Read Ninia Yali 1 TAWARIKH 23 Bible Online

1 TAWARIKH 23 - Ninia Yali bible

1 TAWARIKH 23

¹ At Daud anyo mun sobal atfagdeg de, at Salomo anyo it ap homi Israel on fahet raja welamag ulug unduhuk febag.

²At Raja Daud anyo en de it ap homi Israel on enowesi melal-enepuk on mel, it imam mel, it Lewi enap mel, kabog-debesebagdeg,

³aren it Lewi enap en umur 30 tahun en emberim fil deg on neg wenag-enepfag. Airoho wenag-enepuk men de it enebe abirangge re 38.000 en welatfag.

⁴Airoho deg latfag ma re it enebe 24.000 en de TUHAN Obam olma anyo yabuk duruk kamag ulug fesebag, ne it enebe 6.000 en etano re o wene katukdoho baldukmu pengadilan anyo olma etma lisu baleheg, amu-amu on deheg, di angge su angge o ai ilonggoma etman duruk angge omano hwaleheg, duruk kamag ulug fesebag,

⁵ne it enebe 4.000 en de kahaleg lit wereg on fahet fesebag, ne enebe 4.000 en foma eke re binggong watuk fouk debebag on omano fam TUHAN mot-duruk kamag ulug fesebag.

⁶At Daud en de it Lewi enap anyo re esan henahan it enaknisi deg aleroho, Gerson on eke, Kehat on eke, Merari on eke, lohwale fesebag.

⁷Hun Gerson aire omaliki ap enebe biren angge: Nimi Ladan ha, Simei ha.

⁸At Ladan aire omaliki henahan welatfag anggere: Yehiel, Zetam, Yoel ha.

⁹It ap aire it hun Ladan anyo fam en enowesi enunggul hagdoho welatfag enap. (Selomit, Haziel, Haran inim de hun Simei[32] omaliki.)

¹⁰Hun Simei omaliki eta enebe endag-atfag aleroho en de: Yahat, Ziza, Yeus, Beria ha. It Yeus ha, Beria ha en enambiangma ondoho on de enebe dorangge deg latfag, ai fam de it fahet de enunggul unuk misig on hag boruk katfag.

¹²Hun Kehat de omaliki ap enebe ohwan anggere: Nimi Amram, Yizhar, Hebron, Uziel ha.

¹³ Hun Amram aire it Harun inim Musa inim enakni. (At Harun mel, aren ondohoma on mel, de li mundoho-mundoho somban uruk kwit di angge su angge duruk angge etmano hwaleheg, TUHAN obahet amben fano angge yaleheg, TUHAN obahet deheg, TUHAN unuk fam ap homi fanoapdoho feseheg, duruk kamag ulug eneko fesebag.

¹⁴Allah amingming angge hun Musa anyo omaliki re it Lewi enap mel fam misigmu kwelabeg latfag.)

¹⁵At Musa re omaliki enebe biren anggere: Gersom ha, Eliezer ha.

¹⁶Hun Gersom omaliki fahet enowe enunggul hagdoho welatfag on de hun Sebuel ai.

¹⁷At Eliezer de amloho we misig neg welatfag on de unuk Rehabya ai. Famen de at Rehabya neg de omaliki enebe humdoho welatfag.

¹⁸Hun Kehat amloho bireneg on Yizhar anyo re amloho we misig angge re unuk de Selomit ai. At aire it ap homi it enunggul unuk ai fahet kepala suku welatfag.

¹⁹Hun Kehat amloho henahaneg on Hebron anyo en omaliki ap enebe ohwan welatfag anggere: Yeriare wandeba on, ombolim de Amarya ha, Yahaziel ha, Yekameam ha.

²⁰Hun Kehat amloho ohwaneg on Uziel anyo en de omaliki enebe biren welatfag anggere: Mikhare wandeba on, ne ombolim de Yisia.

²¹Hun Merari re omaliki ap enebe biren welatfag on de enunuk de Mahli ha, Musi ha. At Mahli re omaliki ap enebe biren welatfag on de: Eleazar ha, Kis ha,

²²famen de at Eleazar de omalik ap angge eleg angge we ahwelani neg it enakni eke Kis en endag-enusug latfag on enonggwareg enerekwi inim og-og atfag on etma neg endag-enepfagdeg waratfag.

²³Hun Merari amloho bireneg on Musi anyo en de omaliki enebe ap henahan angge re: Mahli ha, Eder ha, Yeremot ha.

²⁴It ap Lewi enap anyo enunuk it endag-atil watfag ale mel, enunggul unuk deg latfag ale mel, muko hundomog baleg welatfag alere ai. It enebe re umur 20 tahun en emberim fil neg atuk mu TUHAN Obam etmano yabuk duruk kamag ulug feseruk katfag.

²⁵At Daud en uruk kwit de, “It ap homi Israel on enakni TUHAN anyo en At omaliki fam enakol eleg angge bok welamag ulug debesesireg, At ebe oho mundoho-mundoho o Yerusalem welaruhu.

²⁶ Ai halug de, TUHAN Obam sabo anyo nim, di angge su angge At obahet duruk kwit, duruk angge etma re it Lewi enap ai en harulug lauk kamuhup hayog,” ulug hweag-esebag.

²⁷At Daud en wene melaleg ele fotogdoho hweag-esebag ale fam de, it Lewi enap mundoho re enebe umur 20 tahun atuk halug de, yabuk duruk kamag ulug enunuk balduk kamuhup.

²⁸ It aire it imam at Harun ambiangma en ondoho on anyo en TUHAN Obam olma etmano yabuk deheg, TUHAN Obam etmano ambe baleg fam inim, o sokole kwik laukmu lilimol balegma etmano hwaleheg, di angge su angge mundoho TUHAN fahet ulug eneko horoho foruk on alemat am no ulug fubi debeheg, durukmu let-enepuk kamuhup.

²⁹Nikangge iren de foma apma su fam oho duruk kamuhup on de: roti TUHAN obahet werako feik waharuk katfag on mel, tepung Allah obahet foukoho lit duruk katfag angge mel, kue sapleho on hag angge fituk angge ragi eleg angge weraho on mel, wam weraho angge mel, tepung e zaitun ahalue mel muninig angge mel, ai fahet duruk kwit hwalduk kamuhup. Iren de ap homi TUHAN Obam o wirigmu obahet feik waharuk on omano anggin ilit deheg, keraleheg, duruk kamuhup.

³⁰Ai duruk kwit en de it aire hubet inim, hup anggo inim hundig TUHAN mot-duruk kwit suni uruk kamuhup.

³¹It ai en neg de nukoho Sabat anyo fam inim, bigalem keron waharukmu mot-duruk kwit inim, nukoho amu on amu on omano fahet kabog-duruk kwit inim, wam lahe werako TUHAN obahet feik waharuk halug oho hwalduk kamuhup. It Lewi enap ai nukoho hundig-hundig yabuk duruk kamuhup ulug on fahet de wene melaloho mun febag. Mundoho-mundoho fahet it Lewi enap aire yabuk ai on neg duruk kamuhup ebag.

³²Eke it yabuk og-esauk kwit de, TUHAN Obam Sabo anyo hwaleheg, TUHAN Obam wirig anyo hwaleheg, it enori hun Harun ambiangma on anyo TUHAN obahet wene kabog-duruk kwit durukmu let-enebeheg, duruk kamuhup, ebag.