Read Ninia Yali 2 RAJA-RAJA 23 Bible Online

2 RAJA-RAJA 23 - Ninia Yali bible

2 RAJA-RAJA 23

¹Airoho hweag-irik lebag ma re at Raja Yosia anyo en de it ap homi Yehuda fam inim Yerusalem fam inim, enowesi melal-enepuk on etmano mundoho wol-enepfagdeg de,

²at inim seberoho re o TUHAN Obam wirigmu etmano lebag. It laukmu aire ininim de it Lewi enap nim, imam nim, it ap homi holduk on mundoho enenggik wereg on enenggik eleg on et mundoho lebag. Lebagdeg de it enalukwema at raja onggwareg obalma etano at raja anyo inatfagdeg de, buku sali wat-wat atfag angge o TUHAN Obam wirigmen hweahabag angge anyo abirangge ele hum fam bilinggebag. Airoho bilinggulug de, aren de buku ai fam sali watuk kwit hiren diroho duruk halug An den diroho henepuk karuhuk ulug, TUHAN inim it omaliki inim sali watfag on anyo buku ai fam mundoho baleg wereg on etmano dip-debeheg, At TUHAN awene melaleg wereg on nim, wene diroho diyug suroho diyug ulug ebag ma wereg on nim, anyo nenenda nenebe mundoho abirangge fam duruk kamuhuk ulug eheg, At TUHAN ebe ele holoho neg duruk kamuhuk ulug mel, at raja en Tuhan inim sali wareheg, debag ma, it ap homi holduk on en oho re wene sali ai fam holoho neg duruk kamuhuk ulug sali watfag.

⁴ Airoho ebagdeg de at raja en de hun Imam Agung Hilkia anyo mel, ne it imam let-duruk on mel, ne ap o TUHAN Obam kwik laukmu sokolma kahaleg wereg on mel fam de, di angge su angge o ai ilonggoma wereg ma iren kembu Baal mel, Dewi Asyera mel, sohwalanggen mel apne wauk kwit duruk angge etma walug wilibik wamag ulug hweag-esebag. Iren walug wilibik watfag ma re at Raja Yosia en de o kota dag fil o Lembah Kidron horogma etman yalfagdeg de ul de o Betel walug lebag.

⁵Aren de ap raja Yehuda fam etma welatfag on en it imam kembu mot-duruk kwe it ap homi Yehuda on enobam kota kwe mel, o Yerusalem maseroho mel, etma welamag ulug unduhuk fesebag on etmano mel, ne it ap imam kembu fahet wereg lit wam waroho Baal, inim, mo inim bigalem inim, sohwalanggen inim, bohol fam etma wereg angge nim obahet yalduk katfag on etmano mel mundoho sebele feseil lebag.

⁶Kembu enesinga Dewi Asyera ahut ilitdeg o TUHAN Obam wirigmu en walug wilibi febagdeg o kota dag fil walug wilibik lebagdeg o Lembah Kidron etma lebag. Etman de kembu ahut ilitdeg anyo indok yalfagdeg de indok asing de luluhundoho ul al hag damulfagdeg de ul de it ap homi waratuk on sal-enepukmu emberim kwe omano belapil lebag.

⁷O TUHAN Obam wirigmu ambe baleg on etmano fam homi hambena nenepuk kamag ulug kembu dewa obahet kembu obam etmano welatfag on mel mun elehapdoho febag. (O ambe etma fene re it hwelani en sum kembu enesingga Dewi Asyera anyo apne wauk kwit wan-duruk on fahet ulug sum seleben duruk katfag.)

⁸Ap hwal-enap o it ap homi Yehuda on enobam kota di kwe su kwe wereg on omano o Yerusalem wamag ulug hweag-esebag ma at Yosia en de o Yehuda fam etma di kwe su kwe mundoho it hwal-enap etma wam di angge su angge kembu fahet waroho yalduk katfag kwe omano siahapdoho seramap debeseil lebag. Airoho debebagdeg de it ap hwal-enap omano fam hweag-esauk kwit de, “Hiren o TUHAN Obam wirigmu etma obahet duruk kamuhup fug. Famen de hit henori fahet roti fituk angge ragi eleg angge wirig on werako feseruk on etma neg de hinim nahup fano,” ulug hweag-esebag. Ne, hun Yosua o kota ai hwalduk on ai kuruk katfag kwe ele dotdoho yendeg on aire, kwe o kota elehet fak lehet oho on en kwe lohon hilinggigmu o kota kwik laukmu en enenggik hware fil etma welatfag.

⁹

¹⁰ O Tofel, o Lembah Hinom etma kembu dewa mot-duruk katfag ma etma seramap debebag neg. Airoho debebag ai en de o etma ap homi enomaliki kembu Molokh fahet folug waroho yal-utuk katfag ale anyo eke duruk katfag fug.

¹¹Airoho duruk kwit raja Yehuda on en mo mot-duruk kwit duruk angge ulug kuda fouk debebag on etmano hwik-eseheg, kembu mo ai mot-dukoho kereta fam lahalug lauk katfag on omano mel han yaleheg, debag. (Kereta etma abirangge re o TUHAN Obam wirigmu en o bombukmu etma elehet fak lehet ohoman horogdoho etma foruk katfag on. Sokole aire hun yabuk leho on duruk on on unuk Natan Melekh on wereg latfag man ambe baleg on etmano horogma etma welatfag.)

¹² At Yosia en de airoho duruk kwit it ap Yehuda on enowesi raja en wam waroho yaldukmu mezbah at Raja Ahas obam dummu witfag on etmano meiyaloho embesebag neg. Ai en at raja Manasye en atam o TUHAN Obam wirigmu en bumbuk foma-foma mezbah witfag on etmano mel meiyale feheg, debagdeg de at Yosia en de o Lembah Kidron etma hwik-esa lebag.

¹³ Airoho hwik-esa lebagdeg de atam etma at Raja Salomo en de ap homi Sidon on enanggembu hwe on Dewi Asyera mot-duruk katfag on ai mel, it ap homi Moab on en enanggembu Kamos mot-duruk katfag on anyo mel, kembu Dewa Milkom ap homi Amon enap en apne wauk katfag on ai mel, ne mezbah o Yerusalem en mo lahaik waharuk fil en il apma selatan fil Duk Siahap dukmu[26] ulug witfag on etmano seramapdoho siaho febag.

¹⁴Airoho debagdeg de ap homi enahut ilit heheg, duhwi kembu hag angge wiri feheg, debag on etmano meiyaloho febagdeg de kembu wirig latfag ma obale kwe omano re ap waratfag on enowag siling omano at Yosia en luluhundoho feil lebag.

¹⁵ Airoho debebagdeg de atam etma hun Nebat amloho Yerobeam ap homi Israel on enobahet raja wereg lit it siag duruk kamag ulug kembu mot-duruk katfag on mel, di angge su angge yal utuk on fahet ulug mel, o Betel etma witfag angge wereg ma, at Yosia en meiyaloho yalfagdeg de, indok anggen omano re luluhundoho ulap debebagdeg, kembu enesinga Dewi Asyera anyo wirig wereg ma mot-duruk katfag on anyo meiyaloho feheg debag.

¹⁶ Airoho debebag ma indok nauk kweleg de at Yosia elaha leko dukmu ap homi waratuk on sal-enepfag ma etmano il fu hebagdeg de, ap eke en de ap sal-enepfag on etmano enowag feiyaloho walug wamag ulug hweag-etfag ma, lebagdeg de enowag etmano feiyaloho walug watfag ma indok yaleg latfag ma anyo yalfag. Airoho duruk kwit mezbah kembu fahet ulug waroho yaldukmu witfag on anyo seramap debebag ai fam de, ap nabi TUHAN ele hweag-esauk katfag on misig eke en at Raja Yerobeam fam at kembu fahet yal-utuk mu mezbah horogma etma duruk kwit wereg ma,[27] “Fobik diroho aruhu,” ulug hweag-etfag ale anyo dip-ebag. Airoho debagdeg de at Raja Yosia en de ap wareg sal-enepukmu eke il hebag neg.

¹⁷ Airoho hebagdeg de aren hein-og-esauk kwit de, “Sure ap sa wareg salegma?” ulug hein og-esebag ma, Ap homi Betel on etmano en onggo hweag-utuk kwit de, “Aure TUHAN ele hweag-esauk katfag on nabi misig eke o Yehuda en wahasireg de, nenakni haren mezbah wirigmu dehen ale eta higitdoho aruhu ale ulug ebag ahun ai salegma,” ulug hweag-etfag.

¹⁸Airoho ebag ma at raja en de, “At wareg salegma aire hiren diroho suroho ulug duk fug, ne hiren owag feiyaloho amumu feik laheg mel duk fug,” ulug hweag-esebag. Airoho ulug hweag-esebag ma re, iren ap nabi Yehuda on etma enowag siling omano re diroho suroho ulug mel debebag fug; ne ai hagdoho re it nabi o Samaria on etma sal-enepfag on ohore airoho neg debag.

¹⁹At Raja Yosia en de it ap homi Israel on enowesi raja en atam kembu apne wauk katfag kwe ap homi Israel on en enobam kota di kwe su kwe wirig welatfag ai fam TUHAN ahummu olokap kwelapuk katfag ma re at Yosia en moluluk debeseil lebag. At Yosia en o Betel etman debag ale anyo re ap homi Israel on wereg kwe en mezbah wirig kwe omano airoho neg debag.

²⁰It hwal enap dewa fahet on yabuk duruk kwit welatfag on etmano re waroho yalduk angge mezbah emberim kwe etmano en waroho feseil lebag. Ne, mezbah omano domog emberim kwe re at Yosia en ap homi enowag siling yaldil lebag. Airoho debagdeg neg de at Yosia o Yerusalem watfag.

²¹Ai en de at Yosia en ap homi abirangge fam hweag-esauk kwit de, “Nenakni TUHAN en de, An den diroho henepuk karuhuk ulug wene sali waroho og-henebihi on ai henendama eberoho re soni paskah diroho nauk kamuhup ulug wene sali waroho hweag-nesasi on lisu baleg wereg higitdoho esetul,” ulug hweag-esebag. Airoho debag ai fam de iren enakni TUHAN Allah anyo along bolug debag.

²²Airoho debag ale aire it ap homi enunggul unuk Israel on enowesi kaindeg en melal-enepuk wereg latfag li em etma raja Israel on misig en oho ne raja Yehuda on eke on oho soni Paskah esetfag ai hagdoho eke esetfag fug.

²³We at Yosia raja inatfagdeg melal-enepuk men neg de tahun 18 on deg kweleg ai neg de At TUHAN along bolug leho foruk kwit soni Paskah ai esetfag.

²⁴At Yosia en de, wene Allah en diroho diyug suroho diyug ulug melal-enepfag on lisu baloho wereg on anyo o TUHAN Obam wirigmu etmano wereg ma at Imam Agung Hilkia anyo en hweahabag on anyo baleg ale higitdoho re, aren ap homi hein og-angge mel, hwal-enap mel omano at Yosia en de o Yerusalem fam inim ne it ap homi Yehuda on enobam wereg kwe en mel muko wilibi fesebag. Airoho debeselug de aren kembu dewa enahain elekwe on anyo hwik-eseheg, ne iren di angge su angge kembu etma apne wauk kwit duruk angge omano wilibi feseheg debag.

²⁵Raja Yosia ebe re TUHAN amingming angge wereg lit, enda Allah obam neg dip-debelug wene diroho diyug suroho diyug ulug Allah en hweag-esebag ma Musa en lisu baloho febag on ai mundoho higitdoho neg duruk kwit welatfag ai hag, ap raja fomane at Yosia obabut hagdoho wereg lit atam etma airoho eke duruk katfag fug. Ne, at Yosia ebe welatfag li em ohore re at obabut duruk ale hagdoho duruk on raja eke welatfag fug neg.

²⁶Famen de atam etma raja Manasye ai en obabut kwasikdoho duruk katfag ai fam TUHAN olokap kwelpuk katfag ma it ap homi Yehuda on enobam olok fesebag on anyo eleg am fug angge welatfag.

²⁷Airoho wereg lit de TUHAN en diroho hweag-esebag, “An den it ap homi Israel on enobam unggum feserihik ai hag hit ap homi Yehuda on henobam inim unggum fohuk. Henobaharuk kwit de hit ap homi Yehuda on de An den hit henobam welamuhupmu ulug og-hesauihik mu oman wilibi henobahakuk. Ne, An den hit hweag-hesauk kwit de, o Yerusalem suma An nobahet duruk kamuhupmu ulug momaloho fahat dauihik mu mel, An nobam wirig mel, oho embesehuk neg,” ulug hweag-esebag.

²⁸At Yosia en airoho melal-enepuk kwit welatfagdeg, ap homi Mesir on enowe Raja Nekho anyo en de autsi sehen seneg enap esan lohwaleg inim, raja Asyur anyo let dik laul ulug de Ik Efrat elanma lauk men de, at Yosia ebe autsi lit-eneplug de enolohotma kahalik lebagdeg de, weim ebe o Megido etman yapuk kwit de at Yosia ebe it ap Mesir on en watfag. Watfag ma re at ebe wareg anyo at autsi en walug de kereta fam lahapfagdeg de o Yerusalem walug watfag. Walug watfagdeg de ap raja sal-enepuk katfag ma etma salfag. Salfagdeg de at obalmangge re at amloho Yoahas anyo it ap homi en Yehuda on en raja welamag ulug unduhuk febag. At Yosia en duruk katfag ale fomane re buku ap raja Yehuda on en duruk katfag ale baleg wereg on anyo fam baleg.

²⁹

³⁰

³¹At Yoahas ebere umur 23 tahun deg kweleg raja it ap homi Yehuda on enobahet inatfagdeg de bigalem henahan neg o Yerusalem fam etma melal-enepuk katfag. At isinga unuk de hwe Hamutal, hun Yeremia ahaloho obam kota Libna on ai.

³²At Yoahas en ohore it akni ombasi en siag duruk katfag hagdoho TUHAN fam siag neg duruk katfag.

³³At Yoahas ebere raja Mesir on Nekho anyo en de o Ribla en o Hamat fam etman sebeloho feil lauk kwit de, ele omamne fam de it ap homi Yehuda on anyo en at fam onggo perak on anggin 3.400 kilogram en deg angge nim, emas on anggin 34 kilogram en deg angge nim, foukwag ulug hweag-esebag.

³⁴ Airoho hweag-esalug de, at Raja Nekho en de hun Yosia amloho unuk Elyakim anyo ap homi Yehuda on enobahet ulug raja unduhuk febagdeg de unuk Elyakim anyo ahamdoho Yoyakim soale febag. Ne, at Yoahas de hetdoho walug de o Mesir lebag ma etman waratfag.

³⁵Raja Mesir on en onggo foluhup ulug enobam uruk ale anyo ele holoho ulug de, Raja Yoyakim en de it ap homi holduk on en di angge su angge fahet onggo foruk on omano re it enobam wereg aleroho foruk kamag hweag-esaukmu forukmu kabog-duruk katfag.

³⁶ At Yoyakim de ebe umur 25 tahun wereg kweleg raja it ap homi Yehuda on enobahet inatfagdeg de, o Yerusalem fam etma 11 tahun unduhuk wereg lit melal-enepuk katfag. At isinga unuk de hwe Zebuda, hun Pedaya ahaloho obam kota Ruma on ai.

³⁷At Yoyakim en ohore it akni ombasi en siag duruk katfag hag TUHAN il hanim siag neg duruk katfag.