Read Ninia Yali 2 RAJA-RAJA 7 Bible Online

2 RAJA-RAJA 7 - Ninia Yali bible

2 RAJA-RAJA 7

¹Ai ebag ma at Elisa en onggo uruk kwit de, “TUHAN en eheik ale hesanggo holin! O sono hubet mo eiya hag deg kweleg uang perak on misig fam en gandum anggen sahaleg on tepung mun ebe on 3 kilogram en onggo baleheg, ite gandum orohole amu on 6 kilogram en onggo baleheg, duhup,” ulug hweag-etfag.

²Airoho ebag ma at raja onggwareg let-hauk katfag on anyo en uruk kwit de, “Airoho duk alereg a? Duk fug alereg. Ketia eiyan TUHAN en boholman osit humon belabik wa man oho re airoho duk fug alereg,” ulug ebag. Ai ebag ma at Elisa en onggo uruk kwit de, “Wene aire demdoho atuk mu hat hil hahun famen de nauk angge ai haren lohon unduk neg hahun fug,” ulug hweag-etfag.

³Nukoho ai salim de ap enebe ohwan on enahap fam yebil hwenanggo wereg on o Samaria sokole kwik laukmu elehet oho on dag fil etma welatfag. Airoho wereg lit de iren eke en eke fam enele uruk kwit de diroho uruk katfag, “Nit nenebe o suma hwerieg lit neg weregman waramuhuk ale alemaroho welamul ale aure nunggwelug no?

⁴Niren o kota ilonggoma etma kwik lahe ha man ohore siburu obok en nit nenebe warahe ha alereg; ne nit eiya neg weregman oho nit nenebe waramuhuk neg at. Degma re nit de it ap Siria on enobam sum fam sabo salegma etma lakohon. Etma laulmu re iren nit nenoluk lili nenobahakup halug de nenoluk welamuhuk ne iren nenowaruhup halug de waramuhuk neg,” ulug uruk katfag.

⁵Airoho ebagdeg de o hup aikoho duruk kweleg etmano re it etano ap Siria on en enobam sabo saleg wereg ma etmano lebag, famen de iren ap misig ulug oho eke wereg ma esebag fug.

⁶Aire ap Siria enap etmano hol howag ulug TUHAN en debesebag ma hol-hauk men de ap sehen seneg enap esan humon wam kuda mel kereta mel fam lahalug waharuk kwit weim yabik waharuk on aplohok hag holfagdeg, iren boruk kwit de, raja Israel on en de raja Het on mel raja Mesir on mel it enautsi tentara mel fam weim yap-numluhup ulug yonggo fesesimu nit nenowarik waharuk bebag.

⁷Ai fam de hup anyo salim neg it enebe lil atlug wilibik laul ulug lauk kwit de enobam sabo saleg mel, enowam kuda, keledai mel etmano enobam sabo saleg kwe etmano lin-lan esalug heiye lebag.

⁸It ap ohwan enebene yebil hwenanggo wereg on etano ap tentara Siria on enobam sabo wirigmu en elanma etmano lebagdeg de o sabo wirig on eke fam kwik lebag. Kwebagdeg de siburu mel ik mel nebagdeg, uang perak on mel emas on mel sum mun ebe on mel hwelebagdeg de amumu heraho fahat da lebagdeg nikangge sombandoho watfagdeg de o sabo amu on eke fam kwik lalug de atam debag anyo hagdoho ap enengge hwelebag neg.

⁹Airoho debagdeg en fobik en it-it enele uruk kwit, “Wene su re mun fano ale aha ma sure ap homi eke hweag-esa on famen embeselug welamul ale aure mun siag. Degma re noholug hubet hweag-esahuk men de nit unggum nenobam fohup angge re raja obam hweag-irik lakohon,” ulug ebag.

¹⁰Airoho ulug de sombandoho o Samaria watfagdeg de ap o kota elehet fak lehet oho on fam sokole kwik laukmu kahaleg wereg on etmano fam hweag-esauk kwit de, “Nit nenebe ap tentara Siria on enobam sabo salegma laheman de ap homi enebe elegma re enowam kuda mel, keledai mel, de kumbi lili fousa on fam liligmu hehe, ne enobam sabo saleg on etmano re salegma neg hehe,” ulug enele hum fam hweag-etfag.

¹¹Airoho hweag-etfag ma re ap kwe sokolma kahaleg welatfag on anyo en de, “Wene diroho aha,” ulug enele hwirebag ma re ap en de raja ebe wereg ma etmano hweag-irik lebag.

¹²Airoho debag ale aire o hup deg kweleg neg debag. Famen de at raja nohoruk katfag ma etmano en oluk atlug wilibik watfagdeg autsi hweag-esauk kwit de, “Henesanggo holiek. It ap homi Siria on en duhuk ale ulug duswa ale aire an mundoho fubi debehi. Nit siburu obokma welahe ale aure it mundoho enoluk atsi mu re, nit siburu heraril wilibik laukmu nenebe nenolukengge sen-neneplug de nenobam kota iren sebelik kukoho re enobam sabo saleg etmano embeselug de o dagma etma lahesareg saleg wereg boruk kahi,” ulug hweag-esebag.

¹³Airoho hweag-esebag famen de raja apma on perwira eke en uruk kwit de, “Nowe, nit ap homi o kota su fam welahe on oma re, nenebe it ap atam waratswa on etmano hagdoho waramuhuk on at welahe. Ma re ap eke en wene atsi ale ai inil en furoho ha lalug wamagdoho re, wam kuda oluk lilig on oma sahalimu en foaben fam lahalug lowagdoho monde fesoul,” ulug hweag-etfag.

¹⁴Airoho hweag-etfag ma at raja en de, “Fano” ebag ma re, iren ap eke eneko fesebag ma re raja en ap etano kereta weim yapuk on biren fam lahalug ap Siria on en de keroho duswaman airoho atsi ulug inil hwalik lowag ulug monde fesebag.

¹⁵Monde fesebag ma lebadgeg de it enombolim neg lauk katfagdeg de Ik Yordan ikma aik lebag. Airoho lauk kwit etma re it ap Siria on en heiye lauk kwit de enasum mel enangge di angge su angge mel ya belap da belap lebag on mel inil hebag. Airoho halug de ap inil hwal mon-enepfag on etano nikangge sombandoho re raja akit hweag-irik watfag.

¹⁶Airoho hweag-etfag ma re ap o kota Samaria fam welatfag on etmano wilipuk kwit de buroho ap Siria on enobam sabo salegma etmano lebagdeg de di angge su angge lin-esalug wilipfag on etmano wereg ma hwelebag. Hwelebagman de airoho webag on ai fahet TUHAN en uruk kwit, “Uang perak on dorangge fam de gandum anggen sahaleg on 3 kilogram fam hundureheg, ne gandum orohole amu on de 6 kilogram en onggo hundureheg, duruk kamuhup,” ebag ale anyo higitdoho atfag ma hebag.

¹⁷TUHAN en airoho ebag ale aire raja anyo Elisa akit lebag ma, aren hweag-utuk kwit de, “O hubet mo dia hag deg kweleg ap homi o Samaria on en uang perak on dorangge fam gandum anggen sahaleg on 3 kilogram en onggo hundureheg, ne gandum eke orohole amu on de 6 kilogram en hundureheg duruk kamuhup,” ulug hweag-utuk mu hun raja onggwareg fahet hwalduk on anyo en uruk kwit de, “Airoho duk fug alereg. O ketia eiyan oho nenakni TUHAN en osit humon belabik wa man airoho am fug alereg,” ulug hweag-etfag ma at Elisa en uruk kwit de, “Wene aire ebe demdoho atuk mu hil en hahun. Famen de gandum anggen etan haren unduk eke neg hahun fug,” ulug hweag-etfag ale anyo mun higitdoho raja onggwareg fahet duruk katfag on anyo o kota elehet oho on anyo sokole kwik laukmu etano ap homi en eneyog sobit esebag ma ebe waratfag.