Read Ninia Yali 2 RAJA-RAJA 6 Bible Online

2 RAJA-RAJA 6 - Ninia Yali bible

2 RAJA-RAJA 6

¹Nukoho eke salim de it ap Nabi Elisa en mamul-enepuk on etmano enele Elisa obam limiruruk kwit de, “Nit nenobam welahema eiyare mun onggok deg!

²Ma re niren e Ik Yordan som etmano nenebe ilitdoho misig heg mininggik lalug de etma nit nenebe wereg ma fahet o wiruhuk en hweag-hutuk kahe,” ulug hweag-etfag. Ai ebag ma at Elisa en onggo uruk kwit de, “Fano,” ulug hweag-esebag.

³Airoho hweag-esebagman de ap it enesahalimu on etmano misig eke en de, “Nowe hat hebe oho nininim laul,” ulug mingming debag ma, at Elisa en de, “Fano laul,” ebagdeg de,

⁴inim seberoho Ik Yordan ikma lebagdeg de e mutuk ale indip debagdeg keram on mutfag.

⁵Mutuk men de ap iron enesahalimu etmano en eke fetagdoho eyaha anggen heneko ikma wambebag. Wambebag ma aren ele hun Elisa fam hwiroho hweag-utuk kwit de, “Yehei nowe, yaha aire ap en on heng enebehireg walug wahi men e,” ulug hweag-etfag.

⁶Ai ebag ma at Elisa en hein og-hauk kwit de, “Ebe keane wambeheik?” ulug hein og-hebag ma, ap anyo en de, “Ebe dia higitdoho wambeheik,” ulug ebag ma at Elisa en de e enggik eke kisiloho webagdeg, yaha ebe wambebag ma etano belabe febag. Belabe febagman de yaha anggen anyo ik ahummu en ik il emberimmu walug lahaik watfag.

⁷Lahaik watfag ma at Elisa en de, “Yaha ebe ai angge re hwelakin,” ulug hweag-etfag ma re ap anyo en enggik biloho hwelebag.

⁸Nukoho eke salim de it ap homi Siria on en de ap homi Israel on nim weim yapfag. Airoho yapul ulug de at raja Siria on anyo autsi sehen seneg on enowesi etmano nim enele seberoho maho febagdeg de nenobam sabo ebe deta wutul ulug ebag.

⁹Famen de at Elisa en wene hun raja Israel on anyo fam mondotuk kwit de, “Ap Siria enap en ap homi Israel on nim weim yabukoho re kwe re ai fene en neg waharuk angge re hit de kwe ai fene en la fug,” ulug mondotfag.

¹⁰Ai ulug wene mondotfag ma re raja Israel on en de ap homi enobam it ap Siria on wamuhup kwe re ai ulug welatfag on en inil furoho welamag ulug hweag-esebag. Ne, at Elisa en wene husumbi airoho hweag-esebagdeg aren fobik nim ap raja Israel on anyo airoho neg hweag-utuk kwit welatfag.

¹¹Airoho duruk katfag ai fam de raja Siria on anyo ahummu het-bet ebagdeg autsi tentara enowesi omano wol-esebagdeg hweag-esauk kwit de, “Ap niron eke en nit nenowarukwag ulug yonggo lauk on aire ebe sa, hweag-nemek?” ulug hein og-esebag.

¹²Ai ebag ma ap iron etmano eke en de, “Nowe ap eke en eke yonggo hweag-esa lauk fug. We at Nabi Elisa anyo en de hat hebe dima suma wereg lit ane, nohorukmu wereg lit ane hele uruk ale anyo at oluk atlug aren ap homi Israel on enowe raja anyo akit wene mondotuk,” ulug hweag-etfag.

¹³Ai ebag ma at raja en de, “At Elisa ebe kema wereg e? An den at ebe sabu het duhuk angge re furoho herarik lakiek,” ulug hweag-esebag. Airoho hweag-esebag ma re, ap homi en de, “At ebe o Dotan wereg,” ulug hweag-etfag.

¹⁴Ai ebag ma re at raja Siria on en de autsi sehen seneg on tentara esan humon lohwaleg misig eke eneyog fam lauk on mel, kereta kuda emberimmu lahalug weim yabik lauk on mel o Dotan mon-enebik watfag ma re o hup anggo kota ai fam aik watfagdeg de o sok latfag.

¹⁵Airoho debag ma at Elisa amingming angge anyo oluk inatfagdeg hubet wilibik lebagdeg fu hauk men de, ap Siria on wam kuda mel kereta mel weim yapuk on etmano watlug de o sok laroho wereg ma hebagdeg de ambol somban de Elisa wereg ma kwik lebagdeg hweag-utuk kwit de, “Yehei, nit de keroho dul?” ulug hweag-etfag.

¹⁶Ai ebag ma at Elisa en onggo uruk kwit de, “Ap nit ninibil atuk on de hum deg ma it inibil atuk on maben deg angge re hakol eleg angge welamin,” ulug hweag-etfag.

¹⁷Ai ebagdeg Elisa en somban uruk kwit de, “Nakni TUHAN, an namingming angge su en eke il howag ulug il anggen fenggene fein,” ulug hweag-etfag ma TUHAN en at ele esanggo holfagdeg de, Elisa amingming angge anyo il fenggene febag ma il fu hauk men de dom it welatfag on anyo fene re kuda indok on mel kereta indok on mel en dom anyo mundoho heraholit de at Elisa aluluk kwe etmano walinggoho kwelabeg latfag ma hebag.

¹⁸Airoho hebagman de ap Siria on omano en enowatul ulug mundoho kwik waharukmu re at Elisa en somban uruk kwit de, “TUHAN nakni, ap homi etma inil hupni fesein,” ulug hweag-etfag ma, TUHAN en Elisa ele esanggo holfagdeg ap homi etmano abirangge inil hupni fesebag ma,

¹⁹at Elisa it wereg ma lebagdeg hweag-esauk kwit, “Hit de kobokwe henenda nong-hong eheikma duruk kahep a? O kota hiren heraril wahep on aire su fug, amu on anggere hiren o heraril wahep on aire an den hweag-hesamin en de an nombolim manik,” ulug hweag-esebagdeg de it enebe og-eneplug de o Samaria watfag.

²⁰Og-eneplug watfagdeg o kota anyo fam kwik watfagdeg aren somban uruk kwit de, “TUHAN nakni, it inil howag ulug inil fenggene fesein,” ulug hweag-etfag ma Elisa en somban ebag on anyo TUHAN esanggo holfagdeg ap homi etmano inil fenggene fesebag ma hauk men de o kota Samaria anyo fam wereg ma hebagdeg enakol en youk lebag.

²¹At raja Israel on anyo en ap Siria on etmano il esebagdeg aren Elisa fam hein og-hauk kwit de, “Elisa ao, an den ap oma binggi enowatmin a?” ulug ebag.

²²Airoho ebag ma, at Elisa en onggo uruk kwit de, “Enowatmihin fug. Weim yapuk kwit haren tentara sen-enepuk kahen on omano ohore enowatuk kahen fug. Haren de it enebe enesiburu mel enahaik mel og-esalug de fotog-esamihin mu it enebe enakni raja akit lowag,” ulug hweag-etfag.

²³Ai ebag ma re at raja Israel on anyo en it omano enobahet soni humon esetfagdeg it omano enasiburu mel enahaik mel nenggeg debagdeg it enebe enakni raja Siria on akit lebag. Ne, anyo debag huli anyo en de it ap Siria enap en it Israel on nim weim yabik waharuk ale bale febag.

²⁴Airoho weregman neg il eke welatfagdeg de raja Siria on unuk Benhadad anyo en de autsi tentara abirangge og-eneplug de ap homi Israel on enowatul ulug o kota Samaria walinggik watfag.

²⁵Airoho debag ai fam de o etma fam siburu obok humon atfag ma wam keledai misig unggul owag onggo re uang perak on 80 en foruk katfag, ne suwe muluk al[9] onggo re uang perak on foap en foruk katfag.

²⁶Nukoho eke salim de ap homi Israel on enowe raja anyo elehet fak lehet oho on asiagle fene laukmu re hwe eke en hweag-utuk kwit de, “Nakni an let-neakin,” ulug ele hwiroho hweag-etfag.

²⁷Ai ebag ma raja en onggo uruk kwit de, “TUHAN en hat let-heauk fug kweleg an den keroho let-habihi ha alereg? Duk fug alereg. An den gandum oho anggur oho wereg fug mu let-habihi ha fug alereg,” ulug hweag-etfag.

²⁸Ai ebagdeg eke hweag-utuk kwit de, “An den de nunggwe ale let-heowag ulug hweag-nerehen?” ulug hein og-hebag. Ebag ma, hwe anyo en, “Hwe an nehe su en de yoho hat homalik dag nalug de sono an nomalik nahuk ulug limi napuk en de,

²⁹ niren an nomalik anyo dag osoko nauhuk. Ai en likia an den de at fam hat homalik anyo eserukohon ulug heng dirihik famen de aren omalik anyo heraho fesimu,” ulug hweag-etfag.

³⁰Airoho hweag-utuk mu at raja anyo esanggo holfagdeg de omalik nebag on anyo fahet raja enda fu en de asum wandeg latfag on anyo denelepdoho hwik-esebag. Airoho debelug laukmu ap eke elehet fak lehet anyo horogma unduhuk latfag on etmano en hauk men de at raja asum ilonggoma sum de sum karung [10] on wandeg ma hebag.

³¹At raja en ele uruk kwit, “Elisa ai oho yoho su waratmisi. Ne, an den Elisa ai watmin fug halug de Allah en unggum humon nobam foukwag!” ulug ebag.

³²Ai ebagdeg de at raja ebe fobik lauk kwit de at amingming angge eke folo-folo at dam Elisa akit monde febag. Eta li em de at Elisa ebe obam olma wereg ma re ap kaindeg foma akit lebag ma weregman lebag. Ne, ap raja en mondotfag on anyo owan aik lauk elegma at Elisa en ap homi enowesi kaindeg omano fam uruk kwit de, “Furiek, Ap watni anyo en de ap misig an nowarik lowag ulug mondorik waha ma waharuk angge ai. Ap ai lahe olma aik waharuk halug de sok lariyug, ne at kwik wamag ulug embesouk fug. Ne, at ai ombolim de raja waikohoreg anggere,” ulug hweag-esebag.

³³Airoho ebagdeg at Elisa anyo ele kobogdoho etano re, raja en mondorik watfag on anyo etano aik watfagdeg ele uruk kwit,[11] “Niren anggin-fanggin hauk kahe ale aure TUHAN en unggun nenobam fesimu hauk kahe! Ma re, ‘aren nit let-nenebuhu’ ulug nangno hauk kamuhuk ale aire nunggwe fahet no,” ulug ebag.