Read Ninia Yali 1 TAWARIKH 19 Bible Online

1 TAWARIKH 19 - Ninia Yali bible

1 TAWARIKH 19

¹Il eke welatlug en de, fobik en at raja Amon ahun Nahas anyo waratfag ma, at amloho Hanun anyo raja inatfag.

²Airoho inatfag ma re at Raja Daud en uruk kwit de, “Nahas aire an nare ninim hundig lit dipdoho neg duruk katsi on anggere, an den oho at amloho Hanun ai fam airoho debehuk,” ulug ebag. Airoho ebagdeg de at Daud en ap yonggo o Amon etmano at Hanun akni waratsi mu ai enda onggonik lowag ulug mon-enepfag.

³Airoho mon-enepfag ma it anyo lebagdeg o Amon etmano aik lebagdeg duruk men de, it o etma melal-enepuk katfag on enowesi omano en hun Raja Hanun anyo fam uruk kwit de, “Nakni haren boruk kwit de, Daud en ap mon-enebik waha on aire aren hat hakni along boruk kwit mon-enebik waha ulug nakni haren ai bouk fug! Aren de nit nenobam au hwelag-kwik waruhuk en ulug, ap inil yenal balik lowag ulug suma mon-enebik waha enap ai,” ulug hweag-etfag.

⁴Airoho hweag-etfag ma re at Raja Hanun anyo en de ap Daud en fat-enepfag on omano sen-enepfagdeg, enombanisong baloho, enasum enaho huli baloho, debebagdeg de henobam lakiek ulug hweag-esebag.

⁵Famen de it enobam lauk ale enenggali en de it etano o Yerikho lebag. Wene atfag ale anyo, Airoho dehesa, ulug Daud hweag-etfag ma esanggo holfagdeg de, at Daud en wene mondotuk kwit de, it ap aire o Yerikho etma weregman enombanisong wilibuhumu neg de wamag, ulug wene mondotfag.

⁶Ai en de it Raja Hanun inim Amon enap inim en de, Niren duruhuk ai fam de Daud en nit nininim nenaselei aha, bebagdeg de, iren de ap o Mesopotamia emberim fil on mel, o Siria en Zoba mel, Maakha mel, fam iren kereta emberimmu lahalug lauk kwit dog yapil lauk katfag angge anyo mel, it sehen foroho enap kuda emberim fam lauk kwit dog yapil lauk katfag enap anyo enebe 32.000 en angge we elamna heng ulug fobik enonggwareg nikangge og-esahuk en ulug de, perak 34.000 kilo en mondotfag. Airoho mondotfag ma re it Maakha enap en sehen foroho enap anyo mel, kereta elamna fahet onggo folug heng-enepfag on omano mel, watfagdeg de o Medeba etma o sabo wiroho nohweik watfag. Ne, it ap Amon enap ohore o kota etmano en mundoho weim yabuhuk ulug watfag.

⁸Airoho watfag ale anyo at Daud esanggo holfagdeg de aren Yoab inim it autsi dog yapuk enap inim anyo dog yabik lakiek, ulug hweag-esebag.

⁹It Amon enap de wilibik watfagdeg de it enobam kota o Raba elehet oho on fam en sokole kwik lauk on fam etano eratfag, ne it ap en raja it let-enepul ulug watfag on omano re o lei kwe etmano eratfag.

¹⁰Airoho eratfag ma re at Yoab en hauk men de it aselei on esan lohwaleg anyo ambol fil et alukwe fil et atuk kwit at bul hukdoho kwelap-atuk mu hebag. Ai fam de aren it Israel on en sehen foroho enap mun hebel-febel enap neg en-enepfagdeg de it Siria enap sehen foroho on anyo inim yabukwag ulug hweag-esebag.

¹¹Ne, it Israel enap sehen foroho on foma alongdoho anyo re, at aut Abisai en erat-eneplug de it Amon enap en sehen foroho enap anyo mel yabukwag ulug og-etfag.

¹²At Yoab en aut fam uruk kwit de, “An it Siria enap sehen foroho on ai inim yabuk fug ale napuk halug de, folo-folo an let-nabik manu, ne an den ohore hat ap Amon enap sehen foroho enap anyo mel abuk fug ale hapuk halug de, an den hat let-habik watmin.

¹³Hebere hambuk hakiyug! Nit de nit nenunggul unuk on fahet inim, o kota Allah obam etma fahet inim apul anggere. We At TUHAN en neg enda ahayeg boruk ale etma neg dukwag,” ulug hweag-etfag.

¹⁴Airoho hweag-etfagdeg de, at Yoab inim autsi sehen foroho on esan anyo inim it Siria enap wereg ma abik kul ulug lauk men de, it Siria enap anyo bupa wilipfag.

¹⁵It Amon enap anyo en hauk men de it Siria enap sehen foroho on anyo wilipukmu hebagdeg, it oho re hun Abisai mel fam wilipfagdeg hihiloho enobam kota neg kwik lebag. At Yoab anyo it ap Amon enap inim weim apfagdeg de o Yerusalem lebag.

¹⁶Airoho lebag ma re it ap homi Siria on en boruk kwit de, nit de ap Israel enap en nenalong elehapdoho nenobahakesa bebag. Ai fam de it enautsi sehen foroho on o Ik Efrat ikman mo lahaik waharuk fil wereg on omano wamag ulug wol-enepfagdeg, hun panglima Sobakh it hun Raja Hadadezer Zoba ahun anyo autsi sehen foroho on etmano enowe ai helaheroho weim yabik lowag ulug mingming-enepfag.

¹⁷It duruk ale anyo Daud esanggoma atfag ma re, Daud en autsi Israel on en sehen foroho on etmano abirangge andog-esalug de, Ik Yordan dahal esalug nindig-atfagdeg de, it Siria enap enalukwema wereg kweleg it anyo lohwalik lebag. Lohwalfagdeg de it anyo weim apuk men de it Siria enap sehen foroho on anyo it Israel enap sehen foroho on omano en enowaroho enambol somban monde-fesebag.

¹⁸At Daud inim it autsi sehen foroho on inim anyo en de, it kereta wirig angge emberimmu lahalug lauk kwit hwaldil lauk katfag on anyo re enebe 7.000 en enowatfag, ne it sehen foroho enap eneyog fam kwenang kwe lauk katfag on anyo re enebe 40.000 en enowatfag. At Sobakh it Siria enap sehen foroho on enowe panglima anyo oho watfag.

¹⁹It en raja hun Hadadezer apma welatfag on etmano en hauk men de, it enebe ap Israel enap sehen foroho on omano en enowatfag ma esebagdeg de, iren de, “Hat Daud hinim seberul deg, hat hapma sebe ulug hat hele holduk kamul,” ulug hweag-etfag. Airoho debagdeg de it Siria enap anyo it Amon enap let-enepuk ale nenerim ulug embesebag.