Read Ninia Yali 1 TAWARIKH 21 Bible Online

1 TAWARIKH 21 - Ninia Yali bible

1 TAWARIKH 21

¹At Iblis en de it ap homi Israel on alema re fesemin ulug enda bebagdeg, ai fam de aren Daud endama kwelapuk kwit de, ap enunuk lisu balug wenahaukwag ulug debag.

²Ai fam de at Daud en Yoab inim, it autsi sehen foroho on enowesi perwira omano fam hweag-esauk kwit de, “Ap homi Israel on enebe seberoho nunggwe en wereg ai an noluk amagdoho re, hiren ap wenako enunuk lisu baldil de o unggut-unggut etma huli et balik lakiyug,” ulug hweag-esebag.

³Airoho hweag-esebag ma re at Yoab en onggo uruk kwit de, “We At TUHAN en neg, ap homi Israel on ketia wereg on eta horog ha reg famen de, eke inim 100 en neg mangnoroho 100 hagdoho dopno deberuk kamag. Nowe kain, it mundoho etma re hat hapma wereg fug en a? Wereg omano hwi. Nunggwelug niren wenag eneplug lisu balduk kamul? Siag ale dul ai fam de fobik ap homi enunggul unuk abirangge ambiangma hahup lit deg!” ulug hweag-etfag.

⁴Airoho hweag-etfag famen de, at raja de aren diek ulug wene melalfag ale anyo fam seneg latfag ma re, at Yoab anyo it ap homi Israel on wereg kwe omano lebagdeg o unggut-unggut inim mundoho lalug de nikangge sombandoho o Yerusalem watfagdeg,

⁵ap enunuk wenaharuk men ambiangma seberoho atfag ale anyo at Raja Daud fam olukap dik watfag. Wenahabag on ai en ap neg it sehen foroho on omano en duruk ale duruk kam alereg latfag on de enebe 1.100.000 en it ap homi Israel on fam etmano welatfag. Ne, it Yehuda on fam de enebe 470.000 en welatfag.

⁶Famen de it enunggul unuk Lewi on mel, Benyamin on mel, de seberoho wenahabag on ai fam de enunuk kwik lebag fug. At Yoab en de hun raja en dik lakiek ulug hweag-esebag on ai erim bebagdeg de it Lewi on mel, Benyamin on mel, enesahali kwe re wenahabag fug.

⁷Allah en ohore iren ap enunuk lisu baloho wenag-enepfag ale ai fahet erim bebagdeg Aren it ap homi Israel on fam unggum og-esebag.

⁸Airoho og-esebag ma re at Daud en Allah fam somban uruk kwit de, “Allah nakni o, an mun siag dihimu, nasiag hapelehapdoho nobahain, an den dihi ale aire mun morue ale dihimu!” ulug somban ebag.

⁹Airoho somban ebagman de At TUHAN en ap Allah ele hweag-esauk katfag on Nabi Gad, TUHAN dulug Daud dulug at ebe bul wene walug lag-wag uruk katfag on anyo fam uruk kwit de,

¹⁰“Lamihin deg de Daud hweag-utuk kwit de, An den wene indip henahan fam og-hutuk kahi. Anggere haren indip ke on fam momal-damihin halug de, An den ai on at hobahamin, eheik ulug hweag-irik lakin,” ulug hweag-etfag.

¹¹Airoho hweag-etfag ma re at Gad anyo Daud akit lebagdeg de TUHAN en wene diroho iyug ulug hweag-etfag ale anyo hweag-irik lebag. Aren hweag-utuk kwit de, “Hun log haren de ke on momal-damihin:

¹²O suma fam siburu obok tahun henahan hoporoho lahakureg welaruhu on ai fano a, ite nakni hat hebe it haselei on en mug heauk men neg bigalem henahan duhu on ai henda a, ite o suma abirangge fam TUHAN en nukoho henahan fam neg At enggarog hag angge ouk anggolo on Aren yonggo bohol fam en mon-enepuk on omano eke waratuk on walug di kwe su kwe mundoho walug waruhu ai henda a? An den TUHAN fam, Diroho eheik, ulug hweag-itmin anggere haren ketia neg kongdoho in,” ulug hweag-etfag.

¹³Airoho hweag-etfag ma at Daud en onggo uruk kwit de, “Yehei, mun alemat-aikoho lahi! Famen de ap en unggum og-nom hag aire an TUHAN en neg unggum og-nomag o. Aren enda hundig boruk kwit dipdoho duruk ale aire mun hum deg ma re,” ulug hweag-etfag.

¹⁴Airoho ebag ma re At TUHAN en ouk it ap homi Israel on fam mondorik watfag ma re it enesahalimu en ap enebe 70.000 en waratfag.

¹⁵Ai en de TUHAN en malaikat eke o Yerusalem elehapdoho feik lowag ulug mondorik watfag. Famen de at boholma yonggo anyo hun Arauna obam Yebus ahun anyo en gandum anggen loldukmu etano aik watfagdeg duruk men de TUHAN en airoho dik lakin ulug ebag ale anyo ahamdoho re it ap homi enunggul unuk ai enap de unggum enobam femin fug ebag. Aren boholma yonggo anyo fam uruk kwit de, “Mundoho dehen! Mundoho bale fein!” ulug hweag-etfag.

¹⁶At Daud anyo il hauk men de malaikat anyo bohol dulug kwenang dulug koloma bul etma daril noruk kwit karog enggikmu fangdoho, o Yerusalem elehapdoho femin ulug fik-fouk deg ma hebag. Aireg ma hebagdeg de eta li em at Daud mel, it ap homi melal-enepuk on enowesi anyo mel, nit siag durukdeg ulug enenda wat-dauk kwit fong waroho hagdoho ulug sum belahi sum lahabeg latfag angge anyo enelenggen kwenangma dimi-debebagdeg enebe sebe ebag.

¹⁷Airoho debebagdeg at Daud en somban uruk kwit de, “Allah nakni o, an at siag dirihik. An den neg it ap homi enunuk baloho wenag-enebukwag ulug mingming-enepihik. It ap homi enunggul unuk su re siag duswa fug! TUHAN Allah nakni o, we an inim an nahain elekwe on inim unggum og-nesalug de, it Hat homaliki au fam en anggin on ai enobam am no re yatma debein, nakni,” ulug somban ebag.

¹⁸Airoho ebag ma re At Malaikat TUHAN omano at Gad fam Daud hweag-irik lowag ulug hweag-utuk kwit de, “Hun Arauna en gandum anggen loldukmu etma lahaik lalug de TUHAN fahet wam waroho yaldukmu obale etma wiriyug, ulug hweag-umuk,” ulug hweag-etfag ma hweag-irik lebag.

¹⁹Airoho hweag-irik lebag ma re at Daud anyo TUHAN en wene melaleg at Gad fene en hweag-irik lebag on anyo higitdoho lebag.

²⁰Lebagdeg duruk men de, gandum anggen lolduk katfag ma anyo re hun Arauna mel, at omaliki ap enebe ohwan angge mel, gandum anggen lolduk katfag. It airoho lolduk men malaikat anyo inil hebagdeg de, hun Arauna omaliki ohwan etanore buroho herag-aik lebag.

²¹Ne, at Arauna anyo il fu hauk men de at Raja Daud anyo waharukmu hebagdeg de, at ebe Daud akit horog-aik lebagdeg Daud apma sebe ulug mot-debag.

²²Airoho debag ma at Daud en hweag-utuk kwit de, “Ouk anggin on su eleg amagdoho re an obale dia fam TUHAN obahet waroho yaldukmu witmin nenda behi. Anggere kwenang su an nobam onggo balin. Ne, onggo ebe an den nunggwe en og-hitmin ai mel furoho in,” ulug hweag-etfag.

²³Airoho hweag-etfag ma at Arauna anyo en onggo uruk kwit de, “Hun log nakni, we wakin. Ne, nakni haren dimin ulug fano behen ale aire dimihin neg. Sapi waroho yalduk on fahet oho, suma furin, e yalduk on halug ohore gandum anggen lolduk kwit fuk duruk angge suma fam nakni haren yalmihin. An den de mundoho ai og-hirihi angge re nowe haren onggo mel fimihin fug,” ulug hweag-etfag.

²⁴Airoho hweag-etfag man de at Daud en onggo uruk kwit de, “Eleg airoho re fug! An de onggo mun higitdoho fam hundutmin. An den haren hangge deg kweleg oho, ne haren we onggoleg og-nitmihin angge fam oho, TUHAN obahet waroho yalmin fug,” ulug hweag-etfag.

²⁵Airoho hweag-etfagdeg de at Daud en obale etano fahet de hun Arauna fam de uang emas on 600 en fam onggo balfag.

²⁶Airoho balfagdeg de at Daud en etano TUHAN obahet wam waroho yal-utuk mu misig eke witfagdeg, aren wam unuk wareg inim, anggerang owam ulug inim, waroho yalfag. Airoho debebagdeg de aren somban ebag ma, somban ebag on anyo TUHAN en onggo re indok bohol fam en wam waroho yaleg emberimmu anyo belabik watfag ma re, wam waroho yaleg angge anyo mundoho han nebag.

²⁷Airoho nebag ma re At TUHAN en ayonggo noruk on malaikat anyo hweag-utuk kwit de, Henggarog ahonggwa elma nikangge kwelap-dakin, ebag ma, at malaikat anyo en TUHAN en wene melaleg hweag-etfag ale anyo higitdoho debag.

²⁸At Daud en il hauk men de aren wam waroho yalfag on anyo fam TUHAN en at asomban ebag on anyo onggo higitdoho deberukmu hebagdeg de, at Daud en obale waroho yaldukmu anyo eke inim wam waroho yalfag.

²⁹Eta liem de TUHAN Obam Sabo at Musa en o leimu etmano en witfag on anyo inim, wam waroho yaldukmu obale unuk mezbah anyo inim de o Gibeon somban ukoho lit kabog-durukmu etmano wereg kweleg debag.

³⁰Famen de at Daud en de TUHAN en malaikat anyo enggarog fahet akol en de, at ambong seroho Allah fam ele marik la fug angge welatfag.