Read Ninia Yali 2 RAJA-RAJA 5 Bible Online

2 RAJA-RAJA 5 - Ninia Yali bible

2 RAJA-RAJA 5

¹ Hun unuk Naaman aire ap tentara Siria enap esan lohwalduk katfag on etma enowe along-balong ahun Panglima welatfag. Wereg ma re at fene en de TUHAN en ap tentara Siria on en it eneselei on enalong elehap debeselug it enalongap debesebag ai en de Raja Siria on ai en at Naaman enda hundig deg lit along boruk katfag. Famen at Naaman ebe fam de ouk hwenanggo mun anggolo on welatfag.

²Airoho wereg ma re nukoho eke salim de ap Siria enap en it Israel enap nim weim yabik kwik watfagdeg de hwele doron eke senetfagdeg de sabu het-eneplug lauk on hagdoho walug lebag on anyo fobik en hun Naaman anyo ohwe amingming angge atfagdeg welatfag.

³Airoho wereg lit de enenggik eke salim de hwe isinga anyo fam uruk kwit de, “Ninga. Hun nayon Naaman au ebe hun nabi o Samaria wereg on anyo akit la man de at nabi ai en at ebene yebil hwenanggo au fano hilingguk alereg,” ulug hweag-etfag.

⁴Airoho hweag-utuk ale anyo re at Naaman en esanggo holfagdeg de re at ebe raja Siria on anyo akit lebagdeg wene hwele doron anyo en ebag ale anyo dindiloho hweag-etfag.

⁵Airoho hweag-etfag ma, raja en uruk kwit de, “Fano, raja Israel on akit lamihin en de an den lisu baleg at akit walug og-irik lamihin en og-hitmin,” ulug hweag-etfagdeg lisu bal-etfag. Bal-etfag ma re hun Naaman anyo laroho lit de uang perak on en de 30.000 en mel, uang emas on de 6.000 en mel, sum eneyog sum et enebe sum en wut heheg de mun ebe on neg num en mel, walug lebag.

⁶Ne, lisu baloho og-etfag on anyo fam de ebe diroho baleg latfag, “Nakni, an den de it nautsi tentara enowe unuk Naaman ai ebene ouk yebil hwenanggo wereg on ai haren hilinggi femihin en ulug hweag-hutuk kahi,” ulug baloho og-etfag ma walug lebag.

⁷Airoho walug lebagdeg de raja Israel on anyo og-irik lebag ma re aren kumu hebagdeg enda fit atfagdeg de, ap en belahwi belapuk hagdoho re asum wandeg latfag on etmano dinil-deneldoho embesebagdeg aren uruk kwit de, “Raja Siria on ai en de an den ap su ouk yebil hwenanggo ebene au higitdoho hilinggimisi ulug eheik a? An nakol. An nebe re At Allah along wereg lit ap wareg on enolugap debeseheg, enowareheg, duruk ai hag deg lahi fug! Hun raja Siria on aire an nobam angginap kwelap-nabikoho deheik,” ulug wene balfag.

⁸Airoho ebag ale anyo re ap homi en Elisa hweag-etfag ma esanggo holfagdeg de, aren wene diroho ulug mondorik watfag, “Nunggwelug henda elek duruk kahen? Ap ai en ap homi Israel on wereg ma suma ap nabi eke wereg hihi, ulug oluk amagdoho re ap ai an nakit mondorik manu,” ulug ebag ma hweag-irik lebag.

⁹Airoho hweag-etfag ma hun Naaman anyo angge kereta wam kuda en lisulug lauk angge anyo fam de at Elisa obam lebagdeg de obam sokolma etano inaik lebag.

¹⁰Inaik lebag ma re Elisa en amingming angge anyo fam de wene hweag-irik wilibukwag ulug hweag-utuk kwit de diroho hweag-umuk ebag, “Hat hebe Ik Yordan ikma lalug de kumu henggik sabirenam watmihin mu fano atmihin, ulug hweag-umuk,” ulug hweag-etfag ma re at amingming angge anyo en hun Naaman hweag-irik lebag.

¹¹Airoho hweag-etfag ma at Naaman en esanggo holfagdeg Naaman ahummu olok atfagdeg ele hape fam uruk kwit, “An den boruk kwit de at ebe an nakit wilibik watlug, at akni TUHAN Allah ai fam somban nobahet imisireg, enggik nayebil wereg higitdoho eiya feil lamisimu fano hiling atmin behi.

¹²Ik hit ap homi Israel on welahepma suma re fano on eke wereg fug. Nit nenahaik o Damsyik etman ik unuk Abana mel, Parpat mel etma re mun fano on wereg. Degma re an den ik etma fam kume warihi ha man de an nebe yebil hwenanggo su eleg am fug alereg ulug a? Eleg am alereg,” ulug ebag.

¹³Ai ebag famen de at amingming angge omano en at aluluk hopdoho aik watfagdeg hweag-utuk kwit de, “Nenowe, di on su on dimihin ulug hweag-hetlep man oho delen. Famen de aren hat hayebil oma eleg amag ulug we kumu warik lakin ulug hweag-hereheik on aire anggin deg fug, we se aleroho hweag-hereheik man uruk kahen,” ulug hweag-etfag.

¹⁴Airoho ebag ma at Naaman anyo Ik Yordan ikma lebagdeg de Elisa en hweag-etfag ale higitdoho re aren ikma sal aik lahaik wambuk neg de enggik sabirenam en wambebag. Airoho debag ma at ebe fano atfagdeg ahap de ap sauwe on enahap hagdoho fano atfag.

¹⁵Airoho atfagdeg de at amingming angge inim lebag on etmano nim de enambol somban de Elisa akit watfagdeg hweag-utuk kwit de, “O kwenangma suma di kwe su kwe Allah amu on eke wereg fug. We hit ap homi Israel on henakni Allah apne wauk kahep on ai amu neg wereg ale ai an ketia furebehi. Ai fam de an den ketia onggo og-hitmin on su hwelakin,” ulug hweag-etfag.

¹⁶Airoho ebag ma at Elisa en de, “An nakni TUHAN oluk mundoho neg wereg on, an den At obahet duruk kahi on ai owag. Anggere haren onggo nunggwangge on ulug og-nitmihin famen de an den wamin fug,” ulug hweag-etfag. Airoho hweag-etfag famen de at Naaman en de onggo Elisa og-itmin ulug debag on anyo hwelowag ulug ele ningdoho ebag famen de, at Elisa en de, “Nerim” ulug embesebag.

¹⁷Airoho debag ma at Naaman en uruk kwit de, “Nakni. An ketia en de nobam lalug de ap homi en amu on fahet along bolug apne wauk on fam di angge su angge obahet folug waroho yal-om fug angge we TUHAN obahet neg folug yal-utuk karuhuk mu re, kwenang[8] suman on fam en apne wauk karuhuk en de haren kwenang suma on humdoho no bagal humon ebe biren heg wut debelug higitdoho walug la aleroho wamin en heng hapuk kahi.

¹⁸Famen de an nebe re nowe raja alulukmu on deg lahimu re, at ebe ap homi Siria on enanggembu Dewa Rimon anyo apne wamin ulug laukmu inim ambieg lalug, obam somban urukmu halug de, TUHAN en nasiag elehapdoho nobaharuk kamag,” ulug hweag-etfag.

¹⁹Airoho hweag-etfag ma at Elisa en uruk kwit de, “Hobam hahap wendareg lakin,” ulug hweag-etfag ma at Naaman obam lebag. At anyo lamin ulug il eke lebagdeg duruk men de,

²⁰hun Gehazi Elisa amingming angge anyo endaman de, “An nakni en Naaman hweag-utuk kwit onggo og-nitmihin fug eheikma laha aire nunggwelug no. Ap Siria on ai en an nakni onggo og-om ale aire higit famen embeseheik etma re! Nenakni TUHAN oluk mundoho neg wereg on owag. At Naaman en di angge su angge an eke og-nomagdoho re an ombolim fung-fangdoho mutlug lamin,” ulug ai bebag.

²¹Gehazi en airoho bebagdeg Naaman ombolim mutlug laukmu re at Naaman en il fu ha watfagdeg de ebe kereta anduhunmu en wambik watfagdeg hein og-hauk kwit de, “Namloho, hebe keroho fahet wahen?” ulug hein og-hebag ma,

²²at Gehazi en de, “Yehei nakni, ap nabi sauwe on enebe o Efraim dom fil etman ketia wahesama re, nakni haren uang perak on 3.000 en mel, it ap nabi eta enobahet sum wan-duruk on enebe sum et eneyog sum et wutdoho biren nim og-nimin,” ulug hweag-etfag.

²³Ai ebag ma at Naaman en de, “Fano duk alereg,” ulug hweag-etfagdeg de at Naaman en ele abiroho Gehazi fam de uang perak on 6.000 en wamihin ulug ebagdeg de uang anyo ahunggwa fam het-debelug de sum walug watfag on etmano en mun fano on neg biren wutdoho webagdeg Namaan amingming angge biren etano fam og-esebagdeg at Gehazi fobik lauk kweleg de hit dam lauk kamek, ebag ma watfag.

²⁴Watfagdeg domma at Elisa welatfag ma etma aik watfagdeg de at Gehazi en uang mel sum mel omano re it hun Naaman amingming angge etano enenggikmu en webagdeg de at obam olma febag. Airoho debelug de at Naaman amingming angge etano re sombandoho enobam fil monde fesebag.

²⁵Airoho debelug at ebe nikangge Elisa wereg ma kwik lebag ma, at Elisa en uruk kwit de, “Hat de hebe keman wahen,” ulug hein og-hebag ma, aren de, “An den di kwe su kwe lahireg fug, nakni,” ulug hweag-etfag.

²⁶Airoho hweag-etfag famen de at Elisa en de, “At Naaman kereta fam en hat wereg ma wambik waharuk li em eta an nenda etma welahi. Haren boruk kwit de ketia au eiyale uang ai walug e zaitun yabuk mel, anggur yabuk mel, onggo baleheg, wam sapi, domba mel onggo baleheg, ap homi enamingming angge ap on mel homi on mel welamag ulug onggo bal-enebeheg, dimin behen famen de, ketia ai on duk li fug.

²⁷Haren airoho og-hutuk angge wehen ai en de hun Naaman ebene yebil hwenanggo welatsi on anyo re hat hwelehen ai. Airoho hwelehen ai fam de ap homi haren ondohoma on hombasi endag-ail lauk kamuhup on oho re yebil hwenanggo ai enobam welaruhu neg!” ulug hweag-etfag. Airoho ebag ma, at Gehazi ebe dagma wilibik waharuk kweleg etano neg at Gehazi anyo fam yebil hwenanggo anyo atfagdeg ahap mun kuron atfag.