Read Ninia Yali 2 RAJA-RAJA 19 Bible Online

2 RAJA-RAJA 19 - Ninia Yali bible

2 RAJA-RAJA 19

¹At Hizkia autsi henahan etano en wene hweag-irik lebag ma esanggo holfagdeg de, aren enda hesilduk kwit ulug de asum deneloho hwik-esebagdeg de belahwi sum wandoho re o TUHAN Obam wirigmu etmano lebag.

²Lebagdeg de aren de hun Elyakim at raja obam etmano fahet enowe welatfag on anyo mel, at Sebna negara fahet lisu balduk on welatfag on anyo mel, it ap imam sobal atfag on etmano mel de iren at Amos amloho Nabi Yesaya anyo akit lowag ulug mon-enepfag. Ai ebag ma re it oho sum belahwi sum wandoho lebag.

³Airoho lowag ulug mon-enepuk kwit de at Hizkia en wene Yesaya diroho hweag-omag ulug hweag-esebag. “Nit de o yoho su fam ap en unggum nenobahakesareg sebeloho nenobahakesama re yoho re fong watuk kahe. Nit de homi omalik endetmin ulug duruk famen omamne eleg atuk on anyo hag ahe.

⁴Raja Asyur on en de autsi yabuk leho on wereg on etmano misig eke Allah mun oluk wereg on anyo sebeloho foukwag ulug mondorik waha. Ma re aren eheik ale ai hakni TUHAN Allah anyo esanggo holeheikdeg it ap homi airoho ehesa on ai unggum enobam fesehu ane, eleg ane? Sa oluk deg. Ai en de nit ap dorangge nenoluk welahe on eiya nenobahet somban iyug,” ulug ebag ma hweag-irik lebag.

⁵At Yesaya en de at Hizkia en ebag ale anyo hweag-irik lebag ma holfagdeg de,

⁶at Yesaya en ap yonggo angge lebag on etmano fam wene diroho iyug ebag, “TUHAN en uruk kwit de, haren de ap homi Asyur on ai en An henakni TUHAN fahet enendama seramap nobahalug wene hweag-hutuk mu holehen on ai fahet hendama hakol bouk fug.

⁷TUHAN en de raja Asyur on ai fam de wene demdoho fug we enele seiale hweag-umuhupmu esanggo holug de, at onggwareg obam lahumu at ebe waruhupmu wararuhu, ulug ihi on aire at Hizkia hweag-irik lakiyug,” ulug hweag-esebag.

⁸Ap tentara Asyur on enowe anyo en holduk men de, “Hat howe raja anyo re o Lakhis embeselug de o etan horogdoho o Libna lahareg de ap homi etman enowatmin ulug ininim weim yapuk,” ulug hweag-etfag ma re aren raja anyo ninim ambi amul ulug de lebag.

⁹Ne, at raja Asyur on anyo en holduk men de ap sehen foroho Mesir enap esan lohwaleg de at raja Sudan on hun unuk Tirhaka anyo anyo og-eneplug de hit henowatul ulug waharuk ebag ma raja Asyur on anyo en holfagdeg aren lisu baloho raja Yehuda on Hizkia anyo fam monde feik watfag.

¹⁰Ne, aren lisu baloho monde feik waharuk kwit aire diroho ebag, “Hakni Allah ai en seiale hweag-hutuk kwit raja Asyur on ai en henalong elehap henobahalug henowaruhu fug ulug hweag-hitsi ai fam de At fam henda hembisi folug welam fug.

¹¹Ap homi en uruk kwit de raja Asyur on etman o kwenang eke fam ap homi enowatul lalug de enebe mun felelengdoho enowatuk ale fahet urukmu re holduk kahen lit deg. Anggere haren boruk kwit an noluk lil aruhuk boruk kam fug.

¹²O endam etma an nombasi en o kota Gozan on mel, Haran on mel, Rezef on mel enebe mun al binggi sahaloho enowatuk kwit ap homi o Eden on o Telasar etma wereg onmundoho enowatukmu re it enanggembu dewa apne wauk katfag on etmano en eke del-enepsi fug.

¹³Ap homi o kota Hamat on mel, Arpad on mel, Sefarwaim on mel, Hena on mel Iwa on mel, enowesi raja omano re kema lausa?” ulug lisu baloho hweag-etfag.

¹⁴Airoho hweag-etfag ma re lisu baleg anyo walug de watfagdeg de Hizkia og-irik watfag ma webagdeg aren bilinggebagdeg de at Hizkia ebe o TUHAN Obam wirigmu etmano lebagdeg lisu baleg anyo TUHAN olohotma liminggi febagdeg,

¹⁵ aren somban diroho ebag, “TUHAN Allah Nit ap homi Israel on nenakni. Hat hebe re it kerub [23] emberimmu hwerieg welahen on nenakni. We hat hamu en neg bohol kwenang wal-dirihin mu ap homi o kwenangma suma di obam su obam ap enowesi yain-kain wereg lit melal-enepuk on etma Hat henggikmu neg wereg.

¹⁶Hun Raja Sanherib ai en Allah mun holuk neg welahen on anyo endaman mabenap hobahakeikdeg, ele en mabenapdoho hobaharuk ale ai hesanggo holug de, nit nenebe siahap nenepmin ulug duruk on ai hil fubi-nenobahain nakni.

¹⁷Ap homi Asyur on enowesi raja en ap homi di enunggul unuk su enunggul unuk mundoho elehap enepswareg enobam kota mel mundoho siahap debeseruk katswa ale aire nit oho nenoluk deg.

¹⁸Airoho elehap debeseruk kwit de, it enanggembu oho re we e on mel helep on mel famen ap homi laloho wiri folug apne wauk on deg ma re omamne wereg fug. Ne, it enanggembu etma famen ohore indok yalduk.

¹⁹Nenakni TUHAN Allah, ap homi kwenangma suma di obam su obam wereg on en de ap homi Israel on enakni TUHAN Allah ai amu neg wereg ulug enoluk amag ulug de, ap homi Asyur on en enowatul ulug uruk on ai fam en del-nenebin, nenakni,” ulug somban ebag.

²⁰Raja Hizkia en somban airoho ebag ma TUHAN esanggo holfagdeg onggo hweag-omag ulug Yesaya hweag-etfag ma at Yesaya en somban irihin on anyo onggo diroho ulug hweag-etfag,

²¹TUHAN en uruk kwit de, “Ap homi o kota Yerusalem on en de hat Sanherib enele en horogap hapuk kwit de unda yag-habuhup.

²²Haren de sa fahet hendaman de maben deg boruk kwit unuk siag-biagdoho hele en horogap duruk kahen. Ap homi Israel on enakni Allah mun siag duk eleg angge eneg horeg welahi on de Allah nebe An. An fahet hendaman maben hag boruk kwit honggwareg en hawonog atuk kahen ale ai ambi!

²³Haren de hele en werahap duruk kwit de hautsi monde feseik wahenma iren uruk kwit de, nenowe en an nangge kereta mun humdoho wereg ma re dom Libanon unggul yaron omano mundoho sebeloho ferihik deg e lak mun ebe on onggombi yit-yatdoho wilibig on etmano unggul ware ferihikdeg ohweimu mun yit-yatdoho etma kwik lauihik.

²⁴Ne, ap homi bohon ap homi enobam lalug etma ik bohwe habuleheg, ik ai on nenggeg, duruk katihik. Ne, nautsi tentara en de Ik Nil sobit-sabat esausa ma ik anyo iring atsi ulug hawonog atuk kahen ai.

²⁵Airoho dirihin famen de o endam en angge aren airoho dukwag ulug An den en irihik on aire hat hesanggo holduk kahen fug ane? An den airoho irihik ai fam ketia haren ap homi enobam kota elehet fak lehet helep on fam omamneroho oho on etmano moluluk-malalakdoho dukwag ulug de An den neg hat homamneap hobaharihik mu duruk katihin.

²⁶Haren airoho durukmu ap homi o etma wereg on en de diroho suroho ulug duk fug ale atuk kwit, enowag elek dulug enakol atuk katswa. Airoho atuk kwit de it enebe re enggelangge o leimu wilibig on mel, ite enggelangge o dummu wilipuk on mel, hol sielu mo indip fil en ahanhan on[24] fun ha waharukmu bug atuk hag wereg ai.

²⁷Airoho enepuk kahen famen de hat hebe o di kwe su kwe wereg lit duruk kahen ale mel, kwe lauk kahen ale mel, etma mundoho re An noluk deg.

²⁸Aireg ma re ketia hat honggwareg en leho fahat-dauk kwit hendama holok en An bet-napuk kahen ale aire An mundoho nesanggo holdihik. Ketia An den de hat de kobokwe waharihin kwe en lit haplug laroho sabu hambiang elma kwelabe feheg, hambilik fam lili hobahakeg, dulug de lit-haplug lahuk,” ulug hweag-etfag ale fahet wene monde feik watfag.

²⁹At Yesaya en airoho ulug monde feik waharuk kwit de wene eke su Hizkia fahet monde feik watfag. Aren uruk kwit de, “Hiren de Allah en isi on aire demdoho aruhu ulug fureboukwag ulug enegdoho re tahun ketia on au fam nim ne fobik on ai fam mel de ap homi en de gandum anggen abusag wilibuhu on nauk kamuhup. Famen de airoho nauk kamuhup deg fobik it enonggwareg en gandum yareheg, anggur yareheg, dulug anggen yihig nauk kamuhup.

³⁰Ne, ap homi Yehuda on foma enowaruk fug angge enoluk lil amuhup on etma re fobik di angge su angge kwenangma omanggen omamneroho yaho lit anggen yihiruk on hagdoho atlug enebe finik-fanoroho neg welamuhup.

³¹TUHAN en de ap homi Yerusalem on mel Don Sion fam en mel enahap wendat-enebuhu on welamuhup ulug isimu wereg ma re ebe airoho neg aruhu.

³²Aireg ma, TUHAN en at raja Asyur on anyo fahet ebag on wene eke su: Raja Asyur on aire o Yerusalem suma fam kwik waruhu fug. Ne, andog o Yerusalem fil oma eke leg ha waruhu fug. Ne, at autsi enebene sing wandeg on o Yerusalem horogdoho suma waheg, o sok laroho henowarik kwik wamul ulug kobokwe baleheg, duhup fug.

³³Raja Asyur on aire o Yerusalem suma kwik wam fug angge kobokwe wahasi kwe en sombandoho lahu, ulug An henakni TUHAN en nele ihi.

³⁴Hit ap homi o kota Yerusalem welahep on de An nonggwareg nalong welahi ale anyo nelahasikdoho nim, ne namingming angge Daud nim wene sali wa-wat atuhuk on anyo elahasikdoho nim de, hit henebe ili og-henebuhukdeg fahat-henusug lit welaruhuk, ulug isi,” ulug ebag.

³⁵Airoho ebagman hup anyo salim anyo re Malaikat TUHAN en on de ap Asyur enap sehen seneg enap enobam sabo salegma etmano watfagdeg de ap enebe 185.000 en enowatfag. Enowatfag ma re o hubet sekandoho re ap wareg ahum buag ebag ma hebag.

³⁶Airoho atfag ma re raja Asyur on Sanherib anyo re ambol somban de obam Niniwe lebag.

³⁷Airoho lebagdeg nukoho eke salim de at raja anyo ap homi o Niniwe on enanggembu Dewa Nisrokh anyo fahet duruk men de at omaliki nimi Adramelekh mel Sarezer mel etano en karog fam watfag. Airoho ware febagdeg de it enebe o Ararat fil etma heiye lebag. Airoho debag ma re at Esarhadon amloho amu on anyo eke akni obalma raja inatfag.