Read Ninia Yali 2 RAJA-RAJA 15 Bible Online

2 RAJA-RAJA 15 - Ninia Yali bible

2 RAJA-RAJA 15

¹Hun Yerobeam II ap homi Israel on fahet raja inatfagdeg melal-enepuk men neg de tahun 27 on deg li em, at Uzia[16] hun Amazia amloho anyo ap homi Yehuda on enobahet raja inatfag.

²At inatfag li em eta re ebe umur 16 tahun deg li inatfagdeg o Yerusalem fam etma melal-enepuk kwit weregman neg de 52 tahun debag. Isinga re hwe Yekholya o Yerusalem hwe ai.

³At Uzia re akni en duruk katfag hagdoho re TUHAN endama ahayeg howag ulug neg duruk katfag.

⁴Famen aren kembu dewa mot-duruk kwe omano moluluk debag fug mu re ap homi en di angge su angge walug feik laheg, ne amben fano angge dupa etma yalik laheg duruk katfag.

⁵Airoho durukmu re TUHAN en at ebe ahap fam ouk mun siag on febag ma, ouk anyo fano am fug angge weregman neg de at ebe waratfag. At ebe re yabuk duk fug angge welamag ulug o amumu wiroho febag ma wereg kweleg de at amloho Yotam anyo at apma on hagdoho wereg lit ap homi melal-enepuk katfag.

⁶Raja Uzia en duruk katfag alere buku ap raja Yehuda on en duruk katfag ale baleg wereg on anyo fam baleg wereg.

⁷ At Uzia ebe waratfag ma re o kota Daud obam ap raja sal-enepuk katfag ma etmano salfag. Ma re at amloho Yotam anyo obalma raja inatfag.

⁸Hun Uzia ap homi Yehuda on enobahet raja inatfagdeg melal-enepuk men neg de 38 tahun deg kweleg Zakharia hun Yerobeam II amloho anyo ap homi Israel on enobahet raja inatfag. Airoho inatfagdeg o Samaria fam etma bigalem folfalik en huli melal-enepuk katfag.

⁹It ap raja atam welatfag on en duruk katfag hagdoho re aren oho TUHAN fam siag duruk katfag. Aren de hun Yerobeam I en siag durukmu it ap homi Israel on oho siag debag ale anyo higitdoho duruk katfag.

¹⁰Salum hun Yabes amloho anyo en Raja Zakharia watmin ulug weim abug wilipfagdeg de, at ebe o Yibleam etman watfagdeg Salum ebe obalma raja inatfag.

¹¹ Airoho debag ai fam de TUHAN en Raja Yehu fam wene sali hweag-utuk kwit, “At omaliki en ombasi ohwaneg on[17] endag-amuhup huli etma ap homi Israel on enobahet raja welamuhup,” ulug hweag-etfag ale anyo higitdoho atfag ai. At Raja Zakharia en duruk katfag ale fomane re buku ap raja Israel on en duruk katfag ale baleg wereg on anyo fam mundoho baleg wereg.

¹³Uzia ap homi Yehuda on enobahet raja inatfagdeg melal-enepuk kwit weregman de tahun 39 on wereg li em de, Salum hun Yabes amloho anyo ap homi Israel on enobahet raja inatfag man de,

¹⁴at Mehanem, hun Gadi amloho anyo o Tirza en de Samaria lebagdeg Salum ebe ware febagdeg obalma at raja inatfag ma re, at Salum inatfagdeg o Samaria fam etma bigalem we misig neg melal-enepuk katfag.

¹⁵At Mehanem airoho inatfagdeg o Tirza lamin ulug kwema lauk kwit, it ap homi o kota Tifsah on ai at apma sebe uruk katfag fug mu re, aren o kota Tifsah ai mel o aluluk kwe wereg on omano mel ne ap homi etma wereg on mel de mundoho elehap debesebag. Ne, aren de homi o kota ai fam on enomalik enahummu wereg on omano enahum belang isil lebag. At Raja Salum en duruk katfag ale fomane mel, ne aren wene balug duruk katfag ale mel de buku ap raja Israel on en duruk katfag ale baleg wereg on anyo fam mundoho baleg wereg.

¹⁷Uzia ap homi Yehuda on enobahet raja inatfagdeg melal-enepuk men neg de tahun 39 on fam deg li, at Menahem hun Gadi amloho anyo ap homi Israel on enobahet raja inatfagdeg o Samaria fam etma 10 tahun en wereg lit melal-enepuk katfag.

¹⁸At ebe oluk welatfag li etma re aren hun Yerobeam I en siag duruk katfag fam ap homi Israel on nim siag debag ale anyoroho aren oho TUHAN fam siag neg duruk katfag.

¹⁹Ap homi Asyur on enowe Raja Pul[18] anyo it ap homi Israel on fam weim sinalik kwik watfag ma re at Menahem en de, An ap homi Israel on wereg ma etma nebe nomamneroho melal-enepuk katmin ulug hun Pul ai en mel leho nobahaukwag, ulug de, perak 34.000 kilogram en og-etfag.

²⁰At Menahem en uang etma kabog-debag alere, aren ap homi Israel on fam etman enenggik wereg on omano fam de ap enebe domog en uang perak 50 en heg og-nemek ulug ele abi fam heng-enepukmu og-etfag ma kabog-debag. Ai fam de hun Pul anyo o etma embeselug de at onggwareg obam sombandoho lebag.

²¹At Raja Menahem en duruk katfag ale fomane re buku ap raja Israel on en duruk katfag ale anyo fam mundoho baleg wereg.

²²At ebe waratfag ma sale febag ma re at amloho Pekahya anyo obalma raja inatfag.

²³Hun Uzia ap homi Yehuda on enobahet raja wereg lit melal-enepuk men neg de tahun 50 on wereg li re at Pekahya hun Menahem amloho anyo ap homi Israel on enobahet raja inatfagdeg o Samaria fam etma tahun biren fam melal-enepuk katfag.

²⁴At de hun Yerobeam I en siag duruk katfag fam ap homi Israel on nim siag debag ale anyo hagdoho TUHAN fam siag neg duruk katfag.

²⁵At airoho wereg ma re at autsi sehen seneg on enowe perwira misig eke unuk Pekah hun Remalya amloho ai en de ap o Gilead enap enebe 50 en nim weim abug balfag. Airoho debagdeg o Samaria etman ap raja ebe wereg ma il baloho ulug ilonggo lehet ohoma omano en hun Pekahya anyo watuk kwit de ap biren inim seberoho enowatfag on de hun Argob ha Arye ha inim enowatfag. Airoho enowatlug de at Pekah anyo hun Pekahya obalma raja inatfag.

²⁶Hun Raja Pekahya ai en duruk katfag ale fomane re buku ap raja Israel on en duruk katfag ale baleg on anyo fam mundoho baleg wereg.

²⁷Uzia ap homi Yehuda on enobahet raja inatfagdeg melal-enepuk kwit weregman neg de tahun 52 on deg kweleg Pekah hun Remalya amloho anyo ap homi Israel on enobahet raja inatfag. Inatfagdeg aren o Samaria fam etma 20 tahun melal-enepuk katfag.

²⁸Hun Yerobeam I en siag duruk katfag fam ap homi Israel on nim siag duruk katfag ale anyo hagdoho re aren nim TUHAN fam siag duruk katfag.

²⁹At Pekah ebe raja wereg lit melal-enepuk li em de raja Asyur on hun Tiglat-Pileser anyo en de o kota Iyon mel, Abel-Bet-Maakha mel, Yanoah mel, Kedes mel, Hazor mel, o Gilead kwe etma mel, Galilea mel, it ap homi Naftali on enobam etma mel, delfag. Delfagdeg de ap homi sabu het-eneplug de o Asyur lebag.

³⁰Yotam amloho Uzia anyo ap homi Yehuda on melal-enepuk men neg de tahun 20 fam deg lire at Ela amloho Hosea anyo en de Raja Pekah anyo waruhuk ulug weim abug balfagdeg de, hun ebe ware febagdeg, obalma re at Hosea raja inatfag.

³¹Hun Pekah en duruk katfag ale foma re buku raja Israel on melal-enepuk kwit duruk katfag ale baleg on anyo fam mundoho baleg wereg.

³²Pekah hun Remalya amloho anyo ap homi Israel on enobahet raja inatfagdeg melal-enepuk men neg de tahun bireneg on wereg kweleg de, at Yotam hun Uzia amloho anyo ap homi Yehuda on enobahet raja natfag.

³³Hun Yotam ai isinga re hun Zadok ahaloho hwe Yerusa anyo. Ne, Yotam ebere umur 25 tahun deg kweleg raja inatfagdeg de ebe 16 tahun wereg lit o Yerusalem fam etma melal-enepuk katfag.

³⁴Yotam ebere akni Uzia en duruk katfag hagdoho re, TUHAN endama ahayeg boruk ale neg duruk katfag.

³⁵Famen kembu dewa mot-duruk kwe omano moluluk debag fug mu re it ap homi en de di angge su angge etmano feik lauk kwit amben angge dupa nim yalik lauk katfag. At Yotam neg o TUHAN Obam wirigmu en Sokole utara fil on anyo witfag.

³⁶At Yotam en melal-enepuk wereg li em eta re TUHAN en raja Siria on Rezin anyo mel Pekah raja Israel on anyo mel ap homi Yehuda on fam weim sinalik lowag ulug mon-enebik watfag. At Raja Yotam en duruk katfag ale fomane re buku ap raja Yehuda on en duruk katfag ale baleg wereg on anyo fam mundoho baleg wereg.

³⁸At ebe waratfag ma re o kota Daud obam ap raja sal-enepuk katfag ma etmano salfag. Sale folug de at amloho Ahas anyo obalma raja inatfag.