Read Ninia Yali 2 RAJA-RAJA 18 Bible Online

2 RAJA-RAJA 18 - Ninia Yali bible

2 RAJA-RAJA 18

¹Hun Ela amloho Hosea anyo ap homi Israel on fahet raja inatfagdeg weregman neg tahun henahaneg on deg kweleg Hizkia hun Ahas amloho anyo ap homi Yehuda on fahet raja inatfag.

²At ebe raja inatfag li em etare umur 25 tahun deg kweleg inatfagdeg o Yerusalem fam etma 29 tahun unduhuk wereg lit melal-enepuk katfag. At isinga re unuk hwe Abia hun Zakharia ahaloho ai.

³At Hizkia en Raja Daud at omba anyo en duruk katfag hagdoho TUHAN endama ahayeg boruk ale neg duruk katfag.

⁴ Aren kembu dewa mot-duruk kwe etmano meiyaloho feheg, kembu ilitdeg ebetuk angge ulug wirig on etmano meiyale eseheg, kembu enesinga Dewi Asyera ahut ilitdeg anyo dukom eseheg debag. Aren eke kisu perunggu on fam wirig angge Musa en witfag ma unuk Nehustan uruk katfag angge ai mel erap-ferap esebag. Aire ap homi Israel on enebe wereg li em eta huli en angge iren kisu perunggu on ai fahet eberoho ulug amben fano angge dupa yalduk katfag ai fam debag.

⁵Ap homi Yehuda on enobahet raja welatfag on etma it atam Hizkia wereg fug kweleg welatfag on et ne fobik welatfag on et angge re Hizkia higit on eke welatfag fug. Aren it ap homi Israel on enakni TUHAN Allah anyo fam enda dip debeheg,

⁶TUHAN ele holoho neg deheg, duruk katfag. Aren TUHAN ele sahale folug eke duruk katfag fug. Di wene melaleg su wene melaleg Musa en fene TUHAN en og-esebag on etmano Hizkia en fik-furebelug neg dipdoho duruk katfag.

⁷Ai fam hundig-hundig TUHAN en at let durukmu re aren di ale su ale duruk on etmano ambiangma en fano neg atuk katfag. Aren raja Asyur on nim erim deg wereg lit at apma sebeuk fug angge welatfag.

⁸Aren ap homi Filistin enalong elehapdoho fesebagdeg it enebe wereg ma etmano o sili dotman angge o bumbuk lohon huli, aire o Gaza mel ne o ai aluluk kwe maseroho wereg on etmano et angge mundoho delfag.

⁹At Hizkia raja inatfagdeg melal-enepuk kwit weregman neg tahun ohwaneg on deg kweleg, ne eta li em at Raja Hosea ap homi Israel on melal-enepuk men neg tahun soho on wereg kweleg, at Salmaneser ap homi Asyur on enowe raja anyo ap homi Israel on wereg ma weim yabik watfagdeg o Samaria sok latfag.

¹⁰Sok latfag ma tahun henahan welatfagdeg o Samaria anyo ap amu on enenggikmu atfag. Ai atfag ale aire at Hizkia raja inatfagdeg melal-enepuk kwit weregman neg tahun folfalik on wereg kweleg, ne at Hosea re melal-enepuk men neg tahun soho on wereg kweleg debag.

¹¹Airoho debagdeg raja Asyur on anyo en ap homi Israel on omano sabu het-eneplug o Asyur lebag; lebagdeg it etmano en foma re o kota Halah fesebag, ne fomane re Ik Habor horogman wilayah Gozan fam etma fesebag, ne foma re o Madai fam etman kota kwe etmano fesebag.

¹²O Samaria ap amu on enenggikmu atfag aire it ap homi Israel on en enakni TUHAN Allah anyo fam ele holoho duruk katfag fug ai fam debag. Iren TUHAN en it nim wene sali watfag on anyo dahandoho deheg, ne TUHAN amingming angge Musa anyo en wene melaleg hweag-esebag on anyo dahan debeheg duruk kwit iren holoho duk fug angge enerimdoho duruk katfag.

¹³At Hizkia ap homi Yehuda on enobahet raja weregman neg 13 tahun welatfagdeg tahun 14 on wereg kweleg raja Asyur on Sanherib anyo watfagdeg o Yerusalem etma elehet humon oho on anyo enowatmin ulug watfagdeg enalong elehapdoho fesebag.

¹⁴Watfagdeg at Sanherib anyo o Lakhis wereg ma at Hizkia en wene mondotuk kwit diroho ebag, “An den mun siag dirihik mu re nowe haren nit nenowatmin ulug dik waharuk kahen on ai bale fein. Ne, nowe haren diroho dimihin ulug nobam hweag-nitmihin on etma an den dimin neg,” ulug mondotfag. Airoho ebag ma at Sanherib en onggo uruk kwit, “At Hizkia en at Sanherib akit perak 10.000 kilogram en ne emas 1.000 kilogram en mondorik wamag,” ulug hweag-etfag.

¹⁵Ai fam at Hizkia en perak TUHAN Obam wereg on etmano mundoho nim ne at raja obam olma yohwatuk angge fam wereg on etmano nim Sanherib akit mondotfag.

¹⁶Emas at Hizkia en o TUHAN Obam anyo sok fene dopno-debag on nim, lang owag fene febag on etmano mel mundoho webagdeg Sanherib akit mondotfag neg.

¹⁷Airoho debag famen raja Asyur on anyo o Lakhis en ap sehen foroho on esan misig eke o Yerusalem inim weim yabik kukwag ulug mon-enebik watfag. Ap esan aire ap enowesi leho on perwira enebe henahan en og-eneplug watfag on etan eke re it sehen seneg enap enowe kain panglima ne eke re raja ahaik nowag ulug hwenanggoho og-utuk on[22] ne misig eke re it ap hun raja ebe fahet kahaleg wereg on etmano enowe nim en melal-eneplug watfag. It enebe airoho watfagdeg o kota ai fam aik watfagdeg iren enobale yabuk unuk Penatu yabuk urukmu en ik kalog eke ik sene emberim fil ik yenggeleg on anyo en hwaloho wilibigmu etma aik watfag.

¹⁸Etma aik watfagded iren Hizkia wol-duruk kwit enele hwiruruk katfag. Airoho duruk en at Hizkia autsi pegawai enebe henahan wilibik lebagdeg it wereg ma etmano ambi aik lebag. It pegawai henahan eta enebe re hun Elyakim at Hilkia amloho raja obam etma hwalduk on fahet enowe welatfag on anyo ha, at Sebna o etma fahet lisu balduk on welatfag on anyo ha, ne Yoah hun Asaf amloho hun raja wereg ma etma lisu balduk on fahet welatfag on anyo ha.

¹⁹It etano wilibik watfag ma it ap Asyur sehen seneg on etano misig eke en uruk kwit, “Hiren at raja Asyur on en eheik ale su Hizkia hweag-irik lakiyug, Haren nunggwelug an nomamnereg lahi boruk kahen?

²⁰Haren boruk kwit nele ihi on eta fam ap tentara enomamne mel, ne iren enamenggel fam duruk ale etma mel ilit dimin ulug uruk kahen a? Haren ap sa fam henda belabeg lit hambeng se angge Asyur ele sahalduk kahen?

²¹Hat demdoho at Mesir en let nabukwag ulug henda ebereg welahen; famen aire walengge on dumuk hilingguruk hag. Degma re domuk ai somboruruk kwit henggik hwaik duk alereg. Ai hagdoho re ap homi raja Mesir on fam enenda ebere folug wereg on etma airoho am alereg, isi, ulug hweag-umuk,” ulug hweag-esebag.

²²Airoho ebagdeg ap Asyur on sehen foroho on anyo en uruk kwit, “Haren henakni TUHAN Allah anyo en let-nabukwag ulug ebereg lahen ane? Famen Hizkia ebe ap homi Yehuda on mel Yerusalem on mel abirangge en mezbah o Yerusalem fam wirig on ai olohotman TUHAN obahet neg duruk kamuhup ulug hweag-esasi famen mezbah mel ne TUHAN ebe apne waukmu mel etmano re TUHAN ebe en siahapdoho fesi fug a?

²³Ketiare nowe raja Asyur on unuk fam anggere an ketia ninim wal-wal amul en uruk kahi ai, ne hit fam wam kuda 2.000 en og-hesa man oho re ap enebe wam etma anduhunmu lahalug lauk on higit am fug alereg!

²⁴Ne, hiren nit ap niron en sehen foroho on we horog ha on nim wal-ha man ohore it inim eke ilit esa fug alereg. Famen hiren Mesir fam henenda ebereg lit kereta weim yapuk on mel ne ap kuda fam lauk kwit weim yapuk on mel mon-nesa wamag ulug henenda ebereg welahep ai?

²⁵Ne, hiren boruk kwit niren hit henowatlug henalong elehapdoho henobahaul ulug duruk kahe on etma re TUHAN en let-nenepuk fug ulug a? Nit TUHAN en miming nenepuk hit hinim weim yaplug henebe elehapdoho henobahaukwag ulug hweag-nesasimu duruk kahe!” ulug hweag-esebag.

²⁶Airoho ebag ma it Elyakim mel, Sebna mel, Yoah mel en ap perwira anyo fam uruk kwit, “Nenowe haren ap homi Aram on enele fam hele in nit de holduk kahe anggere. Haren it Ibrani enele fam uruk men it ap homi elehet o kota fahet oho on asiagle kwe wereg on etman holukohoreg,” ulug hweag-etfag.

²⁷Airoho ebag ma at sehen foroho on anyo en uruk kwit, “An de hit nim ne hit henowe raja ai nim fahet neg raja Asyur on en mon-nabik waha a? Eleg! An den it ap homi elehet asiagle fene hwerieg wereg on, hit hininim seberoho henonggwareg henal mel henemie mel nahup etma enobahet nim uruk kahi,” ulug ebag.

²⁸Airoho ebagdeg ap sehen foroho on anyo inatfagdeg ap homi Ibrani on enele fam ele hwiroho uruk kwit, “Raja Asyur on en isi ale su henesanggo holiek:

²⁹At Hizkia en hit henahap wendat-henebuk fug alereg anggere aren lal-nenebukwag ulug duruk eleg.

³⁰Aren hit henobam uruk kwit TUHAN fam neg nenenda ebereg welamul ulug onggon henepuk on etma fahet holduk eleg. Hiren TUHAN en nit nenahap wendat-neneplug it ap tentara Asyur on etma nit nenobam kota fam kwik wam no ulug kwe bal-enemisi bouk fug.

³¹An den raja Asyur on anyo en uruk kahi anggere, hit at Hizkia ele holduk eleg we henebe wilibik watlug nit nenapma aik manik. Ne, hiren airoho duluhup halug hit henonggwareg heneyabukmu en henahan anggur anggen mel, ne hit henahan arah fam en anggen nenggeg, ne henahaik bohwe henonggwareg en on fam henahaik nenggeg, duruk kwit welamuhup.

³²Airoho duruk kamuhup deg hit henebe oko o hit henanggwenang welahepma oma higit deg ma oko henobahaik lahup. Ne, o etma re hit henobahet henahan anggur anggen yig-henebeheg, ne hit henasiburu nauk on fahet gandum anggen yig-henebeheg durukmu tepung wireheg, duruk kamuhup. O kwenang etma fam e zaitun hum-hamdoho wereg, ne zaitun ahalue mel ne kin ahalue mel humdoho wereg neg. Ne, hiren lahe an den hweag-hesauk kahi ale eta higitdoho duluhup halug hit henebe henoluk welamuhup ne waramuhup fug. Ne, hit at Hizkia ai ele holduk eleg! Aren nit TUHAN en nenahap wendat-nenepmisi ulug etma re apenen hweag-hesauk.

³³An nalong apman ap homi enunggul unuk ke on enakni kembu en it enobam eke deloho wilip-enepsi behep? Mun eleg.

³⁴Kembu dewa ap homi Hamat on mel Arpad on mel etmano re ebe kema wereg? Ne, it ap homi Sefarwaim mel, Hena mel, Iwa mel en enanggembu etmano re kema wereg? Iron etman Samaria eke ahap wendarik wahausa a?

³⁵Kembu dewa kema on en o kwenang eke an napma wereg ma oko wilibi fesi? Ne, hit ap homi Yerusalem on henakni TUHAN en higitdoho del-henebuk alereg ulug a? Mun eleg! isi,” ulug hweag-esebag.

³⁶Anyo airoho urukmu enesanggo holfagdeg ap homi Yerusalem on en at Hizkia en henele eleg amuk ulug hweag-esebag ma re enele onggo eke ebag fug.

³⁷Airoho ebag ma re at Elyakim le Sefna mel, Yoah mel enenda hesilduk kwit enasum deneloho hwik-esebagdeg, ap perwira Asyur on anyo ebag ale etmano at Hizkia fam hweag-irik lebag.