Read Ninia Yali 1 TAWARIKH 14 Bible Online

1 TAWARIKH 14 - Ninia Yali bible

1 TAWARIKH 14

¹At raja o Tirus ahun Hiram anyo en de, hun Daud obam bumbuk wirukwag ulug de autsi mon-enebik waharuk kwit de, it enebe ap o e fam wutuk on mel, helep fam wutuk on mel, mon-enebik watfag.

²Airoho mon-enebik watfag ai fam de, at Daud endama boruk kwit de, An de TUHAN en it ap homi Israel on fahet demdoho unduhuk nobahasireg, it At TUHAN omaliki hwal-enepuk kamag ulug an raja wereg lit melal-enepuk karuhukmu kerajaan anyo omamne debeheg, napuk au i, ulug endama demdoho bebag.

³O Yerusalem etma wereg lit de at Daud en ohwesi fomano og-enepfagdeg omaliki foma endag-enepfag.

⁴At omaliki o Yerusalem etman endag-atfag on de: Syamua, Sobab, Natan, Salomo,

⁵Yibhar, Elisua, Elpelet,

⁶Nefeg, Yafia,

⁷Elisama, Beelyada,[25] Elifelet ha, endag-enepfag.

⁸It Filistin enap enesanggo holduk men de at Daud anyo it it ap homi Israel on abirangge fahet raja unduhuk fehesa, urukmu holfagdeg de, at ebe senetul ulug watfag. Airoho waharuk ale en de at Daud anyo oho it inim weim yapul ulug wilibik lebag.

⁹At airoho wilibik lauk kweleg anyo re it Filistin enap de o Lembah Refaim etmano aik watfagdeg de donggo anyo it mundoho del-debag ma.

¹⁰Airoho dehesa urukmu at Daud esanggo holfagdeg de, at Daud en Allah fam hein-oghauk kwit de, “TUHAN nakni, an den ap Filistin enap aire enowarik lamin fano a, eleg a? nakni TUHAN haren de an nalongap nobahamihin a, eleg a?” ulug hein og-hebag. Hein og-hebag ma re TUHAN en onggo uruk kwit de, “Yuo enowarik lakin!” ulug hweag-etfagdeg de, “An den hat hobam halong amag ulug og-hitmin,” ulug hweag-etfag.

¹¹Airoho hweag-etfag ma re at Daud mel it autsi sehen foroho enap anyo mel, de it ap Filistin enap anyo o Baal-Perasim etmano enowarik laul ulug lebagdeg de it enalong elehapdoho fesebag. Airoho enalong elehapdoho fesebagdeg de at Daud en uruk kwit de, “Ik fu leheruk kwit di angge su angge misham felelengdoho walug lauk anyo hag de, At Allah en an nebe fam it naselei on enomamne indip wereg ma anyo moluluk dik kukwag ulug nobahakeik,” ulug ebag. Ai fam de obale etma re unuk Baal-Perasim[26] soalfag ai.

¹²It Filistin enap anyo enakol en bupa uruk kwit de, enanggembu wirig owag omano lin-lin wilipfag ma re, at Daud en de kembu wirig owag omano indok yalukwag ulug hweag-esebag.

¹³Airoho debagdeg welatfagdeg en, anunuroho welam fug angge nikangge it Filistin enap anyo o Lembah Refaim anyo del daul ulug watfag.

¹⁴Airoho watfag ma re nikangge at Daud en de, Allah en diroho din ulug hweag-nomag, ulug hein debag ma re Allah en onggo hweag-utuk kwit de, “Haren de su fil en it enowarik kwimin ulug duk fug, ite lamihindeg de hwaninggoho foma fil e murbei wilibig fil horogdoho etman enowarik kwik manu.

¹⁵Hat hesanggo hol-hauk men lahe e etma onggombi fil etman ap eratlug eneyog aplohok dap uruk hagdoho duruk halug de, An de it ap Filistin enap sehen foroho on ai enalong elehapdoho feikoho halukwema lauk katmin anggere haroho kwik lakiyug,” ulug hweag-etfag.

¹⁶Airoho hweag-etfag ma re, At Daud anyo Allah en wene melaleg hweag-etfag ale anyo higitdoho debag. At inim autsi sehen foroho on inim en de it Filistin enap sehen foroho on anyo enowatil de o Gibeon on en indip debagdeg de o Gezer huli feik lebag.

¹⁷Airoho debag ma re at Daud unuk anyo di kwe su kwe saha urukmu re, At TUHAN en it ap homi enunggul unuk amu-amu omano en oho Daud fam enakol boruk kamag ulug debesebag.