Read Ninia Yali 2 RAJA-RAJA 9 Bible Online

2 RAJA-RAJA 9 - Ninia Yali bible

2 RAJA-RAJA 9

¹Eta li em de Nabi Elisa en ap nabi aren mamul-enepuk katfag on etmano misig eke wol debagdeg hweag-utuk kwit, “Hat de o Ramot-Gilead etma lamihin en de fik-fouk din. Ne, hat hebe lauk kwit de e zaitun ahalue ikwag woliom fam hwenanggeg angge au walug lamihin.

²Hebe lamihindeg o etma aik lalug halug de haren nimi Yehu hun Yosafat amloho hun Nimsi omba ai herariyug. Herarulug de at ebe amu hondog halug de ambe misig eke fam kwik lakiyug.

³Ne kwik lalug de ahalue au unggulmu hilili folug de diroho hweag-umuk, TUHAN en uruk kwit de hat de ap homi Israel on enobahet raja unduhuk hobahaki eheik, ulug hweag-umuk. Ne, ai mundoho debelug de obale eta folo-foloroho embeselug lakiyug,” ulug hweag-etfag.

⁴Airoho hweag-etfag ma re ap nabi ket omalik ai o Ramot lebagdeg,

⁵duruk men de at Yehu mel ne it ap sehen seneg on enowesi panglima fomane mel de etma wene seberoho matuk mu lebag. Lebagdeg at nabi anyo en uruk kwit de, “Nowe, an den wene nowe hat hobahet walug wahi,” ulug hweag-etfag ma, at Yehu en onggo uruk kwit de, “Sa fahet?” ebag ma at nabi anyo en onggo uruk kwit de, “Nowe hat honggwareg fahet,” ulug hweag-etfag.

⁶ Airoho hweag-etfag ma re it biren etano o ambe balegma kwik lebagdeg, at nabi ket omalik anyo en de e zaitun ahalue anyo Yehu unggulmu belabe foruk kwit de diroho ebag, “Ap homi Israel on enakni TUHAN Allah anyo en uruk kwit de, An den hat hebe it An nomaliki Israel on ai enobahet raja unduhuk welaruhun en ulug unduhuk hobaharuk kahi, eheik.

⁷Ne, haren de at howe Ahab ahain elekwe on mundoho elehap debesehun. Ne, haren airoho duhun ai fam de An den at hwe Izebel An nomaliki nabi mel, ne it namingming angge fomane mel binggi enowatsi on anyo fahet unggum obam fohuk.

⁸Ne, at Ahab ahain elekwe on enebe abirangge mel ne at Ahab omaliki ombasi mel de mundoho waramuhup. Ne, it enebe ap on enebe sauwe on mel sobal on mel An den mundoho eleho fesehuk.

⁹At ahain elekwe on de An den ap homi Israel on enowesi raja hun Yerobeam mel Baesa mel enahain elekwe on fam debeserihik ale etaroho debesehuk.

¹⁰ At Izebel ebere kwenangma saluhup fug at ebe wareg de o Yizreel etma wereg ma mene en nahup, isi,” ulug hweag-etfag. Airoho mundoho hweag-etfag ma re ap nabi keron anyo wilip atlug lebagdeg heiye lebag.

¹¹At anyo airoho lebag ma re at Yehu sombandoho ori enekit watfag ma, iren hein og-hauk kwit de, “Wene keroho aha? Ne, ap wenenebo on ai en de hat hobam nanggin hapmin ulug deheik?” ulug hweag-etfag ma, aren onggo uruk kwit de, “Nori hit oho onggo henoluk deg ahi,” ulug hweag-esebag.

¹²Ai ebagman iren uruk kwit de, “Eleg, nit de nenapeleg angge re haren hweag-nesakin,” ulug ebag. Ai ebag ma at Yehu en uruk kwit de, “Aren wene hweag-nutuk kwit de, an nebe TUHAN en ap homi Israel on enobahet raja welamag ulug unduhuk nobahasi ale fahet hweag-nereheik,” ulug hweag-esebag.

¹³Ai ebag ma re it Yehu ori etmano en de folo-folo etano enasum jubah ninonggolnale re at Yehu olohotma yal fam etano doale febag. Ai debelug de iren bohweap trompet furoho enele amit-mit duruk kwit de, “Yehu raja inaha a,” ulug uruk katfag.

¹⁴Airoho inatfagdeg at Yoram ebe re hun raja Siria on Hazael anyo nim o Ramot kwe etmano en weim yapuk men dog watfag on etmano hiling nabukwag ulug lebagdeg weregman de Yehu en de aren de hun Raja Yoram anyo ebe o Yizreel etma wereg ma inim weim yabuhuk ulug weim abug ebag. Airoho ebagdeg at Yehu en it ap ori sehen foroho on enowesi panglima fomane etmano fam uruk kwit de, “Ne, hiren boruk kwit an raja welamag fano boruk kahep halug de, ap misig ulug oho eke wilibik lalug ap homi o Yizreel on etma fam wene hweag-esa lano ulug kahaleg lamuk,” ulug hweag-esebag.

¹⁵

¹⁶Airoho hweag-esebagdeg at ebe angge kereta weim yapil lauk angge anyo emberimmu lahabagdeg de o Yizreel lebag. Eta li em de at Yoram ebe owan fano am fug angge wereg ma hun raja Yehuda on Ahazia anyo ohore etma ha lebagdeg wereg ma lebag.

¹⁷Airoho laukmu it ap o kota Yizreel fahet kahaleg wereg ma menara fam lahabagdeg welatfag on en il fu hauk men de at Yehu mel autsi mel laukmu hebagdeg de, aren hwiruruk kwit de, “Ap esan misig eke suma fil waharuk!” ebag ma, Yoram en onggo uruk kwit de, “It waharuk on aire nenaweim on a, nenombali on a, ulug inil hwalik lowagdoho re ap sehen seneg on kuda fam lauk on etmano misig eke mondoriek,” ebag.

¹⁸Ai ebag ma re ap sehen seneg on anyo kuda anduhunmu lahabagdeg de hun Yehu wereg ma aik lebagdeg ele uruk kwit de, “Raja en de nowe hat hebe nombaliroho waharuk kahen ane, ulug oluk amag ulugdoho eheik,” ulug hweag-etfag. Ai ebagman de Yehu on onggo uruk kwit de, “Aire haren dukwag ulug wereg fug, folo an nim seberik ma,” ulug hweag-etfag. Airoho hweag-etfag ma re ap menara fam kahaleg welatfag on anyo furegman de ap sehen seneg on anyo re ap esan anyo wereg ma aik lebag famen de nikangge sombandoho watfag fug. Mu re airoho debag ale anyo fahet aren hweag-esa lebag ma,

¹⁹ap sehen seneg on amu on eke mondotfag. Ne, at anyo lebagdeg aren oho nikale etano neg at Yehu fam hein og-ha lebag ma at Yehu en eke nim onggo uruk kwit de, “Aire haren dukwag ulug wereg fug! Folo an nim seberik ma!” ulug hweag-etfag.

²⁰Airoho debag ma re ap menara fam kahaleg welatfag on anyo en debag ale anyo fahet raja fam uruk kwit de, “Ap yonggo angge anyo re ap esan anyo wereg ma aik laha famen de sombandoho waha fug,” ulug hweag-etfag. Ai ebagdeg aren ele eke nim dopnoroho uruk kwit de, “Ap esan lohwaleg ai og-eneplug waharuk on de at Yehu ane, ap ai en angge kereta weim yapuk on aire ap wenenebo duruk on en hag deg laha anggere,” ulug hweag-etfag.

²¹Ai ebag ma at Raja Yoram en uruk kwit de, “An den nangge kereta ai fouk debeiyek,” ulug hweag-esebag ma iren fouk debebag. Ai debebag ma re at Yoram mel ne Raja Ahazia mel de enangge kereta domog fam lahabagdeg de at Yehu wereg ma lebag. It anyo lebagdeg de at Yehu ebe yabuk hun Nabot en wutuk katfag on fam etmano ambi aik lebag.

²²Airoho ambi atfagdeg at Yoram en hein og-hauk kwit de, “Hat de nenombaliroho waharuk kahen a?” ulug Yehu hein og-hebag ma, at Yehu en de, “O suma ap homi en hein og angge mel, ne hat hisinga Izebel en kembu apne wauk ale indip disi on anyo mel wereg kweleg oma re nunggwelug an den nombaliroho waharuk katmin no?” ulug ebag.

²³Ai ebag ma at Yoram anyo ebe angge kereta anyo alukwe hwaloho heiye lauk kwit de, “Ahazia ao, aure nit nenowarikoho lal-nenebeheik!” ulug ele ngaril lebag.

²⁴Airoho laukmu re at Yehu en de asehen lit-mat hebagdeg de at Yoram ebe ambolowag fam en de enda anggen fam fologdoho ware febag ma re at Yoram anyo dalorebagdeg de angge kereta anyo elman waratfag.

²⁵ Waratfag ma at Yehu en at onggwareg fahet sehen foroho on welatfag on hun Bidkar anyo fam uruk kwit, “Niren kuda laharuhuk deg at Yoram akni Ahab anyo ombolim lauhuk ale anyo re hat ebereg lahen a? Anyo li em de TUHAN en Ahab fam uruk kwit de, O sono hun Nabot mel at omaliki mel ap di en enowatsi ulug de An mundoho noluk deg ma re An den oho hat hebe yabukmu eiya en howaruhuk en dik-demdoho abug uruk kahi, ulug hweag-itsi anyo,” ulug hweag-etfag. Airoho ebagdeg de at Yehu en ele lisoho ap onggwareg along baloho wereg on anyo fam uruk kwit de, “Aireg ma re Allah en unggum at obam fohuk isi ale anyo dip amagdoho re at Yoram ebe wareg aire yabuk hun Nabot en on fam etma hwik-esakin,” ulug hweag-etfag.

²⁶

²⁷Airoho duruk ale at Ahazia en il hebagdeg de aren angge kereta anyo lisoho walug de buroho o kota Bet-Hagan etma watfag. Watfag ma re at Yehu en mutlug watfagdeg ele at autsi fam hwiruruk kwit de, “Ap ai wariek!” ulug ebag ma re iren o kota Yibleam horogma kwe o Gur lauk on fil etman dog ware febagdeg ahap bale febag. Famen de at ebe feiyalug lebagdeg de o Megido fam etma lebagman etman waratfag.

²⁸Waratfag ma re at autsi pegawai en ebe wareg wag lebagdeg kereta fam walug nikangge o Yerusalem watfagdeg o kota Daud en on fam ap raja sal-enepuk katfag ma etma salfag.

²⁹Airoho debag aire hun Ahab amloho anyo ap homi Israel on melal-enepuk kwit 11 tahun huli raja wereg kweleg at Ahazia ap homi Yehuda on enobahet raja inatfag.

³⁰Airoho debelug de at Yehu anyo o Yizreel aik watfag. Ne, at hwe Izebel anyo re atfag ale anyo mundoho esanggo holfagdeg aren oruk al ware feheg il huhuni oho feheg, debebagdeg at obam olma jendela elelekwe en de belabeg ben ha wambebag.

³¹Ne, at belabohoman de at Yehu sokole humon anyo fene en kwik laukmu hebagdeg de Izebel en hwiruruk kwit de, “Hun Zimri[13] Ap watni ai! Hat de nunggwangge hendan suma waharuk kahen?” ulug ebag.

³²Ai ebag ma at Yehu elaha leko jendela fil fu hebagdeg ele uruk kwit, “Ap sa en an nibil atmisi?” ebag ma, airoho uruk ale anyo holfagdeg ap o hwe ratu anyo obam olma yabuk duruk katfag on etmano en biren henahan en hagdoho inil belap ha wambebag.

³³Fu hebag ma re at Yehu en it fam uruk kwit de, “At ai hwik-esa wambik manik!” ebag ma iren de hwe Izebel anyo hwik-esa wambik lebag ma re hwe anyo kereta en al berelfag ma re amep de kwetete heg o owag fene mel ne wam kereta kuda en lisulug lauk katfag angge etano fene mel lebag.

³⁴Airoho debag ma re at Yehu anyo re hwe ratu anyo ebe wereg ma etmano kwik lebagdeg siburu nebag. Nebagdeg aren ele uruk kwit “Hwe aire hururung deg on famen de at ebe ap raja ahaloho on deg ma re ebe wareg ai saluhup fano,” ebag.

³⁵Famen ap en ebe wareg anyo wag lalug saldul ulug duruk men de hwe anyo unggul owag mel enggik owag mel eyog owag mel neg wereg ma inil hebag.

³⁶ Airoho deg latfag ale anyo iren hun Yehu fam oluge feik watfag ma, aren uruk kwit de, “Airoho aruhu ulug aire TUHAN en mundoho sali isimu, ne TUHAN en At amingming angge Elia anyo fene en uruk kwit de, Hwe Izebel ai ebe wareg de mene o Yizreel fam etman nahup,

³⁷ne ebe wareg ai ando re wam di angge su angge al hagdoho del-fol deg ma re ap misig en oho at owag siling ulug fubi debehup fug, ulug isi aleroho,” ulug ebag.