Read Ninia Yali 1 TAWARIKH 17 Bible Online

1 TAWARIKH 17 - Ninia Yali bible

1 TAWARIKH 17

¹At Raja Daud anyo obam silimu etmano yugdoho wereg lit hebagdeg de, nukoho misig salim de aren ap Allah wene hweag-esauk katfag on Nabi Natan anyo wol-debagdeg hweag-utuk kwit de, “An de nobam sili e lak o Libanon on fam wirigmu wereg kweleg de, e Peti TUHAN en Sali Wene Wareg yohwareg anyo re we o sabo ma wereg angge, furin!” ulug hweag-etfag.

²Airoho hweag-etfag ma re at Natan anyo en onggo uruk kwit de, “Hun log hat hebere TUHAN en let-hapuk karuhu anggere, hun log haren dimin ulug hendama wenggelehen ale aire diyug neg,” ulug hweag-etfag.

³Airoho hweag-etfag famen de hup anyo salim de Allah en Natan fam uruk kwit de,

⁴“Lamihindeg de An namingming angge Daud ai fam de, TUHAN en wene diroho eheik, iyug. O An nobam aire haren wiruhun de fug.

⁵It enunggul unuk Israel enap o Mesir en fiselaroho wilibi feseik waharihik li en ketia huli anggere An o wirigmu eke welahi fug. An de dag watil noruk kwit o sabo saleg kwe neg nohweil noruk kahi.

⁶Ne, An nebe dag watil it ap homi enunggul unuk Israel on nim noruk kwit etma, it ap enowesi melal-enepuk kamag ulug An den momaloho feserihik on etma fam oho eke, o An nobahet e lak o Libanon on fam eke nunggwelug wit-napuk kahep fug? ulug mel hein og-esauk kahi fug.

⁷Aireg ma re Natan, ahwi An namingming angge Daud ai fam de, TUHAN Omamne Humon anyo en diroho eheik iyug, Hat de heyabuk wam domba o leimu hwal-enepuk men og-hapihikdeg An nomaliki it Israel on enobahet raja welamag ulug unduhuk hobaharihik

⁸Hat di kwe su kwe laukmu re An den let-hapuk katihik, ne hat dog yabik laukmu re it haselei on An den mun enowaroho feseruk katihik. Ne, hat de it ap o kwenangma suma melal-enepuk on wereg anyo hagdoho An den mun leho hobahakuk.

⁹It nomaliki Israel on enobahet de, kwenang obale misig eke it enanggwenang atlug ap en mel enele ying-enebuk eleg angge wongdoho welamuhupmu foukdoho feserihik. It o endam kwenang su fam kwik wahausa huli en, nit it enowe raja enemu wereg fug li em inim de, ap mun siag ale neg enenda on en enowarik kwik waharuk katswa. Famen de indip ai on de eke nim aruhu fug. An den de hat haselei on enalong elehapdoho feseheg, hat hahain elekwe on homaliki og-hereheg, duhuk ulug abug wene waroho og-hutuk kahi.

¹¹Fobik en lahe hat waratuk ale aik waruhu, ne hat hebe it hombasi sal-enepuk katswa ma etma sale hobahakupmu re, hat homaliki en ap misig eke raja unduhuk fohuk. Aren neg de o An nobahet wit-nabuhu. Ne, aren raja wereg lit melal-enepuk karuhu mu kerajaan aire An den omamne debehuk, ne mundoho mundoho etma re at ambiangma en ondoho on en eke ap homi melal-enepuk karuhu.

¹³ An den at akni aruhukmu re at de An namloho aruhu. An den abug wene irihik hagdoho, An den at fam fano ale neg deberuk karuhuk. An den at fam abug wene waritihik on aire mun seneg laruhuk, ne hat raja inamag ulug An den at Saul anyo at hwerieg wereg lit hwal-enepukmu anyo en hihiloho embeserihik ai hagdoho duhuk fug.

¹⁴Hat hamloho An den momaluhuk on aire it An nomaliki fahet raja unduhuk fohukmu, at raja wereg lit melal-enepuk karuhu on aire mundoho-mundoho neg welaruhu, ne at omaliki ombasi on ohore en raja wereg lit melal-enepuk kamuhup, eheik ulug hweag-irik lakin,” ulug hweag-etfag.

¹⁵Airoho hweag-etfag ma re at Natan anyo Allah en mundoho enamoho hweag-etfag ale omano mundoho Daud hweag-irik lebag.

¹⁶Airoho hweag-irik lebag ma re at Raja Daud anyo TUHAN Obam Sabo salegma etmano kwik lebagdeg ebe hwerieg wereg lit de, diroho somban ebag, “TUHAN Allah nakni, an inim, an nahain elekwe on inim fam Haren fano ale nit nenobam hundig nenobaharuk kahen on etma re mun hwela fug alereg kweleg famen airoho nenobaharuk kahen nakni.

¹⁷We ai huli neg fugmen de, mun alongdoho Haren an den ondohoma on fobik welamuhup ale fahet angge abug hweag-nerehen. Ne, Haren de an ap lohon[29] enunggul unuk wereg enap fam debeseruk hagdoho nobaharuk kahen.

¹⁸Nakni TUHAN Allah, an den de nunggwe ale eke Hat hobam imin? Haren de an hamingming angge su fahet de mun holuk-boluk deg lirenan leho nobaharuk kahenma.

¹⁹We Hat honggwareg hamu en wenggele folug an nebe fahet wene hum ale etma enameg napuk kahen.

²⁰Hat hamu neg Allah welahen, amu on Hat hinim higit on eke wereg fug. Airoho deg ulug nit nenoluk deg aire, o endamet mundoho hweag-nesausa ma.

²¹O kwenangma suma mundoho re ap homi enunggul unuk it Israel on hag de eke wereg fug. It Israel enap neg de, Hat hamu homaliki amag ulug ap en sebel-enusugmen loloho wilibi feserihin. Haren it fahet hum ale dirihin on mel, along on dirihin on mel, etma fam de Hat hunuk o kwenangma suma leho wereg. Haren de it homaliki o Mesir en loloho wilibi feseik waharihin deg, it Hat homaliki weim yabik lakoho laukmu re it ap homi enunggul unuk amu on omano filigdoho amumu feseruk katihin.

²²It enunggul unuk Israel on aire Haren mundoho-mundoho An nomaliki welamag ulug debeserihin. TUHAN nakni, ne Hat neg de it enakni Allah atihin, nakni.

²³Nakni TUHAN Allah, ketiare Haren an nebe fahet inim, an nahain elekwe on fahet inim abug irihin on anyo mundoho-mundoho fahet omamne debein. Airoho nenobahalug de Haren, Airoho henebuhuk ulug, abug hweag-nesauihin on ai nenepuk kamin, nakni.

²⁴Di kwe su kwe en de Hat hunuk neg leho hobaharuk kwit, iren uruk kwit de, TUHAN Omamne Humon aire, TUHAN it ap homi Israel on fahet wereg on, uruk kamuhup. Mundoho-mundoho fahet de ap an den ondohoma on misig eke en de raja wereg lit melal-enepuk karuhu.

²⁵Nakni Allah, an den nambong seroho somban su hobam uruk kahi aire, Hat hamu en hweag-nutuk kwit, Hat homaliki hombasi on mel de, it ap homi enunggul unuk su fahet raja inatuk kamuhup, ulug hweag-nitihin anyo fam o nakni.

²⁶Nakni Hat TUHAN aire, hebe Allah at o, ne wene mun ebe ale aire, Haren an nobam nolukap deberihin.

²⁷Airoho nobaharihin mu re, an den ondohoma on etma Hat henda hundig enepuk karuhun ale ai enobam atuk mu hauk kwit neg welamagdoho re, an nahain elekwe on fanoap nenobahain. Nakni TUHAN Haren it homaliki mundoho fanoap debeserihin mu re, haren mundoho-mundoho fanoap neg debeseruk karuhun, nakni,” ulug somban ebag.