-debag ma hweag-esauk kwit de, “Raja Ahab en de kembu Baal fahet amururu roho duruk katsi; ne aren duruk katsi famen ohore an den de mun alongdoho duruk karuhuk.

¹⁹Anggere an den Baal obahet wam waroho hum ale og-itmin angge re, it ap Baal obahet nabi wereg on mel, it apne wauk on mel, it Baal fahet hwal-enap wereg on mel, dem misig ulug oho eke welatmisi fug mundoho andog enebiek. Ne, it eke wamlusa fug on de enebe binggi enowaruhuk,” ulug hweag-esebag. Famen de airoho ebag on aire Yehu en de ele en yomaroho re it ap kembu Baal fam apne wauk on etmano enowatmin ulug ebag.

²⁰Airoho debagdeg de Yehu en wene melaleg diroho ebag, “Hiren de nukoho di salim kembu Baal apne wauk kamuhuk ulug momale feiyek,” ulug hweag-esebag. Ma re ap homi en nukoho ai salim de,

²¹kembu apne wauk salim ulug eneko febag ma at Yehu en ap homi Israel on wereg kwe etmano mundoho ele unduhuk febag. Ma re nukoho anyo salim de it ap kembu Baal apne wauk on etmano eke welam fug angge abirangge watfag. Watfagdeg de it enebe o kembu obam anyo sokole ambol fil en kwik lebagdeg de hweriatil de olohotman de ambolma huli hopo dik debebag.

²²Airoho debag ma at Yehu en wene melaleg uruk kwit, it ap wene kembu obahet kabog-duruk kwit sum wan-duruk on fahet hwalduk on etmano fam de sum etmano it ap homi kembu Baal apne wakoho kembu obam watfag on etmano fam og-esowag ulug hweag-esebag. Airoho hweag-esebag ale anyo mundoho debag ma re,

²³Yehu ebe o kembu obam anyo Yonadab hun Rekhab amloho anyo nim kwik lebagdeg it ap homi etma wereg on omano fam uruk kwit de, “Suma ap homi TUHAN apne wauk on eke welam no re, ap homi suma kabogdeg wereg on oma re abirangge kembu Baal mot-duruk on neg ane, hiren furoho kumuriek?” ulug hweag-esebag.

²⁴Airoho hweag-esebagdeg Yehu mel Yonadab mel en de wam kembu Baal obahet waroho og-etfag. Ne, airoho duruk kwit de o kembu obam anyo dag fil etma re Yehu en de ap kahaleg wereg on mel ap sehen seneg on enowesi mel enebe 80 en fesebag. Airoho debebagdeg aren wene melaleg eke su ebag, “Hiren de ap homi etma enebe abirangge enowatluhup. Ne, ap sa en ap homi etma enoluk eke wilibi fesemisi halug de at ebe binggi watul,” ulug hweag-esebag.

²⁵At Yehu en wam waroho yalfagdeg etano wilibik watfagdeg it kahaleg wereg enap mel it ap sehen seneg on enowesi perwira etmano mel fam uruk kwit de, “Hit henebe kulug it ap homi etma enebe abirangge enowariek, ne misig eke enoluk fesouk fug!” ulug hweag-esebag. Airoho ebag ma re it anyo enenggarog fing-fang kwik lebagdeg de ap homi etma wereg on omano abirangge enowatfagdeg enebe wareg etmano lit-eneplug wilibik watfag. Airoho debelug de iren kembu obam anyo ambe ilonggoma on fam kwik lebagdeg,

²⁶iren kembu Baal ahut ilitdeg wereg on anyo hamboholug wilibik watfagdeg indok han yalfag.

²⁷Kembu ahut ilitdeg anyo re o wirig anyo nim mundoho siaho febagdeg de obalma anyo re miema laukmu debebag ma ketia nim airoho wereg.

²⁸Airoho debebag fam at Yehu de it ap homi Israel on wereg kwe kembu Baal apne wauk katfag on etmano mundoho eleho febag.

²⁹ Airoho debag ai fam de TUHAN en Yehu fam uruk kwit de, “Haren at Ahab ahain elekwe on fam debesoukwag ulug hweag-hitihik ale anyo mundoho debehen. Ai fam de hat homaliki mel hombasi mel endag-atil neg huli ohwaneg on fam huli aire ap homi Israel on enobahet raja welamuhup en sali wat-hutuk kahi,” ulug hweag-etfag. Airoho hweag-etfag famen de at Yehu en de ap homi Israel on enakni TUHAN Allah anyo fam enda demdoho dip deg lit TUHAN Awene melaleg omano higitdoho duruk katfag fug. Aren de at Yerobeam duruk ale fam en it ap homi Israel on aren kembu emas on o Betel fam inim o Dan fam inim witfag on etmano apne wauk fam TUHAN fam siag duruk katfag anyo hagdoho duruk katfag.

³⁰

³¹

³²Airoho neg durukmu re eta li em de TUHAN en de ap homi Israel on wereg ma etmano re dorap ha kwebag. Ne, at raja Siria on en de ap homi Israel on wereg kwe etmano mundoho sebel debag,

³³ne sebel debag kwe re mo indip fil en de Ik Yordan ikman de Ik Arnon horogman o kota Aroer en dahandoho etma huli. Ne, eke o Gilead kwe mel, Basan kwe mel, it ap homi enunggul unuk Gad on wereg kwe mel, Ruben wereg kwe mel, Manasye mo indip fil on anyo wereg kwe mel etma hwelebag.

³⁴At Yehu en duruk katfag ale fomane mel, ne aren fano ale ebe kain wereg lit duruk katfag ale mel de, buku ap raja Israel on en duruk katfag ale baleg wereg on anyo fam mundoho baleg.

³⁵Ne, at Yehu ebe re ap homi Israel on enobahet raja weregman neg de 28 tahun debagdeg at ebe waratfag ma o Samaria salfag. Ne, at obalmangge re at amloho Yoahas anyo raja inatfag.