Read Ninia Yali 1 TAWARIKH 22 Bible Online

1 TAWARIKH 22 - Ninia Yali bible

1 TAWARIKH 22

¹Airoho wereg lit, at Daud en uruk kwit de, “O TUHAN Allah obam aire, obale eiya at wiruhup. Ne, wam waroho yaldukmu ulug wirig angge au fam de it ap homi Israel on en TUHAN obahet wam waroho yal-utuk kamuhup,” ulug hweag-esebag.

²At Raja Daud anyo en mingming-enepuk kwit de, Ap bohon o it ap homi Israel on wereg kwe suma wereg on mundoho kabog-enebiek, ebag ma, kabog-enepfag ma re aren it yabuk duruk kamag ulug kwelap-enepfag. It ap homi ai fomane re o TUHAN Obam anyo wutuk on fahet ulug helep fololduk katfag.

³O ai fahet bosiemanggen inim, ne sok enggik sen angge engsel inim, TUHAN Obam ai sokole humon etano fahet hilinggukwag ulug de, at Daud en bosie on humdoho kabog-debag. Nikale aren de perunggu inim hum-hamdoho kabog-debag ma re anggin fahet ilit duk fug alereg latfag.

⁴It ap homi Sidon mel, Tirus mel, enobam de e lak o Libanon on etmano walug wamag ulug humdoho yonggo febag.

⁵At Daud mundoho etma airoho duruk katfag aire aren diroho wenggel-hauk kwit: “At Salomo en TUHAN Obam wiruhu on aire o ebe hum-ham on wiruhumu, o kwenangma suma en o ai fahet raja welaruhu famen, an namloho Salomo re ebe sauwereg lit di ale su ale duruk ale oho mun kaukdeg, anggere o TUHAN Obam ai wiruhu on fahet de an den at anggolo aruhu angge ai mun fik-fouk debemin,” ulug ai bebagdeg debag. Ai fam de at Daud ebe owam waram fug angge re, aren o wutuk on fahet o angge humdoho mininggi febag.

⁶Airoho debebagdeg de at Daud en de amloho Salomo anyo wol-hebagdeg, watfag ma re, aren o TUHAN Allah ap homi Israel on en apne wauk on ai obam aire diroho wiruhun, ulug wene melale febag.

⁷ At Daud en amloho Salomo fam uruk kwit de, “Namloho, an o endamet angge At TUHAN Allah anyo along bolug leho foruk kwit de, o misig eke At obam wiruhuk ulug nenda boruk katihik.

⁸Famen de, TUHAN en an hweag-nutuk kwit de, Hat de hundig weim yabik lauk kwit, ap humdoho enowatuk kahenma o An nobam aire haren wiruhun fug, ulug hweag-nitsi.

⁹Airoho re hweag-nitsi famen de, Aren abug hweag-nutuk kwit de, diroho hweag-nitsi su: Hat de homalik ap angge misig eke endag-aruhu mu re, ap enaselei on fahet enakol eleg angge wereg lit ap homi melal-enepuk karuhu. Ne, An den de at let durukmu re ap aselei on en oho eke at inim weim yabik waharuk kamuhup fug. Ne, aren ap homi melal-enepuk li aire An den o ap homi Israel on wereg kwe mun enakol eleg angge we fanoroho welamag ulug debehukmu re at aire unuk Salomo[31] soaliyug.

¹⁰Hat hamloho ai en o An nobam ai wiruhu. At ebere An namloho aruhu mu, An at akni aruhuk. At ebe raja hwerieg wereg lit melal-enepuk karuhu on kerajaan aire at ambiangma en ondoho on fam mundoho-mundoho neg welaruhu, ulug hweag-nitsi,” ulug hweag-etfag.

¹¹Airoho hweag-etfagdeg, at Daud en eke inim uruk kwit de, “Ketiare, namloho, we hat hakni TUHAN Allah ai neg let-hapuk kamag. Ne, o TUHAN Obam aire, Aren wene abug isi hagdoho haren demdoho wiruhun lamag.

¹²TUHAN awene melaleg diroho diyug suroho diyug ulug, ebag on anyo higitdoho haren it ap homi Israel on melal-enepuk karuhun en, At hakni TUHAN Allah ai en hat enggare hobahakeg, holuge hobahakeg, duruk kamag.

¹³ Allah awene melaleg diroho diyug suroho diyug, ulug TUHAN en it ap homi Israel on fahet Musa og-etfag on ai mundoho holoho duruk karuhun halug de, haren duruk karuhun on etma ambiangma fano neg atuk karuhu. Hat hebe re hendama hambuk deg lit hambong seroho duruk kamuk. Di on su on alukwema atlug de hakoldoho duruk kam fug.

¹⁴O TUHAN Obam ai fahet de, an mun namururu doho emas de 34.000 ton kabog-deberihik, ne perak de 34.000 ton en dahandoho emberimmu hagdoho kabog-deberihik. Ai en foma amu on de perunggu mel, bosie on mel, de mun wenahauk fug aleroho omano kabog-deberihik. Helep mel, e mel, ohore an den mundoho mininggi ferihik, famen de haren oho foma miningguhun fano.

¹⁵Hat de ap heyabuk wutuk on de humdeg ai. Foma helep watuk on anyo fam wutuk on wereg, foma e fam wutuk on mel, helep fam wutuk on mel, ai en it ap emas, perak, perunggu, mel

¹⁶ai lalduk ale mun enggat enap de humdoho wereg. Anggere folo-folo indip diyug! We At TUHAN en neg hat let heauk kamag,” ulug hweag-etfag.

¹⁷Airoho hweag-etfagdeg de at Daud en de it ap homi Israel on enowesi melal-enepuk on omano en, at Daud let duruk kamag ulug hweag-esebag.

¹⁸Aren it anyo hweag-esauk kwit de, “At henakni TUHAN Allah anyo en de hit henobam welahepma suma henakol eleg angge fanoroho welamag ulug henobahakeg, henebe seberoho welamag ulug henobahakeg, disi ai. Aren de, an den it ap homi enunggul unuk amu on o kwenang su fam welatswa on anyo enalong elehapdoho fesoukwag ulug nobaharuk katsi. Airoho duruk katsi mu re ketiare it anyo hit henapma sebe eheg, TUHAN apma sebe eheg, duruk ai.

¹⁹Anggere, hiren henakni TUHAN Allah fam neg, henenda, henebe mundoho abirangge fam obam neg ebereg lit duruk kamek. Peti TUHAN en Sali wene wareg yohwareg angge anyo mel, somban ukoho wene kabog-duruk kwit duruk angge di angge su angge etmano mel, o wirigmu etma fohup en de, TUHAN Obam ai wutuk ale indip diek,” ulug hweag-esebag.