Read Ninia Yali 2 RAJA-RAJA 11 Bible Online

2 RAJA-RAJA 11 - Ninia Yali bible

2 RAJA-RAJA 11

¹Hwe Atalya amloho Ahazia anyo mundoho waratfag ma, at Atalya oluk atfagdeg de, it ap homi Yehuda on wereg ma etman ap homi Raja Ahazia ahain elekwe on en wereg on etma mundoho enowariek ulug wene wilipfag.

²Airoho wilipfag ma re at Yoas hun Ahazia amloho ai ohore at raja omaliki amu on etmano enowatuk kwit watlep, famen de at ebe hwe at Yoseba hwalduk on anyo en ahap wendare febag ma lil atfag. At Yoas mel ne hwe at foroho latfag on anyo mel de o TUHAN Obam ilonggoma en ambe misig eke ap nohorukmu etma heraho feseik lebag.

³At hwe Atalya ratu inatfagdeg melal-enepuk men neg de tahun folfalik en wereg li em anyo re nimi Yoas anyo o TUHAN Obam wirigmu etma hwe Yoseba en heraho lit kulduk katfag.

⁴Tahun folfalik en welatfagdeg sabirangge fam de hun Imam Yoyada anyo en de ap sehen foroho on enowesi perwira etmano mel, at hwe ratu anyo along baloho aluluk lauk on mel, ne it hwe ratu anyo obam ebe wereg ma kahaleg wereg on mel, o TUHAN Obam wirigmu at inim ambi amul ulug wol-enepfag. Wol-enepfagdeg de etman de aren duhuk ale anyo iren oho duhuk ulug hombuk balukwag ulug hweag-esebag. Airoho hweag-esalug de aren de hun Raja Ahazia amloho Yoas anyo mel it enobam unug esebagdeg,

⁵aren it enobam wene diroho melale fesebag, “Hit lahe nukoho sabat anyo fam yabuk duruk wereg lit halug de hit ap henebe esan misig de ratu wereg ma etma kahaleg welamuhup,

⁶ne hit henebe esan fomane re o Sokole unuk Sur fam etma kahaleg lamuhup, ne nin foma alongdoho etma re sokole eke it ap kahaleg wereg on[14] enambolma kahaleg lamuhup.

⁷Ne, hit ap esan biren on de nukoho sabat salim kahaleg welatlug wilibik lalug de, at Raja Yoas along baloho re o TUHAN Obam wirigmu etma karog fangdoho unduhuk lamuk. Airoho wereg lit de at ebe di kwe su kwe laukmu re hit henebe en along baloho lauk kamuhup, ne ap homi enebe domog en hit henaluluk aik wamul ulug duruk on etma re enebe enowariyug,” ulug hweag-esebag.

⁹Airoho hweag-esebag ma re it perwira omano en de at Yoyada ele holoho re it enautsi eta li em kahaleg wereg on mel ne it nukoho sabat fam kahaleg welatlug wilibik lauk on mel walug watfag.

¹⁰Walug watfag ma re, Yoyada en de inggisim mel, raja en on dog bei angge mel, hun Daud en TUHAN Obam wirigmu febag on omano it perwira omano fam yohwan-enepfag.

¹¹At raja anyo along baloho welamag ulug de at Yoyada en de ap kahaleg wereg on omano fomane karog enggat fangdoho o TUHAN Obam Wirigmu en olohotma etma welamag ulug fesebag.

¹²Airoho mundoho debebagdeg Yoyada en de hun Yoas anyo hondoholug wilibik watfagdeg de Yoas unggulmu kware-kware hag angge mahkota anyo bug debeheg, enggikmu buku TUHAN Awene melaleg baleg anyo og-ereheg, debag. Ai debelug de at imam Yoyada nim at omaliki nim en de nukoho at raja unduhuk foruk salim anyo fam de ahalue obam hilili febag ma re, it ap homi mundoho anyo en enenggik dagdoho enele amit-mit duruk kwit “Nenakni hat raja welaruhun!” uruk katfag. Iren airoho at Yoas anyo raja unduhuk febag ai.

¹³Airoho unduhuk febagdeg it ap homi omano mel ne it ap kahaleg wereg on omano mel en de enahayeg duruk kwit raja anyo fahet ngaik-ngog durukmu at hwe Atalya anyo en holfagdeg de, at anyo folo-folo o TUHAN Obam wirigmu en it enele anggiluk duruk kwit ap homi lohwaloho kabogdeg ma etmano lebag.

¹⁴ At anyo lebagdeg duruk men de, raja keron anyo re o TUHAN Obam kwik laukmu en sokolma at ebe unduhuk febag ma e doungdoho lahabegma etano unduhukmu re, it bohweap trompet fururuk on mel, it sehen foroho on enowesi perwira omano mel, de maseroho kwelabeg lit unduhuk latfag. Ne, it TUHAN Obam wirigmu etma binggong kong-duruk enap anyo re, wene kabog-debagdeg airoho durukmu anyo re, it enengge binggong etmano fam enahayehap duruk katfag. Airoho durukmu re it ap homi omano trompet fururuk kwit enahayeg duruk katfag. Airoho durukmu esebagdeg de at Atalya anyo asum wandeg latfag on anyo nonggoloho miogdoho hwik-esebagdeg ele hum fam hwiruruk kwit de, “Hwaleg eleg! hwaleg eleg!” ulug hwiruruk katfag.

¹⁵Airoho urukmu re Yoyada anyo en it ap en hwe Atalya anyo o TUHAN Obam wirigmu etmano en waruk no ulug it perwira etmano fam uruk kwit, “Ap along baloho ulug eraroho unduhukmu ai en hwe ai walug dagma wilibik lakiek, ap eke en lahe at ebe ahap wendatmin ulug duruk halug de ap ai ebe binggi wariyug,” ulug hweag-esebag.

¹⁶Airoho hweag-esebag ma re it etmano en senetlug wilibik lebagdeg o raja obam wirigmu etmano walug lebag. Etman de o sokole eke unuk Gerbang Kuda uruk katfag ma etan watfag.

¹⁷Airoho debagdeg de at Imam Yoyada en it ap homi holduk on omano mel, at Raja Yoas anyo mel, fam uruk kwit de, “Nit TUHAN omaliki atlug welamuhuk ulug sali wariek,” ulug hweag-esebag. Ne, aren de hun raja en oho ap homi holduk on nim sali warukwag ulug hweag-etfag.

¹⁸Airoho debagdeg iren de kembu Baal mot-durukmu anyo bin kuruk kwit de, daloroho feheg, kembu obahet wam waroho yaldukmu mezbah anyo mel, ap ilit angge wereg on etmano mel, erap-ferapdoho feheg, ne mezbah olohotma etano en at hun Matan kembu Baal obahet duruk on anyo waroho feheg, debag. Airoho debelug Yoyada en ap kahaleg wereg on omano o TUHAN Obam anyo along baloho kahaleg lamag ulug hweag-esebagdeg de,

¹⁹at nim it ap sehen seneg on enowesi omano mel, at raja onggwareg fahet along baloho wereg on omano mel, it raja ebe wereg ma kahaleg wereg on mel, ne ap homi holduk on abirangge mel de Raja Yoas anyo hondoholug de o TUHAN Obam en de at raja ebe wereg ma istana omano lebag. Lebagdeg de at Yoas ebe re sokole Gerbang Pengawal anyo fene en kwik lebagdeg ap raja huratuk angge takhta anyo fam huratfag.

²⁰Huratfag ma re hwe Atalya anyo mundoho waratfag ma o kota fam etmano enobam hambuk eheg, ne ap homi abirangge en enahayeg deheg debag.

²¹At Yoas ebe ap homi Yehuda on enobahet raja inatfag li re at ebe umur tahun sabiren deg kweleg inatfag.