Read Ninia Yali 2 RAJA-RAJA 20 Bible Online

2 RAJA-RAJA 20 - Ninia Yali bible

2 RAJA-RAJA 20

¹Airoho atfag li em eta re Raja Hizkia ouk bot ebe fam yihibag ma re ouk en ebe waram ale atfag. Airoho atfagdeg wereg ma re at Yesaya hun Amos amloho anyo en ha watfagdeg wene hweag-utuk kwit de, “Nowe hat hebe fano aruhun fug, we il misig welatlug hat hebe wararuhun angge nowe haren di yabuk su yabuk duruk kahen on etma mundoho hwale foukwag ulug TUHAN en ai eheik,” ulug hweag-etfag.

²Ai ebagman de at Hizkia ebe alukwe o elehet fak oho on anyo fil hebel atfagdeg somban uruk kwit diroho ebag,

³“TUHAN nakni, an den Hat hobahet neg duruk nenda mun bekit deg lit dipdoho neg duruk katihik. An den de Hat hendama boruk ale neg duruk kahi ale anyo ebet hakin,” ulug somban ebagdeg at Hizkia anyo oba lahaik-wambuk yatfag.

⁴Airoho debag ma at Yesaya anyo Hizkia embeselug lamin ulug debagman de at Yesaya ebe o raja obam en ambe bulon anyo olohotman wilibik la fugmen de, TUHAN en de

⁵nikangge sombandoho Hizkia raja ap homi TUHAN omaliki enobahet wereg on ai akit lalug de wene su hweag-irik lakin ebag. Hweag-utuk kwit de, “An hakni TUHAN Allah at homba Daud en napne wauk katsi on anyo en haren somban ehen ai mundoho nesanggo holihireg haren hiluwe belabehen ale eta mel mundoho hiihi. Mu re An den hat hiling habuhuk anggere o hau re An nobam wirigmu etmano lakiyug.

⁶An den de hat holuk eke nim welaruhun en umur 15 tahun en eke nim dopno hobahakuk. Ne, hat hebe nim kota Yerusalem nim de raja Asyur on enggikmu en lili henobahakuk. O kota aure An nonggwareg nalong bolug nelahasikdoho nim ne at namingming angge Daud nim sali wat-wat atuhuk on anyo elahasikdoho nim de An den along baloho welaruhuk, ulug hweag-umuk ulug,” hweag-etfag.

⁷Airoho hweag-etfagdeg de at Yesaya en de, “Ap homi miming-enepuk kwit de raja en bot ai fano amagdoho[25] re e ara anggen fam de bot Hizkia fam ai fene damuloho arorebeiyek,” ulug hweag-esebag.

⁸Airoho ebag ma at Hizkia en hein og-hauk kwit de, “TUHAN en an ouk fano hiling nabuhumu hau an nikangge TUHAN Obam wirigmu lahuk ale ai demdoho ulug eneg anggere nunggwangge?” ulug ebag.

⁹Ai ebag ma at Yesaya en onggo uruk kwit de, “TUHAN en wene sali hweag-hereheik on aire demdoho ulug aire TUHAN en neg nowe hat hobam eneg ale og-hiruhu. Mu re ketia nowe haren henda angge re ke? Mo ahohwe ilit-duruk angge at Raja Ahas en hilinggisi angge anyo huli num en dahandoho ilig atmisi ai a, huli num en dahandoho wirig atmisi ai a?” ulug hweag-etfag.

¹⁰Ai ebag ma at Hizkia en hein og-hauk kwit de, “Ahohwe ai ilit duruk kwit huli num en dahandoho alukwe fil ilig aik la ale aire sereg. Anggere mo ebe huli numen dahandoho wirig aik lowag ulug dukwag,” ulug ebag.

¹¹Ai ebag ma re at Yesaya en TUHAN obam somban ebag ma re TUHAN en de ahohwe anyo jam mo on ilit deg anyo huli numen hihiloho wirihig febag.

¹²Li airoho atfag li em eta re raja Babel on hun Merodakh-Baladan hun Baladan amloho anyo en esanggo holduk men de at Hizkia anyo ouk wauk katsireg ketia fano atsi urukmu esanggo holfagdeg, aren de ap enobam lisu baleg mel at Hizkia obahet enda ahayegdoho ulug on mel walug lowag ulug mon-enebik watfag.

¹³Airoho mon-enebik watfag ma re at Hizkia en ap watfag on etmano fanoroho og-enepfagdeg aren de di angge su angge dungdoho fahat dalug angge, emas, perak mel, amben angge mel, ahalue amben fano on mel, autsi sehen foroho on en weim yabukoho walug lauk angge mel, it enobam unug esebag. Airoho unug esauk kwit de at raja ebe wereg ma etmano wereg angge mel ne aren melal-enepukmu etma fam wereg angge mundoho unug esebag ma neg, eke unug esebag fug mu eke welatfag fug.

¹⁴Airoho debagman de at Nabi Yesaya anyo hun Hizkia akit lebagdeg hein og-hauk kwit de, “Ap etma re keman wahesa? Ne, iren de nunggwe ehesa?” ulug hein og-hebag ma, At Hizkia en onggo uruk kwit de, “It de enobam Babel enap o kwenang de mun yatman wahesa,” ulug hweag-etfag.

¹⁵Ai ebag ma at Yesaya en nikangge hein og-hauk kwit de, “O hat hebe welahenma oman de nunggwangge inil hehesa?” ulug hein og-hebag ma, At Hizkia en de, “Di angge su angge abirangge hehesa. An nebe welahimu oman di angge su angge kabog-durukmu etmano wereg angge re mundoho inil howag ulug unug isihimu hehesa neg, ne eke hehesa fug on de wereg fug,” ulug hweag-etfag.

¹⁶Airoho ebag ma at Yesaya en raja fam uruk kwit de, “TUHAN en uruk kwit de,

¹⁷ Di angge su angge hat hebe welahenma foroho welahen on etma mel, ne it hombasi en kabog-dusama ketia huli en wereg on etma mel ap en walug o Babel lauk ale aik waruhu salim eke wereg. Ne, eke embesehupmu welaruhu fug.

¹⁸ Hat homaliki endag-enebuhup on hombasi on ekere at raja Babel on fahet pegawai wereg lit at raja ebe wereg ma etma yabuk duruk kamuhup ulug, uruk.”

¹⁹Ai ebag ma Raja Hizkia en onggo uruk kwit de, “TUHAN en airoho aruhu ulug eheik ale haren an hweag-nirik wahen on ai oho mun fano eheik,” ulug ebag. Aren airoho ebag aire aren boruk kwit de, “An noluk wereg li em an den melal-enepuk kahi on fam o kwenang au fam di ale su ale elegdoho welaruhuk aire fano,” bebagdeg ebag.

²⁰At Raja Hizkia en duruk katfag ale fomane mel, ne aren weim yapuk kwit along atuk katfag ale mel, aren ikalog hwaloho ik sene fam en o kota fam kwelabik lebag ale mel, mundoho etma re buku it ap raja Yehuda on wereg lit duruk katfag ale baleg on anyo fam baleg wereg.

²¹At Hizkia ebe waratfag ma re at amloho Manasye anyo obalma raja inatfag.