Read Ninia Yali 1 TAWARIKH 15 Bible Online

1 TAWARIKH 15 - Ninia Yali bible

1 TAWARIKH 15

¹Hun Daud anyo en de o kota ilonggoma omano o onggwareg wereg ma fam witfagdeg de, obale eke re Peti Allah en Sali Wene Wareg yohwareg anyo fahet ulug fouk debebagdeg Peti anyo fahet oho o sabo sale febag.

² Airoho debebagdeg de at Daud en uruk kwit de, “It ap Lewi enap aire Peti ai hambohokeg, At obahet[27] mundoho-mundoho yabuk duruk kaheg, duruk kamag ulug TUHAN en momal-enepsi, anggere it neg Peti TUHAN en Sali Wene Wareg yohwareg angge ai hambohweik lahup,” ulug hweag-esebag

³Airoho hweag-esebagdeg de at Daud en de Peti TUHAN en Sali Wene Wareg yohwareg angge anyo obale buhun-debebag ma etmano feikoho lit de it ap homi Israel on mundoho o Yerusalem kabog-dik wamag ulug wol-enepfag.

⁴Wol-enepfagdeg de at Daud en it Harun ambiangma on mel, Lewi enap mel, anyo oho kabog-diek ulug hweag-esebag.

⁵Airoho hweag-esebag ma re it enunggul unuk Kehat on fam en Lewi enap anyo en de hun Uriel autsi enebe 120 en eyogmaroho inaik watfag.

⁶It enunggul unuk Merari on fam en de hun Asaya autsi enebe 220 en eyogmaroho inaik watfag.

⁷It enunggul unuk Gerson on en de hun Yoel autsi enebe 130 en eyogmaroho inaik watfag.

⁸It enunggul unuk Elsafan on fam en de hun Semaya autsi enebe 200 en eyogmaroho inaik watfag.

⁹It enunggul unuk Hebron on en de hun Eliel autsi enebe 80 en eyogmaroho inaik watfag.

¹⁰It enunggul unuk Usiel on en de hun Aminadab autsi enebe 112 en eyogmaroho inaik watfag.

¹¹Airoho inaik watfag ma re at Daud en de it ap Imam Zadok ha, Abyatar ha, it ap Lewi enap enebe folfalik en angge: hun Uriel, Asaya, Yoel, Semaya, Eliel, Aminadab, inim etano wol-enepfag. Wol-enepfagdeg hweag-esauk kwit de,

¹²“Hit henebere it ap Lewi enap fam etmano en it enebe dotdoho etmano melal-enepuk on enowesi welahep. Ai halug de, hit inim it ap Lewi enap amu on inim de, ap homi Israel on enakni TUHAN Allah anyo en Peti Sali Wene Wareg yohwareg angge anyo walug de an den obale fouk deberihik mu au feik wamuhup en de hit henebe amu eneko fahat dakiyug.

¹³Peti ai keram on anyo fam walug oko feik wamul ulug duruk li anyo re hamboholug waharuk on fahet hit henebe eleg latuhup. Ai fam de nit nenakni At TUHAN Allah anyo en de, niren At enda besi fug aleroho apne wauhukmu unggum og-nesasi anggere,” ulug hweag-esebag.

¹⁴Airoho hweag-esebag ai fam de it Lewi enap mel, it imam enap omano mel, de it ap homi Israel en on enakni TUHAN Allah en Peti Sali Wene Wareg yohwareg angge anyo oko walug feik wamul en ulug de, enebe horoho eneko fahat debag.

¹⁵ Airoho debebagdeg de iren Peti anyo hamboholug feik waharuk kwit de, wene melaleg At TUHAN en Musa fene en hweag-esebag ale higitdoho, iren e fam bearoho enomaloma harulug watfag.

¹⁶At Daud en it Lewi enap enowesi melal-enepuk on omano fam uruk kwit de, ap it enunggul unuk on foma en suni wilibi folug, suni enahayeg fam binggong kecapi mel, simbal mel, kong-duruk kwit watil wamag ulug et miming-enepfag.

¹⁷It suni wilipuk ale unggul enap ai enahain elekwe en de, iren binggong simbal perunggu fam hilinggig on anyo kongdil wamag ulug ap wenaho fesebag on de ap enebe su: Heman hun Yoel amloho anyo ori enunuk de Asaf hun Berekhya mel, Etan hun Kusaya amloho unggul unuk Merari on fam en anyo mel, eta. Iren kong-duruk on anyo ininim lauk kwit binggong kecapi ai ele leko kongduruk on fahet ulug, it Lewi enap en momal-enepfag on de ap enebe su: Zakharia, Yaaziel, Semiramot, Yehiel, Uni, Eliab, Maaseya, Benaya ha eta. It binggong kecapi anyo ele sebeloho hag kong-duruk on ulug it Lewi enap en momale fesebag on de ap enebe su: Matica, Elifele, Mikneya, Azazya, ha it TUHAN obam wirigmu kahaleg latfag on Obed-Edom inim, Yeiel inim etano ha, eta.

²²Hun Kenanya aire binggong kong-duruk ale fahet mun oluk hum ahun deg latfag ma re it enunggul unuk Lewi enap binggong watil lauk on anyo enowe enunggul hagdoho ulug de at unduhuk febag.

²³Ne, it hun Berekhya, Elkana, inim Obed-Edom inim de Peti TUHAN en Sali Wareg Wene yohwareg angge ai kahaleg lamag ulug eneko fesebag. Ne, it Peti anyo alukwe atam bohweap trompet anyo furil lauk kamag ulug eneko fesebag on de eneb su: Sebanya, Yosafat, Netaneel, Amasai, Zakharia, Benaya, Eliezer inim eta fesebag.

²⁵Airoho mundoho fouk debesebagdeg de at Raja Daud mel, it Israel enap enowesi melal-enepuk on mel, it sehen foroho on enowesi perwira omano mel, Peti Sali anyo obahet hum ale duruk kwit hambohoul ulug hun Obed-Edom obam anyo lebag.

²⁶Lebagdeg de it Lewi enap en Peti Sali anyo fanoroho bearulug waharukmu Allah en let-enepfag ma watfagdeg de Allah obahet wam sapi sabiren domba sabiren waroho yal-etfag.

²⁷Airoho duruk li em aire at Daud de asum kain il sako on unuk lenan ai on fam seleben deg angge wandeg latfag, ne, it binggong watil lauk katfag enap mel, hun Kenanya it melal-enepuk katfag ahun ai mel, it Lewi enap mel, oho airoho neg wandeg latfag. At Daud ohore sum efod [28] wan-debag.

²⁸It ap homi Israel en abirangge ohore Peti Sali anyo bearulug o Yerusalem feik waharukmu re enahayeg en amitmit supdoho re bohweap trompet anyo fureheg, nafiri, wareheg, simbal biren angge doleleng deheg, kecapi kongdeheg, dil waharuk katfag.

²⁹Airoho dil watfagdeg de Peti anyo walug o kota bumbukmu walug kwik waharuk li em de at Saul ahaloho hwe Mikhal anyo o jendela husig elekwe il fu hauk men de at Raja Daud anyo ahayeg en de holog dil waharuk katfag. Airoho dil waharukmu re at Mikhal anyo en de ahummu me aperoho fu hebag.