Read Ninia Yali 1 TAWARIKH 20 Bible Online

1 TAWARIKH 20 - Ninia Yali bible

1 TAWARIKH 20

¹ E alit sobalduk li ombolim on anyo fam de, eta li em de it en raja omano weim abik lauk katfag li re, at Yoab anyo autsi sehen foroho on omano eyogma esebagdeg o Amon anyo hwelag-kwebag. Eta li em de at Raja Daud anyo re ininim la fug angge o Yerusalem bok atfagdeg wereg latfag. At Yoab anyo autsi mel de o kota Raba anyo hwaninggik lebagdeg hukdoho kwelapfagdeg de, o anyo bin kuruk kwit de o kota anyo mun siahap-biahapdoho febag.

²Airoho debebag ma neg de at Daud anyo waharuk kwit de, o kota ai di angge su angge humdoho delfag angge hwelebag. Sum anggen etma sahalimu re at raja Amon ahun anyo kware-kware hag angge mahkota anyo oho welatfag. Mahkota ai anggin de 34 kilo en hag deg ma permata misig eke obam ililig latfag. Airoho ililigmu re at Daud en permata anyo webagdeg de aren on kware-kware mahkota fam borebag.

³Ai en de at Daud en de ap homi o kota Raba ai on omano mundoho feleleng eneplug lebagdeg de, ele omamne fam yabuk gergaji fam inim, keam fam inim, yaha fam inim, duruk kamag ulug hweag-esebag. Ai higitdoho re obabut ai on de o kota Amon fam en amu on omano oho airoho debesebag. Airoho debagdeg de at Daud inim it autsi sehen foroho on omano mundoho inim de enobam Yerusalem watfag.

⁴Anyo airoho debagdeg welatfagdeg de it Filistin enap mel o Gezer omano dog silfag. Weim misig eke fam apuk kwit de hun Sibkhai obam Husa ahun ai en de ap humon owag hweise ahun unuk Sipai ai ware febag. Airoho watfag ma re it Filistin enap anyo fil enalong eleg atfag.

⁵ Weim amu on eke it Filistin enap mel apuk kwit de, Elhanan hun Yair amloho ai en de hun Goliat are unuk Lahmi obam Gat ahun ai watfag. Hun Lahmi en inggisim senetuk katfag fil aire sum yihiruk angge tenun anyo e obahare deg eta hag deg latfag.

⁶Weim amu on eke fam de ap o Gat ahun de ebe owag hweise aireg ahun, enggik sehelet folfalik en eyog sehelet oho folfalik en wilibig ahun welatfag. Hun aire it ap enobahare hum enap enowag yatdeg-batdeg enap o endam etma welatfag enap enambiangma on.

⁷Aren de ap Israel en on alitno enepuk katfag ma re, at ebe hun Yonatan Simea amloho Daud owe anyo en watfag.

⁸Ap enebe henahan at Daud inim it autsi sehen foroho enap anyo inim enowatfag enap etare ap enowag hweise on o Gat welatfag enap etman ondohoma on enowatfag.