Read Ninia Yali 2 RAJA-RAJA 16 Bible Online

2 RAJA-RAJA 16 - Ninia Yali bible

2 RAJA-RAJA 16

¹Hun Pekah at Remalya amloho anyo ap homi Israel on enobahet raja inatfagdeg melal-enepuk kwit weregman neg de tahun 17 wereg li em de at Ahas hun Yotam amloho anyo ap homi Yehuda on enobahet raja inatfag.

²Hun Ahas anyo re at ebe umur 20 tahun deg li raja inatfagdeg de, o Yerusalem etma 16 tahun unduhuk wereg lit melal-enepuk katfag. At ebere at ambu hun Raja Daud en fano ale dil lauk katfag hagdoho duk fug angge re akni TUHAN Allah fam siag neg duruk katfag.

³ At de it ap homi Israel on fahet enowesi raja unduhuk latfag on etma duruk katfag hagdoho wereg lit de, aren kembu dewa fahet ap homi o Kanaan etma weregman ap homi Israel on kwik laukmu TUHAN en muko wilibi fesebag on en duruk katfag ale omano higitdoho re amloho waroho og-ereheg, duruk katfag.

⁴At Ahas en de wam wareg inim, amben fano angge re, dom kwe inim, e humon wilibig on enggik doaleg on apmane inim, kembu dewa anyo apne wauk kwe etma feik lauk katfag.

⁵ Eta li em raja Edom[19] anyo nikangge o kota Elat sebelik kwik watfagdeg ap homi Yehuda on o etma wereg on omano muko wilibi fesebag. Ma re ap homi Edom on o etma watfagdeg yugdoho etma ketia nim wereg. Eta li em neg Rezin raja Siria on anyo mel ne Pekah raja Israel on anyo mel en o Yerusalem weim yabik kwik watfag famen Ahas anyo along elehap debebag fug.

⁷Airoho debebag fug mu re Ahas en wene yonggo hun Tiglat-Pileser ap homi Asyur on enowe raja fam mondotuk kwit wene diroho ulug mondotfag, “An de nowe hamingming angge mun dipdoho neg duruk kahi on anyo deg ma re; it raja Israel on mel raja Siria on mel an nowarukoho kwik waharuk on su fam en an del nabik ma ulug heng hapuk kahi,” ulug mondotfag.

⁸Ne, airoho mondotuk kwit Ahas en raja Asyur on anyo enda ahayegdoho ulug emas, perak mel o TUHAN Obam wirigmu wereg on etmano mel, ne di angge su angge raja ebe obam olma wereg on etmano mel mon-enepfag.

⁹Airoho mon-enepfag ma re Raja Tiglat-Pileser anyo en de at Ahas en heng ebag ale anyo fano bebagdeg, aren o Damsyik bin kwik watfag. Airoho kwik waharuk kwit de ap homi Damsyik enowe Raja Rezin anyo re watuk kwit de ap homi enebe re sabu hetdoho feleleng eneplug o Kir lebag.

¹⁰Airoho debag ma Raja Ahas anyo Raja Tiglat-Pileser inim ambi amul ulug de o Damsyik kwebagdeg il hauk men de o kota ai fam mezbah wereg ma hebag. Hebagdeg mezbah anyo unggut deg ale mundoho ilitdoho ai higitdoho kumu heheg wiruhup en ulug hun imam Uria akit o Yerusalem mondotfag.

¹¹Airoho mondotfag ma re Uria en mezbah misig eke ilit angge ilitdoho mondotfag anyo hagdoho witfagdeg mezbah ebe Ahas wam fug mu mundoho witfag.

¹²At Ahas o Damsyik en lebagdeg duruk men mezbah anyo mundoho wirigmu hebag.

¹³Ai en mezbah anyo fam Ahas en wam mel ne gandum anggen mel yalfag. Ne, aren neg wam Allah en fanoap nenobahaukwag ulug waroho yalduk on anyo en wam amep omano mel anggur mel mezbah emberim kwe etmano hililfag.

¹⁴ Ne, Ahas en hauk men mezbah perunggu on fam atam wiroho TUHAN obahet ulug eneko febag on anyo re o TUHAN Obam wirig on nim ne mezbah ket wiroho febag on anyo nim dulug etma wereg ma hebag. Airoho deg ma hebagdeg mezbah anyo re TUHAN Obam wirig on olohotma wereg ma etano en oko re mezbah keron anyo weregman utara fil etma feik lebag.

¹⁵Anyo airoho debelug aren hun Uria fam uruk kwit, “Haren an den nangge mezbah keron au fam raja en mel ap homi holduk on en mel wam waroho hubet yalduk on fahet mel hupmu yalduk on fahet mel, waroho yalug mezbah fam etma it ap homi holduk on en anggur ahalue etma emberimmu hilil-esakiyug. Ne, eke wam etma amep etma oho re mezbah ai fene hilil-esakiyug neg. Famen mezbah mining on aire an den hein og angge fam hein waukmu fahet welamag,” ulug hweag-etfag.

¹⁶Airoho ebag ma re Uria en de raja en ebag ale anyo mundoho debag.

¹⁷ Ai en Ahas en no kereta perunggu on o TUHAN Obam etmano en di ale su ale fahet duruk katfag on etmano meiyalfagdeg, kereta etma fam ikwag wereg on etmano lol heheg hwelebag. Ne, aren ikwag perunggu on ebe humon perunggu sapi wirig angge nesanggo en etano ahabimu wereg angge anyo oho meiyal debagdeg aren helep alhop wereg on emberimmu febag.

¹⁸Ai en Ahas en raja Asyur on anyo fureberuk kwit ambe eke nukoho Sabat fam durukmu ulug hwiliroho wereg on anyo meiyalfagdeg, sokole hun raja amu kuruk kwe anyo dopno-debag.

¹⁹At Raja Ahas en duruk katfag ale fomane re it ap raja Yehuda fam welatfag enap en duruk katfag ale baleg on buku anyo fam baleg wereg.

²⁰ Ahas ebe waratfag ma re o kota Daud en on fam ap raja sal-enepuk katfag etmano salfag. Ai en at amloho Hizkia anyo at obalma raja inatfag.