Read Ninia Yali 2 RAJA-RAJA 4 Bible Online

2 RAJA-RAJA 4 - Ninia Yali bible

2 RAJA-RAJA 4

¹Nukoho misig salim hwe eke ap nabi sohwe Elisa akit lebagdeg hweag-utuk kwit, “Nakni, an nahun de mundoho waratsi! Ne, at ebe re Allah ele holoho neg duruk katsi ale aire nakni haren oho holuk deg, famen aren ap en enangge eke balegma re, an nahun waratsi on anyo en ombaleg angge ap fam baleg on anyo ketia wahareg de angge obalma re an nomaliki biren etano hwelalug amingming anggeap damin ulug waha,” ulug hweag-etfag.

²Ai ebag ma at Elisa en hein og-hauk kwit, “An den keroho hat let-hapmin? Ne, hwe hat hobam olma re nunggwangge eke wereg?” ulug ebag ma, Hwe anyo en onggo uruk kwit, “Di angge su angge eke wereg fug mu we zaitun ahalue ikwag doron misig hwenanggeg neg wereg,” ulug hweag-etfag.

³Ai ebag ma at Elisa en uruk kwit, “Hat de lamihin deg de ap homi hat nim o horogdoho welahep on etma fam ikwag logdoho hagdoho elamna fahet og-nemek ulug heng-enebik lakin.

⁴Ne, airoho mundoho heng-eneplug de hwe hat hebe nim homaliki nim de henobam olma sok laroho kwik lakiyug. Kwik lalug ahalue ikwag doron fam hwenanggeg angge etare ikwag etmano fam ilitdoho keralug de mundoho ele sop atuk on de amumu feiyug,” ulug hweag-etfag.

⁵Airoho hweag-etfag ma re hwe anyo sombandoho obam lebag. Lebagdeg de at ebe nim omaliki nim enobam olma sok laroho kwebagdeg de hwe anyo en ikwag dorangge zaitun ahalue hwenanggeg on anyo webagdeg de, it omaliki en ikwag enggikmuap duruk on etmano fam keral heg hwenanggebag.

⁶Hwenangguruk men de ikwag etmano abirangge ele sop atil lebag ma re, aren ikwag eke heng ebag. Famen de at omaliki etano misig eke en uruk kwit de, “Mundoho eleg aha,” ebag. Airoho ebag ma re ahalue anyo waharuk ale bal atfag.

⁷Airoho debagdeg hwe anyo nikangge Nabi Elisa akit lebag ma, at Elisa en uruk kwit de, “Haren ahalue etma onggo walug de ap en angge baleg lahep on ai obalma folug dindik atmisi on de hat hebe nim homaliki nim nauk on fahet fahat dakiyug,” ulug hweag-etfag.

⁸O Sunem etma re hwe enggik wereg on eke welatfag. Airoho wereg ma re nukoho eke salim de at Elisa o Sunem etma lebag ma re hwe anyo en de siburu at akit na wamag ulug ayonggo febag. Anyo nebag huli anyo en de at Elisa o Sunem etma lil lauk kwit de hwe ai obam siburu nauk katfag.

⁹Ai en hwe anyo en ahun fam uruk kwit, “An den boruk kwit de hun nit nenobam waharuk on aure dik-demdoho Allah amingming angge boruk kahi.

¹⁰Mu re niren nit nenobam ambe emberimmu on fam en ambe doron eke buhun-debelug de, niren nohorukmu obale nim, e doaleg angge nim, hweriatuk angge nim lampu nim fouk deboulmu re at ebe nit nesa waharuk li em de etma nohoruk karuhu en,” ulug ebag.

¹¹Airoho debebagdeg weregman de nukoho eke salim at Elisa o Sunem watfag. Watfagdeg de kel wat-damin ulug de o ambe wiroho febag ma anyo lahabag.

¹²Lahaik lebagdeg amingming angge Gehazi anyo fam de hwe anyo wol-dik lowag ulug mingming debag ma re, hwe anyo watfag ma,

¹³at Elisa en Gehazi fam uruk kwit de, “Aren nit fahet mun alongdoho duruk ale ai fahet de an den onggo nangginoho og-itmin ulug hein og-hakin. Ne, at hwe ai endama en de Elisa ebe raja wereg ma ane, autsi tentara enowe kain on akit ane, lalug an nobahet wene eke hweag-esowag, ulug endama ai boruk ane, eleg a, hein og-hakin?” ulug hweag-etfag. Ai ebag ma re at Gehazi en hein og-ha lebag ma hwe anyo en de, “An nebe re nunggul unuk on an nahain elekwe on nim enesahalimu welahi famen de di angge su angge eke nilmolegdoho welahi fug,” ulug hweag-etfag.

¹⁴Airoho ebag ma at Elisa en Gehazi fam uruk kwit de, “Aireg halug de an den at obahet de keroho dimin?” ulug hein og-hebag ma, at Gehazi en de, “At omalik de mundoho eleg, ne ahun oho re mundoho sobal atsi neg,” ulug hweag-etfag.

¹⁵Ai ebag ma aren de, “Hwe ai wol-din,” ulug hweag-etfag ma, hwe anyo lebagdeg de sokolma etano inaik lebag.

¹⁶ Inatfag ma at Elisa en hwe anyo fam uruk kwit de, “Tahun fobik on fam nukoho dia higitdeg kweleg hat homalik ap angge hahoma walinggig laruhun,” ulug hweag-etfag. Ai ebag ma hwe anyo en de, “Nakni hat hebe Allah amingming angge deg lahenma re hele seiale lal-napuk eleg,” ulug hweag-etfag.

¹⁷Airoho ebag famen de at Elisa en ebag ale higitdoho re tahun fobik on fam nukoho etano haham hwe anyo omalik ap angge endetfag.

¹⁸Endetfag ma omalik anyo log atfagdeg de, gandum anggen balduk ale higit atfag ma, omalik anyo akni re ap homi yabukmu gandum anggen baldukmu ininim wereg ma akit lebag.

¹⁹Airoho lebagdeg wereg ma etano en fetagdoho ele hum fam akni hweag-utuk kwit de, “Yehei, an nunggulak, an nunggulak i!” ulug ebag. Ai ebag ma at akni en de amingming angge on eke fam uruk kwit de, “Omalik sure isinga og-irik lakin,” ulug hweag-etfag.

²⁰Ai ebag ma re omalik anyo isinga og-irik lebag ma isinga en ahoma webag. Webagdeg foroho weregman de nukoho andundu etano omalik anyo waratfag.

²¹Waratfag ma re omalik anyo isinga en walug de o ambolma Elisa nohoruk katfag ma etmano lahabagdeg de, at nohorukmu etano yinggi folug de sok lare febagdeg olman wilibik watfag.

²²Airoho wilibik watfagdeg de ahun wol-dik lebagdeg hweag-utuk kwit de, “An nebe buroho at Nabi Elisa anyo akit lalug de fol-folo at ebe sombandoho hondoholug watmin en de, nenamingming angge eke wam keledai walug wamagdoho re monde feik manu,” ulug hweag-etfag.

²³Ai ebag ma hwe anyo ahun en de, “O yoho sure nukoho Sabat anyo fam welahe fug, ne Bigalem Keron[7] lahaik waharuk salim fahet soni esetuk on anyo owan deg kweleg famen de, hat hebe lamindeg watmin ehen aire nunggwelug?” ulug hein og-hebag. Hein webag ma aren de, “We fano neg o,” ulug ebag.

²⁴Airoho ebagdeg obale wam keledai fam doaloho hweria aik laharuk angge anyo bug debebagdeg de amingming angge anyo fam de, “An nebe folo-foloroho og-naplug lowag ulug wam au sil hakin,” ulug ebag.

²⁵Ai ebagdeg hwe anyo at Elisa Dom Karmel fam wereg ma etma lebag. Airoho laukmu re at Elisa en hwe anyo yatman il fu ha watfagdeg, Gehazi fam hweag-utuk kwit de, “Hwe obam Sunem on anyo waharuk angge ai hil fu hakin.

²⁶Airoho deg anggere hat hebe folo-folo olohotma lalug de, hat hebe mel, hahun mel, henomalik anyo mel henebe re fano welahep a? ulug hein og-hakiyug,” ulug hweag-etfag. Ai ebag ma watfagdeg hwe anyo hein og-hebagman de, “Fano welahe,” ulug hweag-etfag.

²⁷Ai ebagdeg en de hwe anyo Elisa horogdoho aik lebagdeg de olohotma elenggen dimiroho re Elisa eyog enggik en seneko bok atfag. Airoho debag ma at Gehazi en de hwe anyo filigdoho embesemin ulug debagman de, at Elisa en hweag-utuk kwit de, “Embesein. Nakni TUHAN en wene dorangge eke hweag-nom fug angge endama wereg famen de hwe su endama mun hesilig wereg,” ulug hweag-etfag.

²⁸Ai ebag ma at hwe anyo en Elisa fam uruk kwit de, “Nakni. An den de hat hobam nomalik ap angge eke og-nimin ulug de heng-hapihik fug boruk kahi. An den de an nendama nahayegdoho ulug wene hele seiale hweag-nom fug ulug wene hweag-hitihik fug no? Hweag-hitihik neg,” ulug hweag-etfag.

²⁹Airoho ebag ma At Elisa en il endenoho Gehazi fu hebagdeg hweag-utuk kwit de, “An nandomuk au walug de, hwe au obam folo-folo bekit lakiyug. Lauk kwit de ap homi eke oho dang enebuk fug. Ne, it eke en hat dang hapuk halug de haren dang enebuk fug. Hebe bikit-bekit lalug de mundoho aik lalug halug de an nandomuk aure omalik ai at orohole fam feiyug,” ulug hweag-etfag.

³⁰Airoho hweag-etfag man de hwe anyo en de, “Elisa nakni. Nenakni TUHAN mun oluk neg wereg on nim hat honggwareg nim henowag anggere an den hat hebe hobahalug lamin fug halereg” ulug hweag-etfag. Airoho hweag-etfag ai en de at Elisa ebe hwe anyo nim at obam lebag.

³¹Airoho ebag ma it enebe lauk kweleg de at Gehazi anyo at dam it lin-esalug de domuk anyo omalik anyo olohotma femin ulug de at dam lebagdeg domuk anyo omalik anyo olohotma feik lebag famen de, omalik anyo ele eheg, oluk aikoho eneg ale mel oho deheg, debag fug. Ai debag ma re at Gehazi anyo nikangge sombandoho Elisa akit watfagdeg hweag-utuk kwit de, “Omalik anyo re ebe oluk aha fug,” ulug hweag-etfag.

³²Ai ebag ma re it enebe hwe anyo obam mundoho aik lebagdeg de at Elisa ebe amu neg o anyo kwik lebagdeg duruk men omalik anyo wareg angge at Elisa nohorukmu etano yinggig wereg ma hebag.

³³Hebagdeg de sok lare febagdeg de TUHAN fam somban ebag.

³⁴ Somban mundoho ulug de at Elisa ebe omalik wareg anyo emberimmu sahali atfag. Sahali atlug de ambilik mel il mel enggik mel de omalik anyo fam wut debeil lebag. Airoho debebag ai fam de omalik anyo ebe ahanhan atfag.

³⁵Ahanhan atfag ma re Elisa ebe inatfagdeg de o hwenie kwe lag-wag uruk katfag. Ai debagdeg de fobik nikangge omalik anyo emberimmu sahali atfag. Sahali atfag man de omalik anyo hasig sabirenam debagdeg de il fenggen debag.

³⁶Il fenggen debag ma re at Elisa en de Gehazi en omalik anyo isinga wol dukwag ulug hweag-etfag ma, watfag ma re, Elisa en de, “Hwe su homalik anyo re su,” ulug og-etfag.

³⁷Airoho og-etfag ma re hwe anyo en de Elisa olohotma elenggen dimiroho sahaun uruk kwit dang-debagdeg omalik anyo hwelalug wilibik lebag.

³⁸Li eke fam de o di kwe su kwe etma siburu obok lahabag ma re at Elisa nikangge sombandoho o Gilgal watfag. Watfagdeg de aren it ap nabi nim kabog-duruk kwit aren amingming angge anyo fam de, waruk belanga humon walug it ap omano fahet nauk on esag enebukwag ulug mingming debag.

³⁹Ne, it ap nabi omano enesahalimu en misig eke re wilibik lebagdeg de yerumingga herarimin ulug yabukmu lebag. Lebagdeg de aren hobut amu wilibig on hag eke hweahabagdeg de, aren anggen yihig etmano hum-hamdoho dahanfagdeg walug olma watfag. Ne, aren de anggen etmano re ebe no di on anggen ulug mel fubireg eleg angge en de bal heg de belanga elma kwelapfag.

⁴⁰Kwelabe febagdeg mundoho esag atfag ma re aren it ap nabi etmano fam yohwan esebag. Yohwan esebag ma re iren enambilikmu ket kwelabe foruk kweleg etano, iren Elisa fam da nga ya nga uruk kwit de, “Nenakni sure mun ale on ap watuk on!” ebagdeg de iren nauk ele embesebag.

⁴¹Ai fam de at Elisa en hweag-esauk kwit de tepung dorangge lohon wowag ulug hweag-esebagdeg de aren belanga anyo elma fole febag. Airoho debelug de aren it omano fam uruk kwit de, “Nauk angge osoho ai nikangge yohwan-esakiek,” ulug hweag-esebag ma yohwan-esauk men de nauk angge anyo atam deg latfag hag deg latfag fug.

⁴²Nukoho amu salim ekere ap misig eke o Baal-Salisa en watfag. Waharuk kwit de aren hun Elisa fahet ulug de gandum anggen ket baleg on mel, roti weraho 20 en angge gandum anggen keram tahun ai fam balfag on fam weraho angge mel og-eneplug watfag. Watfag ma re at Elisa en de amingming angge anyo fam de roti omano it ap nabi omano fam yohwan esowag ulug hweag-etfag,

⁴³famen de at amingming angge anyo en uruk kwit de, “Ap enebe 100 nim eiya nim higit am fug alereg!” ulug hweag-etfag. Ai ebag ma Elisa en onggo uruk kwit de, “TUHAN en uruk kwit de it enebe nalusa famen de it nalusareg ando welaruhu ulug isi, anggere it fam yohwan-esakin,” ulug ebag.

⁴⁴Ai ebag ma re at amingming angge anyo en de nauk angge anyo it omano fam yohwan esebag ma re it enebe abirangge en nebag. Ne, it nebagman de TUHAN ebag ale higitdoho re ando wereg latfag.