Read Ninia Yali 2 RAJA-RAJA 22 Bible Online

2 RAJA-RAJA 22 - Ninia Yali bible

2 RAJA-RAJA 22

¹ At Yosia re ebe umur 8 tahun deg kweleg, it ap homi Yehuda on enobahet raja inatfagdeg de o Yerusalem fam etma 31 tahun unduhuk wereg lit melal-enepuk katfag. At isinga unuk de hwe Yedida hun Adaya obam o Bozkat on anyo ahaloho ai.

²At Yosia en de at ambu Raja Daud en obabut duruk katfag aleroho duruk kwit de, Allah wene melaleg wereg on anyo abirangge holoho neg duruk katfag. Aren de TUHAN endama ahayeg hauk ale neg duruk katfag.

³At Raja Yosia en de aren melal-enepuk on fam etman obahet lisu balduk on misig eke welatfag on ai unuk de Safan hun Azalya amloho, hun Mesulam omba ai welatfag. Wereg ma re at Yosia ebe raja inatfagdeg melal-enepuk men neg de tahun 18 on fam wereg li em de, raja en at obahet lisu balduk on anyo fam miming-duruk kwit de, “Hun Imam Agung Hilkia akit o TUHAN Obam wirigmu etmano lalug de, aren de it ap imam en uang ap homi en walug feik waharukmu o TUHAN Obam sokole kwik waharukmu etma wereg lit enenggikmu atsi anyo fahet diroho kwik wahasi ulug ik wamagdoho hweag-umuk.

⁵Ebe kwik wahasi on seberoho ik watlug de aren de uang ebere it ap o TUHAN Obam anyo buhundoho wituk mu melal-enepuk kwit wereg on etma og-esowag. Ne, iren de uang etma fam de ap yabuk duruk on fahet onggo og-eseheg,

⁶ap e on fam wituk on mel, helep on fam wituk on mel onggo og-eseheg, helep mel e mel iren boruk aleroho onggo baleheg dukwag.

⁷ It ap yabuk durukmu melal-enepuk katfag on etman de mun bekitdoho neg uang omano hwaldukmu re it enobam, Duruhup ale uluhup, ulug heng-enebuhup hayog, ulug hweag-umuk,” ulug hweag-etfag.

⁸Airoho hweag-etfag ma re at raja en ebag ale anyo re Safan en de at Hilkia hweag-etfag ma, at Hilkia en de buku TUHAN awene melaleg baleg o TUHAN Obam ilonggoma en hweahabag ale anyo dindiloho Safan hweag-etfag. Hweag-etfagdeg de Safan og-etfag ma Safan en de buku anyo kumurebag.

⁹Kumu halug de at Safan anyo sombandoho raja akit lebagdeg de uang o TUHAN Obam febag ma welatfag on anyo webagdeg de at raja amingming angge omano en de it ap yabuk duruk enobahet melal-enepuk on welatfag on omano fam og-esebag ale fahet mel raja olukapdoho hweag-etfag.

¹⁰Airoho hweag-etfagdeg at Safan en eke uruk kwit de “Hun Hilkia en de buku su an og-nereheik,” ulug ebagdeg de at Hilkia en de buku anyo raja obam biling-etfag.

¹¹Airoho ebag ma re at raja en esanggo holfagdeg de, endama oba en de asum dinil-deneldoho embesebag.

¹²Airoho debagdeg de at raja en de hun Imam Hilkia mel, Hun Ahikam at Safan amloho anyo mel, Akhbor hun Mikha amloho anyo mel, hun Safan sekretaris o etma fahet welatfag on anyo mel, ne hun Asaya at raja onggwareg ebe fahet il baloho lauk katfag on anyo mel fam de wene melaleg diroho hweag-esebag,

¹³“Hiren de TUHAN akit lalug de buku au ilonggoma baleg on oma re nit an mel ap homi Yehuda on mel fahet de keroho baleg. It nenombasi en de buku au ilonggoma wene melaleg baleg wereg on oma duruk katswa fug fam, TUHAN en nit fam olok nenepsi ane, ulug TUHAN fam hein wag lakiek,” ulug hweag-esebag.

¹⁴Ai ebag ma re it Hilkia mel, Ahikam mel, Akhbor mel, Safan mel, Asaya mel omano mel de hwe unuk Hulda anyo ebe nabi wereg on akit ebe o Yerusalem en sili eke ket witfag ma etma wereg ma lebag. Hwe ai ahun unuk de hun Salum at Tikwa amloho hun Harhas omba ai; aren de sum o TUHAN Obam wirigmu etmano fahet hwalduk on welatfag. Airoho wereg ma re iren hwe ai fam TUHAN en hweag-utuk ale hweag-nesowag ulug hweag-irik lebag ma holfagdeg,

¹⁵sombandoho raja wereg ma monde-feseik waharuk kwit de, Wene TUHAN en eheik alere ebe su:

¹⁶“It ap homi Yerusalem on nim it mundoho nim en de, An enambolhan lin nealug de, iren wam waroho ap Allah enapeleg on en mot-duruk katfag on omano fam feik laheg, durukmu, mundoho iren duruk on eta fam An nahummu nolok kwelap napuk mu re, An den ap homi Yerusalem on enobam nolok ferihikdeg de, An nolok lahasi on aire mun sebel hihi fug halereg.

¹⁷Anggere buku ai fam balegma at raja en bilinggisi on ai hagdoho An den Yerusalem fam inim, it ap homi etma wereg on fam inim unggum enobam fesehuk.

¹⁸Famen de at raja Yosia fahet neg de, An TUHAN Allah it ap homi Israel on enakni anyo en de wene su obam foruk kahi: Buku ai fam baleg ale anyo bilinggurukmu hat hesanggo holdihin deg,

¹⁹haren henda wat-dauk kwit, hendama sebe ulug welatihin. An den de o Yerusalem inim, it ap homi o etma wereg on inim enowaruhuk ulug mun nele wal-deberihikdeg welatihik famen de, An den airoho debehuk ulug deg latihik ale anyo hat hesanggo mundoho holdihin deg, fong wat-dauk kwit hagdoho oba yako hasum dinil-denel debelug welatihin. Ai fam de haren somban irihin on aire An mundoho holdihik mu re,

²⁰hat hebe hil oluk wereg li em etma re unggum ai it ap homi Yerusalem enobam feik waruhuk fug. Ne, hat hebe ohore mun finik-fanoroho wararuhun, isi, eheik ulug hweag-umuk,” ulug hweag-esebag. Airoho hweag-isil lauk em de it hun raja en mon-enebik lebag on etano sombandoho watlug wene anyo walug raja hweag-irik watfag.