Read Ninia Yali 1 TAWARIKH 11 Bible Online

1 TAWARIKH 11 - Ninia Yali bible

1 TAWARIKH 11

¹It Israel enap melal-enepuk on enowesi enebe mundoho at Daud akit o Hebron lebagdeg obam uruk kwit de, “Nit sure nenowe hun log hat hori.

²O endamet angge, at Saul en nit melal-nenepuk li em ohore, it Israel enap dog yabik laul ulug durukmu re nenowe hun log haren it sehen foroho enap omano og-eneplug kuruk katihin. Ne, ai en At TUHAN wene abug uruk kwit ohore, “At Daud neg An nomaliki melal-enepuk karuhu en raja inaruhu,” ulug abug ebag,” ulug hweag-irik lebag.

³Airoho hweag-irik lebag ma re at Daud anyo en de it Israel on enowesi melal-enepuk on anyo mel wene abug watfag ma, At TUHAN en hun Samuel fene en, “At Daud airoho aruhu,” ulug abug ebag higitdoho iren at Daud it Israel on fahet raja unduhuk febag.

⁴ Nukoho misig salim de at Raja Daud mel, it Israel enap en sehen foroho enap anyo abirangge mel de, o kota Yerusalem bin kwik lebag. Eta li em de o kota aire unuk Yebus soaloho it ap homi o kota ai enonggwareg on Yebus enap omano welatfag.

⁵It ap homi Yebus enap omano en Daud fam uruk kwit de, “Hat de nit nenobam kota su kwik wahen ha fug alereg,” ulug hweag-etfag. Famen de it ai en enebe hembisig unuk Sion anyo sebelik kwebag. Eta li em de at Daud en it autsi omano fam wene unduhuk foruk kwit de, “Ap eke en kirim-keram ap Yebus on misig waruhu halug de, ap ai it sehen foroho on enowe panglima aruhu,” ulug ele unduhuk febag. Airoho ele unduhuk febagman de at Yoab anyo en atam it ap homi Yebus on wereg ma hou wilipfag ma, at anyo it sehen foroho on enowe panglima unduhuk febag. (Yoab isinga re unuk Zeruya.) It Yebus enap enenda hembisig Sion anyo delik kwebagdeg de, at Daud anyo etma welatfag. Ai fam de it enenda hembisig eta li em angge ap homi en unuk, “Daud obam kota.” Uruk katfag.

⁸Kota anyo at Daud en nikangge witmin ulug de, duk mo lahaik waharuk fil wereg on kwenang atam leho febag ma etman indip debag; ai en o anyo at Yoab en ombolim witfagdeg mundoho wiri-febag.

⁹At TUHAN en let durukmu atlug de at Daud anyo eke nim wereg lit de eke nim omamne atuk katfag.

¹⁰At Daud autsi apma on Daud fahet duruk wauk katfag enap anyo enunuk su. It aire ap homi Israel on inim de at Daud raja inamag ulug, TUHAN en, Airoho aruhu, ulug abug ebag higitdoho obahet duruk katfag enap. Ne, it aire at Daud raja inatfag man ohore obahet duruk kwit neg welatfag enap anyo.

¹¹Ap sehen foroho on enowe leho on perwira keram on aire hun Yasobam o Hakhmoni on ai, aren it enunggul unuk “Esan Henahan”[21] uruk katfag enap ai melal-enepuk on fahet unduhuk latfag. Hun ai en de eke salim dog yapuk kwit ap enebe 300 en apfagdeg aren anggisim fam mun abirangge daloho enowatfag.

¹²It enunggul unuk Esan Henahan ai fam en ap bireneg on de, hun Eleazar hun Dodo amloho it enunggul unuk ahohi ai on ai.

¹³O Pas-Damim etma dog yapuk kwit de, aren Daud ibil atfagdeg it Filistin enap fil yabik lebag. Ne, it Israel enap sehen foroho on omano wilipuk kweleg de, at inim at autsi inim neg de no gandum yaho on yabukmu etman bug hebagdeg, it Filistin enap anyo mel dog yapfag. Airoho yapukmu At TUHAN en at ibil anyo along humon og-etfag.

¹⁵Nukoho misig salim de it Daud autsi leho on perwira omano en it oroholeam enap neg enebe henahan Daud akit o Adulam owikmu dom en helep lehet hagdoho ohoma horogma etma obale amumu akit lebag. Eta li em de it Filistin enap en sehen foroho enap de o Refaim donggoma etma o sabo saloho nohorukmu, ne iron en esan misig ekere o Betlehem sebelik kwebagdeg wereg ma lebag.

¹⁷Airoho lebag ma re at Daud obam indipmu fahet enda fulung duruk en de aren uruk kwit de, “Nori aho, an ik bohwe o Betlehem sokole kwik laukmu horogma ai en eke nakin ulug og-netlep ani aho,” ulug ebag.

¹⁸Airoho urukmu it etano en hol-hebagdeg de, it Daud autsi sehen foroho enowesi leho on henahan etano re ho ulug foldong dohore it Filistin enap enobam sabo saleg kwe en de ik bohwe anyo fam hwenanggik lebagdeg walug de at Daud akit watfag. Walug akit watfag famen de at Daud en na fug angge re TUHAN fahet og-utuk kahi ulug hilili febag.

¹⁹Aren uruk kwit de, “Nakni Allah unuk fam anggere, an de ik sure namin fug! Ne, an den ik su namin halug de, aire an den it ap enebe enowaruk hag ale duruk kweleg hwenanggik lahesa enap au enamep na hag ale namin!” ulug ebag. Aireg ma re at Daud en de ik anyo mun nebag fug. It ap enebe henahan Daud obahet duruk katfag enap etan debag alere ai.

²⁰It ap sehen foroho enowesi perwira enebe 30 en enap ai ohore enunuk de, “Esan 30” Uruk katfag. It enunuk ai enap aire at hun Abisai hun Yoab aut anyo en melal-enepuk katfag. Aren de ap enebe 300 en anggisim fam enowatfag. Ai fam de at unuk oho leho welatfag. Famen de at de it enunuk Esan Henahan uruk katfag enap ai deg latfag hagdoho deg latfag fug.

²²Ap perwira etman leho on misig ekere unuk Benaya hun Yoyada amloho o Kabzeel ahun ai. Hun aire mun ambong si sereg latfag. Aren de it Moab on enobahet duruk katfag enap enowesi biren angge enowatfag. Nika ahun ai en nukoho misig salim lumbiag hetdeg li re koru elekwe kwik lebagdeg mene singa misig eke warik kwebag.

²³Aren de ap Mesir ahun obahare mun hum-ham ahun misig eke watfag. Hun ai owag hweise yatdeg latfag alere 2 meter il eke emberimmu hagdoho inim deg latfag. Ne, ap aire anggisim obahare humon walug noruk katfag, famen de at Benaya re we domuk seneko obam lebagdeg warik lebag. Inggisim ap Mesir ahun ai en enggikmu seneg latfag angge anyo deloho webagdeg de at onggwareg anyo ware febag.

²⁴Hun Benaya aire it enunuk Esan 30 anyo fam on en aren debag alere airoho debag ai.

²⁵It esan ai on fam en de at Benaya ai neg de mun oroholeam ahun welatfag, famen de at de it enunuk Esan Henahan uruk katfag enap ai en deg latfag eta hagdoho deg latfag fug. At Daud en de hun Benaya anyo at onggwareg aluluk along baloho noruk on fahet enowe enunggul hagdoho ulug unduhuk febag.

²⁶Apma sure it sehen foroho on enowesi perwira amu on mun leho welatfag enap anyo: Asael hun Yoab anyo ha Elhanan hun Dodo obam Betlehem ahun anyo ha Samot obam Harod ahun anyo ha Heles obam Peloni ahun anyo ha Ira hun Ikes amloho obam Tekoa on anyo ha Abiezer obam Anatot ahun anyo ha Sibkhai obam Husa ahun anyo ha Ilai obam Ahohi ahun anyo ha Maharai obam Netofa ahun anyo ha Heled hun Baana amloho obam Netofa ahun anyo ha Itai hun Ribai amloho obam o wilayah it enunggul unuk Benyamin on fam en o Gibea ahun anyo ha Benaya obam Piraton ahun anyo ha Hurai obam o Gaas donggo kwe etmano on ai ha Abiel obam Araba ahun ai ha Azmawet obam Bahurim ahun ai ha Elyahba obam Saalbon ahun ai ha Hasyem obam Gizon ahun ai ha Yonatan hun Sage amloho obam Harari ahun ai ha Ahiam hun Sakhar amloho obam Harari ahun ai ha Elifal hun Ur amloho ai ha Hefer obam o Mekhe(...)