Read Ninia Yali 2 RAJA-RAJA 13 Bible Online

2 RAJA-RAJA 13 - Ninia Yali bible

2 RAJA-RAJA 13

¹Yoas hun Ahazia amloho anyo ap homi Yehuda on enobahet raja inatfagdeg melal-enepuk men neg de tahun 23 on wereg kweleg Yoahas hun Yehu amloho anyo ap homi Israel on enobahet raja inatfagdeg de melal-enepuk men neg de 17 tahun en debag.

²Airoho debag famen de at Yerobeam de at Yehu owan raja inam fug kweleg wereg lit duruk katfag hagdoho re at Yoahas en TUHAN fam siag neg duruk katfag, ai fam ap homi Israel on oho siag debag neg. Aren de siag on neg duruk ale etma erimdoho embeseruk katfag fug.

³Ai fam de TUHAN olok de ap homi Israel on fam fesebagdeg, raja Siria on hun Hazael anyo mel ne amloho Benhadad anyo mel en hundig-handig ap homi Israel on enalong elehapdoho fesoukwag ulug fotog-esebag.

⁴Airoho debagman de at Yoahas en TUHAN fam somban ebag ma re, raja Siria on en ap homi Israel on fam de mundoho ilmu siagdoho debeserukumu TUHAN en il hebagdeg de Yoahas en somban ebag on anyo TUHAN esanggo holfag.

⁵Holfagdeg de TUHAN en ap homi Israel on enowe misig eke it Siria on enenggik apman lisoho wilibi fesoukwag ulug og-esebag ma it enebe atam welatfag hagdoho weim abug mel eleg angge enape wongdoho neg welatfag.

⁶Airoho debesebag ma welatfag famen de it ap homi Israel on en de at Yerobeam en siag duruk ale ak debebag on anyo bale fouk fug angge duruk wauk kwit neg welatfag. Iren di siag su siag etma neg duruk kwit de iren de kembu enesinga Dewi Asyera ahut ilitdeg anyo o Samaria etma femdoho welamag ulug febag ma welatfag.

⁷Ne, raja Siria on anyo en de it ap homi Israel on en dog apuk on etmano elehap debesebag ma re Yoahas de autsi dog apuk on fam en kuda fam lauk on de 50 en, ne kereta fam lauk on de 10 en kwenang kwe eneyog fam lauk on de enebe 10.000 en neg welatfag.

⁸At Yoahas en duruk katfag ale mel ne at ebe kain wereg lit debag ale fahet mel de buku it ap raja Israel on en duruk katfag ale baleg on anyo fam baleg wereg.

⁹At ebe re waratfag ma o Samaria en sale febag. Ne, at amloho Yoas anyo re at obalma raja inatfag.

¹⁰Hun Yoas anyo ap homi Yehuda on enobahet raja inatfagdeg melal-enepuk men neg de tahun 37 en huli deg kweleg Yoas hun Yoahas amloho anyo ap homi Israel on enobahet raja inatfagdeg o Samaria fam etma 16 tahun wereg lit melal-enepuk katfag.

¹¹Raja Yerobeam en siag duruk fam it ap homi Israel on siag neg duruk katfag anyo higitdoho duruk fam de Yoas en oho TUHAN fam siag neg duruk katfag.

¹²At Yoas en duruk katfag ale mel, at ebe hun Amazia it ap homi Yehuda on enowe raja anyo inim weim yapuk kwit debag ale mel, de mundoho buku it ap raja Israel on en duruk katfag ale baleg wereg on anyo fam baleg wereg.

¹³Yoas ebe waratfag ma ap raja sal-enepuk katfag ma o Samaria etma salfag. Ne, at obalma re at amloho Yerobeam II anyo raja inatfag.

¹⁴ Nukoho misig salim de Nabi Elisa anyo ouk deg ma re Raja Yoas anyo kwelap ha watfag. Ha waharuk men de at Elisa ebe waram alereg ma hebagdeg de raja anyo oba yatuk kwit de diroho ebag, “Nakni o, nakni o, ap homi Israel on enalong balduk kahen on log hahun o!” ulug oba yatfag.

¹⁵Airoho oba yatfag ma Elisa en hweag-utuk kwit de, “Haren sehen inim dog angge nim wakin” ulug hweag-etfag ma, Yoas en webag ma re,

¹⁶Elisa en de, “Dog lehemihin angge fik-fouk din,” ebag ma, raja en fouk debag. Fouk debag ma re at Elisa enggik de raja enggik emberimmu febag.

¹⁷Airoho debelug at nabi en dukwag ulug ebag ale higitdoho raja en jendela o Siria fil hilinggig on anyo husebag. Husebag ma Elisa en uruk kwit, “Dog leheik lakin!” ulug hweag-etfag. Airoho ebag ma raja en dog anyo leheik lebagman de nabi anyo en uruk kwit, “Hat hebe re TUHAN andog welahen. Ne, dog ai fam de TUHAN en Siria enap enalong elehapdoho fesehu. Ne, hat de ap homi Siria on nim o Afek kwe etman weim yabuhup famen de haren it enalong elehapdoho fesehun,” ulug hweag-etfag.

¹⁸Airoho debagdeg Elisa en de Raja Yoas fam de, “Dog angge amu on eke walug de kwenangma ware fein,” ebag ma at raja en enggik henahanam ware febagdeg bok atfag.

¹⁹Airoho debag famen de Elisa olok atfagdeg uruk kwit de, “Ebere haren henggik foabenam oho folfalik enam oho ware felenman de haren it enunggul unuk Siria on ai ape eleg-beleg eselen. Famen de ketia re we haren henggik henahanam neg enalong elehapdoho fesemihin ai,” ulug hweag-etfag.

²⁰Airoho ulug etano il misig welatlug de at Elisa ebe waratfag ma kwenangma salfag. Eta li em de it ap Moab enap de herag-herag watlug de tahun misig enggelangge alit sobalduk li re enenggik misihan ap homi Israel on wereg ma dog kwelabik waharuk katfag.

²¹Airoho duruk katfag ma re nukoho eke salim ap homi en ap waratfag on salduk kwit hauk men de ap Moab en herag-herag lohwaloho noruk enap waharukmu esebag. Airoho esalug iren de ap wareg anyo at Elisa saleg on amigmu etano hwik-esalug enakol en heiye lebag. Lebagman de ap wareg hwik-esebag on anyo at Elisa owag solong fam bal-hauk men de ap wareg on anyo nikangge oluk atfagdeg inatfag.

²²At Yoas raja inatfagdeg melal-enepuk kwit wereg kweleg etma re Hazael ap homi Siria on enowe raja ai en ap homi Israel on sebel-enusug latfag.

²³Famen de TUHAN en At omaliki enobahet enelaheg esebagdeg it enesiag apelehapdoho fesebag. Aren sali wene it Abraham, Ishak, Yakub mel fam wat-esebag ale anyo ebet hauk kwit atlug de, Aren it enebe mundoho elehapdoho fesoukwag ulug embesebag fug, ite let-enebuhuk ulug debagdeg ketia hulien nim de Aren omaliki apeleg atuk fug.

²⁴Ai en de raja Siria on Hazael anyo waratfag ma re at amloho Benhadad anyo obalma raja inatfag.

²⁵Airoho inatfag ma raja Israel on Yoas anyo en Benhadad anyo enggik henahanam along elehapdoho febagdeg, aren o kota at Yoas akni Yoahas anyo raja wereg li em del debag on etmano nikangge owag oko hwelebag.