Read Ninia Yali 2 RAJA-RAJA 8 Bible Online

2 RAJA-RAJA 8 - Ninia Yali bible

2 RAJA-RAJA 8

¹ Li eke fam de TUHAN en siburu obok ap homi Israel on wereg ma mondorik watfag ma airoho neg weregman de tahun sabiren debag. Ai owan am fug eleg kweleg de at Elisa en de, hwe Sunem on omalik waratfag man olukap debebag on anyo isinga anyo fam airoho aruhu ulug aire hweag-etfag at. Ne, at Elisa en de, “Airoho aruhu angge hat hahain elekwe on nim de kwenang amu on fam o oko lakiyug,” ulug hweag-etfag neg.

²Airoho hweag-etfag ma re hwe anyo re Elisa en hweag-etfag ale anyo higitdoho re o ap homi Filistin on wereg ma etma welatmin ulug lebagdeg etma welatfag.

³Weregman neg tahun sabiren siburu obok wereg on anyo welatfagdeg at ebe nikangge sombandoho ap homi Israel on wereg ma watfag. Watfagdeg hwe anyo omalik inim hun raja akit lebagdeg, “Nobam inim neyabuk inim nonggwareg nikangge og-numluhup,” ulug heng ebag.

⁴Eta li em at raja en de at Elisa amingming angge Gehazi anyo fam de at Elisa en along on duruk katfag on etmano dindilin ulug heng debag.

⁵Airoho heng ebag ma at Gehazi en de at Elisa en omalik waregman oluk unduhuk febag ale dindilduk men de hwe Sunem on anyo omalik inim raja akit heng-ul ulug watfag. Watfag ma re at Gehazi en uruk kwit de, “Nowe kain on, hwe anyo mel ne omalik Elisa en olukapdoho unduhuk fesi on anyo mel de enebe dia!” ulug hweag-etfag.

⁶Airoho hweag-etfag ma raja en hwe anyo hein og-hebag ma re hwe anyo en de omalik anyo fam debag ale etmano dindilfag. Airoho dindilfag ma re raja en autsi pegawai eke wol debagdeg hweag-utuk kwit de, “Hwe su angge di angge su angge mel, ne anggwenang fam en anggen yihig onggo at ebe tahun sabiren o dag fil wereg kweleg dahan atsi on mel onggwareg og-umluhup,” ulug hweag-etfag.

⁷Nukoho misig salim de at Elisa o Damsyik lebag. Ne, eta li em de at Raja Benhadad anyo ouk wauk li lebag. Lebag ma at raja esanggo holduk men de, Elisa o Damsyik wereg, ebag ma holfagdeg,

⁸aren pegawai hun Hazael anyo fam uruk kwit de, “An naouk aure fano aruhuk a, eleg a? ulug at nabi ai en TUHAN fam hein wowagdoho re at onggo og-itmihin angge mel walug lakin,” ulug hweag-etfag.

⁹Ai ebag ma re at Hazael en de wam unta 40 en webagdeg de wam etmano abirangge fam de o kota Damsyik etma fam en di angge su angge anggen balduk katfag angge etmano lahapfagdeg walug de Elisa akit lebag. Lebagdeg de at ebe Elisa wereg ma aik lebagdeg at Hazael en uruk kwit de, “Hat hamingming angge Raja Benhadad anyo en de at ebe fano aruhuk a, eleg a, ulug hein og-heowag ulug an mon-nabik waha ma wahi,” ulug hweag-etfag.

¹⁰Ai ebag ma at Elisa en onggo uruk kwit de, “TUHAN en an hweag-nutuk kwit de, at ebe wararuhu ulug hweag-nereheik. Famen de at hweag-utuk kwit de, Fano aruhun eheik, ulug hweag-umuk,” ulug hweag-etfag.

¹¹Airoho ebagdeg en at Elisa en at Hazael fam il louroho kumureg en de at Hazael anyo enggali atfag. Enggali atfag ma duruk men de fetagdoho etano Elisa oba yatfag.

¹²Airoho oba yatfag ma re at Hazael en hein og-hauk kwit de, “Nowe nunggwelug oba yatuk kahen?” ebag. Airoho ebag ma, at Elisa en de, “Haren ap homi Israel on fam mun siag ale debesehun on an noluk deg lit oba yatuk kahi. Haren de it enobam kota elehet omamneroho oho on etmano harep fisareheg, ap sauwe ebe on mundoho enowareheg, omalik fouwon enunggul han kwenang fam fuk eseheg, homi enomalik enahummu wereg on enahum fili en kahal-eseheg, duhun ale ai fahet oba yatuk kahi,” ulug hweag-etfag.

¹³ Airoho hweag-etfag ma at Hazael en onggo uruk kwit de, “An de ap nunuk wereg fug mu re, omamne hum aireg ale aire an den dihi ha alereg ma? Duk fug alereg,” ulug hweag-etfag. Ai ebag ma Elisa en uruk kwit de, “TUHAN en an fam unug nutuk kwit de, hat hebe ap homi Siria on enobahet raja inaruhun ulug unug-nitsi,” ulug hweag-etfag.

¹⁴Airoho hweag-etfag ma re Hazael anyo nikangge sombandoho hun raja wereg ma lebag ma hun Benhadad en hein og-hauk kwit de, “Elisa en de nunggwe eheik?” ulug ebag ma Hazael en uruk kwit, “Aren uruk kwit nowe hat hebe fano aruhun eheik,” ulug hweag-etfag.

¹⁵Famen de o likia re at Hazael en de selimut misig eke webagdeg de ikma yuhuloho re raja orohole fam berel esebag ma re raja anyo sat hoporoho waratfag. Waratfag ma re Hazael ebe ap homi Siria on enobahet raja inatfag.

¹⁶Hun Ahab amloho Yoram anyo ap homi Israel on fahet raja wereg lit melal-enepuk men neg de tahun foap on[12] fam deg kweleg, hun Yosafat amloho Yehoram anyo ap homi Yehuda on enobahet raja inatfag.

¹⁷Eta li em de at Yehoram ebere umur 32 tahun wereg li em inatfagdeg de aren o Yerusalem fam etma tahun ligin en fam melal-enepuk kwit welatfag.

¹⁸Aren de ohwe hun Ahab ahaloho anyo hwelebagdeg de, it hun Ahab ahain elekwe on en duruk katfag ale higitdoho mel ne it ap Israel on enowesi raja en TUHAN fam siag duruk katfag ale mel higitdoho re aren nim TUHAN fam siag neg duruk katfag.

¹⁹ Famen de At TUHAN en amingming angge Daud fam sali hweag-utuk kwit “Hat hambiangma on en de raja inatuk kwit neg welamuhup,” ulug hweag-etfagdeg atlug de aren it Yehuda on elehapdoho fesouk fug angge welatfag.

²⁰ At Yehoram raja wereg lit melal-enepuk li em de it Edom enap de Yehuda nim sebereg welamul fug ulug wene balfagdeg de it oho enowe raja enemu in dalug de enemu atfag.

²¹Ai fam at Yehoram angge kereta weim yapuk angge etmano abirangge mel wilibik lebagdeg de o Zair lamin ulug lebag. Lebagman etman it Edom enap sehen seneg on en hukdoho kwelabe fesebag, famen o hup anggo at mel ne it autsi sehen seneg on enowesi panglima kereta fam lauk on etmano mel en ap eneselei on en hukdoho kwelap-enusugmu etmano en heal esalug wilibik watfag ma it enautsi sehen seneg on etmano enakol en heye re enobam domog lebag.

²²Ai debag huli en it Edom enap enebe Yehuda enapma seberuk ale embesebag. Ne, eta li em neg it ap homi o kota Libna fam wereg on en nenemu amul ulug wene abug balfag.

²³At Yehoram duruk katfag ale fomane re it ap raja Yehuda on en duruk katfag ale lisu baleg wereg on anyo fam baleg wereg.

²⁴Ne, at ebe waratfag ma re o kota Daud en on fam it ap raja sal-enepuk katfag ma etmano salfag. Salfag ma re at obalmangge re at amloho hun Ahazia anyo raja inatfag.

²⁵Hun Ahab amloho Yoram anyo ap homi Israel on enobahet raja unduhuk wereg lit melal-enepuk men neg de tahun nesanggo en deg kweleg at Yehoram amloho Ahazia anyo ap homi Yehuda on enobahet raja inatfag.

²⁶Eta li em at Ahazia ebe umur 22 tahun deg kweleg raja inatfagdeg aren o Yerusalem fam etma tahun misig fam melal-enepuk kwit welatfag. At isinga re unuk hwe Atalya hun Raja Ahab ahaloho, hun Omri ap homi Israel on enowe raja anyo omba ai.

²⁷Aren ohwe hwelebag ai fam de at Ahazia re it hun Raja Ahab ahain elekwe on nim indip deg latfag. Airoho deg latfag ma re it Ahab ahain elekwe on etman duruk katfag hagdoho re at Ahazia en oho TUHAN obam siag neg duruk katfag.

²⁸Airoho duruk kwit de at Raja Ahazia en de raja Israel on hun Yoram anyo nim sebe ulug hun Hazael ap homi Siria on enowe raja anyo nim weim yapuk katfag. Airoho yapuk kwit de iren o Gilead fam en o Ramot kwe etma yapuk kwit, at Yoram ebe weim yapukmu etman dog ware febag.

²⁹Airoho ware febag ma re at ebe sombandoho o kota Yizreel etman hilinggukwag ulug watfag ma, at Ahazia en ebe etma wereg ma kwelap ha lebag.