Read Ninia Yali 1 TAWARIKH 13 Bible Online

1 TAWARIKH 13 - Ninia Yali bible

1 TAWARIKH 13

¹At Raja Daud anyo en it ap sehen foroho enowesi perwira ap enebe esan 1.000 en melal-enepuk on et, esan 100 en melal-enepuk on et inim wene seberoho enele watfag.

²Matfagdeg de aren it ap etmano fam uruk kwit de, “Nori hiren oho fano boruk kahep halug, ne At nenakni TUHAN Allah en oho fano dukwag boruk halug, de niren ap Lewi enap mel, it imam o esanggo-esanggo wereg on omano mel, it nit nenunggul unuk on amu on abirangge omano mel, watlug nit nenakit suma kabog-dik wamag ulug miming-enebiek.

³It airoho kabog-dik wamlusama re nit nenebe mundoho Peti Allah en Sali Wareg Wene yohwareg angge anyo hun Raja Saul anyo unduhuk lit melal-enepuk li em nong-hong ale debesimu hesama wereg on ai wag-laul,” ulug hweag-esebag.

⁴Airoho hweag-esebag ma re it ap homi Israel on mundoho kabog-dik watfag on anyo en de, hun Daud en dul eheik on aire fano ale eheik, ulug enahayeg debag.

⁵ Airoho debag ma re at Daud anyo ap homi Israel on o sili abirangge etano wereg on apma fil de o Mesir huli en de, emberim fil de o Hamat kwe lauk huli wereg on etmano mundoho Peti Sali o Kiryat-Yearim wereg angge aire walug o Yerusalem feik wamul en ulug kabog-enepfag.

⁶ Airoho kabog-enepfagdeg de at Daud anyo oho it ap homi etmano ininim de o kota Baala en Kiryat-Yearim urukmu, wilayah it enunggul unuk Yehuda on fam etma Peti Allah en Sali Wene Wareg yohwareg angge anyo waul ulug lebag. Peti aire unuk de, “TUHAN At ebe boholma yonggo enunuk Kerubim ai emberimmu hwerieg wereg on,” ulug soalfag.

⁷It anyo o Baala mundoho aik lebagdeg de, Peti Sali anyo o hun Abinadab obam en webagdeg de no pedati wam sapi en lisulug laukmu di angge su angge emberim fam lahaplug lauk katfag angge anyo fam hamboko lahapfag. Lahabe febagdeg de it Uza mel, Ahyo mel, de no pedati anyo aluluk hopdoho lauk katfag.

⁸Ne, at Daud inim it ap homi Israel on inim de yunggul dil holog dil mun enahayeg fam suni wiliboho dil lauk kwit de, Allah along wereg ma leho foruk kahe ulug de binggong unuk kecapi, rebana, simbal, [23] trompet bohweap hag on anyo mel, kong dil lauk katfag.

⁹Airoho dil lebagdeg de it anyo o hun Kidon en gandum anggen loldukmu etmano aik lebagdeg duruk men de, sapi no pedati lisulug lauk katfag on etano eyog dung debag ma re, at Uza en de Peti Sali anyo wambuk no ulug enggik en sene febag.

¹⁰Sene febagman de etano li em neg de at Uza en debag on aire TUHAN unuk mabenapdoho fouk ale hagdoho deheikma ulug de TUHAN mun olok Uza fam febag. Airoho olok febagdeg ebe etano en at binggi ware febag. Ware febag ma re airoho atfag anyo li em de obale eta unuk “Peres-Uza”[24] uruk katfag. At Uza anyo TUHAN en ware febag ale fahet de at Daud olok atfag.

¹²Famen de at Daud oho Allah fam akol bebagdeg uruk kwit de, “Ketiare an den Peti Sali aure nangginoho walug lamin?” ulug ebag.

¹³Ai fam de at Daud en Peti anyo o Yerusalem walug lauk ale embeselug de hun Obed-Edom unggul unuk Gad ahun anyo obam etma febag.

¹⁴ Etma febag ma re Peti anyo etma bigalem henahan hunduko wereg ma re, At TUHAN en de at Obed-Edom anyo ahain elekwe mel, at angge mel, mundoho fanoap deberuk katfag.