Read Ninia Yali 1 TAWARIKH 18 Bible Online

1 TAWARIKH 18 - Ninia Yali bible

1 TAWARIKH 18

¹Airoho ebagdeg il eke welatlug en at Raja Daud anyo it Filistin enap mel dog yabik lebagdeg de it enalong elehapdoho folug o kota Gad mel, o sili maseroho etma wereg on mel, delfag.

²Daud en ohore it Moab enap enalong elehapdoho fesebag ma re it at apma sebe ulug wereg lit de o kwenang, di angge su angge onggo at fam feik waharuk katfag.

³Ai en de at Daud en raja o Zoba unduhuk latfag ahun hun Hadadezer anyo o Siria, wilayah Hamat fam etman along elehapdoho febag. Ai salim de at hun Hadadezer aire o wilayah Ik Efrat eleruk fil etmano sebelik lamin ulug kwema lauk men airoho debag.

⁴At Daud en de kereta ap emberimmu lahalug laukmu wam kuda en lisulug lauk kwit dog yapil lauk katfag angge 1.000 en delfag, ne it ap sehen foroho on kuda emberimmu lauk enap de enebe 7.000 en sen-enepfag, ne it sehen foroho enap eneyog fam kwenang kwe lauk katfag on de enebe 20.000 en sen-enepfag. Aren de kuda omano mundoho andeng kongdil lebagdeg de, foma e wirig angge kereta anyo ebe 100 en angge emberimmu lahalug lauk kwit dog yapil lauk on ulug neg febag.

⁵Airoho durukmu re it ap homi Siria on mel, Damsyik on mel en de at Raja Hadadezer anyo let dukwag ulug ap sehen foroho on mon-enebik watfag, famen de at Daud it enebe enalong elehapdoho folug ap enebe 22.000 en enowatfag.

⁶Airoho debesebagdeg de aren it autsi sehen foroho on it ap enowatfag on etma enobam wilayah fam omano wiroho fesebag ma re, it ap etmano Daud autsi enapma sebe ulug onggo Daud akit feik waharuk katfag. At Daud en di kwe su kwe dog yabik laukmu re TUHAN en at alonge foruk neg katfag.

⁷At Hadadezer autsi sehen foroho on en dog ohwalni emas on fam hilinggig angge omano re at Daud en delfagdeg de walug o Yerusalem watfag.

⁸ Ai wauk kwit de, at Daud en de o Tibhat mel, Kun mel, atam kota hun Hadadezer en sebeleg latsi mu etman perunggu humdoho hwelebag. (Aren walug feik watfag angge etma, fobik en de at Salomo en waruk mel, e lahabeg on ulug mel, TUHAN obam wirigmu etmano en wene kabog-duruk kwit duruk angge ulug mel, witfag.)

⁹Airoho durukmu at raja o Mahat on hun Tou anyo esanggo holduk men de at Daud en it Hadadezer autsi sehen foroho on omano mun enalong elehapdoho feseheik, urukmu holfag.

¹⁰Airoho holfagdeg de, atam etma at Raja Hadadezer ai en Raja Tou inim dog yabik lauk katfag ma, aren amloho Yoram anyo at Daud along atfag ale fahet, Aren dang-habeheik, ulug hweag-irik lakin, ulug mondorik watfag. Mondorik watfag ma waharuk kwit de, at Daud halong atihin mu ulug dangdoho re emas, perak, perunggu mel hum-hamdoho at Yoram en walug watfag.

¹¹Walug watfag ma re at Raja Daud anyo en de abirangge omano wene kabog-durukmu en duruk angge ulug TUHAN obahet febag. Ai en di angge su angge emas, perak mel, hun Hadadezer mel, it enunggul unuk amu on aren enalong elehapdoho fesebag ma on, enunggul unuk Edom enap, Moab enap, Amon enap, Filistin enap, Amalek enap, omano fam en delfag on etmano ohore airoho neg TUHAN obahet febag.

¹² Hun Abisai ai (Isinga unuk de Seruya) ai en de it Edom enap o Asin donggo kwe wereg latfag enap omano enebe 18.000 en enalong elehapdoho feselug enowatfag.

¹³Airoho enowatfadeg de it sehen foroho enobam wit-heheg o Edom fam omano feseil lebag. Airoho debag ma re it ap homi omano Daud apma sebe ebag. At Daud en di kwe su kwe weim yabik laukmu re TUHAN en alongap neg deberuk katfag.

¹⁴Airoho at Daud en it ap homi Israel on wereg anyo abirangge melal-enepuk kwit, it ap homi holduk on fam katukdoho debeseheg, fanoroho debeseheg, duruk katmin ulug kahaleg welatfag.

¹⁵It ap enunggul unuk leho on at Daud en unduhuk fesebag enap de enebe su: It sehen foroho on enowe panglima re: Hun Yoab Abisai owe anyo. Raja wereg ma omano fahet sekretaris de: Hun Yosafat Ahilud amloho anyo. Imam welatfag enap de: Zadok hun Ahitub amloho anyo ha, Ahimelekh hun Abyatar amloho anyo ha welatfag. Negara fahet sekretaris welatfag on de: Sausa.[30] At raja along baloho aluluk unduhuk latfag on anyo enowe enunggul hagdoho re: Benaya hun Yoyada amloho anyo. At Daud omaliki re it pemerintah fam omano yabuk leho on neg seneg latfag.