Read Ninia Yali 2 RAJA-RAJA 24 Bible Online

2 RAJA-RAJA 24 - Ninia Yali bible

2 RAJA-RAJA 24

¹ At Yoyakim ebe raja wereg lit melal-enepuk li em de, hun Nebukadnezar ap homi Babel on enowe raja en de o ap homi Yehuda on wereg ma dog sinalik kwik watfagdeg de it enebe sebeloho fesebag. Ma re tahun henahan hunduko ai at Yoyakim de hun Nebukadnezar apma sebe ulug welatfagdeg en fobik en airoho welatmin fug ulug wene watfag.

²Wene matfag ma re TUHAN en en de At amingming angge it nabi omano fene en wene ebag ale higitdoho re, Aren ap enabut siag enap enesehen lik-loukdeg on it enunggul unuk Babel on mel, Siria on mel, Amon on mel, Moab on mel en de at Raja Yoyakim inim weim yaboho re Yehuda enap sebeloho fesoukwag ulug mon-enebik watfag.

³Airoho atfag ale aire TUHAN en uruk kwit, “It enunggul unuk Yehuda enap aire it enanggwenang TUHAN en og-esauihik mu etman hwik enebik lahuk,” ebag. Aleroho re At raja Manasye en asiag duruk katfag on ai fam it hwik enebik lebag,

⁴Eebe mun alongdoho re at Manasye en ap homi siag duruk ale mel enapeleg deg kweleg enebe binggi enowatuk katfag ma re, TUHAN en de at Manasye en asiag duruk katfag on ai elehapdoho embesebag fug.

⁵O kwenang Ik Efrat ikman dulug de o Mesir kwenang fam huli-hulimu etman at raja Mesir en on melal-enepuk katfag ma wilayah fam en il emberim utara fil etma huli re raja Babel on en sebeleg welatfag. Ai fam de at raja Mesir on anyo re weim yabik wilibuk eleg angge at obam anggwenangma etma neg welatfag. At Yoyakim en duruk katfag ale fomane inim, aren obabut mun siag on deheg, kwasikdoho doho deheg, duruk katfag ale nim de, buku ap raja Yehuda on en duruk katfag ale baleg wereg on anyo fam mundoho baleg wereg. At Raja Yoyakim mundoho waratfag ma re obalma re at amloho Yoyakhin anyo raja inatfag.

⁸At Yoyakhin ebere umur 18 tahun deg li it ap homi Yehuda on enobahet raja inatfagdeg de, aren o Yerusalem fam etma bigalem henahan hunduko nukoho numen inim melal-enepuk katfag. At isinga unuk de hwe Nehusta hun Elnatan ahaloho, obam Yerusalem on ai.

⁹At Yoyakhin en de at akni en siag neg duruk katfag hagdoho aren oho TUHAN fam siag neg duruk katfag.

¹⁰At Yoyakhin en melal-enepuk wereg li em etare hun Nebukadnezar autsi ap perwira omano en de it sehen seneg enap esan lohwaleg lit-eneplug de o Yerusalem dog sinalik watfagdeg de, o kota ai enowarik kwik watfag.

¹¹It airoho o kota enowarik kuruk kweleg de at Nebukadnezar ebe re o Yerusalem watfag.

¹² Watfag ma re at Yoyakhin ebe mel, at ohwesi mel, at isinga mel, at omaliki mel, autsi tentara enowesi omano mel, autsi at onggwareg obam yabuk duruk katfag on mel, mundoho at Nebukadnezar wereg ma wilibik watfagdeg de, nit de hat henggik fam ahe ulug hweag-etfag ma re at Yoyakhin ebe sabu het-debag. Airoho atfag ale aire at Nebukadnezar ebe raja inatfagdeg weregman neg de tahun ligin on fam deg kweleg debag.

¹³Di waruk su waruk emas on fam hilinggig angge hun Salomo en o TUHAN Obam wirigmu etmano fahet ulug witfag angge omano mel de at Nebukadnezar en siahap debebag. Airoho debelug de di angge su angge mun onggo wereg angge o TUHAN Obam wirigmu wereg on mel ne at raja obam olma wereg on mel abirangge re Raja Nebukadnezar en feleleng dulug o Babel lebag. Wene aire atam TUHAN en wene ebag ale higitdoho neg atfag.

¹⁴ Airoho walug lauk kwit de Raja Yoyakhin ebe mel, at isinga mel, ohwesi mel, at autsi sehen foroho on enowesi mel, ap homi Yehuda onmelal-enepuk on mel, enebe abirangge re 7.000 ap enowesi kaindeg enapsabu het-eneplug de felelengdoho o Babel lebag. Ne, ap di angge su angge lalduk ale enoluk on mel, ne bosie emas on fam en lalduk ale enoluk on mel de enebe 1.000 en, ne ap enomamne on weim yapuk ale fahet enambong si-sereg on mel, it ap raja en ondohoma on mel, it ap enowesi log-log enap mel oho re enebe 10.000 en angge feleleng eneplug hwik enebik lebag. Ap homi ininuk wereg hag on de abirangge airoho og-eneplug o Babel lebag ma re, ap homi we mun enenggik eleg on neg o Yerusalem welatfag.

¹⁷ Airoho lebagdeg de at Nebukadnezar en de hun Yoyakhin ami re ap homi Yehuda on enobahet raja welamag ulug unduhuk febagdeg de at unuk keron de Zedekia soalfag.

¹⁸ At Zedekia ebere umur 21 tahun deg li em it ap homi Yehuda on enobahet raja inatfagdeg de o Yerusalem fam etma 11 tahun unduhuk lit melal-enepuk katfag. At isinga unuk de hwe Hamutal hun Yeremia ahaloho obam kota Libna on ai.

¹⁹Raja Yoyakhin en siag neg duruk katfag hagdoho re at Raja Zedekia en ohore TUHAN fam siag neg duruk katfag.

²⁰ It ap homi o Yerusalem fam welatfag on mel Yehuda fam welatfag on mel de At TUHAN ahummu olok enobam febagdeg de Aren it fubi debeseruk katfag fug.