Read Ninia Yali 2 RAJA-RAJA 17 Bible Online

2 RAJA-RAJA 17 - Ninia Yali bible

2 RAJA-RAJA 17

¹Hun Ahas ap homi Yehuda on enobahet raja weregman neg de tahun nesanggo en deg kweleg, at Hosea hun Ela amloho anyo ap homi Israel on enobahet raja inatfagdeg wereg lit o Samaria fam etma tahun soho en melal-enepuk kwit welatfag.

²Aren de TUHAN fam siag duruk katfag famen de aren siag duruk katfag on etma re it raja atam welatfag on en duruk katfag etma hagdoho fug.

³At ebe re hun Salmaneser ap homi Asyur on enowe raja anyo en inim weim yabik watfagdeg ebe along elehapdoho febag ma re tahun hundig-hundig de Hosea en akit onggo feik lauk katfag.

⁴Famen nukoho eke fam Hosea en raja Mesir on hun So anyo let-nabukwag ulug lisu baloho feik lebag. Airoho debagdeg aren hun raja Asyur on akit onggo feik lauk ale anyo bale febag. Airoho debag ma Hosea en debag ale anyo Salmaneser en oluk atfagdeg aren Hosea senetfagdeg sabu hetdoho hetdeg ma kwelabe febag.

⁵Airoho debebagdeg de at raja Asyur[20] on Salmaneser anyo o Samaria sok larik watfagdeg ap homi Israel on enowarik watfag. Aren sok larik watfag on anyo tahun henahaneg on wereg kweleg etare,

⁶at Hosea re ap homi melal-enepuk kwit neg weregman de tahun soho on deg kweleg Salmaneser en o Samaria sebelik watfag. Airoho sebelik watfagdeg ap homi Israel on sabu hetdeg on og-eneplug de o Asyur lebag. Ne, og-eneplug lebagdeg it etmano fomane re o kota Halah fam etma fesebag, ne fomane re o wilayah Gozan fam en Ik Habor horogma etma fesebag, ne fomabil de o Madai kwenang fam en kota wereg on fene etmano feseil lebag.

⁷It ap homi Israel on de enakni TUHAN Allah en raja Mesir on enggikmen loloho wilibi feseheg, o kwenang ai fam en og-eneplug wilibik waheg, debag on anyo fam siag debag ma o Samaria anyo ap amu on enenggikmu atfag ai. Iren de kembu ilah amu on apne wauk kwit de,

⁸it ap homi enunggul unuk amu on it Israel enap en enowatil waharuk li em TUHAN en muko wilibi fesebag enap omano en eneitogdoho duruk ale etmano inim duruk katfag. It enunggul unuk Israel enap en de it enowesi raja en wene melaleg unduhuk febag on etmano deheg,

⁹ne it enakni TUHAN Allah endama ahayeg bouk fug ale etmano neg deheg, duruk katfag. Iren de o kota hummu mel ne dot kwe mel kembu dewa apne waukmu fahet ulug obale witil lebag.

¹⁰ Duk-duk kwe etmano domog mel ne e enggela heikdoho wilibig on etmano indip kwe mel de iren kembu enesinga Dewi Asyera anyo ahut ilitdeg mel ne anyo ebetuk mu fahet ulug mel witfag.

¹¹Iren enanggembu dewa fahet amben fano angge dupa it ap di enunggul unuk su enunggul unuk o Kanaan fam wereg ma TUHAN en muko wilibi fesebag on etmano en eneitogdoho duruk katfag hagdoho mezbah kembu dewa fahet wirig on fene etmano yalduk katfag. TUHAN en kembu wiruk fug ulug ele huli febag famen de iren kembu wituk katfag. Ne, iren di ale su ale mundoho kwasikdoho neg duruk katfag on ai fam TUHAN olokap kwelapuk katfag.

¹²

¹³It airoho neg durukmu TUHAN en ap nabi nim Allah en ena fam hweag-esaukmu uruk on nim wene ap homi Israel on fam nim Yehuda on fam nim mon-enebik waharuk kwit de wene diroho hweag-esebag, “Hiren siag neg duruk kahep ale ai bale folug de, An den namingming angge ap nabi fene wene melaleg mel wene diroho diyug suroho diyug ulug mel hit henombasi hweag-esauihik on etma holoho neg duruk kamek,” ulug hweag-esebag.

¹⁴Famen it Israel on mel Yehuda on mel en holduk katfag fug. Iren enombasi en enakni TUHAN Allah fam demdoho bouk eleg angge enenda omamnereg latfag hagdoho it oho aireg latfag.

¹⁵It Israel on mel Yehuda on mel de TUHAN en wene diroho diyug suroho diyug ulug hweag-esebag on etmano holoho duk fug angge deheg, ne TUHAN en wene sali it enombasi nim wat-wat atfag on anyo fam dipdoho welam fug angge deheg, duruk katfag. It de TUHAN en airoho duruk eleg ulug komo ale hweag-esauk on anyo re fubi debouk fug angge re, iren kembu siag on etmano fam apne wauk fam it enebe nim siag atil lauk katfag. TUHAN en airoho duk fug ulug hweag-esauk katfag famen iren ap homi enunggul unuk amu on it weregman etman maseroho wereg on etman en duruk ale omano enahut ilitdoho neg duruk katfag.

¹⁶ Iren it enakni TUHAN Allah en wene melaleg omano abirangge sahale folug duruk kwit, iren kembu re no sapi logam on ilitdeg biren angge apne wauk kamul ulug biren angge witfag. Iren de kembu Dewi Asyera ahut wireheg, sohwalanggen mot-deheg, kembu Dewa Baal anyo obahet deheg, duruk katfag.

¹⁷ Iren de enanggembu etmano endama ahayegdoho ulug wam waroho yaluk hag de enomaliki waroho yalduk katfag. Iren hwal ale duruk kwit de enambol fam angge iren heime inim wene maruk alereg ulug boruk kwit hein og-enebik lauk katfag. Iren de mun enamurururoho duruk kwit de TUHAN endama ahayeg boruk fug ale etmano neg duruk katfag,

¹⁸ai fam TUHAN mun olok neg atfagdeg it hwale feseruk katfag fug. Aren it enebe kwenang it og-esebag on etmano fam en oko hwik-enebik lebag ma re we ap homi enunggul Yehuda on neg de etma welatfag.

¹⁹Airoho debagman ap homi Yehuda on en oho re it enakni TUHAN Allah en di wene melaleg su wene melaleg hweag-esebag on etmano holoho duruk katfag fug. Iren de ap homi Israel on en duruk katfag ale etmano enahut wal heheg duruk katfag,

²⁰ai fam TUHAN en it ap homi Israel on anyo abirangge At omalik on ulug boruk katfag fug. Aren enebe unggum enobam feselug ap it enaselei mun enelok deg on fam feseruk katfag. Aren it enebe hwale fesouk fug angge re kwenang it welamag ulug og-esebag ma etmano en oko hwik-enebik lebag.

²¹Ne, TUHAN en it enunggul unuk Israel on de Yehuda enap fam en minggiroho fesebag ma anyo re, it Israel enap en at Yerobeam hun Nebat amloho anyo raja welamag ulug unduhuk febag. Airoho unduhuk febagman at Yerobeam en duruk ale fam ap homi Israel on en TUHAN enapeleg atlug siag neg hum ale duruk katfag.

²²Iren de Yerobeam en duruk ale omano neg duruk kwit de di siag su siag aren duruk on etmano iren oho airoho neg duruk katfag,

²³ai fam ambiangma en TUHAN en it eke hwale feseruk katfag fug, ite Aren it enebe kwenang it og-esebag on etmano fam en hwik-enebik lebag. Airoho debag ale aire At TUHAN en wene fureboukwag amingming angge nabi fene en hweag-esauk katfag ale anyo higitdoho debag. Airoho debag ma re ap homi Asyur on en ap homi Israel on airoho hwik-enebik laukmu etma og-eneplug lebag ma re ketia huli en nim enebe etma wereg.

²⁴It ap homi Israel on hwik-enebik laukmu og-eneplug lebag on etmano enobalma re raja Asyur on en o Samaria[21] en kota etmano fene re ap homi Babel enap mel, Kuta enap, Awa enap, Hamat enap, Sefarwaim enap, etma feseil lebag. Ap homi etma re o etma kwik watfagdeg yugdoho welatfag.

²⁵Ap homi etma keram o etma welamukoho wereg li re iren TUHAN along bouk fug angge duruk katfag. Ai fam de TUHAN en no singa it senggel enebukwag ulug mondorik watfag ma re iron fomane senggel enepfag.

²⁶Airoho debag ma re ap en raja Asyur on anyo hweag-utuk kwit, “Ap homi o kota Samaria etmano fene feserihin on etmano re o etma fam dewa wereg on en awene melaleg wereg ale omano enapelegdoho wereg. Ai fam kembu ai en de no singa en senggel-enebukwag ulug mondorik wahasimu senggel enepsi,” ulug hweag-etfag.

²⁷Airoho hweag-etfag ma re raja Asyur on en it ap sabu hetdoho o Asyur hwik-enebik lebag on etmano en ap imam misig eke sombandoho o Samaria mondorukwag ulug hweag-esauk kwit de diroho ebag, “Ap ai sombandoho lalug at ebe etma wereg lit o etma kembu wereg on ai awene melaleg ai it ap homi etma hweag-esauk kamagdoho mondoriek,” ulug hweag-esebag.

²⁸Ai ebag ma re ap homi Israel on o Samaria en og-eneplug lebag on etmano en imam misig eke watfagdeg o Betel welatfag. Etma wereg lit aren ap homi etmano fam, TUHAN diroho apne wauk kamluhup, ulug mamul-esauk katfag.

²⁹Hweag-esauk katfag famen de ap homi o Samaria etmano wereg on en de eneitogdoho kembu wutlug de atam it ap homi Israel on o kota etma fam wereg lit kembu obam witfag on etmano fene feil lauk katfag. Iren de it enebe deg aleroho re enanggembu domog wit dalug de o kota enebe domog wereg kwe etmano foruk katfag.

³⁰Airoho wituk kwit ap homi Babel on en enanggembu Dewa Sukot-Benot wireheg, ap homi Kuta on en kembu Nergal ahut ilitdeg wireheg, it Hamat enap en enanggembu Asima ahut ilitdeg anyo wireheg,

³¹Ap homi Awa enap en enanggembu Nibhas ilitdeg mel Tartak ilitdeg mel wireheg, ne ap homi Sefarwaim enap en it enanggembu Dewa Adramelekh mel Anamelekh mel etano enobahet enahayegdoho ulug enomaliki waroho yeleheg duruk katfag.

³²Iren kembu dewa etmano fahet mot-duruk kwit en iren TUHAN oho apne wauk katfag. Iren ap homi it enesahalimu on etmano momaloho re enebe imam wereg lit kembu obam etmano en wam waroho foruk kamag ulug unduhuk feseruk katfag.

³³Aireg ma re iren de TUHAN apne weheg, ne it enobam indipmu etmano en wene melaleg wereg ma eneitogdoho duruk katfag aleroho kembu apne weheg, duruk katfag.

³⁴ Airoho duruk kwit ketia huli en nim iren it eneitogdoho duruk ale etma duruk kwit neg wereg. Iren TUHAN obahet duk fug angge deheg, ne wene melaleg mel wene diroho diyug suroho diyug ulug TUHAN en at Yakub unuk eke Aren Israel ebag on anyo ambiangma on etmano en duruk kamag ulug og-esebag on anyo fam dipdoho duruk katfag fug.

³⁵ TUHAN en it omaliki Israel on nim wene sali diroho watfag su, “Hiren kembu ilah amu on fam obahet duruk kam fug, ne hiren henorohole belabeg apma sahaun eheg, obahet deheg, ite wam waroho og-ereheg, duruk kam fug.

³⁶ Hiren An TUHAN nomamne humon fam o Mesir en og-heneplug wilibik waharihik on anyo nalong bolug leho nobaharuk kamek; Ne, hiren An neg napne wauk kwit wam de an nobahet neg waroho og-nutuk kamek.

³⁷An den nawene melaleg mel wene diroho diyug suroho diyug ulug hit henobahet bal-hesauihik on anyo mel fam dipdoho neg duruk kwit welamek. Hiren kembu ilah amu on obahet duruk kam fug,

³⁸ne wene sali An nim hit nim wat-hesauihik on ai henapeleg am fug.

³⁹An de henakni TUHAN Allah deg lahimu re hiren An nobam dipdoho neg duruk kamek, ne hiren airoho duruk kamuhup halug de hit henebe ap henaselei enenggikmen An den loloho henobaharuk karuhuk,” ulug hweag-esebag.

⁴⁰Famen ap homi Samaria fam welatfag on etma re enesanggo holduk katfag fug; iren it eneitogdoho duruk katfag ale etmano fam neg seneg wereg lit duruk katfag.

⁴¹Aireg ma re iren TUHAN apne wauk katfag famen kembu oho mot-duruk katfag. Ma re ketia huli en nim it enambiangma on en airoho neg duruk kwit wereg.