Read Ninia Yali 1 TAWARIKH 10 Bible Online

1 TAWARIKH 10 - Ninia Yali bible

1 TAWARIKH 10

¹Ap homi Israel on inim it Filistin enap inim de o Gilboa dom kwe omano dog yapfag. Etma dog yapuk men de it Israel enap humdoho enowatfag ma waratfag, ne foma re at Raja Saul anyo inim, at onggwareg omaliki etmano inim de enakol en wilipfag.

²Famen de it Filistin enap en enombolim mug-eneplug watfagdeg at omaliki enesahalimu etano en de it enebe henahan angge, nimi Yonatan ha, Abinadab ha, Malkisua ha, enowatfag.

³At hun Saul wereg kwe etano dog yapuk on anyo omamne-omamne lauk kwit, at Saul ebe anyo oho it aselei on enandog en ware febag ma, dog en wareg yebil atfag.

⁴Airoho atfag ma at Saul en ap sauwe on at asehen walug lauk katfag on anyo fam uruk kwit de, “An ap Filistin enap TUHAN enapeleg enap ai en an nele ying nabuk no re, hat henggarog ai lisoho walug an dale nobahain,” ulug hweag-etfag. Airoho hweag-etfag famen de at nimi sauwe omalik anyo akol en de dale febag fug. Ai fam de hun Saul anyo enggarog onggwareg en webagdeg de, karog anyo ambiangma deiyal atfag.

⁵At nimi sauwe on anyo il hauk men de hun Saul anyo mundoho waratfag ma hebagdeg de at oho onggwareg enggarog fam deiyal atlug waratfag.

⁶Aireg ma re at Saul inim omaliki enebe henahan etano inim waratuk debag ma re at raja ahain elekwe en en raja inatuk katfag on anyo oho ai huli aik lebag.

⁷It Israel enap o Yizreel donggo kwe welatfag enap anyo enesanggo hol-hauk men de it Israel enap sehen foroho on anyo mundoho wilibehesa, ne at hun Saul mel, omaliki mel de mundoho warahesa, urukmu enesanggo holfagdeg de, it oho enobam kota etmano embeselug wilibfag. Embeselug wilipfag ma re it ap Filistin enap en o kota etmano sebelik kwebag.

⁸Likia sekandoho it Filistin enap en ap Israel enap wareg omano herahaul ulug waharuk men de, at Saul inim omaliki henahan etano inim o Gilboa dom fam etma wareg wereg ma hweahabag.

⁹Airoho wereg ma hweahabagdeg de iren at Saul asum dog yapuk kwit wandeg latfag on anyo nonggol-dauk, ebe unggul kong balduk, debagdeg hwelalug lebag. Airoho walug lebagdeg de iren wene o bumbuk abirangge omano it enunggul unuk wereg kwe mel, it enanggembu dewa fam inim wene fano on ai fatfag.

¹⁰Hun Saul asum dog apuk kwit wan-duruk katfag on sing mel asehen angge mel anyo re kembu obam iren on anyo fam febag, ne at unggul kongdeg anyo re it enanggembu dewa unuk Dagon anyo obam wirigmu etma sukni febag.

¹¹Airoho febag ma it ap homi Yabes enap o Gilead welatfag on omano, en hol-hauk men de, “It ap homi Filistin enap en de at Saul anyo fam airoho dehesa,” urukmu enesanggo holfagdeg de,

¹²it ap enambong se on neg de at Saul ebe wareg anyo nim at omaliki wareg omano nim, og-enebik lebagdeg walug de, o Yabes watfag. Etma watfagdeg de iren etma e humon eke wilibig on apma salfagdeg, it enebe enenggik nukoho sabirenam siburu na fug angge enambilik hweang hagdoho welatfag.

¹³ At Saul ebe waratfag aire, aren TUHAN fam dipdoho duk eleg angge, Aren awene melaleg diroho diyug suroho diyug ulug, hweag-etfag on anyo holoho duruk katfag. Ne, eke at Saul en an keroho dimin ulug, At TUHAN en hweag-nomag ulug, heng uk fug angge aren it ap waratfag on enaheime fam heng ik lauk katfag. Ai fam de At TUHAN en unggum obam febagdeg de at raja unduhuk latfag ma obalma anyo re hun Isai amloho Daud anyo og-etfag.