Read Ninia Yali 2 RAJA-RAJA 21 Bible Online

2 RAJA-RAJA 21 - Ninia Yali bible

2 RAJA-RAJA 21

¹At Manasye re ebe umur 12 tahun deg li it ap homi Yehuda on fahet raja inatfagdeg de o Yerusalem fam etma 55 tahun wereg lit melal-enepuk katfag.

² At inatfagdeg wereg lit de, it ap homi Israel on o kwenang ai fam owan kwik lauk eleg kweleg ap homi enunggul unuk Kanaan enap wereg ma TUHAN en muko wilibi fesebag enap etmano enobabut kwasikdoho duruk katfag ale omanoroho duruk kwit de, aren TUHAN il hanim siag on neg duruk katfag.

³Ap homi en kembu mot-duruk katfag kwe mel, kembu Baal obahet duruk kwit wam waroho yalduk katfag angge mezbah omano mel, at akni Hizkia en mun erap-ferapdoho hwik-esebag on omano mel de aren nikangge wireheg, kembu hwe on Dewi Asyera anyo ahut ilitdeg wireheg, sohwal-anggen apne weheg, duruk katfag.

⁴ At TUHAN en uruk kwit de, “O Yerusalem etma re li mundoho-mundoho etma An nobahet neg duruk kamuhupmu welaruhu,” ulug ebag famen de, at Manasye en de o TUHAN Obam wirigmu etmano kembu dewa omano fahet wam waroho yaldukmu mezbah witil lebag.

⁵O TUHAN Obam wirig on anyo olohotma foma-foma etano re sohwalanggen fahet wam waroho yal-utuk mu ulug mezbah anyo witfag.

⁶At onggwareg omaliki ohore yal angge yalduk on ulug de o Lembah Hinom etmano waroho yalik lebag. Nikale aren neg de it hwal-enap en duruk ale omano deheg, hein og-angge hein weheg, ap homi waratfag on enaheime fam hweag-nomag ulug hein og-enebik laheg, duruk katfag. Aren airoho neg duruk kwit siag duruk katfag ai fam de mundoho TUHAN olokap kwelabe foruk katfag.

⁷ At TUHAN en TUHAN Obam wirigmu anyo fahet it Daud mel, Salomo mel fam uruk kwit de, “It ap homi enunggul unuk Israel on wereg kwe wilayah 12 etmano sahalimu en de O An Nobam Yerusalem ai, An nobahet li mundoho-mundoho etma kabog-duruk kamuhupmu ulug yug deberihikdeg momale ferihik.

⁸It An nomaliki Israel on anyo en lahe An nawene melaleg wereg on anyo holoho deheg, wene diroho diyug suroho diyug ulug An namingming angge Musa anyo en it og-esebag on anyo furebelug deheg, duruk halug de, o kwenang An den it enambu-enombasi fam og-esauihik mu oman muko wilip-enebik lowag ulug embesehuk fug,” ulug hweag-esebag ma. Famen de aren de kembu enesinga Dewi Asyera ahut ilitdeg anyo walug TUHAN obam wirigmu etmano feik kwebag.

⁹At Manasye en dil ale famen de it ap homi Yehuda on oho, it ap homi enunggul unuk enap o Kanaan fam etma wereg ma, it TUHAN omaliki anyo o ai fam kwik lauk kwit TUHAN en muko wilibi fesebag on anyo en siag duruk katfag on ai re horog maben hag famen de iren neg de mun siag humon duruk katfag.

¹⁰Airoho neg durukmu katfag ai fam de At TUHAN amingming angge nabi omano fene en TUHAN en uruk kwit de,

¹¹“Raja Manasye aire mun olok ahun. Aren duruk ale etma re, it ap Kanaan enap en duruk katswa alere maben hag famen de aren neg de mun alongdoho duruk. Ne, aren kembu-kembu witil lauk on etma fam de ap homi Yehuda on siag duruk.

¹²Ai fam de An nebe TUHAN Allah ap homi Israel on en napne wauk on anyo en anggin on it ap homi Israel on mel Yehuda on mel fam mondorik waruhukmu, it ap homi enebe domog en ai fahet enesanggo hol-hahupdeg de youk lahup.

¹³Ap homi Yerusalem enap aire An den o Samaria mel, hun Raja Ahab ap homi Israel on enowe anyo mel at ahain elekwe on mundoho mel unggum enobam ferihik hagdoho unggum og-esahuk. Ap homi piring doal angge ik horoho alukwe hebele foruk hag An den Yerusalem ai mon horoho embesehuk.

¹⁴Ne, ap homi o ai fam alinlan welamuhup on de it enaselei on enowarukwag ulug debesehukmu it enaselei on etman de it enebe sen-enebeheg, ne it enobam indipmen feleleng-enebeheg, duhup.

¹⁵An den airoho duhuk ale aire it enombasi o Mesir en wilibik wahausa hulien angge o ketia huli aire iren An nobam siag neg duruk kwit An nolokap kwelabeg ale neg duruk ai fam enebuhuk,” ulug ebag.

¹⁶At Manasye ai en kembu apne wauk fam it ap homi Yehuda on TUHAN obam siag dukwag ulug debeseruk kwit etma re, aren de ap homi humdoho siag duruk ale enapeleg kweleg famen aren binggi enowatfag ma re o Yerusalem fam etma di kwe su kwe ap mep neg deg latfag.

¹⁷At raja Manasye en duruk katfag ale amu on nim ne aren asiag duruk katfag on nim, de buku ap raja Yehuda enap en duruk katfag ale baleg wereg on anyo fam mundoho baleg wereg.

¹⁸At Manasye ebe waratfag ma re ap raja obam bumbukmu, hun Uza eyabuk bumbuk hilinggigmu etma salfag. Salfag ma re at amloho Amon anyo at obalmangge raja inatfag.

¹⁹At Amon de ebe umur 22 tahun deg li it ap homi Yehuda on fahet raja inatfagdeg de, o Yerusalem fam etma tahun biren fam melal-enepuk katfag. At isinga unuk de hwe Mesulemet, hun Harus obam Yotba on ahaloho anyo.

²⁰At akni en duruk katfag hagdoho re at inim kembu akni en apne wauk katfag on omano apne weheg, kembu etmano enobahet wam waroho yal-enebeheg, duruk fam de aren TUHAN il hanim siag duruk katfag.

²¹At akni en duruk katfag aleroho obabut oko duruk kwit de, aren kembu en mot-duruk katfag on omano mot-duruk katfag.

²²Aren de TUHAN endama boruk ale omano higitdoho duruk katfag fug, ne aren de TUHAN Allah it ombasi en apne wauk katfag on anyo oho embeselug neg duruk katfag.

²³Airoho duruk kwit wereg ma re at Raja Amon autsi pegawai omano en waruhuk ulug abug baldil lauk kwit de, at ebe obam ilonggoma etmano weregman warik kwebag.

²⁴Famen de it ap homi Yehuda on wilipuk kwit de, it ap Raja Amon watfag on etano binggi enowatfagdeg de, at raja amloho Yosia anyo raja unduhuk febag.

²⁵At Raja Amon en duruk katfag ale fomane re buku ap raja Yehuda on en duruk katfag ale baleg wereg on anyo fam mundoho baleg.

²⁶At Amon ebere hun Uza eyabukmu etmano salfag. Salfag ma re at amloho Yosia anyo obalmangge raja inatfag.