Read Ninia Yali 1 TAWARIKH 12 Bible Online

1 TAWARIKH 12 - Ninia Yali bible

1 TAWARIKH 12

¹At Daud hun Raja Saul anyo akol en wilipfagdeg de o Ziklag etma lebag. At etma lebagdeg wereg ma re it ap foma humdoho sehen foroho enap mun dipdoho neg duruk katfag enap mel, weim apuk ale mun enoluk-benoluk deg enap mel, at akit seberik watfag.

²It aire at Saul hagdoho enunggul unuk Benyamin misig on en de, it enebe re dog leheik lauk ale enomalo wirik enap, ne helep hwik enowatuk ale oho enenggik bekit fil en oho, hware fil en oho wele enap neg waharuk katfag.

³It enowesi melal-enepuk katfag on de hun Ahiezer mel, Yoas mel, hun Semaa o Gibea ahun ai omaliki eta. It ap Daud inim duruk katfag enap aire enebe su: Yeziel mel, Pelet mel, hun Azmawet omaliki eta ha Berakha mel, Yehu mel, o Anatot enap eta ha Yismaya obam Gibeon ahun, Daud obahet along ale duruk katfag ahun at ebe it esan eke enunuk Deng Esan uruk katfag on anyo enebe 30 en enowe melal-enepuk on unduhuk latfag ahun ai ha Yeremia mel, Yehaziel mel, Yohanan mel, Yozabad mel, enobam Gedera enap eta ha Eluzai, Yerimot, Bealya, Semarya, Sefaca mel, enobam Harufi enap eta ha Elkana, Yisia, Azareel, Yoezer, Yasobam mel, it enunggul unuk Korah enap eta ha Yoela, Zebaja, ha hun Yeroham omaliki enobam Gedor enap eta ha.

⁸At Daud o leimu dom en elehet hagdoho fak ohoma etmano weregman de, it enunggul unuk Gad on en, it ap Daud obahet duruk katfag enap, ap enunuk enameg on, weim apuk ale enoluk-benoluk deg enap humdoho at akit seberik watfag. It ap etma re wanggun wauk ale mel, dog kwe balni wauk ale mel, de mun hebel-bebel deg enap mun waratlug enoluk am ale duruk katfag enap. It enebe re wam singa ambong si sereg omano hagdoho deg latfag, ne iren nenek duruk katfag ale re wam rusa en hweik solog duruk hagdoho duruk katfag.

⁹It enebe pangkat deg latfag aleroho enunuk baleg latfag on de su: Ezer, Obaja, Eliab, Mismana, Yeremia, Atai, Eliel, Yohanan, Elzabad, Yeremia, Makhbanai, ai.

¹⁴It Gad enap ai en fomane re it sehen foroho on enowesi perwira leho on ap enebe esan 1.000 en fahet enunggul hagdoho welaheg; it foma perwira enebe re ap esan 100 en fahet enunggul hagdoho welaheg, duruk katfag enap.

¹⁵Eke atfag ale re bigalem misig fam en de Ik Yordan anyo fu waharuk kweleg it sehen foroho on enowesi anyo ik bal-esalug de ik anyo foma fil en it ap mo obuk uruk fil oho, mo lahaik waharuk fil oho donggo kwe wereg on omano muko wilip-enebik lebag.

¹⁶Nukoho eke salim de it ap enunggul unuk Benyamin on nim Yehuda on nim esan misig eke at Daud wereg ma dom helep lehet hagdoho deg ma etmano akit lebag.

¹⁷Akit lebag ma re at Daud it inim ambi atfagdeg hweag-esauk kwit de, “Hit de nit nenori on en an let-napul ulug wahep halug de, nit nininim seberiek. Niren de hit nenenda nenahayeg fam og-henepuk kahe anggere. Ne, hiren lahe an laloho it naselei on fam og-esaul ulug wahep halug de, an den hit henobam ulug oho siag dirihik fug ale aire At Allah nit nenombasi en apne wauk katswa on anyo oho mun olukdeg ma re, Aren hit unggum henobam og-hesahu,” ulug hweag-esebag.

¹⁸Airoho hweag-esebag ma it enesahalimu etano en ap misig unuk Amasai, hun ai fobik en de ap ai en esan unuk “Esan 30” uruk katfag on anyo enowe melal-enepuk on atfag ahun ai, Allah Aheime obam atfagdeg aren uruk kwit de, “Daud hun Isai amloho ahwi! Nit de hat henggik leg hauk kahe o! Allah re hat hibil wereg! Anggere hat nim it hat let hapuk on nim de hiren duruk ale etma ambiangma fano on neg atuk kamag,” ulug hweag-etfag. Airoho hweag-etfag ma re at Daud en it anyo og-enepfagdeg aren autsi sehen foroho on en dog yabik lauk on perwira omano fam welamag ulug leho fesebag.

¹⁹At Daud inim it Filistin enap inim seberoho at Raja Saul anyo wereg fil dog yabik laukmu re, it enunggul unuk Manasye on en ap sehen foroho enap fomane re ik bal-esalug de at Daud ibil aik watfag. Ne, ebe demdoho re at Daud en de it ap Filistin enap aire let-enepuk katfag fugmen. It Filistin enap enowesi melal-enepuk katfag on etmano en de, at Daud Raja Saul ibil ik baloho nindig-atuk kwit it lal-enebuk no ulug enakol en de, hat de o Siklag etma lauk kamin ulug hweag-etfag.

²⁰Airoho hweag-etfag ma at Daud anyo o Siklag lamin ulug kwema laukmu it enunggul unuk Manasye enap en dog yapuk katfag enap Daud ibil nindig-atfag enap anyo enunuk de su: Adnah, Yosabad, Yediael, Mikhael, Yosabad, Elihu, Siletai, ha eta. It ai enebe domog de ap dog apuk enap enebe 1.000 en heheg enunggul hagdoho wereg lit hwal-enepuk katfag.

²¹It ap aire Daud fahet duruk kwit de waram hag ale dulug en enoluk atuk katfag enap, mun enobam lik-louk deg lit it ap o siahap kwelapil noruk katfag enap etmano inim yabukoho Daud let duruk[22] katfag enap. Fobik en de it ap etma it Israel on fam en dog yapuk on enowesi perwira anyo atfag.

²²Nukoho hundig-hundig omano ap eke inim eke inim at Daud fil dopno ik waheg neg durukmu re, we horog il misig fam de at Daud autsi dog yapuk on de esan humon atfag.

²³At hun Daud anyo o Hebron wereg ma re ap dog apuk ale fahet hum ale duruk katfag enap omano at Daud ibil aik waharuk katfag. Iren de At TUHAN en abug uruk kwit, Daud raja inaruhu, ulug ebag higitdoho at Saul obalma raja inamag ulug let dik waharuk katfag. It enebe seberoho esan lohwaleg latfag ale re su: It enunggul unuk Yehuda on en de ap enebe 6.800 en dog kwe balduk angge inim fit inim et wutdoho welatfag. It enunggul unuk Simeon on en de ap enebe 7.100 en neg mun milil-melal deg enap welatfag. It enunggul unuk Lewi on en de ap enebe 4.600 en welatfag. Hun Yoyada it Harun ambiangma on anyo melal-enepuk katfag ahun ai autsi re ap enebe 3.700 en welatfag. Nimi sauwe on misig ambong se omalik de Zadok ai owesi autsi re ap enebe 22 en welatfag. It enebe abirangge re it enahain elekwe on etma hwal-enepuk en enowesi enunggul hagdoho welatfag. It enunggul unuk Benyamin on (at Raja Saul anyo unggul unuk fam on) ai en de ap enebe 3.000 en. It enunggul unuk Benyamin on aire foma humdoh(...)

³⁸It ap Daud obahet duruk katfag enap aire mun enalili angge lik-louk deg angge en at Daud anyo raja it ap homi Israel on abirangge fahet unduhuk foul ulug de o Hebron akit lebag. It ap homi Israel on fomane ohore it enenda misig wenggelfagdeg de iren we misig ale ai neg dul ulug bebag.

³⁹Nukoho henahan hunduko aire it ap Daud fahet duruk katfag enap omanore Daud inim omano wereglit soni pesta esereheg, ap homi Israel on en it fahet ik mel, siburu mel foukdoho febag on omano it inim, it ap homi Israel enap amu on omano et angge nenggeg, duruk kwit etma welatfag.

⁴⁰It enunggul unuk foma il emberim utara fil welatfag on mun yatma enap it enunggul unuk Isakhar enap, Zebulon enap, Naftali enap etmano ohore wam keledai, unta, bagal, sapi, mel fam nauk angge, tepung, e ara anggen mel, kismis mel, anggur, saitun ahalue mel, emberimmu mun hoporoho lahaplug waharuk neg katfag. It ap etman de wam sapi mel, domba mel, senggelug nauk on ulug et walug waharuk katfag. It ap homi Israel on o mundoho omano en enahayeg boruk anyo enegdeg howag ulug de, iren airoho duruk katfag ai.