Read Ninia Yali 2 RAJA-RAJA 2 Bible Online

2 RAJA-RAJA 2 - Ninia Yali bible

2 RAJA-RAJA 2

¹TUHAN en at Elia ebe hol sielu en kwaniroho walug boholma laharuk ale aik watfag. Eta li em de at Elia mel Elisa mel de o Gilgal en watfagdeg de,

²kwe bulmu etano en at Elia en Elisa fam uruk kwit, “An de TUHAN en o Betel lakin ulug hweag-nereheik anggere, hat de hebe dia bok amin,” ulug hweag-etfag. Airoho hweag-etfag famen de at Elisa en onggo uruk kwit de, “Nenakni TUHAN oluk mundoho wereg on anyo mel, ne nakni hat hebe mel henowag. An den hat hamu lin healug lamin de fug,” ulug hweag-etfag. Airoho ebagdeg de inim dil-dil de o Betel lebag.

³Airoho lebagdeg de etma ap nabi welatfag on esan lohwaloho Elisa akit wilibik watfagdeg hweag-utuk kwit de, “TUHAN en de o yoho su salim hat hakni hamboko walug boholma lahamisimu hat lin heamisi ale aire hat de holuk deg lahen a?” ulug hein webag. Hein webag ma aren uruk kwit de, “An oho nolukdoho welahi anggere henele eleg amek,” ulug hweag-esebag.

⁴Airoho ebag ma Elia en Elisa fam uruk kwit de, “An de TUHAN en o Yerikho lakin eheikma lamin anggere hat de hebe suma bok amin,” ulug hweag-etfag. Famen at Elisa en de, “Nenakni TUHAN oluk mundoho wereg on anyo mel, ne nakni hat hebe mel henowag. An de hat hamu lin healug lamin de fug,” ulug hweag-etfag. Airoho ebag ma re inim lebagdeg de o Yerikho lebag.

⁵Airoho lebag ma ap nabi etma welatfag on esan lohwaloho Elisa akit lebagdeg hein og-hauk kwit de, “Allah en o nukoho su salim hat hakni hamboko walug lahamisi ale re hat de holuk deg lahen a?” ulug hweag-etfag ma, at Elisa en de, “An oho nolukdoho welahi anggere henele eleg amek,” ulug hweag-esebag.

⁶Ai ebagdeg de at Elia en Elisa fam uruk kwit de, “An de TUHAN en an o Ik Yordan ikma lakin eheikma lamin anggere hat hebe suma bok amin,” ulug hweag-etfag. Famen de at Elisa en onggo uruk kwit de, “Nenakni TUHAN oluk mundoho wereg on mel nowe hat hebe mel henowag. An de hat hamu lin healug lamin fug,” ulug hweag-etfag. Airoho ebag ma re it enebe seberoho re Ik Yordan ikma lebag,

⁷ne airoho laukmu re it ap nabi enebe 50 en oho ininim lebag. Lebagdeg de at Elia mel Elisa mel etano Ik Yordan elanma bok aik lebag, ne it nabi enebe 50 en etano oho it unduhukmu etano horogdoho hagdoho inaik lebag.

⁸Inaik lebagdeg de at Elia en de asum yaron jubah anyo nonggoloho webagdeg de hwililipdoho re ik anyo emberim fam ware febag. Ware febag ma re ik anyo biren foma-foma minggit atfag ma at Elia mel Elisa mel kwenang iringgig kwe nindig-atfag.

⁹ Airoho nindig-atfagdeg ik foma fil aik lebagdeg at Elia en Elisa fam uruk kwit de, “Nenakni TUHAN en an hamboko boholma og-naplug lahauk eleg kweleg, an den mel hat lin hea fug kweleg eiya hat henda angge an den hat og-hitmin angge hweag-nimin,” ulug hweag-etfag. Airoho ebag ma at Elisa en de, “Ap enaknisi en enomaliki fam enabinggi angge og-esauk anyo hag, an nebe nakni hobalmangge[2] welaruhuk en de, nakni hat halong welahen ai hag an nalong welaruhuk en an og-nimin,” ulug hweag-etfag.

¹⁰Ma at Elia en uruk kwit de, “Yehei u, aire an den mel og-hom fug on heng-nabehen.” Ebag. Famen de eke uruk kwit de, “An nebe TUHAN en hamboko og-naplug laharuk li em eta hat hil welatmihin halug de heng ehen on ai higit atmisi. Ne, hat hil neamihin fug halug de haren heng ehen on ai eleg atmisi,” ulug hweag-etfag.

¹¹Airoho ebagdeg de it etano enebe seberoho lauk kwit de enele matil lauk katfag. Airoho lauk men de fetagdoho etano kereta indok ulugdoho no kuda en lisulug lauk angge en de it biren etano minggit enebik watfagdeg de at Elia anyo hol sielu fam en walug de boholma lahabag.

¹² Airoho lahabag ma at Elisa en il hebagdeg de ele hwiruruk kwit de, “Elia nakni, nayon ao. Nit ap homi Israel on nenalong baloho fahat nenusug lahen on anyo hebe eleg ahen ai nakni,” ulug ele uruk kwit il lahaboho weregman de Elia ebe mundoho obukdoho kwik lebag. Airoho debag ma, Elisa endama mun hesilfag ma asum yaron jubah anyo deneloho biren debebag.

¹³Airoho deneloho embesebagdeg at Elia asum yaron jubah nonggoloho wambik watfag on anyo webag. Airoho hwelalug de at ebe sombandoho re Ik Yordan elanma in aik watfag.

¹⁴In aik watfagdeg de aren sum hun Elia asum anyo fam de ik anyo fam ware foruk kwit de, ele diroho ebag, “At Elia akni TUHAN Allah anyo re ebe kema wereg?” ulug airoho ebagdeg aren sum yaron anyo fam ik anyo ware febag ma, ik anyo biren minggit atfag ma re at ebe kwenang iringgig kwe nindig-aik lebag.

¹⁵Nindig aik lebag ma ap nabi enebe 50 en angge o Yerikho en lebag on etmano en Elisa inil hebagdeg de uruk kwit de, “Hun Elia along wereg on anyo re at Elisa fam fesimu,” ulug ebag. Airoho ebagdeg de at Elisa akit lebagdeg at alukwema enelenggen dimiroho enorohole belabeg sahaun uruk kwit dang-debag.

¹⁶Dang duruk kwit de diroho ebag, “Ap nit nininim de enebe 50 en eiyare enomamne on neg wereg ma re, hat hakni Elia anyo TUHAN Aheime en walug lalug dom fam oho donggoma oho embeseik lalug la no re herarik laul,” ulug hweag-etfag. Ai ebagman de at Elisa en de, “Laluhup fug embeseiyek,” ulug hweag-esebag.

¹⁷Airoho hweag-esebag famen de it etmano en de, “Nit de laul” ulug ning hauk katfag ma re, fano lakiek ulug hweag-esebag. Airoho hweag-esebag ma ap mon-enepfag on enebe 50 en etano Elia heraril lebagdeg de nukoho henahan hera debag famen de ebe hebag fug.

¹⁸Airoho heraruk katfagdeg at Elisa ebe it nangno enusug lit o Yerikho wereg ma akit sombandoho olma watfag. Watfag ma at Elisa en hweag-esauk kwit de, “Hit de la fug ulug hweag-hesauihik famen de hit lahepdeg ai a?” ulug hweag-esebag.

¹⁹Ai ebag ma it ap o Yerikho on etma Elisa akit watfagdeg hweag-utuk kwit de, “Nenowe, o kota suma fam haren hil hehen ai hag fanoreg famen de, ik mundoho siag neg deg ma homi enomalik enahummu wereg on mundoho wiri watuk kwit neg wereg,” ulug hweag-etfag.

²⁰Airoho hweag-etfag ma at Elisa en de, “Waruk mangkuk keron wag lalug, mayu ilonggoma yohwaroho folug og-nirik manik,” ulug hweag-esebag ma re og-irik watfag.

²¹Og irik watfag ma at Elisa ebe ik eleruk fil lebagdeg de mayu omanno ik elerukmu belapuk kwit de diroho ebag, “TUHAN en isi alere su: Ik su siag deg ai en ap homi enebe siag aheg, homi enomalik wiri wareheg, duruk kam no ulug An den fanoap debehi, ulug eheik,” ulug ebag.

²²Airoho ebagdeg etano neg at Elisa ele ebag ale higitdoho ik omano fano atfagdeg de ketia hulien nim de fano neg wereg.

²³Airoho dulug de at Elisa anyo o Yerikho en de o Betel watfag. Ne, at airoho kwema lauk men de it omalik doron o kota eke en wilibik lauk kwit de enele en horogap duruk kwit de, “Unggul delag, unggul delag. Hat hebe re deiya en lakin!” ulug hwirebag.

²⁴Airoho ebag ma at Elisa en alukwe endenoho omalik doron etmano fil fu-enusug lit de TUHAN unuk hombuk baloho hururung debesebag ma re, bak humon hag angge unuk beruang ai hwe on biren angge ekeman wilibik watfagdeg de omalik doron etmano enesahalimu en de enebe 42 en angge singgil-senggeldoho enowatfag.

²⁵Airoho enowatfag ma re at Elisa anyo Dom Karmel fam lahabagdeg fobik en sombandoho o Samaria wambik watfag.