Read Ninia Yali 1 TAWARIKH 16 Bible Online

1 TAWARIKH 16 - Ninia Yali bible

1 TAWARIKH 16

¹Peti Sali anyo re at Daud en o sabo Peti fahet ulug obale buhun-debebag ma anyo feik kwebag. Airoho febagdeg de iren Allah obahet wam TUHAN endama ahayeg howag ulug on mel, wam TUHAN en fanoap nenobahaukwag ulug heng duruk kwit mel, waroho yal-etfag.

²Iren airoho wam omano waroho yalfagdeg de at Daud en TUHAN unuk fam ap homi mundoho enobam fanoap debesebagdeg,

³nauk angge it enebe mundoho anyo fam yohwan-esebag. It ap homi eta welatfag on anyo re enebe domog ap et hwelani et wam lenggareg osoho angge misig inim, roti inim kue kismis inim misig heheg og-esebag.

⁴Airoho debagdeg de at Daud en it ap Lewi en enebe wenako Peti Sali anyo aluluk etan ap homi Israel on enakni TUHAN Allah anyo obahet dukoho suni eheg, mot-deheg durukmu melal-enebukwag ulug unduhuk fesebag.

⁵Unggul hagdohore at hun Asaf unduhuk febag, ne at apma re hun Zakharia unduhuk febag, ne it binggong kecapi anyo watuk kamag ulug de, hun Yeiel, Semiramot, Yehiel, Matica, Eliab, Benaya, Obed-Edom, Yeiel ha unduhuk fesebag. Ne, at Asaf de simbal anyo kweng duruk kamag ulug unduhuk febag.

⁶Ne it imam biren angge, hun Benaya ha, Yahaziel ha re Peti Sali anyo alukwema etan bohweap trompet anyo fururuk kwit neg welamag ulug fesebag.

⁷Kirim-keram at Daud en it hun Asaf ori nim, suni TUHAN mot-duruk suni ukwag ulug unduhuk fesebag on de ai.

⁸Iren suni uruk kwit de, diroho uruk katfag: Nenakni TUHAN dang-diek, hu At ebe humon wereg ale anyo fag-dik lakiek, hu Aren duruk ale etma dindilik lakiek, hu Ap homi enunggul unuk enap wereg kwe etma, hu

⁹TUHAN fahet suni motdeg on neg iek, hu Aren debag angge mun fulu laleg on etma fahet hweag-esa lakiek, hu

¹⁰TUHAN we misik-misig neg on anyo re At neg, hu Nit de At onggwareg angge on welahema henahayeg duruk kamek, hu nit At apne wauk kahe on halug de henahayeg duruk kamek, hu

¹¹At omamne wereg anyo akit heng duruk kamek, hu At hindik-hundig apne wauk kamek, hu

¹²Yaho! Hit Allah amingming angge Yakub anyo ahain elekwe on ai, hu Yaho! hit ap homi Allah en momaleg on Israel ahain elekwe on ai, hu Aren along on duruk katsi on omano wenggel-hauk kamek, hu Aren diroho duruk kamuhup ulug kongdoho isi wene omano henapeleg-am fug, e hu

¹⁴TUHAN aire nit nenakni Allah anyo o, hu Aren wene kongdoho isi on aire o kwenangma suma abirangge fahet e, hu

¹⁵Aren isi abug wene isi wene re mun ebereg wereg Aren sali watsi wene re mundoho-mundoho welaruhu on fahet e, hu

¹⁶ Wene abug aire at Abraham inim watfag e, hu Ai en de Ishak inim watfag e, hu

¹⁷ Ai en de at Yakub inim oho re omamne debebag e hu, Wene abug wat-esebag on aire it ap homi Israel on mundoho fahet welaruhu ulug ebag, hu

¹⁸Abug wene wat-esauk kwit de, “O Kanaan kwenang aire hit og-hesahuk Og-hesahukmu re hit henonggwareg henengge on aruhu,” ulug hweag-esebag.

¹⁹Endam de TUHAN omaliki etma re ap bohon hagdoho o etma welatswa It enebe seberoho re we dorangge neg welatswa

²⁰It enebere ap enunggul unuk eke on weregman de enunggul unuk eke on wereg ma laheg kwit da kuk ya kuk noruk kaheg o ekeman okore o ekema lil noruk kaheg duswa.

²¹ Famen de ap eke en it sebel-enebukwag ulug TUHAN en fotog-esauk katsi fug; It inili okore Aren it enunggul unuk enap wereg on omano enenda kahaloho ulug hweag-esauk katsi,

²²Hweag-esauk kwit de, “Ap homi An den momal dauihik on etma enahap bal-eseheg, diroho suroho ulug oho eke debesouk fug, Nomaliki An nele hweag-esauk on nabi fam oho siag on eke debesouk fug,” ulug hweag-esauk katsi.

²³Hit kwenang abirangge su en TUHAN fahet suni iek, Nukoho hundig-hundig de wene henenda henahayeg on neg fag-dik lauk kamek Aren nit nenahap wendat-nenepsi ulug de.

²⁴At mun along wereg ale anyo ap homi enunggul unuk wereg kwe etma dindilik lakiek, At omaliki fam de, At obabut en fulu laleg ale disi on etma fahet dindilik lakiek.

²⁵At TUHAN aire humon wereg lit mun motdeg ahun wereg anggere; Ap homi en kembu dewa fam enakol boruk aire maben hag famen de At halug de mun alongdoho nenakol boruk kamul.

²⁶It ap homi enunggul unuk amu on en enanggembu dewa etma re we ilirangge ahut wirig angge, Famen de TUHAN neg de bohol koloma wereg angge ai wal-disi ahun

²⁷At ebere anggiluk humon deg ma ambogbag humon wereg, At obam etma re along deg ma enahayeg humon wereg,

²⁸Hit ap homi At omaliki TUHAN mot-diek! At anggiluk wereg ale fahet inim, omamne humon wereg ale fahet inim mot-diek.

²⁹At unuk mun ombagbag wereg on ai neg mot-diek, Wam waroho At obahet yalduk on de walug At obam wirigmu kwiek. TUHAN apne wauk kwit de, sum Allah obahet dukoho wan-duruk on anyo wan-debelug apne wakiek!

³⁰Yaho, Hit ap homi o kwenangma suma welahep on anyo At olohotma en henowag elek duruk kamek! Kwenang mun hambukdoho unduhuk on de elek-felek uk fug alereg.

³¹Hit bohol inim kwenang inim, henahayeg diek! Ap homi enunggul unuk wereg on omano fam hweag-esauk kwit de, TUHAN aire raja wereg ulug hweag-esauk kamek!

³²Ik laut inim, ik laut ahummu wereg angge etma inim henele ahe fun-fun iek. Hit lei inim di angge su angge wilibig angge inim oho henahayeg diek!

³³E ohweimu wilibig on oho e enahayeg duruk kamag, At TUHAN ebe o kwenangma raja wereg lit melal-enepuk karuhu en wahasi anggere.

³⁴ TUHAN aire mun finik-fanoreg ma re dang duruk kamek; Aren enda hundig enepuk on aire mundoho-mundoho welaruhun fahet.

³⁵Hiren uruk kwit de, “Allah nenakni nenahap wendat-nenepuk kahen on, it ap homi enunggul unuk amu on enomamne fam sebel nenesug wereg on fam en ninili og-nenebin, niren Hat hobam dang-hapuk kamuhuk en, niren Hat hunuk mun horeg eneg wereg on anyo mot-duruk kamuhuk en nit nikangge andogdoho misigmu nenobahaik ma,” iek!

³⁶Allah ap homi Israel on enakni ai neg mot-duruk kamek, Ketia en fobik inim mundoho-mundoho mot-duruk kamek! Ulug suni urukmu re, it ap homi Israel on mundoho en uruk kwit de, “Amin” ulug iren TUHAN mot-duruk katfag.

³⁷Airoho debagdeg de at Daud en de it hun Asaf mel, ap Lewi enap fomane mel de Peti TUHAN en Sali Wareg Wene yohwareg wereg on anyo forohoma etma TUHAN apne wauk kwit duruk ale fahet hundig-hundig hwalduk kamag ulug unduhuk fesebag. Airoho fesebag ma re it anyo hundig-hundig etma duruk kwit welatfag.

³⁸It airoho durukmu re at Obed-Edom hun Yedutun amloho anyo inim, ap amu on at unggul unuk kwe on enebe 68 en inim let-enepuk katfag. At Obed-Edom ha, Hosa ha re sokole humon kwik waharukmu on fahet kahaleg welatfag.

³⁹Famen de at Zadok mel, it imam foma mel de, o Gibeon etma TUHAN apne waukmu etma fahet hundig duruk kamag ulug welatfag.

⁴⁰Hubet inim hupmu inim de hundig-hundig waroho TUHAN fahet yaldukmu etmano wam unuk wareg, wene melaleg At TUHAN en it ap homi Israel on og-esebag ale anyo higitdoho waroho yalduk katfag.

⁴¹At Imam Zadok anyo mel, it imam fomane omano mel de, TUHAN en enda hundig enepuk on ai mundoho-mundoho welaruhu ulug, suni TUHAN motdeg suni uruk kamag ulug ai fahet hunduko fesebag on hun Heman mel, Yedutun mel, it ap fomane amu on mel ai en let-enepuk katfag.

⁴²At Heman mel, Yedutun mel, de iren bohweap trompet mel, simbal kweng duruk katfag angge ai mel, binggong amu on mel, suni TUHAN motdeg suni urukmu ai inim watuk kamag ulug fesebag. It enunggul unuk Yedutun on en autsi anyo re sokole log on kwik waharuk kwe omano kahaleg welamag ulug fesebag.

⁴³ Airoho debagdeg it ap homi omano mundoho enobam domog buhulduk kweleg, at Daud ohore at ahain elekwe keroho wereg ma esamin ulug, esa laroho obam lebag.